أنا مضغوووووووط في قدر كاتم بس ما اقدر اصرخ
صح ما قلت
انا طبيبة امتياز
بمسمى آخر: بيبي دكتور👼🏻
وصلت الصبح اليوم، وقبل احط شنطتي بغرفة الموظفات ويصدح القسم كله: "كوووود بلووو اتنشن بليز كووود بلووو"
اللي ما يعرف، عشان الوسط الطبي خصوصًا الطوارئ مالهم خلق يفكرون (او يمكن أغبياء ما ندري عاد)، اخترعوا طريقة الأكواد، كل كود لون، زي مثلًا كود پنك (وردي) يعني انه فيه طفل مفقود بالمستشفى (مرة وحدة بحياتي صارت وانا فيه، تعطلت حياة البشر كلهم عشان بزقة عمره ساعتين، قفلوا كل البيبان وحبسوا الخلق، الى ما لقوه واطلقوا سراحنا... ما يمزح البيبي ذا، مسوي اكشن بأول لحظات حياته)
قبل اكمل عن اليوم تذكرت كود ثاني حضرته 🤣
كود يلو (أصفر)
كنا في أمان الله جالسين ننقنق بالهداوة، ويصرخ المذيع المزعج ذا يقول "كوووود يلووو اتنشن كود يلو!!"
وش يعنييي كود يلو؟ يعني كارثة خارجية 😵💫
طبعًا كنت أتدرب في أكبر مستشفى بالمنطقة اللي انا فيها، يعني الكارثة اللي بتجي مو سهلة، وزيادة ذاك اليوم كان فيه عجاج يضف الأخضر واليابس (ما ضفني عشاني مو نبات هههخه)
فعلًا، صار جاي حادث اصطدام ثلاث سيارات، هاتلك استنفااااارررر ويجيبون الحمالات ويراكضون، عاد انا بقيت مع الفريق حقي مسكنا كم حالة ونجونا الحمدلله... اذكر ذاك اليوم مو معقول الطوارئ كانت توحش.
نرجع لسالفتنا، اول ما دخلت الصبح اليوم ويصرخ ابو الأكواد يقول كود بلو (أزرق)، يعني فيه حالة توقف قلب مفاجئ...
راح الفريق المختص وطرقعوا صدر الحاج وأبشركم عاش الحمدلله (الله يعينه بيكمل يعيش ههههخه)
هذي "صباح الخير" حقتي...
يضحك قسم الطوارئ ايام المدارس
كل اللي يجوننا مبزرة لابسين مراييل او ناس باقي هه وتموت (غالبًا عمال يجون بسبب حوادث بناء)
طيب مستر مريول عادي تنتظر شوي فيه شخص ودنا نغثه ونحاول نخليه يعيش
بس لا، مستر مريول صامل
المشكلة انه قبل يقولون الشكوى يقولون "ابي سكليڤ"
سيرسلي وتذفك😭
طيب وش وضع البيبي دكتور (أنا) بين كل هذا؟ ابد ربع شغلي افحص واقيم الحالات والثلاث ارباع الباقية اترجم عشان الدكتور ما يتكلم عربي
تطورت بعد صرت اترجم هندي وبنغالي بعد (صراحة مدري وش اللغة وما اعرف الا كلمتين، "بخار" يعني حرارة، و"تكليف" يعني ألم... الباقي الله يعز قوقل)
طبعًا اول ما تفضى الطوارئ شوي اهرب واذااااكر الى ما يفرجها ربي...
تعب والله، بس احس مستمتعة بطريقة ما؟
يعني الضغط هذا والقروشة و و و تخلي شيطان مخي بعيد عني، ما يمديه يوسوس حتى 😭
هذا روتين هذي الأيام
أو... صراحة مافيه روتين، حرفيًا حياتي تتشقلب فوق تحت
يا رب رحمتك... بهذي الثانية وانا اكتب بغرفة الموظفات جت النيرس تطقطق على شرابي
يوم خلصَت ضحك قالت "لڤلي سوكس دوكتر"
ههههههههه تسلمين ليتك هارجة قبل الطقطقة
وتطقطق بلغة ما أفهمها بعد 😔
أكره كذا... دايم كنت أتخيل انه اذا جاني مارد علاء الدين وقال لي لك ثلاث أمنيات
الأولى: أطير (زي سوبرمان هيك)
الثانية: أحفظ كل اللي أقرا وما أنساه أبد
الثالثة: أتكلم وأفهم كل لغات الكائنات الحية
عشان ما تطقطق علي الممرضة اقين....
أمزح عاد حلالها
قعدت أضحك معها أصلًا وزدت الطقطقة... فديتني مضحك
أتوقع يكفي بقفل كتابة
برجع أترجم وأمثل اني أنقذ العالم مع الدكاترة الشيبان -الله يطول بأعمارهم على طاعته-
ولما أخلص بمر ماك أجيب لي غداء... أستاهل مكافأة
سيااااا💋
