#البطل_المغمور"شمس الغروب"
#الجزء_الثاني
#Goman_Fared💕
💐..
◇اختي نسيبه..او نوسه..زي ماتحب هي ينادوها اختي الصغيره..قبلها الوالده الله يرحمها حملت تلاته مرات ومع الأسف ماكانش يتم حملها..
وكلهم كانوا ذكور توصل بيهم لأول الشهر السادس ويموتوا داخلها..الوالد الله يرحمه من خوفه عليها قرر هو وياها الاكتفاء بيا اني وخلاص..
بعد عشر سنوات من قرارهم هدا..يعني لما كان عمري 12 سنه..اراد الله لأمي انها تحمل للمرة الخامسه واكتشفوا هي والوالد الحمل متأخر ع حسب ماحكالي بوي ممكن في الشهر الثالت.. الوالد كان يبيها تجهضه لكن امي اصرت تحتفظ بيه
وهو رضخ لرغبتها...
لما عرفوا جنس المولود بوي قالي وبصراحه اضايقت اللي طلعت بنت..وامك فرحت بيها هلبه..
هو بصراحه للوقت اللي وليت فيه أب لبنت ماكنتش عارف خلفة البنات ليش شبه مكروهه في مجتمعاتنا العربيه..
مش شايفها اسباب مقنعه القلق والخوف ع البنت وشرفها وماإلى ذلك..
هو كل من جاب بنت بنته ضاعت!؟ لو هكي الدنيا ليا زمان خاربه ومنتهيه..
بس..
بعد ماوليت اب لبنت اكتشفت ان خلفة البنات تشكل عبء ثقيل ع الأهل في مجتمعاتنا العربيه من جميع النواحي..
يعني حتى بعد يعطوها لراجل يقعدوا خايفين عليها من فشل زواجها وتحمل لقب يزيد من ثقل العبء ع الأهل..مطلقه..
حتى لو مش مطلقه ارمله...والزوز امر من بعض..
المشكله عند الأب اكثر علاش لأن هو المسؤول الأول عن بنته..
عكس الولد اللي بعد مايتعدا سن الرشد يولي مسؤول مسؤوليه تامه عن نفسه...
بوي قرر يتغلب ع خوفه هدا لما خلا نسيبه اقربله من اي حد..
اللي ماقدرش فيه عليا..قدر فيه عليها..رباها تربية مانبيش نقول تربية تريس..بس خلاها مراة بمية راجل..
امي حاولت تمنعه من صنع شخصية "التريسه" فيها لكن ماقدرتش لأن نسيبه تعلقت ببوي لدرجة كبيرة وحبت نمط الحياة اللي خلاها تعيشه
خلاها زيه تلعب كاراتيه وخدت الحزام الاسود..خشت حتى ع فنون القتال...المهم انها كانت بعيده كل البعد عن أي شي ليه علاقة بالأنوثه..بطبيعتها اللي ربي خلقها عليها..
لهالسبب وصلت لسن 32 وماتزوجتش..والباين انها مش حاطه في بالها الفكرة من اساسها..
ومش عارف كان تمنت في داخلها انها تكون ام..هو الحق اني عمري ماتخيلتها ام..اسيمه كعمة كويسه هلبه لكن ام ياودي هادي امممهائه..
كنت نسمع في اسيمه قبل تقوللها انتي كان تجيبي صغار تولي احلى أم..
ماكنتش عارف فوقتها اذا كان اسيمه تقوللها فالكلام هدا بش ادخل في راسها فكرة الزواج..او لإنها فعلا شافت فيها شي خلاها تقول هكي..
ع العموم..اني في هداكا الوقت كنت مؤمن ان كل شي في الدنيا ممكن الا حاجه وحده..
ان اختي نسيبه تعرف الحب وتحب...
من رابع المستحيلات..
▪▪▪▪▪▪
مجرد ماسمعت اللي سمعاته من صاحب الورشه سيبت الحصه ومشت جري طلبت اذن من الإدارة..
وطلعت من المدرسه تجري وماتدري..
خدت تاكسي ومشت للورشه ودارت عركه مع صاحبها لقلب السمي فضحت بيه مسكين ومسحت بسمعتهم الوطا..
بعدين مشت وخلتهم..
قعدت تمشي مسافه ع رجليها وهي في قمة الغضب وقلبها محروق ع سيارتها تحبها هلبه تقول بنتها مش سيارتها..
وع قد ماعطلت معاها مافكرتش حتى مجرد التفكير تبيعها من حبها فيها..
وهي ماشيه في نص الطريق وقفت..
رفعت حاجبها اليمين وعقداته مع اليسار وهي تذكر في حاجه..
<< سيارتك مش طالعه لورشه تانيه لو توقفي ع رموش عيونك..>>
غمضت عيونها بعصبيه وفتحهم وهي تقول:ياغبو يانوسه مفروض من الأول فكرتي فيها باجحشه مافيش غيره نسناس خالد الكبير..ضيقت عيونها بوعيد وقالت..كان ماحبستك مانوليش نوسه بنت حكيم الكاتب..
لفت يمين شبحت للكياس..
حطت ايديها في نصها وقعدت تراجي تجي تاكسي..
بعدين شافت وحده اشرتلها وقفتلها ركبت..
السواق:وين يااختي..
نسيبه بحده:حي *****..
وطول انطلق بيها السواق لوين ماقالت..
••••••°°°°°•••••°°°°°•••••
☆قدام ورشة ولاد خالد..
كان خليل واقف في الفم حاط ايديه فجيوب القامجو ويدندن ويشوف لطريق مرة يمين مرة يسار..
وخوته داخل يخدموا ويهدرزوا..
رفيق:صار حصلت منهم 20 الف..
جهاد بإبتسامة غرور:حطوهم عين تبكي وعين تضحك..
رفيق:اطلع القرش من تحت الوطا انت..
جهاد قعد محتفظ بإبتسامته وماردش..
سكتوا شويه..بعدين قال رفيق..
رفيق:اشهب..
قام عيونه وشبحله..
رفيق وقف ع حيله وجاه..
