اذكر عيونك وأهيم

2

في احد ليالي شتاء نجد العذيه وفي مجلس الجد عبدالعزيز اللي م فيه نفس ثقيله كان جالس فيه هو وعياله وأحفاده سوالف وضحك وشبة نار ...
الجد عبدالعزيز : إلا شرايكم ي عيالي نسرح بكره يم البل عوايل ونجلس حول الثلاث أربع أيام بما انه هالايام مهو ذاك البرد ؟
تركي : أنا موافق ي جد
عبدالعزيز : وأنا موافق
أبو مطلق : وأنا م عندي اعتراض نبى نروح ونغير جو ونشم هوى ربي
الجد عبدالعزيز اجل دام الكل وافق ،،، سطام وأنا أبوك انقز يم الحريم قولهم يجهزون العزبه وملابس وفرش
سطام : ابشر بي ي أبوي ع خشمي
الجد عبدالعزيز ضحك وقال : عليه الشحم بعدي عياله اعد وأنا أبوك يمهم
وراح سطام يقول للحريم
....................................
عند الحريم /
جاهم سطام يقول لهم عن الكشته ويجهزون الأغراض
أم مطلق : الحمدلله بنطلع نكشت والله انه نفسي من زمان بالكشخه والأجواء م تفوت ولا ي عمه ؟
الجده نوره : إلا بالله صادقه وأنا امتس ان الجو م يتفوت ولاهو ذاك البرد اللي نخاف ع وراعينا منه
أم نايف : أي والله انه مو ذاك البرد ولا كان م طلعنا
الجده نوره : أقول وين البنات خل يجن يجهزن العزبه يالله عبدالعزيز قال نسرح يعني بعد الفجر ع طول اعرفه مطفوق
ضحكت أم نايف وقامت تنادي البنات يجون يجهزون الأغراض
....................................
عند البنات /
العنود : بنااااتت م سمعتوا آخر الأخبار ؟
رند نطت قدامها وهي تقول بحماس : ووش بسرعه تحمست
ضحكت نوره ع نطة رند وقالت : يمهه نط عرق القافه هدي العلوم م بتطير وأنتي ي العنود ي نقالة العلوم وش عندتس ؟
ضحكت ريناد وقالت : أي والله وش أخبارتس ترا كلنا جانا عرق القافه مو بس رند
ضحكوا كلهم وقالت العنود : جدي قرر بكرا نسرح يم العزبه عوايل ونجلس ثلاث أو أربع أيام
نطت رند وقالت بحماس : امااااا الله اخيراً بنطلع كشته وربي حماسسس
جت سحاب وقالت : وش السالفه ؟
ردة انفال وقالت : ابد بس جدي قرر نطلع كشته عوايل استعدي
سحاب ركضت يم الدرج وسحبت شنطتها وهي تطلعها وتضحك
طالعو فيها البنات وقالت ريما : شبلاتس  انهبلتي وراتس تضحكين ؟
قامت سحاب وسحبت شنطتها لعندهم وهي تفتحها تحت صدمة الكل من ضحكها الغريب
وقالت بضحكة : بنات شنطتي جاهزه لأي ظرف مفاجئ أو كشته عاجله وهي تفتحها إلا فيها ملابس وكل شي جاهز
ضحكوا البنات ع حماسها وتجهيزها لشنطه لأي ظرف
قالت ريما : وربي أنتي محد يقدر عليتس بالله كيف جتس الفكره ؟
ضحكت سحاب وقالت : لايلدغ المؤمن من جحره مرتين آخر كشته أكلت هوا من البرد لأني م جهزت شنطتي إلا بأخر الدقايق ومن بعدها تبت وخليت احتياطاتي جاهزه
ضحكت رند وقالت : ابك مو احتياطات إلا قوات دفاع م شاء الله ههههههههههههههههههههههههههههههههههه
طالعت فيهم نوره وهي تقول بنات
لفوا كلهم عليها وقالت ريناد : سمي ؟
قالت نوره : بنات أنا م عندي ملابس يمدي ننزل السوق ؟
ريناد ورند بنفس الوقت : حتى حنى
طالعت فيهم العنود وقالت اجل ورا م تروحون بسرعه م في وقت ترا الساعه 6 الليل وتعرفون قوانين جدي يقفل البوابات الساعه 10 تقول معسكر
ضحكوا البنات ع ذبة العنود وقالت ريناد أي والله بس من بيودينا العيال علل م يرضون بسرعه ولو الشغله لأخوياهم نقزوا انجزوه بسرعه وحنى تتأجل أشغالنا
قالت العنود : اجل يالله خلو الهرج الزايد وبنسوي قرعه من تروح تقول لجدي وهو يقول للعيال كذا بيودونها ورجلهم فوق رأسهم
ضحكت رند وقالت : اشهد بالله انتس جبتيها يالله اعدي جيبي أوراق وقلم ونكتب أسامينا ونسحب ورقه واللي يطلع اسمها تنط لجدي
راحت سحاب وجابت ورقه وقلم وسوو القرعه وخلو سحاب تسحب ورقه
ريناد : اعجلي يالله اعرف حظي أنا اللي بروح
ضحكت سحاب وقالت : الحظ حالفتس هالمره مو أنتي
قالت نوره : من بسرعه جاني هبوط
قالت سحاب : رند
رند كانت تشرب مويه غصت فيها وقالت : متأكده رند م في ألف يمكن ريناد
ضحكت ريناد وقالت : أقول خلي الألف في حالها ونطي لجدي وأنتي ساكته اعجلي علينا م عاد في وقت
قامت رند وهي تسب سحاب والبنات يضحكون
.............................................
