■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_126"إمتحان/في الضراء"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#التقوى
(وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ ۗ أُولَٰئِكَ الَّذِينَ صَدَقُوا ۖ وَأُولَٰئِكَ هُمُ الْمُتَّقُون.)
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أمّا أنا فالموتُ عندي أسهل مِن الفراق🍃
_______________________________________
"بيضيع عمره في القرايه وياريته غير بيحصل منها حاجه "
هالكلام قاله واحد من افراد عيلة شنيبه للي مقعمزين معاه
محمد ولدي المهدي وعمامه عمر ونضال واحد تاني من ابناء عمومتهم..
وكلامه هدا خالفه محمد المهدي لما قال..
/مش معاك بكل في كلامك هدا الشهاده مهمه هلبه في وقتنا هو سوا للراجل ولاالمراة الشهاده تخليك تخدم في الدوله والخدمه في الدوله الضمانه الوحيده لأي حد مهما كان المعاش اللي تاخده منها المهم يكون عندك مصدر دخل ثابت..
قاله:شن تقول انت مش عايش في البلاد ولا كيف في ناس ليهم سنين حاطين ملفاتهم في التعيينات وماحصلوا شي..
محمد:الوضع هدا مهما طال وقته يقعد مؤقت ماحد عارف شن يصير القدام..خودها الشهاده وخليها مدسوسة ثق وتأكد حيجي يوم وتلقاها..
عمر:بعدين الشهاده تفتحلك بيبان الخدمه في القطاع الخاص وزي ماتعرف في وقتنا الحالي الواحد لازم يكون عنده اكثر من مصدر دخل بش يقدر يعيش حياة كريمه..
محمد المهدي:مزبوط..اهو اني صح ماعنديش مسؤوليات كبيرة لتوا لكن داير لروحي مشروع ينفعني القدام وفي نفس الوقت متمسك بقرايتي ومش ناوي نسيبها مهما صار..
ضحك الشاب وقال..
/حتى انت ولد عيت محمد شنيبه مستقبلك مضمون في كل الحالات .
محمد بضحكه:يكون في علمك قعدت فترة نصرف ع روحي من خدمتي في كوشة خبزة وتوا نصرف من اللي يطلعلي من المشروع اللي خاشه يعني مش معتمد هلبه ع رزق غيري..
ابتسموا نضال وعمر بفخر والشاب التاني من العيله قال لمحمد..
/المهدي ربى راجل..
محمد ابتسم بشي من الاحراج وقال..
/هدا من طيب اصلك..
طبطب عمر ع ظهر ولد خوه وهو يوزع في نظره ع المكان..
ويشوف اللي خلاه معاش يرمش من الصدمه وبتلقائيه قال..
/الجالي!
نضال ومحمد المهدي جتهم زي الفجعة شافوا وين مايشبح عمر ويجيهم ماجاه من الصدمه.
وباقي الحضور من اللي عندهم درايه بكل شي تفاجئوا بشدة لما شافوه خاش ومنهم من قعد يوزع في النظر بينه وبين عبد القيوم..زي الجيران وعلى راسهم الصيد وولده اشرف..
بس في اللي كان مرافق صدمتهم غضب شديد من وجوده..
زي بوه وخوه الكبير وحسين الواعر..
ومع هذا كله هو ولاع باله..كان راسم ع وجهه ابتسامة فرح لطيفه وماشي طول بإتجاه العريس وصل فيه وقال..
/مبارك عليك غالينا..
نضال برغم قلقه وصدمته ناضله بيسلم عليه لكن الجالي طول خداه بالأحضان وهو يقول..
/ربي يهنيك وبالذريه الصالحه ان شاء الله..
نضال:الله يبارك فيك..
تباعد الجالي عنه بعدين جي لولاد عمه سلم عليهم بالواحد وكان سلامه حار وفيه ترحاب..
بعد ماسلم عليهم جي لولد خوه محمد وحضنه وهو يقول..
/باش مهندس..
محمد وقتها مش عارف علاش حس بحنين وشوق ليه مهما كان يقعد عمه اللي رباه ع ايديه..ضمه بقوة وقاله..
