قصة مثلي مغربي

أنا طرحت سؤال: بغيت نسولك واش نتا لي ختاريتي تكون مثلي ولا كيفاش ؟
قلتي واش ختاريتها، تخيل معايا ا صديقي ، من نهار كانت عندي 16 عام عرفت راسي ماشي بحال گاع الناس، لقيت راسي كاننجاذب لكولشي، وبحكم كنت أكثر شخص متأثر بالدين الإسلامي، معروف عليا ملتزم لدرجة لا تقاس، مكاين غي الجامع والقرآن، كنت كل عام كانختم القرآن من نهار كانت عندي 8 سنين، وفكل رمضان كانختمو تاني، من نهار ولات عندي 8 سنين ما خليت صلاتي (ليومنا هذا) ولكن فاش وصلت ل 16 عام لقيت راسي طايح فواحد المتاهة لي خلاتني نعيش متناقض لهاد اللحظة فاش كاندوي معك، كنت كل رمضان كاندعي بالليل وبالنهار ، كاندعي الله يبعد عليا هاد الميول لي كيختالف على ديني، كنت كاندعي وأنا كانبكي، من أعماق قلبي... داز رمضان الأول ، والو الميول بقات هيا هيا، قلت يمكن غير حيت أنا مامتاقيش الله بزاف وحيت كانسمع الموسيقى اللي هي حرام ولا حيت كانسلم مع البنات واللي حتى هي حرام، صافي قررت نمسح گاع الأغاني ومانبقاش نسلم على البنات، داكشي لي درت، زدت اجتهادي فالدين وبقيت كل نهار كانطلب فربي يستاجب لي، جا رمضان آخر ديال 2018 وبديت تاني كل نهار القرآن والعبادة والطليب والرغيب فالله عز وجل، الشيء الأكثر محطم هو أنني كنت بحال شي ... بحال شي حماق، كنت كاندعي بالليل وبالنهار وكانبكي فكل لحظة لدرجة مالين الدار حسو بيا ومعارفينش مالي ديما مقلق، داز رمضان بدون نتيجة، هنا دخلت فاكتئاب حاد، مابقيتش كانخرج من الدار، بقيت غي ساد عليا ، بعض المرات كنت كانخرج ونمشي حدا البحر، وأقسم لك بالله الى كنت كانفكر نتلاح من واحد البلاصة عالية كاينة تما حدا البحر.. كرهت راسي وكرهت هاد الميول.. فلخر فكرت وعاودت فكرت ولقيت ان الموت ماشي حل، تواصلت مع دكتور نفسي.. درت شحال من حاجة والو الميول بقا هوا هوا..
ليومنا هذا بعض المرات كانبقى گالس فبلاصتي ومكانهضرش، أنا طبيعتي ماشي هاكا، أنا عاقل على راسي قبل 16 عام كنت كانهضر مع بنادم وكانهضر بكل طلاقة، دابا يهضر معايا شي واحد على غفلة تقدر تجلى ليا الهضرة بسبب داك قوة التفكير وداك الاكتئاب لي كيشدني مرة مرة..
كانشوف أن الحل هو التصالح مع الذات، ولكن صعيبة بزاف.. صعيب تصالح مع ذاتك فاش كاتنوض فمجتمع او فمحيط متخلف ..
القصة ديالي طويلة بزاف مع هاد الملاوي د الميولات الجنسية ، حاولت نلخص ليك
رغم ذلك عمرني مارست مع شي دري.. حيت باقي ماختاريت طريقي، باقي مسلم، ومابغيتش ندير شي حاجة ماترضيش خالقي..
ولكن الشيء لي كيخليك تتحطم هو أنك طلبتيه عام عامين تلت سنين 4 سنين 5 سنين والو وتقول غير مكاينش
ولو استجابة بسيطة
عييت معه مابغاش يشوف من حالي..