عند العيال /
ياسر : ي شباب شرايكم نظبط لنا جلسه هنا نجيب فرشه ومراكي ونطلع المنقل ونشب نارنا ونسوي لنا شاهي حطب وقصايد مطلق
رد تركي وقال : ي رجال اقسم بالله كانك بقلبي أنا موافق
قال نواف : واحد يقول لشبة النار وقصايد مطلق لا
ابتسم مطلق وقال : ابد ازهلو بأحلى القصايد بس يالله اجل نجهز الجلسه
وفعلاً قامو العيال يجهزون اللي يفرش الفرشات وياسر يرمي المخاد ع عبدالعزيز وعبدالعزيز يرميه بالنعال وقلبت مصارعه
طلع لهم فيصل وقال. : لعنه أنت وياه م كان الشنب خاط ع وجيهكم
ضحك ياسر وقال : شفيك ي فيصل شادها ترا نمزح ونحرك الجو
طلع الجد عبدالعزيز وهو يضحك وقال.: امحق تغير جو أنت وياه تغير جو بكسر خشم ولا ضلع ولاسن
ضحك عبدالعزيز وقال : افا ي جد هذا وأنا سميك مفروض أنا غير عندك
ضحك الجد عبدالعزيز وقال : أنت لو تعقل وتخلي الهبال كان امورنا ماشيه
ضحك مطلق وقال : والله ي جدي انه م يعقل يكبر وينهبل مير م نقول إلا يالله السلامه
طالعهم عبدالعزيز بطرف عين وقال : والله لو أني ذابح احد ؟
طالع فيه ياسر وقال : م عليك منهم وأنا عمك عيش حياتك الحياه مرا
طالعه الجد عبدالعزيز وقال : لا بالله كدينا خير المعزز ياسر تكلم وهو اللي يبي له من يعدل حياته
جا بيتكلم ياسر إلا قاطعهم دخول رند وهي مصدومه إنهم برا بالحوش مو بالمجلس وجت بترجع للبيت
إلا قال لها الجد عبدالعزيز: رند ي بنتي سمي بغيتي شي وأنا جدتس ؟ً
لفت رند عليه بارتباك وقالت وهي عيونها معلقه عليه أي ع حبيب قلبها اللي محد يدري عنه كانت تطالعه من بعيد وشلون واقف بهيبته
وقالت وصوتها فيه رجفه توترها وسرعة دقات قلبها : ابد ي جدي أنا والبنات ناقصتنا أغراض من السوق بما انه بكرا بنكشت ف نبي احد يودينا
ابتسم الجد عبدالعزيز وهو اللي ملاحظ نظرات رند المعلقه ع مطلق وقال : غاليه والطلب رخيص ابشري وأنا جدتس روحوا البسوا عباياتكم تلقون السياره جاهزه
ابتسمت رند وقربت من جدها وحبت رأسه وقالت : الله يخليك لنا ي جدي ويطول عمرك
حضنها الجد عبدالعزيز وقال : ويخليكم لي ي رب وأنتي لو تطلبين عيوني عطيتس مير شكل عيونتس طايحة ع شي زين لدرجة انتس بتعافين عيوني
ضحكت رند بعدم فهم من تلميح جدها وقالت يالله بدخل أقول للبنات وراحت تركض والجد عبدالعزيز يضحك عليها
ولف ع مطلق وقال : مطلق وأنا أبوك
لف عليه مطلق وقال : سم ي طويل العمر ؟
قال الجد عبدالعزيز : طالبك أنت اللي تودي البنات لسوق
طالعه مطلق باستغراب وقال : ابشر ع خشمي
ابتسم الجد عبدالعزيز وقال : عليه الشحم بعدي وأنا أبوك
ابتسم له مطلق وقال : أنا احتريهم بالسياره بالله استعجلهم علي
قال الجد عبدالعزيز : ابشر ،،، طالع بسطام وقال له : سطام وأنا أبوك ادخل استعجل البنات قل لهم مطلق يحتريكم برا
اشر سطام ع خشمه وراح يركض للبنات دخل البيت لقى رند بوجهه قال لها : جدي يقول استعجلوا مطلق يحتريكم برا
رند دق قلبها وقالت : مطلق اللي بيودينا
طالعها سطام وقال.: أي جدي قال له ووافق
رند بتوتر : تمام خلاص بروح استعجل البنات وإنت اطلع قول لهم يالله جايين
وراح سطام عند الرياجيل برا ورند كانت تقاوم الرجفه اللي فيها هي كانت دايم تلمحه من بعيد لبعيد اللحين بتركب معه بنفس السياره كيف قلبها بيقوى م يطلع من مكانه وهي تشوف عشقها قدامها استعجلت خطواتها تقول للبنات وطلعت هي والعنود
وركبت السياره قالت العنود : سلام مطيليق