/حمد لله ع سلامتك..
الجالي:الله يسلمك..
تباعد عنه بعدين جي لعمر سلم عليه بالأحضان حتى هو وعمر قاله..
/ماخبرتش!
تباعد عنه الجالي وقال بإبتسامه..
/خليتها مفاجأة..وضمه من الجهة التانيه لثواني بعدين طلقه ووجه النظر للطاولات اللي وراهم..
مرره بين الحضور..
شاف حسين وعبد المطلب وعزيز اللي كانوا مقعمزين مع جد اريج وواحد من عمامه..
غير نظره عنهم للطاوله اللي وراهم..
ويشوف المحجوب اللي كان يشوفله بنظرات كلها حقد تجاهلهم وتجاهل نظرات جبريل لكن استغرب في الوجه الجديد اللي معاهم..الصابر..كانت ملامحه متجهمه ونظراته ليه واضح فيها البغض..
غير عيونه عنه ويجوا في عيون اكثر بني آدم يكنله مشاعر الحقد في الحياة وكل مايشوفه يتمنى لو يقدر يخفيه من الوجود وهادي كانت نفس امنية هالشخص..عبد القيوم..
تنهد الجالي بعدين مشي بإتجاه طاولة عيلة الواعر وخلا اهله ع اعصابهم بالذات نضال اللي خاف يخرب عليه فرحته للمرة التانيه..
🍃🍃
اغلب الحضور تبعوه بأنظارهم وهو ماشي لطاولة عيلة الواعر وحالاتهم مختلفة عن بعضها بين مترقب..ومرتاب..وقلق..
وصل الجالي في الطاوله تحديدا عند عبد المطلب مد يده وقاله..
/كيف حالك عمي عبد المطلب..
عبد المطلب وهو يشوفله بتعجب مد يده و صافحة ع مضض بدون مايرد عليه وسيب يده بسرعة..
هو ابتسم ومشي لحسين مد يده وقال..
/افندي شن الاخبار..
حسين شافله من فوق لتحت بنظرات حادة ومع هدا صافحه برووس اصابعه بدون مايرد..
هدا كله يشوفله عزيز بإستغراب..والمحجوب والمهدي وبوه..وعبد القيوم بغيظ وغضب شديدين..
ويسلم بعدين ع جد اريج وعمها ويختم جولته ع الطاوله هادي بسلامه ع عزيز..
ومنهم للطاوله اللي وراهم مشالهم وفات من ورا جبريل والمحجوب وهو يقول..
/السلام عليكم.. كيف حالكم..ويجي عند الصابر يمد يده وهو يقول..مانتفكرش ان شفت قبل هكي حضرتك قريب لعيلة الواعر؟
صافحه الصابر وشد ع يده بقوة وقال..
/اهلا وسهلا..
ابتسم بإرتباك وهو يقول..
/اهلا بيك..معاك الجالي خو العريس..وكمل يقول بإبتسامة اسف..ونسيب سابق لعيلة الواعر..
سامي شاف لعبد القيوم اللي كان موجه نظره القدام وملامح وجهه تقطر غضب..
فجأه..ناض..وخدي هاتفه ومشي بيطلع من القاعه وسامي ناض وراه ولحقه..
طلق الصابر يد الجالي وهو يتبع في عبد القيوم ونظره ومعاه المحجوب وجبريل..
ابتسم عبد القيوم بتعجب ساخرا..بعدين قال..فرصه سعيده..وغادر الطاوله..
وهو ماشي شاف المهدي جايه ضحك وقدمله بسرعه وخداه بالأحضان..
المهدي:حتخليني نديرها ونقتل خوي.
تباعد عنه وطبطب ع ظهره وهو يقول بإبتسامه..
/ماشي نسلم ع الحاج..
ومشي وخلاه والمهدي لحقه وهو يحاول يضبط اعصابه ع قد مايقدر بش تمشي هالليله ع خير..
🍃وصلوا في طاوله محمد شنيبة اللي كان مقعمز فيها مع خوته ونسيبه جمال..
