واقفة عند المراية تسقم في روحها رايحة تروح للافاك تقرا ... أرواحو نتعرفو على هاد الطفلة المميزة ونتعرفو على حكايتها المميزة كيفها:
بشرى: سلام جيتو؟ دوكا نعرفكم بروحي بالخف قبل ما نروح نقرا : أنا بشرى في عمري 21 سنة نقرا فلافاك هدا العام التالت ديالي ، أنا عايشة في عايلة بزاف شابة ماما وبابا وخاوتي تتعرفو عليهم قاعيتيك منا وجاي ان شاء الله، وعندي تان صحاباتي نحبو بزاف بعضانا تتعرفو عليهم تان بالتفصيل منا وجاي حتى هوما ، علابالكم مكاينش فيهم حتى وحدة عقلها في بلاصتو وانا تان كيما هوما وعلى هادي متفاهمين ههههههه ، وتان عندي راجل يحبني ونحبو انا تان ونحلمو باه نتزوجو ونعيشو قع حياتنا مع بعض ، شوفو نقولكم الصح أنا نحب حياتي بزاف نحس ماناقصني حتى حاجة قع لي نشوفها بلي حاجة تفرح نلقاها عندي في حياتي : عايلة شابة، صحابات مهابل، راجل يحبني ونحبو، عايشة حياتي ، نلبس ، ناكل ، نضحك، نشرب، ندير قع الحاجات لي يعجبوني، نورمالمو ما نسيت والو . ايه ما نسيت والو هادي هي حياتي مكاش حاجة وحدا اخرى ما قلتهالكمش ، حياتي مثالية ياك؟ هادي هي السعادة ياك ؟ وي أنا هكدا نشوف هادي هي السعادة وهادي هي الحياة المثالية! ما نظنش بلي كاين حاجة تقدر تخليني نكون مرتاحة اكتر من هكا وما نظنش بلي تقدر تكون كاينة حياة خير من حياتي!......
شافت في الساعة ولقات بلي راهي روطار ...
بشرى: سامحوني راني روطار كترت بزاف من الهدرة ، لازم نروح دوكا خير ما يحاوزني البروف واعر وتوجور يحاوز لي يدخل روطار ، رانا فلافاك ومازالهم يعاملونا هكدا كيما الدراري رانا مظلومين راكو تشوفو استناو تفكرت هادي : اووو في بلادي ظلموني ..... اووووو...
عاودت شافت في الساعة وتشوكات بسك صح راهي روطار...
بشرى: ياربي بقيت نحكي وداني الوقت راني تع الصح روطار ، دوكا نروح نقول لخويا يديني
بشرى(ببراءة): إسحاق علابالك نتا هو الشباب قع في هادي الدنيا
إسحاق: واش راكي حابة؟
بشرى: أنا ؟ والو ماراني حايبة والو ^_^
إسحاق(يزكر فيها): اوك
بشرى: اديني للافاك الله يحفظك ياخو شوف يا إسحاق راني روطار دوكا يحاوزني البروف و....
إسحاق: مانديكش ، لوكان نديك واش نستفاد؟
بشرى(بالزعاف): نقولك حاجة جامي ماراح نخطبلك أميرة وما نخليهاش تقبل بيك (وجات رايحة)
إسحاق: أميرة؟ استناي وين راح تروحي راني نقصر اووو ما تعرفيش تقصري قع ، هيا نروحو
بشرى: شفت كيفاش ياك قلتلك راك نتا هو الشباب قع في الدنيا
بشرى: شفتو قلتلكم حنا عايلة شابة ^_^
وصلت للافاك ودخلت حتى لقات بلي البروف ماجاش يعني مكاش قراية مالا قعدو هي وصحاباتها أميرة وسندس يحكيو مع بعض حتى تشوف من بعيد اسماعيل جاي ليها ودعت صحاباتها وراحت معاه قعدو مع بعض :
اسماعيل: علاش ماراكيش تقراي
بشرى : ما نقراش اليوم
اسماعيل: مالا زهري شباب
بشرى: ههههه علاش
اسماعيل: بسك جبتلك سوربريز
بشرى: وشنو ؟ صحا وريهالي نشوفها وين راهي السوربريز
اسماعيل: مازال
بشرى: صحا غير قوللي وشي هي
اسماعيل: ما نقولش
بشرى: مي نتا فري صامط ):
اسماعيل: صحا ما تزعفيش دوك نقولك جبت اليوم معايا يما باه تشوفك ، وراهي تستنا فينا برا لافاك باه نروحو لعندها
بشرى(بتوتر): وشنو؟ يماك؟ علاش ما قلتليش اسماعيل مارانيش واجدة باش نقابلها دوكا كيفاش راح نحكي معاها؟ ياربي كيفاش راح ندير؟ لالا اسماعيل امبيوسيبل نقابلها مارانيش واجدة و ديجا لازم.....
اسماعيل: هههههه ما تخافيش يما جونتي رايحة تعجبك ، وديجا راكي هايلة راني سور رايحة تحبك ،
نروحولها ؟ هيا ما تفسديش السوربريز...
بشرى(بخوف): اوك
عند يماة اسماعيل:
قاعدة تستنا فيهم حتى تلقا وليدها جاي ومعاه طفلة عرفتهم بلي هوما :
اسماعيل: رانا جينا يما نشالله ما نكونوش طولنا عليك
بشرى(بخجل): صباح الخير طاطا راكي بخير؟
حكيمة(يماة اسماعيل): صباح الخير يابنتي ، راني مليحة الحمد لله ونتي ؟
بشرى: الحمد لله
حكيمة: راكي شابة الله يحفظك بنتي ، ظهرت تعرف تخير يا وليدي
بشرى: مغسي طاطا
بقاو يحكو بين التلاتة مع بعض ومنبعد راحو لريسطورون فطرو فيها وبقاو يحكو حتى كملو ورجعو لديارهم
بشرى روحت للدار وهي ميتة بالفرحة من الشي لي عاشاتو في هداك اليوم : بدلت قشها و دارت العشا وحكات مع اسماعيل و مع صحاباتها تان ومنبعد راحت لبلاصتها وبقات تكونيكتي بين ما يديها النعاس وترقد ، حتى جات يماها لعندها:
خديجة(يماة بشرى): رقدتي؟
بشرى: لالا ما مازال ما رقدت ماما
خديجة: جيت نحكي معاك في واحد السوجي نحكيو؟
بشرى: وي ماما تفضلي
خديجة:...........................
سلام هدا أول بارت في روايتي نتمنى يكون عجبكم ، ادعموني بالتصويت : (يكون بالضغط على النجمة⭐️في الأسفل🌟) و اكتبولي رايكم في التعليقات ، وتان قولولي توقعاتكم زعما واش تتوقعو يصرا في البارت الجاي ؟ هل راح تتغير نظرة بشرى لحياتها؟ هل كلشي رايح يبقا كيما هو ولا راح يكونو أحداث تان يغيرو مجرى القصة؟ واش تتوقعو خديجة(يماة بشرى) راح تقول لبنتها وفي واش من موضوع راح تحكي معاها؟
أنت تقرأ
من الظلمات إلى النور
Spiritual#من_الظلمات_إلى_النور القصة تدور حول :"بشرى" وهي فتاة جزائرية شابة ، كانت تعيش حياة جميلة في نظرها ، وإذا بحياتها تتغير ب 180° درجة ! ياترى ماهي قصتها؟ وكيف تغيرت حياتها بل وما الذي غيرها؟