وقف حداه وقال بضيق:مش عارف شن ندير بش نخليها تحس بيا..مش معبرتني بكل..نحس فيها عارفه شن فيا لكن مدايره الحوله بالقصد..
جهاد وقف ع حيله وقاله:علاش؟
رفيق:مش عاجبين..
جهاد شبح لخليل وهو يقول:لو هكي فوتها زي ماقال شارون..
رفيق بتهكم:شن تحسابوها انت وخوك ساهله امتى نبي نفوت نفوت..راهو الحاجه هادي هني..خبط بيده ع قلبه وقال..هو مايبيش ينسى ولايفوت افهموا..
جهاد تأفف بضيق بعدين حط يده ع كتف خوه وقال:باهي اصبر لين تكبر البنيه شويه باك تقدر تقرب منها وتكلمها وتصارحها وتفهم عليك..
رفيق مط شواربه بضيق..بعدين مشي للسيارة اللي كان يخدم عليها..
جهاد وهو يشوفله"مالك ومالهم الناس هادو ياخوي بس"..
حرك راسه يمين ويسار بعدين شبح للباب..
شاف خوه الكبير كيف واقف يشبح يمين ويسار ويمضغ في المستكه..
فهم ان خوه متوتر..وهادي علامه تبين هالشي..
وجهاد لما يشوف خليل متوتر يتوتر معاه.. فكر ان حالة التوتر هادي ليها علاقه بخدمتهم التانيه..
ماكانش متخيل حتى مجرد الخيال ان الحالة هادي ليها علاقه بس بقلب خوه..
اللي بدي يزيد في النبض لما بانت عليه تاكسي واقفه في اول الشارع من قبل ماتنزل طول عرفها جايبتها..
شويه وبانت عليه هي جايه من بعيد واضح انها في قمة الغضب من مشيتها..
هو شد ضحكته وغير عيونه عنها ودار روحه يشبح هني وهني عادي جدا ولاكأنه داير حاجه ولاليه علاقه بحاجه..
اما هي..
نسيبه بغضب:والله انت يازوفري ياسفتول..
وسرعت مشيتها وهي جاياته..
وهو كان يدندن بصوت منخفض..شبح ايساره بشي من البطء شافها جايه بسرعه وملامح وجهها تخوف..
رفع حاجبه اليسار..
لما وصلت فيه وقفت وقالت:اخرتي بنخليك تكمل عمرك كله في الحبوس..يااني نرتكب جريمه ونكمله غادي..
هو ببرود قعد يشبحلها ويغني..
حبيبي خودها ومني ليك مشتريك اه مشتريك
فوق ماتتصور كمان والوحيد ولاليك شريك..
ضمت شواربها لداخل بغضب..
وقامت هاتفها وقالت:تو نوريك كيف نقول ونفعل..
ضم شواربه لداخل وهو شاد ضحكته يشوفلها شن دير..
اتصلت برقم المركز متاع الحي ردوا عليها طول:ايوه..اني عندي بلاغ..سيارتي انخنبت ونعرف خانبها وأهو واقف قدامي خفو رواحكم وتعالوا لشارع*****..قدام ورشة ولاد خالد...
قالتها بإزدراء..ونزلت تليفونها وشبحت وقالت..وريني كيف تخلص روحك..
خليل:انتي بسكوتايه مقرمشة..
يابت ده انتي قطه مخربشه..
قرب منها فجأة وقال فوجهها..مياااوو..
هي تقول ضربها الضي..
تلقائيا مدت يدها ونزلت ع خده اليمين بكف لاقبله ولابعده..
خوته الزوز اللي كانوا يتفرجوا ع الموقف تلقائيا حطوا ايديهم ع خدهم وكإنه نزل ع وجوههم هما...
هو بعد ماقريب الكف طيرله راسه..
لفه جيهتها وهو مغمض عينه اليمين وع وجهه ابتسامه وحاجبه اليمين مرفوع ويغني..
بنت الزوات انتي اللي هتصوني..
ياأحلى البنات يالوز يابنبوني.
هي حست بشعور مش حلو بكل وقتها بالنسبه ليها..
شعور اربكها هلبه وخلاها تحس بشي من الضعف..
حدها شبحتله من فوق للوطا وقالت:حيوان..
ولفت ومشت بسرعه بعيد عنه ووجهها مولي لونه احمر..
وقفت لما شافت سيارة الشرطه جايه..
درست بالزبط قدام الورشه..
تبعتها بعيونها وهي تشوفلها بعدين مشتلها طول..
وخليل يشبحلها وهو يغني..
وخوته الزوز طلعوا ووقفوا معاه وهما مفجوعين..
وكذلك بوه اللي كان طالع من الزنقه..
لما شافلهم مشالهم يجري...
وصل فيهم وشاف نسيبه عقد حواجبه بإستغراب..
نزلوا الضباط الزوز من السيارة ع وصلتها هي..
نسيبه بشي من الإنفعال:اني صاحبة البلاغ..اشرت ع خليل بدون ماتشوفله وقالت..اهو ياافندي خانب السيارة..
خالد:سيارة شني!!؟ مش انتي كنتي حاطيها فالورشه بش يصلحوهالك؟!
شبحتله بإمتعاض وقعدت ساكته..
رفيق:خدتها امس..
الضابط لخليل:الاخت مقدمة ضدك بلاغ تقول انك خانب سيارتها..
حول خليل السماعات وقال وهو رافع حواجبه:نعم؟!
التاني قاله بحده:مشطت سيارتها؟
خليل شبح لنسيبه وعقد حواجبه بإستغراب:مشطت سيارتها!؟ مش امس خديتها من الورشه!؟
شبحولها الزوز..
نسيبه:كنت حاطتها عندهم من اسبوع بش يصلحوها ولما ماقدروا يديرولها شي طلعتها من هني ورفعتها لمكان تاني
خالد بضحكه:ايه وبعدين!!؟
الضباط قعدوا يشبحولها..
هي بشي من الربكه:كلمني اليوم صاحب الورشه التانيه اللي حاطتها فيها قالي انخنبت..
خالد:وباهي شن علاقتنا حني؟! بدال ماتحاسبي الورشه اللي خنبوا منها سيارتك جايه تحاسبي فينا حني؟
الضباط الزوز شبحولها تاني..