سلم الجالي ع بوه وكب ع راسه بعدين سلم ع عمامه ولما وصل في جمال كان سلامهم بالاحضان..
تلاقوا كذا مرة في تركيا والكويت ومن خلال اللي شافه منه وكلام خديجه عنه تقبله هلبه وتعاطف معاه..
🍁🍁🍁🍁
وبرا القاعه..
ركب عبد القيوم سيارته وسامي ركب معاه..
تحرك بسرعه وهو يحرق في العجل من الغضب الشديد اللي خالطوه قلق وخوف رهيبين..
هداكا الوقت في مشهد واحد بس كان بين عيونه يوم اللي طوبى بإستسلام رضت تروح مع الجالي بعد ماخطف جنة..
اليوم هدا كان اسوأ الايام اللي مرت عليه في حياته من بعده اسودت الدنيا في عيونه وكره حياته وهرب من كل شي..
"عبد القيوم "
استاقظ لما سمع صاحبه قاله..تنهد بخوف وسأله..
/شن تتوقع؟
سامي:مش عارف..
قاله:انا نقولك..اكيد حيطالب بحضانة بنته وطوبى مستحيل ترضى تخلي بنتها لهالمريض انا بروحي مانفرطش فيها..حرام فيه يكون عنده بنت زيها حرام..خبط الدومان خبطه قويه بعدين قال بقهر..استغفر الله العظيم..استغفر الله العظيم واتوب اليه..
سامي شاف للمنظومه متاع السياره بعدين شغل الراديو وحط ع إذاعة القرآن الكريم وزاد الصوت..
( مَا أَصَابَ مِن مُّصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا ۚ إِنَّ ذَٰلِكَ عَلَى اللَّهِ يَسِيرٌ (22)لِّكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ (23) )
تنهد بألم لما سمع الآية حاول يطمن بيها بس الخوف اللي كان مسيطر عليه خلا القلق في اللي قلبه يزيد ماينقصش..
🍃🍃🍃🍃
وصاحبة الشان في هاللحظات كانت في قمة السعاده وهي تشوف في توأم روحها وصديقة عمرها عايشه فرحة حقيقيه بدون تظاهر او تصنع..
مش اول مرة تلبس اريج الفستان الأبيض لكن اول مرة تبان سعيده فيه..ووجهها كان يتوهج سعاده وهي تسمع في كلمات الزفه اللي كانت تحاكي احساسهم في هالليله..
"ادخلي عمري بخطوتك اليمين..اضوي ايامي وعتمة السنين"
عتمة سنين الفراق اللي ياما شافوا فيها من عذاب..عذاب صبروا عليه وصبرهم هدا طلع احلى مافيهم وغيرهم للأفضل بش تولي ليهم الخيره في بعض ويولوا يستحقوا بعض هالمرة بكل معنى الكلمه..
🌸🌸
ووصلت العروس للكوشه وساعدوها طوبى وآلاء بش تقعمز عليها..
في عيون الحضور بانت اريج مشرقه وجميله بزياده،لمسات طوبى كان ليها دور في هالطلة لكن شعور السعاده اللي عايشاته هو صاحب الدور الابرز..
☘الفرحة لما تكون من القلب تنور وجوهنا وتزيد تجملنا في عيون كل من يشوفنا...
وهالشي بان حتى ع طوبى اللي همسات الحضور تقول عنها..
"شوفيها كيف زايدة ومزيانه باين عليها مرتاحه"
"وجهها ناير باين عليها متهنيه"
"شوفوا شن لابسه شوفوا ذهبها..يعيشوا بنات الواعر مهما يصير فيهم يعيشوا ويتهنوا"
وكأنهم نسوا كل المآسي اللي عاشتهم في حياتها ومعاش تفكروا شي كان اللي يشوفوا فيه عليهاحاليا!.
☘☘☘☘
ومروا ساعتين فرح في فرح دربوكه..شتاوات..زغاريد..صغار وكبار رقصوا العروسه ورقصوا معاها وخلوها تعيش فرحة العمر..
