ايلين المغرورة

انا

انا ايلين انا طفلة وحدة عند والديا و معنديش خاوتي بحكم انو امي صرالها ظروف و امور مسمحتلهاش تزيد تعاود تحمل لا علينا انا طفلة طويلة نوعا ما يعني طولي 1.70 و انا عندي عينين بني و لكن غامقين جدا جدا لدرجة السواد و هوما مش واسعين بزاف نورمال بصح لونهم عاطيهم جاذبية شواربي منفخين شويا و حومر وحدهم لي يشوفني يقول اني مدايره rouge à lèvres سنيا معدولين و حاجة يلي نحسها جذابة بزاف فيا هي ضحكتي لاني عندي ضحكة عريضة و كي نضحك عينيا يتقفلو 8/10 و زيد منديرش صوت و هادا يلي يحير ناس فيا و زيد انا بيضة انا طفلة رقيقة ماشي كونطر بلاكي زايدة عليه شوي برك يعنيla taille des mannequins يعني كي نلبس les robes نجي تحفة الله يبارك (اوكول يقولو هكدا) بون انا ملامحي عادية جدا بصح عندي كاريزما و جذابة بزاف و هاد الشي يلي يجيبلي العين و الحسد و دايمن تخرج فيا نرجع لنفسي انا انسانة مغرورة او تقدرو تقولو انسانة نشتي نفسي بزااااااف يعني انا لحق منيش فاهمة روحي يعني انا انسانة ثقتي بنفسي كبيرة عمبلي بقدراتي و حدودي و عمبلي بلي كي نحب نوصل لحاجة نوصلها بتعبي و اجتهادي مثلا عمبلي بروحي منيش ذكية لدرجة كبيييره و كاين يلي نعرفهم و في محيطي أذكى مني و لكن انا نغطي على هادا نقص باجتهادي و هكدا فالقراية و فالحياة  (و هدا بيني و بين نفسي) . و برا مع ناس انا انسانة واثقة من نفسها و متواضعة يعني انا مع ناس نهدر معاهم كيشغول انا انسانة نورمال و زيي زيهم و كلي مكان اتا فرق بيناتنا ليشتا هاداك العبد لي قدامي او عمبلو بالفرق (يلي يكون ساعات مادي او فكري او اجتماعي ) لاني ببساطة منشتيش تكون كاينة حساسية بيناتنا و مبحبش انو اتا انسان يحس بهداك الشعور تاع الفرق لانو ببساطة نحس بذنب و نخاف ناس تبعد عليا بسبة هادا الشي (دايمن تصرالي ملي كونت صغيرة ) سما دايمن نخبي هادا الفرق و دايمن نتشبت فالعلاقة يلي يكون فيها الطرف الآخر زيي زيو و لانو هاد الشي يحسسني بالاطمئنان و ندي راحتي و حتى انو ساعات كي نحب كاش عبد من قلبي و نحب نشجعو و نفرحو نخليه يحس انو هو أفضل مني (ليشتا اي العكس) و هادا الشي غالبا ما يرجع ضدي فغالبا ما هادوك ناس يوليو يتفاخرو عليا و يقنعو صح بلي ام خير مني و يعايروني تاني 🤣🤣 و معلومة أخرى انا انسانة نحشم كي نشوف واحد اقل مني او انا احسن منو و نحس بذنب و نكون مرتاحة مع ناس يلي هوما احسن مني اكثر . انا كتلكم قبيل بلي نحب نفسي بزاف لانو انا اي انسان يديرلي جاست صغير و ... تافه ساعات انا بسبتو نعيش صراع نفسي لانو من جهة غروري يلي يقولي كيفاه انا يديرولي هك و من جهة قلبي (حساب العبد ) ساعات يقولي هادا الإنسان نشتيه و نحبو نورمال اغفلي و مكان والو و ساعات هاد انسان معندو ما يعنيلك و ميهمش و ساعات كيفاه انسان هادا يلي عطيتو قيمة كبيرة يجازيني هك ووووو ..................و من جهة عقلي يلي يقولي هذا جاست نورمال و يصرا و تافه و من جهة صورتي قدام الناس ايلين العاقلة و المربية والرزينة يلي من المستحيل نخليها تتشوه قدام الناس يعني لازمني نرد بتصرف يناسب صورتي قدام الناس و يرضي غروري و يقنع عقلي و قلبي (نعبو باباه هاداك )نورمال شوي و ينسا هههههههه انا دايمن نحاول منخليش مشاعري يلي تحكم و مع ذلك مش عقلي يلي يسيطر و إنما غروري و هدا الشي يلي علاجالو دايمن نخلي روحي لفوق و بعيدة عل ناس . حاجة أخرى عليا انو انا انسانة ننسا شر الناس بزربة معرف علاه .