هي بلعت ريقها وشبحت لخالد بعقدة حواجب..
وخليل يشوفلها وحاجبه مرفوع..
خالد:مفروض حني نبلغوا فيك اللي جيتي قريب 20مرة للورشه تصلحي فسيارتك وماتدفعيش فولا قرش..هدا فوق البلاغ الكاذب والإضرار بسمعة مكان خدمتنا..
نسيبه بسخريه:سمعه!! اللي يسمع يقول برلنت..
شبحولها التلاته بحده..
ماعدا خليل اللي قال:قدامكم الورشه خشوا شوفوها وحوشنا كان تبوا واي مكان لينا في اي تركينه هني وتتأكدوا برواحكم ان مافيش واحد فينا يعرف شي عن سيارة الأبله..
نسيبه:انت هددتني وقلت سيارتك مش حتتصلح في مكان تاني..
خليل مط شواربه للأسفل وهو عاقد حواجبه بإستغراب بعدين قال:هدا امتى صار!!؟
جهاد:هي جت خدت سيارتها ومافي حد فينا وقفها الشارع كله يشهد انها الوحيده اللي تصلح فسيارتها وماناخدوا منها فشي بكل والحق هي ماتبيش تعطي لانها مراة مشيناها..
🌿لأول مرة نسيبه تحس روحها مرتبكه ومش عارفه تتصرف ولاطلع روحها من ورطة هي بنفسها طيحت روحها
فيها..
الضابط وهو يشوفلها قال؛الوضع هكي انقلب ضدك..
شبحت للضابط وكيف جايه بتتكلم سبقها خليل وقال..
خليل:مسامحينها يافندي ماصار شي خلاص..
نسيبه بشي من العصبيه:لا صار وصار..ارفعوني للمركز ولايمن عليا اللي يسوى واللي مايسواش..
خالد ضحك وحرك راسه يمين ويسار..
وجهاد ورفيق يشوفولها وهما مبتسمين بتهكم..
اما خليل قال:خلاص فوتوها يافندي ماصار شي..سوء تفاهم..
الضابط:تمام هدا نعتبروه سوء تفاهم..لكن سيارة الأخت فعلا مسروقه..تعالي معانا قدمي بلاغ رسمي في المركز وحني نديروا شغلنا..
نسيبه بنرفزة:خلاص مانبي نبلغ على شي ومعاش نبي شي..
ولفت ومشت وهي معصبه ع الآخر ودموعها عبوا عيونها..
حست روحها غبيه وضعيفه وماتعرفش تتصرف..حست بعجز اول مرة تحس بيه..الموقف كان بايخ هلبه صغرها في نظر نفسها هلبه..
وخليل عيونه معاها وهي تمشي..
بوه وخوته كانوا يتناقشوا مع الضباط وهو مش معاهم بكل..
معاها هي وبس لين ادرقت من قدام عيونه..
ابتسم ابتسامه خفيفه وتنهد بعدين انتبه مع الحديث اللي يدور بين المحيطين بيه..
••••°°°°°•••••°°°°°•••••
الساعه الثانية عشر والنصف قبل الظهر..
بعد اللي صار...
خليل طلع من الورشه ومشي لمشوار يخصه..
ورفيق كمل خدمه مع بوه..
اما جهاد فكان ماشي للشارع اللي يسكن فيه صاحبه بيتفقوا ع موضوع ما..
وصل للمحل..
مشي خشله لقي فيه صاحبه يهدرز ع صاحب المحل..
صاحب المحل لما شاف جهاد وجهه انقلب..
وجهاد جي لصاحبه طول خبطه ع كتفه وقال:شن جو..
صاحبه:مليح..بحبحت وبتبحبحنا الليله..
جهاد وهو مبتسم ع جنب:الامور منظمه وكل شي واتي الليله سهرة العمر..
صاحبه:مانتوقعش منك اقل من هكي..خلاص نتلاقوا في *****
جهاد:اوكين..
صاحبه:اوينا..سلام حسام..
حسام صاحب المحل:وعليكم السلام..
ومشي صاحب جهاد طلع من المحل..
اما جهاد خدي شكاره وخش داخل وقعد يعبي فيها شكاليط من اغلى الأنواع..
وجي للكاصه وحطها عليها وقال:كم تبي فيهم..
الشاب خدي الشكاره من غير نيه..
فتحها ويدوب شاف اللي فيها بعدين شبحله وقال:30دينار..
طلع جهاد من جيبه ورقه من فئة 50 حطها ع الكاصه وخدي الشكارة وقال:الباقي ليك..
ومشي طلع بيها من المحل..
حسام بغضب :ال####..
وجهاد مشي كمل طريقه ع رجليه للورشه..
وين وصل اول الشارع..
وقف باص الجامعه..
هو شبحله..
شويه ونزلت منه رتاج..
هو لما شافها خطروا عليه عيونها ابتسم تلقائيا..
اما هي لما لمحاته ماتت من الخوف ومشت بسرعه..
هو قعد معاها بعيونه..
بعدين لف ومشي وراها..
هي ماتحسباش يمشي وراها..
وصلت في المحل ومشت خشتله..
وهو قعد واقف يراجي فيها..
في المحل..
رتاج؛السلام عليكم..
حسام وقف طول ومشالها وهو يقول:وعليكم السلام تفضلي شن تبي..انتي غير اشري بس..
هي مطت شواربها بإزدراء بعدين قالت..حكة طماطم وشيشة زيت..
حسام؛حاضر..
ومشي طول لوين مافي الزيت والطماطم..
ورتاج مش طايقه تقعد في المحل بسببه هو..
حسام يكون قريب بوها امه وبوها صغار عم..وميت عليها من لما كانت صغيره ويراجي لين يوتي روحه من جميع النواحي يش يخطبها منه..
وهي لاطيقه ولاتحبله شبح وجه..دمه رزين..وعنده في المكر..وغير هكي شين ورتاج الى جانب الأخلاق يهمها الشكل هلبه..
جاها وهو مظبط زوز شيش زيت وزوز حكاك طماطم..
رتاج؛قتلك وحده زيت ووحده طماطم!