ولكل شي زي مافي بداية في نهايه وجو اهل العريس مرت بوه واخته نسرين ووحده من عماته ووحده من خالاته قدمولهم ضيافه خفيفه بعدين خدوا اريج ورفعوها لدار العروسه وماقعد حد من اهلها غير خالتها سدره..
لبسوها الكاب الأبيض وفوق الكاب غطوها بعبايه سودا مفتوحه..
فتحوا الباب الخارجي لدار العروس وقعدوا يمشوا فيها لعند ماوصلوها قدامه ويتلقاها عريسها اللي قالتله مرت بوه..
/هي خود فستكتك..
ضحكوا عليها وهو كان يضحك بإحراج بعدين خدي اريج وحاوطها وقعد يمشي فيها واخته نسرين تلحق فيه..
سميرة وهي تشوفلهم غلبوها دموعها خطرت عليها ليلة دخول خوها الصغير ماقدرتش تتمالك نفسها خشت داخل وقعدت تبكي..
عمة نضال وخالته عارفين اللي فيها وتعاطفوا معاها..
وسدرة جتها ضمتها بدون ماتقول كلمة..
لكن هي حاولت تهدي نفسها ودعت من قلبها وهي تقول بنبرة باكيه..
"فرحتلهم من قلبي والله ربي يهنيهم ويحفظهم"
☘وداخل القاعه فردوس كانت مقعمزة تبكي وعيلتها حواليها كل حد حاول يخفف عنها بكلمه وفي الآخر خلوها تدعي لبنتها من وسط قلبها..
"ربي يهنيها العمر كله"
☘☘☘☘
في الطريق..
نضال؛ضلعي الأعوج ماعنداش حس..
اريج:بنقولك حاجه وعارفاتك بتضحك عليا اضحك عادي ماعنديش مشكله..جعانه بنموت بالشر..
قعد يضحك من قلبه بعدين قال..
/مش ناسي ان بطنك كبيره ماخليت ماخديتلك عبيتلك الثلاجة وحتلقي مفاجئة مش عاديه تراجي فيك غير نفوتوا هالنص الساعه في حوش عمك الحاج محمد شنيبه بعدين ننطلقوا لعش الدبابير..
اريج:غير مغمومه ومكتفه بس...
ضحك بعدين قال بالفصحى تقليدا لجنة..
/تهبني!؟ "تحبني"
اريج ردت عليه بنفس الاسلوب وهي تقول بضحكه..
/هبكي هلبه هلبه..
ضحكوا مع بعض..
🌸ويكملوا طريقهم وهما يتغازلوا بأسلوب مناقرة فكاهي لعند ماخشوا بالموكب اللي معاهم لشارع القهوة..
🌸🌸🌸🌸
وتلقوا اريج العمات والخالات ونساوين العيله وخديجه في مقدمتهم وكل شتاواتهم كانت عن نضال لكن سميرة مع سدرة خلوهم يغيروا الموجة غصب عنهم وحتى كامله عاونتهم وشتت ع العروس..
☘☘☘
ويدخلوا اريج للصاله لقت عزوزتها مقعمزة ع الكرسي المتحرك بكامل اناقتها وتشوفلها بإبتسامه..
قربتلها سميره وقالت..
/بريلها طول..
رفعت اريج فستانها شويه وقدمتلها سلمت عليها بالخد وباست راسها ومغليه حضنت يد اريج بإيديها الزوز وقالت.
/ربي يهنيك انتي ووليدي ويفرحنا بصغاركم..
اريج بإبتسامه:آمين وعينك حية..
هزت مغليه راسها وهي مبتسمه بعدين طلقت يد اريج وجوها خالتها ونسرين بش يساعدوها تقعمز ع الكوشه..
☘وعدت نص ساعة ع وجود اريج في حوش شنيبه وبعدها طلعوها لراجلها بش يروح بيها..
واول ماتحركت سيارة العريس لحقوهم عمر ومحمد ووراهم سيارة حمايه لجماعه من اصحاب المهدي..
