رفع نظره للمرايا وشاف عيونها تناظره نزلت عيونها و توترت من ناظرته تنهد وابتسم بخفوت هو يحب يتامل جمال عيونها يبي لساعات لايام لسنين يتاملها ولا يمل
وصلو للمحطه و وقفت سيارة غيث و بعدها سعود نزلو البنات ودخلو على طول للبقاله يشترون اغراض سهرتهم مرت من رف العصائر سرحت وهي تتذكر الموقف اللي صار لها هنا ويوم هجم عليه وضربه للان ما نست الاحداث اللي صارت ولا غاب شكله عن بالها
مر يتاكد عليهم وحده وحده وقف وهو يشوفها تناظر للفراغ ناظر للمكان اللي تناظره عض شفته لما عرف انها تذكرت اللي صار جاء وراها بهدوء
سعود : اعتبريه كابوس و راح ما يحتاج تفكرين فيه
فزت برعب يوم سمعت صوته لفت عليه : ايش اللي اعتبره كابوس مافهمت كلامك وقصدك ؟
ناظرها يوم لفت عليه هو يضعف قدام عيونها يضيع بشكل فضيع تضيع كلماته تتبعثر حروفه و تضيعه هو بكبره بسبب هالعيون و الرموش جمع نفسه و حروفه وكلماته عشان يعرف يكلمها ولا تبعثره كذا
سعود : المكان اللي تناظرينه ادري انك تذكرتي الموقف اللي صار ويوم ضربت الخسيس ذاك واقولك اعتبريه كابوس لك وتعوذي من ابليس و روحي شوفي البنات خلصو لان جدي يتصل يبي نرجع
هزت راسها بالايجاب وراحت تنهد سعود و تكى على الرف اللي جنبه وهمس بينه و بين نفسه
فعيونك أسرار تقتلني و تحييني
ميلاد عشق و عذاب قلوب فعيونك
في رحلة الشوق وش ودك تسميني
شهيد هالحب ولا صرت مظنونك
وان جيت تسأل أنا في هالحكي ويني
نظرات عيني على حبك يدلونك
صفقت له يوم سمعته : الله على اخوي الشاعر بس يا ترى مين هي ملهمتك اللي خلتك شهيد هالحب وغمزت له
لف عليها سعود : يمه منك تراقبيني انتي خوش اخت الصدق
ضحكت عبير على شكله : لا ياخوي ما اراقبك بس اني سمعت واحد يقصد القصيد وجيت اشوفه وطلعت انت
سعود : يلا امشي قدامي بس جدي احرق جوالي من الاتصالات عائلة بو هزاع بيرجعون لازم نستعجل
هزت راسها بالايجاب ومشت قدامه
شافت البنات واقفين عند الكاشير يحطون اغراضهم وقفت عندهم : تدرون اني سمعت سعود اخوي يقول قصيده بينه وبين نفسه ويوم سالته ضيع الموضوع
معالي : جاني فضول اعرف مين اللي يقصد فيها وصارت ملهمته
ناظرته وهو واقف بعيد عنهم جلست تتامل وقفته كيف فيها هيبه و شعره المبعثر و عيونه البنيه الكبيره نزلت نظرها ليده و شد انتباها عروق يده كيف بارزه رفعت نظرها له وهي تشوفه كيف يضحك مع اخوها غيث هي اول مره تشوفه يضحك كذا كانت تشوفه بس مبتسم
طقة كتفها شيخه : اقول امواج شوفي نظرات منى لسعود كيف شوي وتاكله بنظراتها
لفت تناظر منى وكيف فعلاً تناظر سعود ولا تبعد نظراتها عنه و كيف انها ملاحظتها طول الطريق بس تناظره حست قلبها يوجعها لفت على البنات : يلا بنات تعالو نركب السيارات
وصلو عند السيارات جت منى بتركب بس وقفتها امواج : اقول منى شرايك تروحين مع غيث اخوي انا بخاطري اخذ معي علياء هالمره تغيير اذا سمحتي
انحرجت منى من تصرف امواج وكيف انها سوت كذا معها وراحت بعصيبه تركب بسيارة غيث
امواج وهي تركب سيارة سعود: اوف الحين توسعت السياره علينا كنا مكتومين
لفت عبير على امواج : انتي شنو جاك مسكينة البنت كان خلتيها تجي ويانا حيل كسرت خاطري
امواج وهي تقلد عبير : حيل كسرت خاطري اقول عبيروه دامنا مروقين خلينا مروقين و شغلي لنا شي ننطرب عليه قبل نحرك للمزرعه
وصلو البنات للمزرعه ونزلو و راحو لقسمهم عبير بحزن : حيل راح اشتقت لكم ضمت علياء بحزن وبادلتها علياء الحضن
امواج بابتسامه : جداً انبسطت اني تعرفت عليك و ياحلو الصدف لما تجيب لنا بنت الامارات يا بخت نجد بجيتك