حسام وهو يحط فيهم فشكارة قال بضحكه:التانيات هديه مني لخالتي سدينه..
رتاج"مثقل دمك"..
مدلها الشكاره خدتها بحذر بش مايمسش يدها حتى وهي مغطيه..
وحطتله الفلوس ع الكاصه ومشت طلعت..
وهو وراها..
هي لما طلعت..
تفاجئت لما شافت جهاد واقف قدام المحل وفي نفس الوقت خافت هلبه..
مشت بسرعه لعمارتهم وهي تشوف قدامها وبس..
وجهاد قعد بعيونه معاها لين وصلت عمارتهم وخشت..
حسام وهو يشوف لجهاد بحده قال:تفضل خوي..
شبحله جهاد شويه..بعدين لف ومشي ورفع يده بإشارة التحيه لحسام..بعدها نزلها وهو يكمل فطريقه مشي..
حسام خبط الباب بقوة ومشي خش داخل..
••••••°°°°°°°
وصلت رتاج لشقتهم..
وبعد طقت كالعاده فتحت امها..
خشت وسألتها؛بوي داخل..
سدينه:ايه هو وخوك..شبحت للشكارة وخدتها حستها رزينه قالت..شن هدا كله..
رتاج رفعت خمارها وقالت من فوق نفسها:من حسام..
ومشت طول لدارها..
سدينه وهي ماشيه للكوجينه:وليد حلال وكريم حسام هدا ربي يجعل وحده من بنياتي نصيبه..
🌷بعد خشت رتاج للدار وصكرتها عليها..
حولت ملايتها وهي تفكر من هو هدا اللي شافاته امس واليوم ؟!واليوم بالذات بانلها انه يلحق فيها؟!
ارتسمت ع وجهها ابتسامه خفيفه وهي سرحانه وين خطر عليها شكله...
مشت وقفت ع المرايا وقعدت تشوف لشكلها قالت في نفسها"هو غير شاف عيوني وصار فيه هكي مال كان يشوفني هكي شن يصير فيه!؟"
ضحكت ع روحها وتفكيرها...
بعدين مشت للباب فتحاته وطلعت بتمشي للحمام..
🌿رتاج مش ملتزمه دينيا..بنت عاديه زي كل البنات والخمار فرضه عليها بوها بعد خشت الجامعه..اما اختها دانيه اللي تقرا في الثانويه كانت تلبس في جبة رصاصيه وشاربه بيضا كبيرة وحتى هي لو نوت الجامعه حيلبسها ملايه وخمار...
بوهم من نوعية الرجاله اللي في صغرهم ماخلوا مادارو عاشوا بالطول وبالعرض وامثالهم من اللي شافوه وخوفا من ان اللي داروه يولي عليهم فولاياهم يصكروا عليهم من جميع الجهات وكان يلقوا حتى النفس يقطعوه عليهم بش يفتكوا مرة وحده..
وعبدالمجيد الى هده اللحظه مش مهني روحه🌿
مقعمز في المربوعه فيده تليفونه يتكلم ماسنجر..
(شن رايك ؟)
طوق الياسمين..
(ماشاء الله عليك مانعطيكش عمرك)
الطير الحر
(اسمعي بنقولك بنفتح موضوعك مع ولدي وبنجي نخطب)
طوق الياسمين
(وعادي عنده ولدك مايديرش مشاكل)
الطير الحر
(لالالا ولدي هدا مايعرفش يعارضني بكل)
طوق الياسمين
(باهي كلمه ورد عليا بنوض عندي ماندير)
الطير الحر
(غير خليك شويه)
طوق الياسمين
(لا وراس مجوده مانقدر وراي غدي هي باااي)
الطير الحر
(مالينا الا الصبر وخلاص)
نزل تليفونه وهو يقول:كان نشوفك بس..
ع جية مجاهد ولده كان في البالكونه يتكلم بالتليفون:هاه ياحاج توا فضيتلك..قعمز جنبه وكمل يقول..شن هو الموضوع الضروري اللي تبيني فيه..
ساوا عبدالمجيد تقعميزته..
ومن هالحركه زبط مجاهد شنو الموضوع اللي يبيه فيه بوه..
ابتسم بضيق وقعد يسمعله..
•••••°°°°°•••••°°°°•••••
مقعمز حداها ع الطاوله يقرض فالسلاطه وهو يهدرز ع مرته..
هيثم:شي يبكي الحجر ياأسيمه..باهي اللي ربي حفظ للعزوز صحتها بش عانت شيبانها لو قعدوا لصغارهم راهم من زمان مرحوم ومرحومه..
اسيمه بأسف:تس تس تس..
هيثم وهو يقرض في الخس ويشبحله:الواحد يربي ويكبر ويتعب وفي الأخير يكون هدا مصيره..
قامت عيونها اسيمه بعدين رفعت حواجبها والتفتت وقالت:ماتعممش الصورة هادي ع الصغار كلهم ياهيثم فيه اللي يثمر فيه وفي اللي لا..
هيثم بتهكم:ان شاء الله يثمر في اللي عندنا..
اسيمه:صغارك مافيش منهم ياهيثم..
شبحلها وقال تهكما:بالذات الكبير..من بعد اللي ريته منه الصبح واني متفائل
اسيمه تنهدت وقالت:باهي اني معاك اسلوبه معاك كان زفت لكن في نفس الوقت مش من فراغ مولي هكي
هيثم حط الموس وقال:لو بتجيها بالدين يااسيمه اني بوه مافي شي يبررله سوء اسلوبه معاي..تي غيره يتمنى يكون عنده بو زيي يرفعله راسه وين مايمشي مش خير مايقعد يكركر فيا الشوارع واني سكران طينه..
اسيمه ابتسمت وقالت:تعرف شن الغريب فالشي هدا ان ولاد السكير يحترموا في بوهم احترام مخليني مقدرتهم هلبه..
هيثم؛هي هني المصيبه! يعني هو عرف يربي واني لا!!؟
اسيمه سكتت وهو تشوفله بإبتسامة جانبيه..
هيثم: ماتشبحليش هكي اسيمه ايوه..
ونزل عيونه للسلاطه وخدي الموس وكمل تقريض..