🍃🍃🍃🍃
المهدي اللي كان مقعمز مع الجالي وبوه في سيارته قدام قاعة الفرح وصاير بينهم نقاش محتدم..
🍃محمد شنيبه:عليا الطلاق من امك مانك خاش الشارع..
الجالي وهو يحاول يتمالك اعصابه قال.
/نبي نشوف امي وبنتي وصغار طاهر..
محمد شنيبه:شوفهم وين ماتبي لكن الشارع مانعرفكش تعفسه..اسمع ياولد راك موصلني لمرحلة مستعد فيها نبعت من يقتلك ويريحني منك من غير ماترمشلي عين..
الجالي بأسف مصطنع:لاحول ولاقوة الابالله..باهي حاضر اللي تبيه يصير..
المهدي:غصب عنك مش بكيفك ..
سكت وهو يمرر في نظره القدام.. كان كاتم في داخله غضب شديد..
المهدي:وين قاعد؟
الجالي:مأجر شقه من واحد نعرفه..
بوه بإستغراب:قداش ليك هني؟
الجالي:اليوم الصبح وصلت..
المهدي:من قالك ع مكان الصاله..
ابتسم ع جنب وقال..
/نضال منزل منشور دار فيه الدعوة عامه لكل من يعرفه فاكيد بيكون كاتب فيه اسم الصاله ومكانها..
بدت ع وجه المهدي ملامح الاستياء وهو يشوف للطريق..
محمد شنيبه: وتوا انت مروح نهائي!..
الجالي:لا..جاي زيارة بس،عندي خدمه برا مانقدرش نخليهافترة طويله..
شافله بوه شويه بعدين قال..
/انزل..
الجالي:مش نازل قبل لتقولولي امتى ووين نقدر نشوف امي وبنتي وقت زيارتي محدود..
المهدي:بعد غدوة في الشقه اللي قاعد فيها..
هز الجالي راسه وقال..
/تمام تو نبعتلك النعته في رساله..فتح الباب وقال..تصبحوا ع خير..بعدين نزل وسكره وتوجه لسيارته..
محمد:مش مستريحله بكل خوك هدا
المهدي:خليه عليا..وشغل السيارة وتحرك...
🍃🍃🍃🍃
وفي حوش طوبى..
تحديدا المربوعه الخارجيه..
الصابر:باين عليه مش مزبوط كيف فرطتوا فيها وعطيتوها له!؟
جبريل:ماكانش يبان منه كان الباهي ياالصابر..
المحجوب:لطفي الله يرحمه كان يشوف فيه ملاك نازل من السمي ولما عرفه ع حقيقته ندم روحه هلبه..
عبد المطلب:مالينا الا الظاهر ياخوي صابر وزي مايقولوا المظاهر خداعه
الصابر ماقدرش يقتنع بولا مبرر من اللي سمعهم وقلبه كان واكله ع طوبى مرر نظره عليهم وقال..
/عبد القيوم وين!؟..من اولها بيختفي!؟
شافوا المحجوب وجبريل لبعض بنظرات ضيق وقلق..
وعبد المطلب قال بتوتر..
/مانقول غير يستر الله
☘والجو في الحوش عكس اللي كان في المربوعه الخارجيه..
كانت احاديثهم عن الحفله وتفاصيلها وضحكاتهم مسموعه في الحوش كله..
وفي عز الهدرزةقطع عليهم رنين هاتف طوبى شافاته بعدين ناضت طلعت من جنبهم وهي مبتسمة وعيون سالمين وكاريمان معاها..
☘في الدار..
خشت وهي تقول..
/السلام عليكم حبيبي
"وعليكم السلام ياروح قلبي..هيا ياقلبي وتي روحك"
بإبتسامة استغراب قالت..
/كيف حبيبي مش تفاهمنا نبات هني الليله؟
"معليش ياقلبي رديت في كلامي"طوبى بضحكه:عبادة بلاجو..
"قلبي..نحكي جد عشرة دقايق ونوصل، نرن عليك تطلعي..
