مر شهر وعلاقة بدر ومالك مع غيث تتطور وتطورت معها نفسية غيث
كانو بيت عم سيف رجعوا من سفرهم وعرفت اريام ريم على صديقتها وبنت عمها
في المركز كان جالس بدر في مكتبه ومعه مالك استدعى غيث اللي دخل وادى تحيته العسكرية وهو يقول : طلبتني سيدي
ابتسم بدر : ارتاح ناديتك كصديق مو كشرطي
جلس غيث وهو مبتسم ويدري ان الكل يحسده على علاقته مع بدر
بدر : غيث ابي اطلب منك طلب وما ودي تردني
غيث : أمر
بدر : ودي تجي معنا الاستراحه اليوم بنجتمع انا ومالك واخواني بس مافي احد ثاني بس عشان نأخذ راحتنا
غيث : ودي والله بس اخوي سيف اليوم ذكرى زواجه وبقضيه مع زوجته وما اقدر اخلي التؤام مع اريام لوحدهم في الليل لأن اريام تخاف
ابتسم بدر وقال : ما عليه خذ البنات بيتنا اصلا انا واخواني ما بنكون موجودين وابوي بيروح لصديقه وجيب معك ريان وانا بجيب علاوي ومالك بجيب اخوه زياد خلهم يلعبون مع بعض
غيث : بس
قاطعه مالك وهو يقول : غيث كلام بدر صح سوي كذا على الأقل عشان اخوانك خلهم يستانسون شوي بدل حبسة البيت
ابتسم غيث ووافق وهذه كانت نقطة بداية شيء ما حد كان يعرفه
........
عند الساعة ٧ ونص مساءً قال غيث لاريام تجهز وتجهز إخوانهم عشان يروحون وفعلا لبست اريام تيشرت ابيض وبنطلون اسود ورفعت شعرها البني ذيل حصان ولبست شوز ابيض ولبست عبايتها ونقابها وطالعت اختها ليليان اللي لبست تيشرت اصفر وبنطلون جنز وشوز ابيض وشعرها مفتوح ولابسة عباية بدون طرحة لأنهم يعودونها على العباية من بدري الين يوصل عمرها ١٣ سنة وتتحجب وريان لبس تيشيرت ابيض فوقه جاكيت صيفي اصفر وبنطلون جنز وهو متحمس يروح مع غيث وأما غيث ف لبس تيشرت ابيض وبنطلون اسود وهو متعمد يطقم مع اريام
طلعوا ووصل غيث البنات بيت ابو ماجد اللي ما كان موجود بس شاف ماجد وبدر واخوهم انس وعلي ومالك وأخوه زياد
كان مستغرب ان انس ما يشبهم بس ما اهتم وصعد سيارته وركب معه ريان وهو يقول : غيث سيارتهم حلوة قول لسيف اذا كبرت ابغى مثلها
ضحك غيث وقال : ليش سيف؟ انا بشتريها لك
ضحك ريان وهو يدري ان غيث يتكلم وبس وهو رغم صغر سنه يعرف ان إخوانه ما يقدرون يسوون له كل شيء بس كل مرة يتذكر كلام سيف له انه يرضى باللي عنده وما يطالع ال حوله فهمس : الحمد لله
طالعه غيث وابتسم
في سيارة بدر كان معاه علي او علاوي وهو شايفه هادئ ووجهه تعبان فقال له بابتسامة : علاوي من الحين بتنام؟
