• Wave to Earth - Seasons
နွေရာသီတစ်ခုမှာ စတွေ့ခဲ့တာ။ မျက်ဝန်းတောက်တောက်လေးတွေကြားမှာ ဂီတာတီးနေခဲ့တဲ့ အဖြူရောင်လေးကို။ နွေရာသီရဲ့ ဖရဲသီးစိတ်လေးလိုမျိုး အေးမြတဲ့ ထိုကောင်လေးကိုလေ။ နွေရာသီတစ်ခုရဲ့အလယ်မှာ စတွေ့ခဲ့တာပဲ ဖြစ်တယ်။
___
မိဘမဲ့ဂေဟာတစ်ခုမှ အကူလုပ်ပေးဖို့ လိုက်သွားတဲ့နေ့ကဖြစ်တယ်ထင်ပါရဲ့။ ကလေးတွေရဲ့ အလယ်မှာ ဂီတာတီးပြီး သီချင်းဆိုပြနေတဲ့ ထိုအမျိုးသားငယ်ဟာလေ စတွေ့ကတည်းက အရာရာကို အပိုင်စားပေးလိုက်ချင်စရာ ကောင်းနေခဲ့တာ။
Daniel Caesar ရဲ့ Best Partသီချင်းကို ဂျောင်ဟျွန်းကောင်းကောင်းသိတယ်။ သူကိုယ်တိုင်လည်း အခေါက်ပေါင်းများစွာ နားထောင်ခဲ့ဖူးတာဖြစ်သည်။
သီချင်းတစ်ကြောင်းဆုံးတိုင်း သွားညီညီလေးတွေပေါ်တဲ့အထိပြုံးပြတတ်တဲ့ လူမျိုးခြားကောင်လေးက နွေရာသီရဲ့ အေးမြတဲ့ ဖရဲသီးစိတ်ကလေးလို ဖြစ်တည်မှုလေး။ အသံ ခပ်ရှရှဟာလည်း ထပ်တလဲလဲ ကြားယောင်နေမိစေတဲ့အထိ ညှို့အားပြင်းလှသည်။ ပြီးတော့ သူဟာလေ ရွှေရောင်ဆံနွယ်တွေနဲ့ရယ်။
" If Life is a movie, then you're the best part "
" ကိုကိုချွမ်ရွေ့ကအရမ်းတော် ! "
သီချင်းဆုံးသွားသည့် ဂီတာခတ်သံလေးအပြီး အရှေ့ဆုံးကသွားကျိုးကလေးရဲ့ မပီကလာစကားသံလေးကြားတဲ့အခါ ထိုကောင်လေးက စိတ်လိုလက်ရ ထပ်ရယ်ပြန်သည်။
သူမသိလေသရော့လား၊ ဖရဲသီးစိတ်အေးအေးလေးတွေကြောင့် နွေရာသီရဲ့ အပူဟာ နှစ်ဆလောက်ထိုးကျသွားခဲ့တာကိုလေ။
မျက်ခုံးပေါ်ထိ ဝဲကျနေတဲ့ ရွှေရောင်ဆံနွယ်တွေအောက်က အကြည့်တစ်စုံနဲ့ ဆုံမိသည့်တိုင်အောင် ဂျောင်ဟျွန်းက မလှုပ်မရှားရပ်နေမိတုန်း။
ကလေးတွေရဲ့ နောက်မှာရပ်နေတဲ့ ဂျောင်ဟျွန်းကိုစိုက်ကြည့်လာတဲ့ မျက်လုံးတွေက ရှင်းရှင်းလင်းလင်းနဲ့ တောက်တောက်ပပလေးရယ်။
" ချွမ်ရွေ့ သွားနားတော့လေ။ ကလေးတွေလည်း တော်တော့နော်။ မင်းတို့ကိုကိုက သဘောကောင်းတိုင်း သီချင်းထပ်တောင်းမနေကြနဲ့တော့။ ချွမ်ရွေ့ လက်ထိပ်လေးတွေတောင် နီနေပြီတွေ့လား။ "
