مرات نكتاشفو بلي الناس اللي حاسبينهم قراب ... عزاز .. احباب .. هم مجرد ممثلين بارعين .. لعبو علينا دور البراءة .. مجرد منافقين ... كي يخلاص صلاحهم .. لا يعرفوك لا تعرفهم ...
رح تتجرح .. تبكي ... تغضب ... تتدمر بمعنى الكلمة
رح تبات الليل تخمم و النهار تحسب ..
رح تكرهم و تكره روحك و حياتك قبلهم
رح تزعف ... ماشي منهم ... لالا .. رح تزعف عليهم بسك معرفوش قيمتك .. و رح تزعف على روحك على ثقة حطيتها في غير محلها
الصراحة انو انا و صلت المرحلة و ليت نشوف العلاقات كيما ال business ... فيه الربح و فيه لخسارة
يقدر المشروع تاعك ( العلاقة ) تطورك .. ترجعك رائع ... توصلك للفوق ..
و قادر المشروع تاعك من اول مرة يطيح لانو ماشي مليح
و قادر المشروع تاعك يبدا مليح و تبدا تشوف الارباح .. تبظا تشوف النجاح .. ثم في لحظة ...
بوووووم .. ترجع لنقطو الصفر . .
شفتو المشروع الاول. هو العلاقة الصحية .. العلاقة اللي تبانات بأساس مليح .. تقولولي ماهو الاساس ؟؟ نقولللكم كملو اقراو و تعرفوه 👇🏻👇🏻
المشروح التاني هو العلاقة اللي ماشي متجانسة اساسا ... وعلاه لانو مكاش اساس اصلا .. لانو هاد الانسان لا يشبهنا .. بلاصتنا ماشي معاه ... منقدروش نشوفو روحنا معاه... Tout simplement رح يعيينا برك
المشروح الثالث. و هذا الاصعب .. هو العلاقة اللي تبانلك صحية من اول نظرة ... و لكن اساسها مكانش قوي ... كان اساس هش ... رح تعيشك النجاح .. رح توصلك لسابع سماء و في لحظة تهبطك لأسفل السافلين
دوكا نهدرو على الاساس ... نقريلكم الفكرة علميا اولا و لا نقولو هندسيا .. اللي قرا هندسة معمارية كانت او مدنية ... يعرف باي اهم حاجة في البناء هيا الاساس المتين ... لانو كل مكان اساسنا متين .. بناءنا رح يكون رائع
صحا نفهمكم كتر ...
كاين بيوت تلقاوهم شابين من براااا .. شابين بزااف. مع اول هزة ريح .. بوووم طاح البيت .. و راح الغالي .. هادي العلاقة الثالثة .. عايش في بيت جميل شكلا فقط .. و المضمون 0
وش حبيت نقول من هدرتي .. لما نحب تدخل في علاقة .. مهما كان نوعها .. حب .. صداقة .. زواج
جيب ورثة و قلم ... و ادرس الشخص هداك .. يناسبني ؟؟, عقلياتنا يتافقو ؟ .. حط احتمالات تاوعك .. احتمال المضي في العلاقة .. احتمال انو ما تنجحوش مع بعض . و اهم حاجة اتعامل بصدق ... بدون نفاق .. بسك يضيعو كلش
الاساس اللي حكيت عليه ... الصدق .. الحب ... الراحة النفسية .. الامان .. الونس .. السند
نهار تحس بهاد الحاجات انت مع الشخص الصح ...
لان الحب .. هو امان. هو سند.... هو صديق
و النصيحة اللي لازم نقولها :
Ih you have ability to love .. love your self first
احب نفسك اولا و سيحبك الجميع
احبكم في الله
صحا سحوركم
