_نور بعتالك ده..كارت دعوة على فرحها هي وفارس
اخدت علياء منها الكارت بإبتسامه ساخره وحزينه
_هي وصلت بيهم البجاحه للدرجادي!
ريم بنبرة حزينه
_صدقيني فارس بيعمل كده علشان ينقذني من شرها..فارس ملوش ذنب في اي حاجه
علياء بعدم اهتمام مصطنع
_صدقيني مبقاش يفرق معايا..ربنا يهنيهم وكده كده انا هطلق من اخوكي برضاه او غضب عنه وكفاية قلة قيمة لحد كده
_هتتنازلي عنه وعن حبكم بالسهولة دي
_عايزاني اعمل ايه يعني..اروح اقوله متتجوزش ابوس ايدك!
هو اللي اتخلى عني وطلعني من حياته ومرضاش يحكيلي ايه اللي بيحصل معاه وسابني عايشه في حيرتي وشكوكي
وانا خلاص مبقتش قادرة استحمل اكتر من كده واحسن حل لينا الطلاق
_روحي اتكلمي معاه لآخر مره.. هو بيعمل كده علش..
قاطعتها علياء بحده
_مش عايزة اعرف حاجه يا ريم لو سمحتي
ايا كان السبب مش من حقه يتجوز عليا
بعد اذنك
قفلت الباب في وشها ومشيت ريم وهي حاسه بالندم وبتأنيب الضمير لأنها السبب في تدمير علاقتهم
وقعدت علياء عالأرض بإنهيار وبكاء وهي مش مصدقه انه قدر يعمل فيها كده ويتجوز عليها
_هدفعك تمن كل ده يافارس...هدفعك تمن حرقة قلبي ودموعي اللي مبقتش تنشف بسببك
___________________
قبل الفرح بيوم فارس كان واقف في مول مع نور اللي مشغوله في اختيار لبس ليها
_الشقه دلوقت فاضيه اطلع بسرعه
_يابني آدم عايز تحولني من ظابط محترم لهجام
_سراج متعصبنيش..انجز واخلص انا عاصر على نفسي شوال لمون ومستحمل اني اخرج معاها ف انجز
_طيب يافارس لما نشوف اخرتها معاك
_اطلع وانا معاك عالتليفون اهو
_بس على فكرة عماد المرشدي مش بالغباء اللي يخلي ورق زي ده في بيته
_ياسيدي حاول انت بس تتصرف وتجيب اللاب توب بتاعها وتمسح من عليه كل حاجه الاول لأن ده الاهم
_ماشي..اقفل طيب دلوقت وهتصل بيك تاني علشان اعرف ادور براحتي
طلع سراج البيت وفتحه بسهوله بأداة معاه
ودخل وفضل يدور على اللاب لحد ما لقاه ومسح كل البيانات اللي عليه
ودور على ورق يخص عماد في كل حته وملاقاش
نفخ بضيق وقرر انه يطلع من البيت لكن لفت انتباهه برواز متعلق على الحيطه بطريقة غريبه
قرب من عليه وشاله لقى وراه خزنه...ابتسم بخبث
_يا ابن القديمه يا عماد يامرشدي
حاول يفتح الخزنة لحد ما اخيرا فتحها ولقى فيها الورق اللي عايزه فارس ومعاه ورق تاني خلاه يبرق عنيه بصدمة وزهول
_________________________
يوم الفرح
كان معظم رجال الاعمال واكبر تجار في البلد موجودين
وفارس كان واقف مستني نور تنزل هي وابوها
وواقف جنبه سراج وكانوا بيبتسموا بمكر وخبث لبعض
_هياخدوا اكبر خازوق في حياتهم دلوقت
_يستاهلوا.. الاتنين طلعوا اقذر من بعض وفضيحتهم هتبقى بجلاجل
_ولاد حلال ويستاهلوا كل خير
بس انت متأكد يافارس من الخطوه دي
بصلوا واتكلم بقسوة
_طبعا..اللي عملوه مش شوية وده اقل عقاب ليهم..انا عايزها تيجي علشان ننفذ اللي اتفقنا عليه واخلص بقا من الحوار ده واروح لمراتي اصال....علياء!
قالها فارس بصدمه وهو شايف علياء واقفه وبتراقبه من بعيد بكره ودموع
قرب ناحيتها بسرعه وسحب ايديها وطلع من القاعه واتكلم بسعادة
_كويس انك جيتي علشان تشوفي اللي هيحصل فيهم دلوقت
_طلقني
قالتها علياء بكره وقسوة
رد فارس بهدوء
_علياء اهدي وافهمي انا عملت كل ده ليه الاول..انا كنت عامل خطه عليهم علشان اخلص منهم والنهاردة هفضحهم قدام ال..
_بقولك طلقني مش عايزة اسمع منك حاجه..انت كداب..انت لسه بتبرر!
لابس بدلة فرحكم وكمان بتبرر ده غير صوركم على الانستجرام امبارح وانتوا خارجين مع بعض.. لسه هتكدب عليا وتغفلني برضو..فيه حد بيكره حد يخرج معاه ويتصور كمان
_اوكي..انا عارف اني غلطت اني محكتلكيش حاجه عن اللي بعمله لكن صدقيني انا كنت بحميكي وبخليكي بعيدة عنهم وعن شرهم
انتِ متعرفيش هما طلعوا ايه دول..
قاطعته وهي بتطلع سكي.نة من شنطتها وبتحطها على رقبتها بإنهيار وبكاء وبتتكلم بصراخ
_طلقني يافارس...قسما بالله لو ما طلقتني همو.ت نفسي...طلقنيي
_انتِ طالق
قالها بصراخ وخوف وهو شايفها بدأت تعو.ر نفسها
يتبع...
(انتقام_عاشقه)١٥
هيبدأ انتقام علياء منه
تفتكروا فارس يستاهل ده لأنه محكلهاش عن حاجه
ولا علياء اتسرعت واتصرفت بغباء
تفاعل حلو بقا
وسوري عن التأخير🥺♥️
#سلمى_تامر
#انتقام_عاشقة
