#ملائكه_بألف_وجه15
الساعه 11 في الليل والأجواء كانت تجيب الاكتئاب
درجة الحرارة مرتفعه والضي مره يجي و10 لا
الحزن كان مخيم على القصر بكبره
غرفة كانت هاديه كأنه صاحبها يستعيد في ذكريات اليوم وهوا ساكت بدون حس
✨✨✨✨✨✨✨✨✨✨✨✨✨✨✨✨✨✨✨✨✨✨
كان المشهد كأنه فيلم
قاعة المحكمة والهدوء يلي صاير يوتر الاعصاب
نضرات القاضي ليهم كأنه يلوم فيهم على اختيارهم بس كانو متجاهلين كل الضغط يلي صاير حواليهم كأنهم متأكدين ان يلي رح يصير من مصلحتهم الاثنين
شاف القاضي لعيونها وسألها بحدة........شنو اسباب طلبك لي الطلاق يا بنتي؟
ريحانه:قامت عيونها والقوة موجوده فيهم زي العاده .....اولا القرار هادا ياسيادة القاضي الاثنين اتخدناه مع بعض
يعني مش انا يلي طلبته
النصيب كمل بينا والاثنين عازمين على قرارنا ولا رجعة فيه
مفيش تفاهم ولا استيعاب لبعض والاهم مفيش الشي يلي يخلينا نستمرو مع بعض
القاضي:قام حاجبه وسأل بي فضول ........شنو الشي هادا ؟!
ريحانه:الحب ........مفيش
القاضي:سكت وهوا يكتب في كدا سطر على الورقه يلي كانت قدامه
ونصر وريحانه كل حد عيونه في اتجاه
ريحانه:رجعت من ذكرياتها وحطت راسها على المخده
جت عينها على الكميدينو وشافت ورقة طلاقها يلي حصلتها بدون تعب وتنهدت بحزن
كانت جدا حزينه مش بسبب طلاقها لا
كانت حزينه بسبب سنها يلي تعرض لي الف حاجه قبل وقته
زواج وبيبي وطلاق هادا كله وهيا قاعده مسكرتش ال18 السنه
كانت حزينه ان طول ها الوقت مش فاهمه ولا واخده بالها ان كل امورها ممكن تنحل مجرد انها تتقرب من ربي
انها افتخرت بي الذنب يلي دراته بدل ما تستغفر واثوب
اما الغرفه الثانيه كانت ابدا مفيهاش ولا ذرة هدوء
الاصوات فيها كانت جدا عالية بين جميلة وسمير وكل واحد محمل الثاني ذني يلي صلير لي ريحانه
الاب محمل الام نتيجة التربيه الغلط
والام محملة الاب نتيجة انه معرفش يحل مشكلة بنته كويس
والاثنين كان خوفهم من نفس الشي
منو رح يفكر ياخد ريحانه وهيا مطلقه وفضيحة انها جابت بيبي بي الحرام على كل لسان ؟؟
_______________________________
الجو كان يضايق اي شخص حتى لو ان جوه مليح
معروفه درجة الحراره تسبب في هلبا حاجات غلط من ضمنها تعكيرت المزاج والتسرع في اختيار القرارات
زي قرار يزن يلي عرضه على نجمه مثلا!!!!
على حاشية الطريق كان يزن مقعمز وسارح
يفكر هل القرار يلي خديته كان غلط من بدايته ؟
به ردها هيا شن قصدها بيه ؟
وخداته الذكريات للحوار يلي دار بينهم
✨✨✨✨✨✨✨✨✨✨✨✨✨✨✨✨✨✨✨✨✨
نجمه:ضحكت بتوتر ........شنو العرض الغريب هادا ؟
يزن:تكلم بصرامه وحزم واضحه .......الزواج والحلال بدي شي غريب ولا كيف؟
نجمه:لا مش هكي بس
يزن:بس شنو ؟
نجمه:اختفت الابتسامه يلي كانت على وجها وتكلمت بجدية.......شنو في بينا باش تعرض عليا الزواج ؟
يزن:عقد حواجبه بعدم فهم .....كيف؟
نجمه:مفيش بينا حب يزن
ولا حتى احترام باش نوافق عليك ونكون اسرة معاك
يزن:كلام فارغ هادا
انتي بنت خالتي وقعدتك بروحك هنايا غلط
لازم تتزوجي وتنستري
نجمه:اي وباش ننستر ناخد شخص مفيش بيني وبينه اي توافق ولا مشاعر ولا حتى معزه
شوف يزن
واضح انك راجل تربيت على التقاليد والعادات وهادا شي مش سيئ بي العكس حلو
لكن اكيد عندك ناس في عيلتك متزوجين ومكملين عشان صغارهم بس
لان ببساطه مفيش بينهم ابسط مقومات الزواج لا حب ولا موده ولا احترام ورح يربو اطفال يكبرو ويفكرو ان الزواج شي عادي الغرض منه نجيبو اطفال بس
يزن:شنو الملخص من المحاضره هيا كلها ؟
نجمه:ابتسمت ........كنت عارفه انك مش رح تفهم شي من كلامي
انا مش موافقه يزن
ومش فرض عليك تتزوج بنت خالتك عشان تنقدها من وحدتها او من كلام الناس
لازن لما تتزوج تاخد وحده يفز قلبك لما تشوفها
مطيقش فراقها
وكان تلقى تقضي عمرك كله معاها
الحب يلي في قلبك وقتها هوا يلي رح يخليك تسامحها وتحترمها وتكون سند ليها
يزن:سمع كل ها الكلام وطلع بدون ما يرد كلمه
