ماء مغلي

part.. 59

صوتو
ــــــــــــــــــــــــــــــــــــــــــــــــــــــــ
#ماء_مغلي_بارت_٥٩

..♣️🩸   ماء مغلي  🩸♣️..
* adzzon *

- مشتاقلج مشتاااقلج
دايريد يحضني وسمعت صوت باب الغرفه فوك نفتح كبل وخرت منه .. وهو ضاج وطلع من البيت ..عايف تلفونه هنا وضليت ضايجه عليه شلون بي هنا ؟؟ اكيد حيداار يزعل بس يعرف بي ..

بقيت كاعده جوه وحيداار نزل .. ريتا جابتله الاكل وهو كالي ..
- ياروحي يلا اكلي وياي
- اكل عوافي عليك اني شبعانه

هو سوه لفه صغيره وتقرب يريد يوكلني واني هذا الاكل بس اكله اتقيء وماخجلته اكلتهه بس راسا كمت ورحت للمطبخ اخذت كلينس وذبيتهه .. واخذت بطلين مي ورجعتله ..

هو كمل اكل وراح غسل واجاني حضن راسي ويكولي ..
- حيل نعسان ومشتاق تنوميني

- تدلل بس خلي يرجع عمي واشوفه خاف يحتاج شي واتفرغلك

- وين راح ؟

- هيج طلع يتمشى ويجي هسه ميتاخر حتى تلفونه عايفه ميطول هسه يرجع
انته اصعد ارتاح واني ابس يرجع عمي اجيك

- لاتتاخرين حيل نعسان اذا لكيتيني نايم احضنيني ونامي تره قفلت كلش

ابتسمتله وهو يثاوب وراح صعد ...
بقيت كاعده انتظر عمي واكل الشوربه الي لاطعم ولا هضم .. مجرد شي سائل  بخاشوكه ابلعه
بين مارحت اغسل .. عمي رجع ..
رحتله وهو مدنك دياخذ تلفونه .. كلتله ...

- رضا خلي نحجي
اشرلي باصبعه اسكت وراح صعد ..

صعدت وراه وهو جان واكف كدام الغرف وباوعلي .. رحت كدامه فتحتله باب غرفته وهو دخل وكعد ينزع جواريبه .. كلتله ..

- شبيك دتزعل ؟ تره ماسويتلك شي يزعل اذا جنت تعبان اوووكي كولي حتى مايضل بالي عليك

رجع ايده على الدوشك وضل هيج مستند ويباوعلي .. كالي ..
- تعبان روحي يلا اريد انزع ملابس وانام براحتي ورجلج خاف يلكطج وياي ويتمزعل ويشيل خشمه علينه روحي يلا

- ليش تضوج منه!  انتو مو جنتو متفاهمين شبيك هسه عليه !!

- متفاهم وياه هسه شفتيني سويتله شي ! روحي بابه نامي وارتاحي وحسبي حسابج باجر عدنا كعده سوه تشرحيلي كل مرضج بالتفصيل وكل فحوصاتج اشوفهن حتى اتصرف لعلاجج بعد

- اووكي .. لعد تصبح على خير

هو وكف يريد ينزع ملابسه واني طلعت .. رحت لغرفتي .. شفت حيداار نايم بملابسه وممتغطي .. بدلت ملابسي وطفيت الضوا وغطيته ونمت بمه ..

اتلمس وجهه شكد بنفسي ابوسه ومااكدر اخاف عليه .. بنفسي ابوس ركبته وكل وجهه واخاف ..

خليت راسه على ايدي وحضنته .. حيداار منين ماباوعله اشوفه فقير وكلبه فطير بكل شي يصدك ويقنع وكلبه مو اله .. اخاف عليه من كل شي وادري بي بدوني مايكدر هو مايحب يتصرف بشي خارج عن الي تعلمه ونشىء بي من صغره ..يريد يبقى مثل ماهو يفتح عينه يذكر الله وينام وراسه بارد لا يفكر بفلوس ولا يطور عيشته ولا يفكر بطمع بهالدنيا .. يريد يطلع يشتغل يرجع يحصله لكمه ياكلهه وينام .. وكل الي عدا هالشي هو متكل عليه بي .. و لا يكدر يرتب عيشه مثل الي راسمتله بالي .. لذلك كل شي اوفرله واضل انطيه كل شي لان كلبي يحن عليه اريده عايش بنعيم .. هاي النفسيات الطيبه مثله حرام تعيش متعثره  بالدنيا ..


كعدت الصبح على نفسه بركبتي يشمشم ويبوس .. لزمت شعره وهو رفع وجهه عليه يريد يبوسني بشفتي واني للحظه جنت ناسيه بس من طخت شفته بشفتي راسا جفلت وخرت راسي منه .. هو هم مبين نسى المرض ورجع هسه تذكر .. ماكال شي وصار يبوس بخدي .. ويكولي ..

- حبيبه روحي فله حبيبه عمري هي
- ياعوومري انته
- مشتاكلج وحك لا اله الا الله