ابتسمت علياء لكلامها وانها فعلاً حبتهم : و يابخت نجد العذيه دامكم بناتها وهيه ترا معالي و عبير من بناتنا لا تفكرون تسرقونهم لنجدكم
ضحكت شيخه وهي تضمها : افا عليك عليوه عائلة اخوي فهد اماراتيين على سعوديين مافيه فرق بينا كلنا اهل واخوان
علياء وهي تودعهم : هيه صدقتي و انتبهو لهم و نتريا جيتكم بديرتكم الثانيه باقرب فرصه تتيح لكم
مشت عائله ابو هزاع للمطار عشان ما تفوتهم رحلتهم
ماجد بملل: ما صدقنا يرحون ليه عزمتوهم
خزه عمر : وليه حنا عزمناك دام ليه نعزمهم و هذيل اهالينا و اخوانا اكثر من انهم جيران
ماجد وهو يبي يستفزهم : وانتم عاد صدقتو نفسكم و صرتو زيهم بالملابس و اللهجه تراكم سعودين مو امارتيين
سعود: هيه صحيح حنا من مواليد نجد و نرجع لنجد العذيه بس انك تعيش كل عمرك مع ناس غير عنك بلبس بالعادات بالتقاليد بالكلام تصير تاخذ منهم وتصير كانك ولدهم و فعلاً انا اشوفني ولد من اولاود الامارات كل حياتي عشتها تحت امانهم وظلهم دراستي وظيفتي كلها تعلمتها عندهم و بنفس الوقت ولد للسعوديه حط ببالك ان مافيه فرق بينا وان السعودي اماراتي والاماراتي سعودي وكلنا شعب واحد ويد وحده واذا ماتشوف ذا الشي مقنع اعرف ان الوعي عندك بسيط ولازم يتوسع
ضحك غيث بصوت عالي يوم سعود قدر يسكت ماجد بكلامه وان ماجد ما قدر يستفزهم و يعاملهم كذا
ماجد وهو يناظر غيث بعدوانيه و رجع انظاره لسعود: بما انك من عيالهم ليه خليتوها و رجعتو هنا كان جلستو فيها دام كل عمركم فيها وصارت ديره لكم و شغلكم
عمر : لان مافيه شي زي الوطن صح اننا تضايقنا يوم تركنا الامارات واهلها وشعبها الكريم بس الوطن غير واذا على الروحه كل فتره بنزورهم ونروح لها مهما صار هذيل اهلنا وديرتنا الثانيه
سلمان بهدوء : جدي وعماني يقولون تعالو اجلسو عندهم بدكة المزرعه ويبون الشاهي حقك ياسعود
هز راسه سعود وراح يسوي لهم الشاهي والباقين طلعو عند الرجال لدكة المزرعة يسولفون ويضحكون
وصل سعود لعندهم ومعه الشاهي و جلس بين غيث و عبدالرحمن
ابو ماجد : اقول يا خالد بما اننا كلنا مجتمعين وجالسين مع بعض ومبسوطين ودي اقولك عن موضوع
خالد بابتسامه : اسلم يابو ماجد وش موضوعك عسى اقدر اساعدك فيه
ابو ماجد وهو يتنحنح : والله وانا اخوك ابي اطلب بنتك امواج على سنة الله و رسوله لولدي ماجد
جاء بيتكلم خالد واسرع ابو ماجد بالكلام : لا تقاطعني يابو غيث خلني اكمل كلامي ادري ان البنت الحين همها دراستها بس انا اقول نعقد قرانهم وبعد تخرجها نحدد موعد الزواج ولا شرايك يا عمي محمد مو حلوه بكل مره ترفضونا بموضوع دراستها
سكتو من سمعو كسرت الكاس هو ما استوعب ولا شي الا شي واحد انهم يبون يخطبون امواج لمين ؟ لماجد ناظر يده بهدوء وهو يشوفها تنزف دم و رجع ناظر غيث اللي وجهه كلامه لابو ماجد : اعذرنا يا بو ماجد بس حنا ماعندنا لكم بنت للزواج وخل ولدك يشوف نصيبه مع غيرها وكمل ونظراته تتركز لجهة ماجد : صح ابوي حي والله يطول بعمره بس انا بعد اخوها الكبير واعرف مصلحة اختي و اعرف مين الشخص المناسب لها
رجع اناظره بهدوء ليده اللي تنزف بكثره قام للمغاسل يغسل يده بعد ما نزفت وامتلت بالدم رفع راسه للقمر والنجوم يتامل المنظر وجت هي بباله تنهد بينه وبين نفسه : ليه انا جالس افكر فيها كذا ليه حسيت النيران تحرق جوف صدري يوم طلبوها من ابوها معقوله حبيتها معقوله اني بديت احبها قطع تفكيره صوت غيث اللي يناديه راح له وهو مايبي يقابل احد فيهم عشان ما يسالونه يبي مكان يهرب له بعيد عن الكل وصل لعند غيث وابتسم له بخفوت