اما هي حركت راسها يمين ويسار بأسف والتفتت بتكمل الماعين اللي كانت تغسل فيهم..
••••••°°°°°••••••°°°°°•••••
الساعه الواحده ظهرا...
☆في الورشه..
شاد فيده شكارة الشكلاطه وهو يقول:يصير منها بشكلاطه؟
جهاد؛البنات اللي عرفتهم من لما كنت فالاعدادي لتوا يكبدوا بطرف شكلاطه وهي مازال صغيره الحاجات هادي تحرك مشاعرها.
تنهد رفيق وقال: نقولوا ان شاء الله..
والقى اخر نظرة ع المرايه..
جهاد؛والله مش عارف كيف ماكبدتش فيك لتوا وانت نص بنات المنطقه طايحات فيك.
رفيق:مكتوب ع خوك العذاب هدا علاش..
بعدين مشي للباب طول وطلع..
اما جهاد وهو يشوفله خطرت عليه البنية المنقبة ابتسم وسرح فيها..
برا..
جهاد قعد يمشي بطريقه لبداية الشارع شاف اخته جايه وسارة معاها..
وهو وين يشوف سارة الولد ينسلب عقله سلب..
تهاني لما شافاته اضايقت..
شبحت لسارة وقالت:كملي بروحك سارة..
سارة شبحت وين ماتشبح بعدين رجعت شافتلها وقالت:باهي
مشت سارة من جهة تانيه بعيد عن رفيق
وتهاني مشت لخوها
هو انصدم لما شاف سارة مشت بعيد..
قعد يشبحلها بضيق ولهفه في نفس الوقت..
لين فاتت من قدامه..تبعها بعيونه وهي تمشي..
ماقدرش يشد روحه..مشالها طول..
تهاني:يانهاري الأحرف هي راس هالصاحبه بيقطعوني منها..
ولحقاته طول..
هو قعد ينادي:سارة..ياسارة..
سارة وقفت وشبحتله وهي متفاجئة..
وقف عليها وهو مبتسم بحب..مدلها الكيسه وقال:تفضلي..
شبحت للكيسه بعدين شبحتله من فوق لتحت..
وصلتهم تهاني وهي تقول:سارة..
سارة شبحتلها وقالت:ع خاطرك مش حنقول لبابا وياريت تكون اخر مرة يتمادى فيها خوك معاي..
ومشت طول بدون ماتشوفله.
هو تقول من خدي موس وقعد يخرط في قلبه خرط..
التفت وعطي لأخته الكيسه خدتها..
ومشي طول بعصبيه..
قعدت معاه بعيونها تشبحله كيف فات الورشه وماخشلهاش..
ع طلعة جهاد اللي كان حتى هو يشوفله..
لما ادرق شبح ايسار شاف اخته قاعده واقفه قاللها:روحي..
هي شبحتله شويه بعدين مشت..
وجهاد بعد ادرقت عن عيونه...ارتسمت ع وجهه ملامح الضيق وخش داخل..
••••••°°°°°°°••••••
خشت سارة للحوش وهي معصبه..
مجرد ماسمعت ضحك بوها وامها تلقائيا ابتسمت.
حولت كندرتها وصكرت الباب..
بعدين مشت خشت داخل..
كانت متردده تمشي للكوجينه لأن بوها فيها وفي الأخير تشجعت ومشت للكوجينه وخشت..
لقت بوها يسقي فالغدي..
وامها واقفه تشوفله وهي تضحك..
نظرات سارة لبوها كانت نظرات مختلفه..
اعجبت ببوها هلبه ولأول مرة تعجب بيه لأنها شافاته في وضع عفوي وحلو..
قعدت تتأمل فيه لحظات لين امها شافتها..
ضحكت وقالت:روحتي سارة..
هو شبحلها..
هي ارتبكت لما شافلها غيرت عيونها عنه لأمها وقالت:ايه توا بس..
اسيمه:باهي بري بدلي بسرعه الغدي واتي..
سارة:حاضر..
وكيف جت بتمشي وقفت لما سمعت بوها قال..
هيثم؛ترا اوقفي..
شبحتله بخوف..
هو جاها وقف عليها وحط كف يده ع جبهتها بعدين قال:امم كويس مافيش حرارة..
بعدين شبح لعيونها ونزل جفونها التحتانيات لوطا بسبابتيه بعدين قال:كويس..حول ايديه وقال..بري..
هي شبحت لأمها شويه ووجهها مولي احمر بعدين لفت ومشت طلعت..
ضحكت اسيمه بآستغراب وقالت؛خيرها؟
هيثم التفت وشبحلها حك حاجبه وقال:امس في الليل سمعتكم..
وفيسع غير عيونه عنها ومشي للطاولة يكمل باقي تسقي الغدي..
وهي تشوفله بإبتسامه..
هيثم؛ترا قوليلي نحط الخضرا الاول ولا البصله..
ضحكت وقالت:البصله..
ع خشة زياد وخواته الصغار..
مشوا التلاته لديارهم..
فاتوا من حدا الكوجينه..
البنيات لما شافوا بوهم شن يدير في الكوجينه..
شهقوا بدهشة وخشوا يجروا وهما يقولوا:بابا دار الغدي..بابا دار الغدي..
قعدت تضحك اسيمه..
اما هو كان يهز فراسه وهو مبتسم بشي من الإحراج ويقول:باهي..باهي..
اسيمه شبحت لزياد خفت ضحكتها..
وزياد شبحلها ابتسم متهكما بعدين مشي لداره...
تبدلت ملامح ضحكتها للحزن وقعدت تشبح لراجلها كيف يحاول يساير البنات الصغار..
ولأنه بطبعه مايسايرش فالصغار هلبه خافت يكشخ ع البنات قالت؛هيا ماما بسرعه بروا بدلوا حوايجكم بنتغدوا..
الزوز مع بعض قالوا:حاضر..
ومشوا جري طلعوا من الكوجينه.
هيثم:ريحتي راسي..
اسيمه بضحكه؛ربي يعطيك شوية وسعة بال..
هيثم ضحك وقال؛هي عندي غير مش ديما تحضر..