ونهي المكالمه بدون مايعطيها فرصه ترد هي استغربت فيه هلبه وماحاولتش تعاود عليه عارفاته كان خدي قرار مستحيل يغيره..
🍃🍃
وبدت تلم في حاجاتها وحاجات الصغار،والعيله لما عرفوا ان راجلها غير رايه في مبيتها واصر يروح بيها فسروا اصراره تفسير وردي رومانسي..
لكن طوبى كانت حاسه ان في شي مش مريح من طريقة كلامه معاها..
☘☘
طلعت من الحوش ومعاها معتز رافع جنه في حضنه..
نزل عبد القيوم من السياره وتوجه طول لمعتز خدي منه جنه وحطها في الكرسي الخلفي..
بعدين خش معتز طلع الشناطي وركبهم في السيارة من الخلف في الوقت اللي كان فيه عبد القيوم يساعد في طوبى بش تركب بعلي..
سكر الباب بإحكام بعدين قال لمعتز..
/تصبح ع خير..
ومعتز رد عليه بعدين خش للحوش وسكر الباب..
🍁🍁🍁🍁
واول مايتحرك بالسيارة يدير حركته المعتاده يضرب بأطراف اصابعه ع يدها..
وهي تبتسم وتحول القفاز بشي من المعاناة لإنها شاده علي بعدين تعطيه يدها وهو يشدها بقوة..
طوبى بضحكه؛تو مش تفاهمنا امس؟
قاللها:سايرتك مسايرة..
قالتلك:حسيت روحي انحطيت في موقف اسبوع العرس كله مابتش معاهم وغدوه بإذن الله من الصبح بيضموا الحوسه بالله ولي بيا الصبح بكري ارجوك..
زاد شد ع يدها وقال..
/حاضر ياقلبي حاضر..
ركزت عليه حست انه متوتر لكن فضلت تأجل اي كلام تاني لعند مايوصلوا لحوشهم..
🌸🌸🌸
ووصلوا العرسان لشقته..
الشقه كانت في الدور الاول ركبوا اقل من سته درجات ووصلوها..فتح نضال الباب دخل مرته وخش بعدها..
لما سكر الباب شافها تحول في العبايه بعدين الكاب..
رفعت عيونها فيه وقالت وين المفاجأه؟
لقاته يشوفلها بإبتسامة ونظرات مليانه اعجاب وتلمع بالحب
ضحكت وقالت..
/حلوة لهالدرجة!؟
نضال؛قولي شينه لين فايت فيك..
بضحكة قالت..
/طالعتلك..
ضحك بعدين حط ايديه في نصه وقاللها.
/ترا قيمي الفيلو..
عكرشت وجهها وهي تضحك بعدين رفعاته ويشوفها لابسه في رجليها سبيدرو.
ضحك من قلبه بعدين قدملها فتح ايديه وقال..
/استاحشتك اقسم بالله استاحشتك موت..
رمت اللي في يدها وتعنقاته بقوة وهو ضمها وقال بنبرة فيها حزن..
/ضعت من بعدك لكن ربي ردني ليك..
دفنت وجهها في رقبته وقعدت تبكي..
وهو رغم عنه دموعه نزلوا..وقعدوا لحظات طلعوا فيها كل مشاعر الالم اللي كانوا كامدينها في قلوبهم..
وبعدين هوقال..
/هي خلاص سادنا نكد..ورفعها فوق..لما سمعها صوت ضحكتها شدها بيده الصحيحه بس وقعد يلف بيها وهي تضحك من وسط قلبها اللي كان طاير بالسعاده..
🍁وفي قلب يرجف من خوف يحاول يخفيه ع قد مايقدر..
واقف قدام دار الصغار وهو يشوف فيها كيف تغطي في بنتها بعدين طبعت قبله لطيفه ع راسها..
التفتت بتمشي تطلع من الدار لقاته واقف في الباب ويشوفلها.
ابتسمت بشك وقالت..
/حاسه صايرة معاك شي موترك..بمزح قالت..حي عليك تطلع مكلم الشرنه..!
ضحك وقدملها..خداها في حضنه بقوة وقال..