طالعها مطلق بطرف عين وقال : علمتس ميه مره م احب مطيليق خليني ع مطلق لاتشوهون اسمي الهيبه
ضحكت وقالت : والله اسمك انه ع غيرك عادي مير م يزها الاسم إلا راعيه وأنا م احب أسم مطلق إلا منك
ابتسم لها وقال : لسانتس ذا أنا مدري شلون يجيب الهرج هذا كله أنا اعجز
ضحكت وهي تقول : والله م أظن لسان شاعرنا يعجز ع شي وأنت توصف أجمل الكلام بأجمل صوره وش أجمل من القصايد
ابتسم بخفه وهو يطالع اللي من ركبت ساكته ولا لها حس وابتسم بخفه وقال : ي بنت محمد شلونتس ؟
ارتجفت رند وقالت : أ أنا الحمدلله بخير أنت شلونك ؟
ابتسم وقال : م علينا خلاف إلا ي العنود وين الباقي تأخروا لفت العنود يم البوابه وقالت هذا هم جو
ركبوا البنات وحرك مطلق يم السوق ورند اللي كانت جالسه وراه وهي للحين م تنسى نبرته شلون سالها وفيه ابتسامه ع وجهه
وكانت غارقه في هواجسها م صحاها إلا ضربة العنود لها وهي تقول : ي حماره شفيتس وصلنا انزلي
طالعتها رند بطرف عين وقالت : وجع يوجعتس وراتس تمدين يدتس ترا عورتني الضربه
قالت العنود : بلاي اكلم جدار أنادي لي دقايق ولاتردين في عالم آخر ب وش تهوجسين ؟
طالع فيهم مطلق وقال : العنود عن القافه وخلي البنت بحالها ويالله انزلوا اعجلوا علي
م يخفى عليكم شعور رند باللحظه ذي وكيف حست نفسها فوق السحاب مطلق دافع عنها يووه ي كبر حظها
نزلو هي والعنود وكل وحده راحت تنجز أغراضها ورجعوا لسياره بعد ساعه ونص بالظبط
وحرك مطلق للبيت
وصلوا البيت ونزلوا البنات بسرعه يقيسون ملابسهم
دخلو الصاله شافو امهاتهم قد جهزوا العزبه وكل شي وطالعو بعض بخوف
قالت ريما : بنات ي ويلنا طلعنا نسينا العزبه
قالت ريناد : أي والله انتس صادقه والله لأناكل  تراب
طالعت فيهم نوره وقالت : بس ترا بيسمعون
قالت العنود م عليكم ازهلو عندي خطه بس أبي خويتي تساعدني طالعت فيها رند وهي عرفت أنها تقصدها بكلمة خويتي وقالت : ازهلي بس وش علمتس ؟
قالت العنود : سهله نقول لهم رحتى استائذنا من جدي ووافق وطلعنا مستعجلين عشان نرجع بدري لان تعرفون قوانين جدي
قالت رند : صحح والله انتس جبتيها يالله أنتي ابدّي وأنا بعزز لتس
ضحكت العنود وقالت : هههاههيي أنا جبت الخطه أنتي ابدّي وأنا اللي بعزز لتس
تخصرت رند وقالت : وجع مو وقت الورعنه اخلصي
طالعتهم سحاب وقالت : وجع يوجعتس أنتي وياها اخلصوا علينا لأنودع
قالت نوره : أي والله اخلصوا علينا ابدوا مع بعض
طالعوا رند والعنود ببعض وقالوا : بسم لله بنتشهد ثم بنبدأ
ضربتهم نوره من ورا وقالت : لعنه بلا ثقالة دم اخلصوا
جت رند بتتكلم إلا جت الجده نوره من وراهم وهي تضحك وقالت : وراكم تتصافقون خلاص عذرناكم عشان قوانين عبدالعزيز يالله كل وحده ع غرفتها تجهز شنطتها وارقدوا بدري ورانا مسراح
جتها رند وهي تحب رأسها وقالت : الله لايحرمنا منتس ي جده أنقذتينا
وجت العنود وهي تحضنها وقالت : انشهد بالله إني أغار من عبدالعزيز
نطت عيون الجده نوره وضربتها وقالت : الخلا ي الملسونه
ضحكوا البنات وبعدها كل وحده راحت لغرفتها وبدوا فقرة التجهيز والحوسه ومن خلصوا حتى اعلن الهدؤ انه البيت كله نام استعداداً للكشته بكرا
................................................
وانتهى البارت الأول أتمنى تقولون لي رأيكم وان شاء الله يعجبكم ❤️.
وطبعاً البنات يتغطون عن العيال ورند يوم طلعت كانت لابسه عبايتها لأنها اساساً كانت بتدخل المجلس عند جدها وبس حبيت أنبهه ع هذي النقطه