مملكه الجن الأزرق
الزمان: الوقت الحالي
المكان: مملكه الجن الأزرق - سبع طبقات تحت أرض مصر .
-رئيس وزراء مملكه الجن :أيه التهريج اللي أنا شايفه ده..دي مبقتش مستشفي ده سوق عكاظ
- مدير المستشفي: نعمل ايه بس سعادتك...العيانين كتير والأمكانيات محدوده فشخ..
- رئيس الوزراء : وهوا أيه اللي كتر العيانين كده...هوا فيه أيه بالظبط؟؟عمري ما شوفت الكميه دي من العفاريت تعبانه..
- مدير المستشفي: زي ما انتا عارف-أباشا- أن الغذاء الأساسي للعفاريت الزرق هوا الكراهيه والفساد والحسد والخيانه وأي وساخه عموما...علشان كده جنسنا استوطن أرض مصر...بس المشكله أن العمليه وسعت أوي..كميه الوساخه زادت أوي يعني..فبقي فيه آثار جانبيه خطيره ..أثرت بشده علي صحه مواطني المملكه من العفاريت والشياطين..
- رئيس الوزراء: أزاي يعني..وضح شويه..
-مدير المستشفي: شايف العنبر ده-أباشا- ده فيه ميت عفريت كانوا عايشين في كباريه في عماره طالعلها قرار ازاله متنفذش..العماره وقعت عليهم....كلهم كسور في القرون والديل سعادتك..
-رئيس الوزراء: ومين الخمسه اللي في غيبوبه دول..
- مدير المستشفي: دول العفاريت اللي كانوا لابسين الخمس بنات بتوع طنطا.
-رئيس الوزراء: أنتا هتستعبط انتا كمان...كلنا عارفين ان (سهام سعيد) دي نصابه هي واللي معاها..وأنهم ميعرفوش يطلعوا شعره من.....مناخيرهم -لا مؤاخذه-
-مدير المستشفي: لا يا باشا...أنتا فهمتني غلط..العفاريت مستحملتش كميه الأسفاف والضحك علي الدقون و الجهل اللي في الحلقه جلهم جلطه في المخ ومن يومها وهما في الغيبوبه.
-رئيس الوزاره:ومين الست التخينه المتشنتحه دي؟؟
-مدير المستشفي: دي أم رجل مسلوخه سعادتك..طول عمرها بتخوّف العيال عادي وواكلاها بالحلال..بس نسبه التلوث زادت أوي في مصر..جالها غرغرينا في رجلها المسلوخه....هنبترها سعادتك من فوق الركبه..ونعيد تأهيلها وظيفيا أنها تبقي أم رجل مقطوعه..
-رئيس الوزاره: ومين البنت الحلوه اللي بتغسل كلي دي؟؟
-مدير المستشفي: دي النداهه سعادتك..اللي بتنده علي الشباب وتغرقهم في ميه الترعه....بس الميّه كلها رصاص وكبريت..المصانع بترمي المخلفات في الميه سعادتك..البت جالها فشل كلوي..مستحملتش..
- رئيس الوزاره: لا حول ولا قوه ألا بالله...
أهئ.أهئ
-مدير المستشفي:متقولش كده أباشا-أنتا هتسلّم ولا ايه
- أمسك اعصابك شويه..البلد محتجاك
-رئيس الوزاره: عندك حق..مين بقي التلاته المحروقين دول؟؟
-مدير المستشفي: لأ دول عادي..
رئيس الوزاره: ............................؟؟
مدير المستشفي :واحد قال أعوذ بالله من الخبث والخبائث وهو داخل الحمام....حالات روتينيه سعادتك..
-رئيس الوزاره:........................!!!
==========================
الزمان: الوقت الحالي
المكان: القصر الملكي لمملكه الجن الأزرق
ـ ملك مملكه الجن الأزرق: وبعدين يا رئيس الوزرا...الوضع بقي خل خالص..نص العفاريت والشياطين عيّانه..ومعندناش أمكانيات ماديه نعالجهم...