اسيمه بضحكه؛يجعلها تحضر ديما..
ضحك هيثم وهي معاه...
••••°°°°°••••°°°°••••
"نوسه...نوااسه"
هادي ماجده خالتها طق ع باب دار نسيبه اللي من لما روحت خشت حبست روحها فيها..
ماجده:يانوسه اطلعي الغدي طاب..راهو دايرة رشدة كسكاس بالوطني زي العسل..
مافيش رد..
ماجده بقلق:لا اني بنتصل بهيثم وخلاص..
"لااااااا"
ماجده؛امالا افتحي..
شويه وانفتح الباب..
طلعت نسيبه وهي عاصبه راسها ولابسة نظارات سود قالت بنبرة زعل خشنه؛وين الرشده..
ماجده:شن اللي دايرتيه في عمرك اللطف؟
نسيبه:بتحطيلنا السمسام ناكلوه ولا نولي نصكر ع روحي..
ماجده شبحتلها ع جنب بريبه بعدين قالت؛تبت علينا عقولنا لين نوصلوا قبورنا..
لفت نسيبه وجت بتولي لدارها..
ماجده؛خلاص خلاص هاني ماشيه بنجيبه بري لوسط الحوش..
ومشت طول للكوجينه..
اما نسيبه مشت بخطوات سريعه لوسط الحوش وهي تقول:تو نوريه والله لما نوريه..
حولت النظارات مسحت دموعها قبل ينزلوا بعدين ردتهم وقالت بصوت عالي:تي هيااا ياخالتي عاد متنا بالشر..
••••°°°°°•••••°°°°°•••••
"زياد"
زياد وهو راقد ع سريره ومغطي عيونه بذراعه:بنرقد يام بنرقد تغدوا انتم..
اسيمه بحده:زياد تعرف لو مانضتش توا معاش نبي لسانك يخاطب لساني..
حول زياد ذراعه وقال:شن جابه توا هو؟
اسيمه بصدمه؛زيااد!
ناض قعمز وهو يقول:امي انتي اكتر من يعرفه وين يشوفني لازم يفتح مواضيع تسكر النيه وتحرق الأعصاب واني معاش قادر نشد روحي..
اسيمه؛مايبي يتكلم في شي هو يبي يتغدا وبس..وهيا نوض يازياد..
ومشت للباب وهي تقول..ماتخلنيش نغضب عليك..
وطلعت..
غمض عيونه بنفاد صبر بعدين قال:الصبرررر..
فتحهم..
بعدين نزل من السرير بالسيف ومشي للباب وطلع من الدار..
وقعد يمشي بالسيف.
وصل في المكان اللي فيه طاولة الطعام لقاهم كلهم مقعمزين..
بوه كان ضام كفوفه لبعض وحاطهم تحت ذقنه وهو يشوفله بطرف عينه كيف جي وقعمز ع يساره..
نزل ايديه وقال متهكما؛طيب فينا..هي ابدوا تغدوا..
مرروا اسيمه وسارة نظرهم بين زياد وهيثم..
كل واحد فيهم بدي ياكل وملامح وجوههم متجهمه..
بدوا ياكلوا كلهم في هدوء..
شويه هيثم ركز ع ريحان كيف تخلط في السلاطه بالرز وتحرك فيهم بدون ماتاكل..
هيثم؛ريحان..
شبحولها كلهم..
هيثم:ياتغدي باهي يانوضي..
اسيمه شبحت لهيثم..
ريحان حطت الكاشيك ونزلت من ع الكرسي ومشت تجري..
وجنان جت بتنوض وراها..
هيثم:جنان!
شبحتله بزعل..
هيثم؛كملي غداك..
شبحت جنان لأمها..
اسيمه ابتسمت وقالت؛تغدي ماما تو ندس لريحونه حصتها..
هزت جنان راسها وكملت ماكله..
رجعت شافت اسيمه لهيثم لقاته ياكل عادي.
شبحت لزياد وساره لقتهم ياكلوا بالسيف..
تنهدت بعدين كملت ماكله..
ورجعوا لنفس الهدوء..
شويه واسيمه قالت:بوكم اليوم بيطلع في برنامج فالتلفزيون..
زياد بلامبالاة؛ديما يطلع فالتلفزيون فالبرنامج متاعه وين الجديد..
شبحله هيثم وقال:برنامج حواري يابو العريف..
زياد وهو لاهي بصونيته؛ وفي شن بيحاوروك؟!
اسيمه قعدت تراقب في حديثهم بقلق..
وسارة كذلك..
هيثم:في انجازات بوك اللي انت اخر من يعلم بيها..بتهكم كمل يقول..طبعا وقتك كله وانت تخبرش وتلبز ومش عارف شن ادير ماتندري علي حاجه..
شبحله بتضييقة عيون وقال:انت تستمتع لما تهزا عليا وع الشي اللي نحبه تستمتع وانت مخلي روحك كسار مجاذيف لصغارك كان ماداروش اللي يعجبك يولوا فشله وضايعين..
هيثم شبح لأسيمه واشر بسبابته عليه وقال:تفاهمي معاه انتي.
اسيمه بتوتر:خلاص زياد امي نوض لدارك..
زياد ناض وقال:من الاول قتلك مانبيش نطلع نقعمز معاه..
ومشي من حداهم..
هيثم شبحله بحده وقال:وقح..قليل ادب..
بعدين ناض وهو يقول..واحد تافه مايثمر فيه شي..اللي زيه ماني راجي منه خير لا توا ولا بعدين..
وصل في الباب خدي شنطته ودجاكته ولبس كندرته..
وفتح الباب وصكره وراه بقوة..
اسيمه كانت شاده ذقنها بيدها وهي مخنوقه بدموعها اللي حابستهم..
وبنتها تشوفلها بحزن وقلبها موجوع..
▪▪▪▪
◇ ماكنتش نعرف نعبر..هدا اكبر عيب كان فيا..طبعي جاف وقاسي شويه وقتها ممكن جينات لان بوي كان هكي..بس الحق ونعترف اني كنت اسوأ من بوي..
اني راهو زي اي اب يفكر في مصلحة صغاره..يشوف للأمور بنظرة شامله كامله..
