*تجربة أخيرة قبل حضور الضيف 3,2,1
_سيداتي آنساتي سادتي ..
*انتِ بتقدمي خطبة؟ مافيش سادة هنا أساسًا غيري!
_هبدأ من الأول عادي انت معصب نفسك ليه؟ ده مش بث مباشر يعني معانا للصبح نغلط ونعدل.
*مين ده اللي هيفضل معاكي للصبح؟
_ما خلاص يا شكري!! يلا هجرب تاني.
_من حديقة الشِعر والكلمات، نقدمُ لكم...
*حتى المقدمات هنسرقها؟ مش كفاية اسم البرنامج!
_لا لو هتفضل تنط في بوقي كل كلمتين تعالى قدم البرنامج مكاني أحسن!!
*الضيف جه .. ماتتحركيش من مكانك، أنا هطلع مكاني برا وأشاورلك تبدأي الحلقة، أي غلطة تانية هدفنك مكانك بالكرسي اللي انتِ قاعدة عليه.
(موسيقى إذاعية هادئة)
_بكل الحب هنتكلم عن الحب، وبكل الحب هنناقش كل قضايا الحب، وبكل الحب هنتقابل ولمدة ساعتين في "أنا والهجوم وهواك"، معكم على الهواء أسماء منير على 100,6 بطابيط F.M.
_في البرنامج ده هنستضيف في كل حلقة بطل من أبطالنا ونعرف رأيه في موضوع حلقتنا عن الحب، وأكيد هنهاجمه لأن مافيش رIجـ..ـل آرائه كويسة، حسبي الله ونعم الوكيل.
=هو حضرتك مشخصنة الموضوع ليه؟ لو متضايقة من وجودي أنا ممكن أمشي عادي!
_احم.. ماتتكلمش قبل ما أقدمك.
_معنا ومعكم ضيف حلقتنا النهاردة، اللي مش عارفة جاي من أنهي رواية بصراحة بس شكله واقع من نوفيلا ولا قصة قصيرة.. اتفضل عرف الجمهور بنفسك.
=...
_اتفضل! (نظرة أمومية خطيرة)
=كنان عاشور.
_سمعنا ان القريبين منك بيقولولك كونان.
=بالظبط.
_لأ نطلع فاصل يا جماعة مش قادرة..
=في ايه أنا ماقلتش غير اسمي!
(موسيقى إذاعية هادئة)
_قول لي يا كونان، ايه رأيك في...
=لا القريبين مني بينادوني كونان مش أي حد معدي كده، هو حضرتك هتصاحبيني؟
_أنا حاسة اني بتهان وده غير لائق بمذيعة عريقة زيي.. منتچ يا شكري!
(موسيقى إذاعية هادئة)
_قول لي يا كنان، ايه رأيك في العلاقات العاطفية قبل سن ال18؟
=هو أنا الحقيقة مابدعمش العلاقات العاطفية عموما، لا قبل ال18 ولا بعدها.
_ليه يابني كده؟
=مجهود على الفاضي وفي الآخر بتفشل، الشيء الوحيد اللي ممكن أدعمه في حياتي هو انقراض البشرية، ده لولا انه خيال كنت نزلت دمرت الكوكب مع ثانوس.
_هو انت كنت رايح تنتحر وجيت البرنامج غلط؟
=لا لسه جاي من امتحان بس.
_ما علينا.. احنا بس حبينا نبدأ البرنامج بيك عشان انت أصغر الأبطال والمفروض انك فريش كده ولسه في مقتبل العمر!
=لأ نطلع فاصل يا جماعة مش قادر.
_لا إله إلا الله!
(موسيقى إذاعية هادئة)
_الحب بيمثل ايه في حياة كنان عاشور؟
=مكالمة العشر دقايق بين الكلية والنوم.
_ده البسكويت بياخد وقت أكتر من كده في الفرن يابني! لا حول ولا قوة إلا بالله..
=حضرتك أنا ساكن معاها في نفس العمارة ومع ذلك مابقابلهاش إلا صدف، ماتبكيناش على حالنا.
_بس كويس ان فيه حب أصلا في حياتك دي يعني! بلاها السؤال ده، نشوف حاجة تانية.
_طبعا زي ما كلنا عارفين ان الحب بلا أمل هو أسمى معاني الحب، بما انك طالب في كلية طب قدامك وقت لحد ما تتخرج وتتعين وتكون نفسك، هل شايف ان حبك فيه أمل؟
=هو حضرتك بتعايريني؟ تحبي أقطع شراييني قدامك طيب ولا أعمل ايه؟ ده انتِ ست تنحة صحيح!
_منتچ يا شكري واقفل على الحلقة دي عشان العيل ده شكله محتاج يتربى..
=عيل مين؟ أنا ساكت لك من الصبح وانتِ عاملالي فيها لميس الحديدي وماحدش يعرفك غير قرايبك أساسا.. اقفل يا شكري الحلقة!
(موسيقى الفك المفترس)
أنا والهجوم وهواك فقرة رمضانية خفيفة أتمنى تكون أول حلقة منها نجحت في رسم البسمة على وشوشكوا، وانتظروا الحلقة القادمة ان شاء الله❤️
*شخصية كنان من نوفيلا "في حلة المحشي"*