انا تربيت مع امي و ابي و كنا ساكنين مع جدي و جداتي و عمي لكبير و مرتو ولادو فوق بعضانا و عندي عماتي زوج تاني و متزوجين و بولادهم ساكنين قراب لينا و كانت علاقتنا معاهم نورمال كيما اي عايلة فيها المشاكل و مشي بزاف قلال لانو حنا حاكمين قدرنا بابا انسان خدام عند روحو يخرج صباح يجي لعشية و موفرلي وقت ليا كان يشتيني و يحب يوفرلي كل حاجة نحبها و يحب يدللني و متساهل معايا بزاف و اوكول يعيطولي لمدلة تاع باباها و لكن رغم هادا شي متشدد يعني كانت عندي حرية كبيرة بصح محدودة كي نغلط نسلك حساب الغلطة و هو كان متفتح في حوايج (فالقراية مثلا) و انا اصلا كنت نخافو و نشتيه لدرجة كبيرة كون نلقا كيفاه ميخدمش باش ميتعبش بسك نشتيه و نحب نفرحو و نخليه يفتخر بيا و كنت دايمن في قرايتي بعيدا على اني نرضي في غروري نحب نكون انا لولةاولا ، ثانيا باش نفرح والديا و كنت دايمن هك و كبرت و انا هك (ناس بزاف تقول هاكداك حنا نقولو هك ) نرجعو لماما ماما انسانة حنونة و تشتيني و تاكل اي عبد يكيسني الا انو يكون من فاميلتها معمبليش علاه بصح هيا هك تشتيهم هبال مام كون يغلطو فيها تقولي ليشتا و نورمال و تختلقلهم الأعذار و ساعات بلا والو تولي تروح تطلب السماح و تحولهم و هوما يوليو يهزو في روحهم و انا نغلي وحدي انا عندي خالي (تبرأ من مو و باباه بكري مبعد تفهمو لحكاية ) و زوج خالاتي كبار علا ماما و هي الصغيرة انا جداتي تاع ماما تحبني حب كبيييير لانو انا بنت بنتها الصغيرة و الوحيدة و زيد دايمن يشبهوني ل وحدة اسمها جنان مكنتش نعرف شكون هي و ياريتني معرفت
لا علينا انا انسانة كلاااص بزاف لانو انا ذواقة فلبسة و نعرف نسق اللبسة و بالإضافة انو بابا ذواق زيي بعد و ماما نفس الشي يعني انا كي نخرج نشري اللبسة دايمن ندور mall كامل باش نشري حاجة بسيطة . بابا كان عندو و لاباس بيه بصح ميحبش يبين سما كنت نشري لبسة و عندي وحد 10 تبديلات(انا كنت من عند ربي القش ميصغارش عليا ) كنت و مزلت نشري نلبس المستور لانو منحسش روحي مرتاحة بالعريان مكنتش محجبة او بالأحرى بابا حاب ندير الحجاب لكن انا نتهرب مالموضوع رغم اني مقتنعة بالفكرة و حابة بصح النفس و ماتشتهي نكون قانعة بيه كي نروح نشري القش نلقا مودال جديد يعجبني ننسا عالحجاب خلاااص هههههه مكانتش مكتبة بالاك .
انا طفلة خاطيني الحب و الغرام و كدا ماشي بسك نخاف من بابا لانو انا مانيش حابة نهبط من نيفو تاعي و نخاف من ربي و منبعد تجي انو انا مانيش حابة نستغبي بابا و نحطو محل الداب يلي معمبلوش بنتو واش كاعدة دير من وراه منيش حابة ناس تتشفا في بابا بسبتي و زيد انا خلاطة هههههه كل يوم نعشق في واحد كي نقول نعشق معناتها نكراشي برك هوما ميسمعوش اصلا سما مدايرتها ضحكة برك 🤣