كنت نبي زياد يدير سيرة ذاتيه لروحه من توا..يتعلم حاجات تنفعه مستقبلا يلقاها..كنت نبيه يخش طب لسبب واحد كنت نبي نساعده بش ينجح فيه ويكبر اسمه بإسم بوه..نبي مستقبله يكون مضمون..الفن عمره مابني مستقبل...
اممم..هو اني لهداكا الوقت كنت نحساب هدا الصح..لهداكا الوقت ماكنتش مدرك اني فالحقيقه مانشوفش للوضع بنظرة شامله لا بالعكس اني كنت نشوفلها من زاويتي اني وبس...
••••°°°°°°•••••°°°°°••••°°°°•••••
الساعه الثامنه والنصف مساءا..
"يام طالع"..
طلعت عفاف من الكوجينه وهي تقول:شكلك بايت برا..
جهاد هز راسه بإيجاب وهو يلبس في سبيدروه..
عفاف:باهي خوك رفيق وينه اليوم من طلعته الصبح معاش روح..
جهاد:باك اشبح وين ماشي تو يروح..
وفتح الباب وطلع وصكره وراه..
هي تنهدت بحزن بعدين ولت للكوجينه..
برا..
جهاد وهو ماشي للباب الخارجي فتحه طلع في وجهه خليل..
خليل:وين؟
جهاد:سهريه مع الاولاد..
يعرف خليل نوعية سهريات خوه اللي يدير فيها بين فتره وفتره لهدا رد عليه يقول:رد بالك تروح الحوش قبل تنظف الحوازه كويس..
جهاد طبطب ع كتفه ومشي طلع من حداه..
وخليل خش وصكر الباب..
داخل فالحوش..
كانت تهاني مقعمزة في وسط الحوش قدام التلفزيون حاطه ع وحده من القنوات الليبيه اللي فيها برنامج اسمه" لقاء المشاهير.."
يستضيف المشاهير ع جميع الأصعده حتى السياسيين..
وحلقة اليوم ضيفها مشهور في عالم الطب والصحه..
بدي البرنامج..
وتهاني قعدت تنادي:يام..يماااا..
طلعت عفاف بسرعه من الكوجينه ومشت لوسط الحوش..
ع خشة خليل للحوش سمع تهاني وهي تنادي في امه..
صكر الباب وحول اللي فرجليه وتوجه لوسط الحوش..
وصل فيه ووقف في الفم لما شاف هيثم فالتلفزيون..
ابتسم ع جنب وقعد يتفرج..
ومش حوشهم هما بس اللي كان يتابع في اللقاء..
الشارع كله..وكل من يحب الدكتور هيثم اللي كان معروف هلبه..حتى ع مواقع التواصل كان عنده حساب ع الإنستقرام يطلع فيه بث لمدة ساعتين يومين في الاسبوع بش يجاوب ع اسئلة الناس في مجاله..
وكان اسلوبه حلو ودمه خفيف يوصل في المعلومه ببساطه...
☆☆
الإعلاميه بضحكه؛خلينا نطلعوا من البالطو الأبيض شويه ونمشوا لحياة هيثم الكاتب بعيد عن حرف الدال اللي يسبق اسمه..
ضحك وقال:تمام..
الإعلاميه بإبتسامه:هيثم الكاتب الزوج الأب الأخ..هل هو شخصي مثالي زيه زي الدكتور هيثم الكاتب؟
تنهد وقال؛هو اني مش متالي في الحالتين..اني عادي جدا ندير في واجبي مادرت شي زايد عنه..
الاعلاميه:باهي..بعيد عن المتاليه هل انت داخل اطار حياتك الخاصه صاحب صورة جميله؟..
◇اني متأكد وقتها ان اجابة السؤال هدا صغاري 4كانوا يستنوا يسمعوها ايه حتى جنان وريحان اللي نقولوا ع اللي في عمرهم صغار مايفهموش الدوة هادي..لاهما يفهموا ويفهموا كويس..
واني في هداكا الوقت مانملكش الإجابه..يعني السؤال هدا مامرش عليا اصعب منه في حياتي كلها..
ولازم نكون صادق في الإجابه قدام صغاري...لازم..
▪▪▪▪
أسيمه كانت تراجي في الإجابه حتى هي وتدعي من قلبها ان هيثم مايخيبش ظنها...
اما صغاره..
زياد وسارة كانت مرسومه ع وجوههم ابتسامه متهكمه...
والتوأم الصغار كانوا يشبحوله ويحاولوا يفهموا اللي يسمعوا فيه..
هيثم ابتسم وقال:في الحقيقه..الصورة عاديه جدا علاقتي بعيلتي علاقه عاديه زيها زي كل العلاقات العائليه مافيهاش شي مميز..
الإعلاميه:عندك 4صغار؟
هيثم هز راسه بإيجاب..
الإعلاميه؛عندك خلفيه عن طموحاتهم..
هيثم ضحك ودار بعيونه في الأستديو بعدين قال:هما يعني مازال صغار يعني مازال بكري ع كلمة طموح بالنسبه للي في سنهم..
الإعلاميه هزت راسها وقالت؛ع العموم هما في كل الاحوال محظوظين بحضرتك..
ابتسم مجامله وقال:شكرا..
الاعلاميه ابتسمت وشافت للكاميرا وقالت؛نطلعوا فاصل نريحوا فيه ضيفنا شويه وبعدين نولوا ماتمشوش بعيد...
☆☆
تهاني تنهدت بحسرة وقالت؛ايه والله محظوظين يابختهم بيه بو غير صيته الباهي ساد
عفاف:هو يقول علاقتي بيهم عاديه وحق ربي معاملته لمرته ماريت ليبي يعامل فيها لمرته احترام،تقدير..عيني ماضرهم..
خليل:اني نشوف في العكس..
عفاف شبحتله وقالت:عكس شني اللي تشوف فيه!خشيت حوشهم وشفت بعيونك!؟ اني خشيت حوشهم وريت راجل مقوم ماخصاته حاجه مش كيف البلوة اللي بالينا بيه ربي..
خليل وهو يحاول يكبت غضبه قال؛تمام تمام..مانيش مناقشك يام..
