شفيق / غيم اهنا! 🥸،
مجرد بارت زغيرون عجبني انشره.
الرواية عنيفة درجة اولى، اكو تفاصيل وشغلات يجوز
ما تستلطفوها بعدين فيلي مايحب هالشي لايقراها ويتعب نفسه
بحچي مايقدم ولايأخر، مراح اتراجع عن الكتابة بيها واذا ماناسبت
اذواق بعضكم ومنتظرين مني رواية اوعدكم بتعويضكم بروايات
لخ متنوعة ورة ماتخلص هاي.
......
قبل الاختطاف بـ 28 ساعة.
- الحارثية / ساعة بثمانية بالليل.
چانت واگفة بغرفتها الفخمة وگدام مرايتها التقارب طولها بالمعنى الحرفي تحاول تسد سحاب ثوبها من ورة، لحدما رفعت راسها على المراية سامعة صوت يدة الباب تتحرك وجفلت لما انفتحت الباب تندار رأساً ناحيتها.
بس عكس مافكرت چان الشخص هذا زوجها ومحد غريب دخل عليها تتنهد رافعة ايدها على صدرها • حبيبي الله يسامحك خرعتني!، ليش ماتدگ الباب؟..•
• قابل منو حيطب غيري رهوفتي؟، شنو اله داعي ادگ الباب اذا اريد اطب لغرفتي الخاصة اني ومرتي؟.• جاوبها عراق مدني ناحيتها بضحكة يرفع حاجبه مستغرب خرعتها هاي لان مادگ الباب.
• عبالي احد غيرك طب اخوك او عمي او حتى واحد من الخدم واني بعدني مامخلصة لبس ثوبي.• بررتله رهف متنهدة براحة لان ظنونها چانت غلط ولانهم عايشين بقصر اهل عراق ومامنفصلين ببيت وحدهم خافت يكونون دخلوا للغرفة.
• لاتخافين محد يتجرأ يطب طبعاً بدون مايدگ الباب، تردين اساعدچ؟.• طمنها عراق يبوس گصتها قبل مايباوع للمراية ويشوف السحابة مسدودة على النص وظهرها طالع لانها لامة شعرها فوگ متنها حتى تگدر تسد السحابة ومايچلب بيها.
• اي ياريت تسويلي السحابة.• طلبت منه براحة تندارله حتى يسدها الها وابتسم عراق لازمها يسدها الها، چانت لابسة ثوب بيجي حرير ضيگ من ناحية الخصر مغطي الصدر بياخة عالية شوية لحد الرگبة وردانات فضفاضة عمود المناسبة يلي ديجهزون الها.
كالعادة تحب الملابس الراقية كلش وبحكم كونها تعيش بين اهل عراق تميل اغلب ملابسها تكون متسترة همين، مسرحة شعرها بعكس طبيعته الكيرلي وحاطة مكياج خفيف، تسأله بابتسامة من خلص رايدة مديحه • شونه شكلي طالعة حلوة لولا؟.•
YOU ARE READING
عِرَاقٌ أَثِمٌ / متوقفة النشر.
Romanceسلام الله عليك أيها العراق الأثِم، أني هويتك وبالأثام غارِق!. مثلية، عراقية عامية +18. عنف، الفاظ جرئية وسب عامي صريح.
