كم مرة قعدت تكلم نفسك أو تعاتب نفسك ، مش بس كدا !! أنت كام مرة أخدت قرارات بينك وبين نفسك والقرارات دي غالبًا بتطلع صح !؟
بس السؤال الأهم ! هو أنت بتكلم نفسك ولا بتكلم قرينك ؟
الكلام مع النفس بيبدأ مع الإنسان من الولادة وتقريبًا لحد ما الطفل يتم سنة أو سنة ونص بالكتير ، ودا بيفسر ليه بنلاقي الأطفال قاعدين بيكلموا نفسهم وممكن يضحكوا ، وبتلاقي إن في حوار داير بين الطفل ونفسه !!
وأحيانا كتير تلاقي الطفل قاعد يبص في أماكن مفهاش اي حاجه وفجاة تلاقيه بيضحك أو بيعيط وطبعا دا أكيد يفسر لو الطفل بيضحك يبقى شاف حاجة فرحته وإن لو بيعيط يبقى شاف حاجة خوفته ، وبيتقال عن الأطفال إن مكشوف عنهم الرؤية يعني بيقدروا يشوفوا حاجات احنا مش بنشوفها ، ودا يخلينا نقول احنا بنكلم نفسنا ولا بنكلم القرين !؟
الكلام مع النفس " نوعين " :
" نوع يتصنف انه ظاهرة عادية وبتحصل لكل البشر بشكل طبيعي وهنتكلم فيها دلوقتي بالتفصيل "
" النوع الثاني هو نوع أقرب للمرض وبيكون عبارة عن مشاكل مرضية نفسية وهنتكلم عنها بعد شوية "
النوع الأول:
_الكلام مع النفس بيكون " نوعين" نوع بيكون بصوت مسموع ، ولكن بصوت مش عالي أوي يعني مش مبالغ فيه.
والنوع التاني بيكون صوت غير مسموع بيكون كلام مع النفس داخلي ودا بيحصل للإنسان في أي موقف من مواقف الحياة ، وغالبا بيكون للإنسان وهو قاعد لوحده ، أو وأنت سايق العربية أو وأنت في مكتبك !!
وغالبًا على سريرك قبل النوم بتلاقي نفسك عمال تكلم نفسك ومش عارف هو سبب الكلام مع النفس دا إيه ؟
وغالبًا الكلام مع النفس أحيانًا بصوت مسموع بس زي ما قولت مش مبالغ فيه لدرجة إنك تبقى قاعد وسط ناس عادي ومرة واحدة تقول كلمة أو يطلع منك تصرف واضح جدًا فيه إنك بتكلم نفسك …
وممكن تلاقى الـ حواليك ساعتها يقولو عليك إنك اتجننت والأغرب إنك بعد متتكلم مع نفسك توصل لحلول لمشكلتك والـ أنت اصلًا مكنتش عارف ليها أي حل وممكن توصل لحلول مش متوقعة أصلًا !! ودا لإن النفس أكتر حاجه صادقة معاك.
صعب جدا تلاقي حد بيضحك على نفسه ، ولما بتتصرف تصرف مش صح غالبًا بتقعد تعاتب نفسك لإن أنت عارف إن التصرف دا مش صح ، وغالبًا كمان من كتر ما أنت بتكلم نفسك وبتعاتب نفسك ممكن تتصل بالشخص الـ غلطت فيه وتعتذر له ، وبتحس ساعتها إن القرار الـ خدته دا ال نابع من نفسك أو كلامك مع نفسك هو أكتر قرار صح أنت ممكن تعمله.
لكن السؤال هنا هو احنا فعلا بنكلم نفسنا ولا بنكلم القرين؟
لأن القرين هو حاجة منك بالظبط وعايش معاك طول الوقت ! في أي مكان وأي زمان القرين ملاصق وملازم ليك لان الفكرة اصلًا هو أنت بتكلم نفسك ازاي ؟ وبتعمل حوار مع نفسك ازاي ؟
ازاي تفضل في حالة مناقشه شد وجذب مع نفسك ؟ الا إذا كنت بتخاطب فعلا حاجه جواك والحاجة دي في الأغلب القرين … يعني أنت في الأغلب بتكلم قرينك ومش بس بتكلمه هو كمان بيكلمك وبيرد عليك ويناقشك وممكن يعاتبك طول اليوم ع تصرف غلط أنت عملته وبيفضل فاكر لك تصرفات أنت عملتها حتى لو من زمان وممكن يقعد يفكرك بيها ويحسسك قد اي أنت كنت غلطان في موقف معين وصح في موقف معين !!
والكلام مع النفس أحيانا بيلحقك من مشكلة ، وممكن يحطك في مشكلة لإن أحيانا الكلام مع النفس يجبرك إنك تعمل حاجه غلط ، وعشان كدا في حاجة اسمها جهاد النفس ، والجزئية الي لها علاقة بجهاد النفس أو الكلام في الدين دا موضوع كبير جدًا.
أنت كام مره غلطت في حق حد ولما قعدت مع نفسك حسيت إنك عاوز تتصل بيه وتعتذر ليه ؟ فـ نفسك قررت انها تتصل بيه وتعتذر ، أو قرينك قالك أنت غلطان.
النوع الثاني:
امتى الكلام مع النفس يكون مرض ؟
الكلام مع النفس بيكون ف حالة ان الكلام مع النفس بشكل مبالغ فيه … الصوت عالي أقرب للزعيق دا غير ان الكلام مع النفس في حالة المرض بيكون مصاحب لهلاوس … والهلاوس دي إنك ممكن تقول وأنت بتكلم نفسك إنك شوفت أشخاص أو قعدت مع ناس أو شوفت أحداث هيا اصلا مش موجودة… !!
ولو هيا ظاهرة مرضية ومبالغ فيها لازم تروح لدكتور نفسي يكشف عليك عشان يحدد المشكلة بالظبط ويعالجها … لكن في الأخر الكلام مع النفس مفيد جدًا وأهم حاجة بيعملها انه بيساعدك ع التذكر ، ولما بتقعد تكلم نفسك في موضوع بيخلي الـ مُخ والعقل يفتكر أحداث ومواقف فـ بيقدر الإنسان يفتكر أحداث كتير.
وفـ الأخر بعيدًا عن الجانب المرضي في الكلام مع النفس إلا إن أنا من الناس المقتنعين جدا إني وأنا بكلم نفسي غالبًا أنا بكلم قريني !!