ولف ومشي بيطلع من حداهم انصدم وين ري بوه واقف وباين عليه كان يسمع..
خليل قعد يشبحله..
اما هو ابتسم ع جنبه وفات من حدا ولده ومشي لدار النوم..
غمض خليل عيونه وفتحهم بأسف بعدين مشي لداره هو وخوته..
••••°°°°°•••••°°°°•••••
الله يبارك ع وليد اختي الله يبارك..
نسيبه بإيتسامة عريضه:ديما رافع راسنا هيثومه..
ماجده شبحتلها وقالت:باهي لعند امتى بتقعدي مدايرة هالحداد؟!
تعكرش وجه نسيبه وهي تقول؛لين نلقى بنيتي حسبي الله في اللي فرق بيني وبينها..لخبطيلي جوي ياخالتي ضروري اذكريني وتنكدي عليا..
وناضت من حداها ومشت طول لدارها..
ماجده وهي تشوفلها؛يارب يااارب يجيها صاحب النصيب ويرفعها اني والله مادخلي فيها ومعاد مراجيتها بنتزوج يعني بنتزوج..
🌷اما عند نسيبه..
لما خشت دارها..
حولت النظارات وفكت عصابة راسها ومشت تلوحت ع سريرها وهي راقده ع بطنها..وشعرها نزل ع عيونها اللي كانت تنزل منهم الدموع..
اللي مبكي نسيبه توا مش سيارتها وبس..
اكثر سبب بكاها الشعور المزعج اللي حست بيه قدام خليل
شعور فيه ضعف عمرها ماتعودت تحس بيه..
حست روحها لأول مرة تنهزم في حياتها قدام حد..
🌾اما خليل..
فليلته كلها قضاها وهو يفكر في اللي صار بينه وبينها الصبح..
الكف اللي حصله منه لو عطاهوله راجل كان قطعله يده من منبتها..
لكن هي بالذات راضي منها بكل شي...اي شي يكون فيه تواصل بينه وبينها
غمض عيونه ورقد مرغم من التعب..
ولحسن حظ رفيق ان خليل رقد وماشافاش جاي للحوش سكران..
كان سكران لكن مش ثمل تماما..
وين جي خاطم من قدام حوش هيثم وقف قدامه وقعد يشبحله بنظرة قهرة
فجأة سمع صوت تخطيف رجلين جاي من الحوش
مشي طول
انفتح الباب وطلع زياد لسيارة امه بيدخلها نستها برا..
شوي التفت وشاف رفيق يمشي بخطوات مش متوازنه..
شبحله بإزدراء بعدين مشي لسيارة امه وركبها..
ورفيق وصل لحوشهم..
يدوب قدر يفتح الباب بالمفتاح ويخش..
صكره وراه بهدوء بش مايحس بيه..
وقعد يمشي بحذر برغم ثقل خطواته..
وهكي لين خش لداخل الحوش ووصل في دارهم..
فتحها وخش لما شاف خليل خاف شويه..
مشي لسريره انطرح عليه ورقد..
🌿خليل كان محرص ع خوته اللي بيشرب مايروحش للحوش ساد بوهم امر واقع ماعندهم مايديروا معاه لكن هما في بعضهم يقدروا يحطوا لبعض حدود..
خليل برغم مشيه في طريق بوه البطاله عمره ماخدي اي شي لاشرب لاخدي مخدرات ولاحتى دخن..في نظره الحاجات هادي مش بس اضره حتى تنقص من قدره كراجل وتحط من قيمته..🌿
•••••°°°°°°•••••°°°°•••••
تاني يوم الصبح...
بعد لبست طلعت من دارها ومشت لخالتها فالكوجينه..
خشت عليها وهي تقول:من قالك قولي لهيثم ع السيارة؟
ماجده:لا لازم نقوله يدورلك حل قبل اديري فروحك حاجه..
نسيبه:شن قالولك عليا مهبوله هاربه من مستشفى قرقاش!
ماجده؛لا مهبوله لتوا ماجاش من يحطها غادي بالك تعقل..
نسيبه؛غير جيتي خالتي كان هدا عرفت شن نرد عليك..
ماجده؛قردة من يوم يومك قرده ولسانك اطول من السريع..
رن تليفون نسيبه شافت من لقاته هيثم قالت بتذمر:وواااااك..والله ماتبي كان نتشه من قرجومتك..واشرت ع رقبتها..
ماجده؛قليلة ادب..
فتحت الخط نسيبه وردت:هاه هيثم وصلت؟...عقدت حواجبها بإستغراب وقالت...لالا...........شن في؟
شبحتلها خالتها...
نسيبه؛اوكي نازله راجي شويه..
نزلت تليفونها وصكرت ومشت تجري للباب لبست فرجليها شبشب صبع..
فتحت باب الشقه..
ونزلت تجري من الدروج..
لين وصلت لوطا..
وطلعت برا العمارة تجري...
فجأة وقفت في مكانها جامده..
لما شافت سيارتها مدرسه فم العماره..
كانت مزينه تقول سيارة عرسان...ونظيفه تقول جديده..
هي حكت عيونها وقعدت ادقق بالنظر..
بعدين حطت يدها فوق عيونها وهي تحاول تركز..سيارتها ولامش سيارتها..
ع جية خوها وقف حداها وقال:هدا شني ياأبله؟!
شبحتله شويه بعدين رفعت ايديها فوق وقالت؛وحق ربي مانعرف يادكتور والله العظيم..
هيثم رفع حاجبه وقال؛شكله في حد داير فيك مقلب..
نزلت ايديها وشبحت للسيارة وقالت:احمم ايه اكيد واحد من الطلبه اللي نقري فيهم تو نعرفه من هو ياويله مني..
هيثم بضحكه:حتى انتي خفي عليهم شويه ماتخليش نقعمزك فالحوش..
ابتسمت بربكه وقالت؛لا عاد مش لهالدرجه..
هيثم بإبتسامه؛خلاص اسمعي الكلام..
هزت راسها وقالت بإبتسامه ريبه:حاضر..بعدين قالت..خالتي تراجي فيك..
هيثم:استاحشت نهدرز عليها..هي تعالي..
نسي
