امطري ياخيبة كبار الهقاوي .. وارعديّ

P20

تجهزت اصيل وطلعت لبيت الجد الي فيه العزاء
وهي طالعه شافت بتال بالمطبخ نهاية الحوش ناظرت حولها وتأكدت ان مافي احد وراحت له
كان جالس يسن سكاكين ذبايح العزاء وعيونه حمراء من الارهاق والسهر والتعب وشايل بقلبه غضب كبيير على كل احد وكل شيء ف ماكان بيده الا انه يطلع هذا الغضب بسَن السكاكين
اصيل بهدوء: عظم الله اجرك بتال
ناظرها بحده بعيون ذبلانه وكمل شغله
تنهدت اصيل وهي عارفه وش ورا هالحده والكتمان وتأكدت انه لازم يفرغ هذا الحزن
نزلت له وحضنته رغم ان كل شيء يقول لا لكن هالمره قلبها الي قال ايه
اول ماوصلته ريحتها واستقر بحضنها غمض عيونه وتنهد بدون مايبادلها الحضن وبعد دقيقه رما السكين من يده حضنها وبدت تنزل دموعه بهدووء
اول ماحست اصيل بدموعه حضنته اقوى الى ان تحولت الدموع لشهقات مكتومه
اصيل دموعها نزلت معاه: اعرف قد ايش الفقد مؤذي بس برضو اعرف اننا قادرين نكمل لأن هذي ارادة ربنا
بتال وسط انهياره بحضنها: انا الي قلت له يجي هناك! انا الي جنييت عليه
اصيل: لا يابتال مو ذنبك كان ربي بياخذ امانته وين ماكان
بتال: ماأسعفه الوقت يقول لي الكلام الي بيقوله حتى
بدأ يرتفع صوته بغضب من نفسه وقال: هوو كان يبيي شيء كاان جااي يقووله
تركته اصيل يتكلم براحته وهي كل شوي تشده لها وتمسح على ظهره
بعد ماأنهار بأنه السبب وهو الي قال له يجي هالمكان وتساؤلاته عن الشيء الي كان يقوله
هدأ بتعب وبدأت تبان تخبطاته وقال بصوت يترنح: ابي ارجع نفس المكان يمكن يكون كل هذا كابوس
استجمعت اصيل قوتها وقالت: لا مو كابوس، وهذا اليوم الي قدّر انه يتوفى فيه زي ماتقدّر لنا كلنا ايام محدده .. يحق لنا نزعل ونبكي وننهار كلنا بس مانسخط على اقدار الله
سكت بتال وارتخى بحضنها
اصيل: مو صح الي تسويه بنفسك، شوف كيف وجهك مرهق وتعبان انت مانمت من امس ولا اكلت كيف تبي تقويهم وانت كذا؟
تنهد بتال: كل مااغمض عيوني اشوف الحادث
اصيل: بعطيك دواء ينومك
هز بتال راسه بنفي: لازم اكون معهم
اصيل: بيتنا مافيه احد ادخل نام ساعتين واصحيك وعد
بتال: لاتضغطين علي، اتركيني ارتاح بحضنك شوي وبقوم بخير لاتشيلين همي
تنهدت اصيل وفعلًا تركته بحضنها وجلست تلعب بشعره وهذا اول تصرف منها لبتّال يكون حقيقي لأول مره تقدم له شيء وهي فعلًا تعنيه
بعد دقايق تنهد ورفع راسه مسح دموعه: انا لازم اروح لهم
اصيل: تمام انا تأخرت هنا اصلا بدخل
ابتسم بتال بتكلف: انتبهي لنفسك
قالت وهي طالعه: بنتظرك تنتبه علي
سند ظهره على الجدار حس انه اخيرًا تنفس رما السكين وطلع للمجلس وريحة اصيل باقي عالقه فيه او بذهنه تحديدًا

دخلت اصيل المجلس وعزّتهم كلهم وجلست
وحده من قريباتهم استغربت وجود اصيل لانهم مايعرفونها: انتِ من اعمام المتوفي؟
اصيل: لا
الضيفه بأستغراب: اجل مين انتي
اصيل: انا بنت سيف
الضيفه ناظرتها من فوف لتحت: انتي بنت نورة؟
اصيل بنبره حاده: انا بنت سيف ونورة
استحقرتها الضيفه بنظراتها ولفت عنها
اصيل بصوت شبه مسموع للي حولها: عما
نزلت ليان راسها وضحكت ضحكه مكتومه من عصبية اصيل رغم ان ماااكان لها خلق
لين خزتها: خير وش يضحكك مب وقته
ليان حطت يدها على فمها: اصيل تهاوشت مع ام مهند
لين: تستاهل ملقوفه اكيد حاشره نفسها بشيء
مهره خزتهم من بعيد عشان يحترمون حزن عمتهم ومايضحكون حولها