/مانتحملش بعدك عني ماقدرتش نتخيل كيف بتعدي عليا الليله وانتي مش معاي..
بضحكه قالت..
/لاانت شكلها فرحة نضال رجعتلك ذكريات ايام العرس..
بعدها وهو شادها..حط يده ع خدها وقال..مافي حد في الدنيا فرح ربع فرحتي هذيك الليله..اصلا من يوم خديتك ونا عايش سعاده عمري ماعشتها..ولاعمري عرفت الفرح كان لما رحتي ليا..
ابتسمت برفعة حاجب وقالت مازحه..
/معناها حافظ عليا كويس...
ضمها بقوة وقال..
/كان نلقى نحطك في قلبي من جوا..طوبى انا معاش نقدر نعيش من غيرك..الحياة تنتهي عندي كان تخليني..
تباعدت عنه وقالت.
/حي عليك! يقولوا الراجل لما يقول لمرته كلام زي هدا معناها داير فالطه اكبر من راسه..
شدت رقبته وقالت بنظرات شر مصطنعه..
/اعترف..
خلاته يضحك غصب عنها..بعدين قعد ينكش في شعرها وهي تقوله..
/لا شعري قطعته..شعري..
وماتندريش علي روحها الا وهي مرفوعه فوق وتسمع فيه يقوللها..
/تعالي نحكيلك قصة الرحاله وام العيون الحايره..
🍁قصة هالحب المميزة والفريده من نوعها ولدت في ظروف غريبه..وكبرت في ظروف صعبه..ومازالت محاطه بالمخاطر من كل ناحيه...
🍃🍃🍃
"الجالي!"
حسين بإستياء:خش علينا زي القضاء المستعجل وبكل صحة وجه جي يسلم لا ويقول اني نسيب سابق لعيلة الواعر..
صفيه بغيظ؛ياعطه خارق حارق يفترشه بين 16..
حسين بقلق:واضح مش ناوي ع خير المصيبه هدا بكل وكل خوفي يدير شي لطوبى ولاراجلها..
صفيه بألم:ياعليك بخت بختها بنت عمك هادي..
🍃🍃🍃
"زعمه روح ع خاطر عرس خوه ولافي باله حاجه تانيه!"
الصيد: مش عارف..لكن من لما ريته يسلم ع عيلة الواعر حسيته مش ناوي ع خير..
نجمة:باهي عارفها تزوجت ولالا..
الصيد مط شفايفه للأسفل وقال:اللهم اعلم..
🍃🍃🍃🍃
خبطت بيدها ع خدها وهي تقول بفجعة..
/جي !؟
عمر بإستياء:ودار تصرفات خي خلا نضال ع اعصابه..
خديجه بقلق:باهي وينه توا؟
عمر:قال للمهدي قاعد في شقة ايجار..
نسرين وهي مفجوعه وخايفه..
/باهي قول شن دار؟.
عمر:مشي سلم ع عيلة الواعر ومش عارف شن قال خلا التارقي يطلع من الصاله.. نسرين:زعمه شن قاله! نهار احرف !معناها عارف انه راجلها!
عمر:لالا مازال مايعرفش نشدني عنه وقال..قاعد يتلصق ع عيلة الواعر..
خديجه تأففت بضيق بعدين شافت لعمر لما قال..
"راهو خوكم قاعد متأمل.."
نسرين:قول عايش في الوهم..
خديجة:بوي شن قال؟.
عمر قال:حلفله بالطلاق ع الجية للشارع..
خديجة؛لازم نوصل فيه بأي طريقه تو نعرف كيف نقنعه يولي من وين ماجي..
عمر:اطلعي منها سلم وخيتي انتي جايه زيارة وبتروحي فوتي وجع الراس...وفتح باب الكوجينه وطلع..
نسرين؛عنده الحق ياخديجة.
طلعت خديجه من الكوجينه وهي مضايقه وقلقه ع حال خوها ونسرين طلعت وراها وهي تتمنى من قلبها ربي يكفي طوبى وراجلها شره..
#امتحان
#طوبى
...يتبع...