ـ رئيس الوزاره: الوضع الأقتصادي للملكه منهار..بالنسبه لممالك الجن التانيه..
ـ الملك :انتا يا جدع جاي تبيض عليا..منا عارف ان مصدر دخلنا الرئيسي بيجي من أمم الجن المتحده علي حسب قدره الشركه القابضه للشياطين أنها توسوس للناس..بس وسوسه الشياطين عموما هايفه..
تخلي عيّل يلزق زميله بالقفا
، واحده تقلب محفظه جوزها ،
واد يبص علي جارته من شباك الحمّام..كده يعني
بس المصريين عدّوا المرحله دي وأزحوا..
مش هحكيلك علي حاجه انتا عارفها كويس بس النتيجه ان الشركه القابضه للشياطين فلّست..معدوش عارفين يوسوسوا للمصريين...
المصريين هما اللي بدأوا يوسوسوا للشياطين..تخيّل ان فيه شيطان من الجن الأزرق بقي بيبيع ترامادول؟؟عفريت تاني صوّر الجيرلفرند بتاعته وهما بيشاتوا علي السكايب وبيبتزها بالفيديو...
حاجه وسخه أوي يعني
-رئيس الوزاره: طب هنعمل ايه سعادتك..
- الملك: أحنا لازم نسيب مملكه الجن الأزرق اللي في مصر ونهاجر كلنا..أوروبا...أمريكا..العفاريت عامله هناك أحلي فلوس..
والناس لسه بريئه الشياطين بتعرف توسوسلها..
-رئيس الوزاره: هجره أزاي بس..ده فيه جرين كارد وشنجن وأقامه دايمه وبلاوي سودا..لازم حد يبعتلنا زياره علشان يدونا الفيزا..
- الملك : أنا مش قلتلك كلّم ديراكولا..الراجل برنس وعنده كذا قصر...
- رئيس الوزاره: ديراكولا أيه بس سعادتك..ده في رومانيا..والحاله عندهم تعبانه برضه..
- الملك: طب أخوّانا المذئوبين؟؟
-رئيس الوزاره: نفسه سعادتك..في رومانيا..
-الملك : هما مش ليهم فرع في أمريكا؟
-رئيس الوزاره : بيحاربوا مصاصين الدماء والبت سيلين ومايكل كرايفن بتوع (الأندر ورلد)..ومش فاضين
الملك: طب كلملنا فولدمورت كده؟؟ده برضه لورد وليه كلمه مسموعه في بريطانيا
رئيس الوزاره : هاري بوتر قتله سعادتك!!
الملك: أحيــــه..طب الواد الطري ده أسمه أيه..أدوارد كولن
رئيس الوزاره: تاب أباشا من بعد ما أتجوّز البت بيلا سوان وبطل يمص دم..وسمعت كلام كده -أن بعض الظن أثم -..أنه آمن بالله!!
الملك:.................!!!!
رئيس الوزاره: هوا فيه حل سعادتك ممكن نجربه...أحنا بلاش نهاجر..أحنا نبعت 3 عفاريت من ال777 يلبسوا الراس الكبيره بتاعت البلد دي..
الملك : وهوا ناقص دهوّله...ده مش عارف يقول كلمتين علي بعض..
رئيس الوزاره : لا سعادتك...عناصر ال777 بتاعتنا مش هتلبسه عشان تدهوّله..لأ بالعكس..أحنا هنساعده أنه يبقي شخص ذكي وايجابي ونشيط وشجاع..ياخد قرارات حاسمه وينضف الوساخه اللي في البلد..يوفّر العيش والحريه والعداله الأجتماعيه...ويحافظ علي كل قيمه كويسه ويدمر كل طبع وسخ..وبكده الوساخه تقل في البلد والأمراض تقل..والناس ترجع محترمه..ونعرف بقي أحنا نشتغل وناكل عيش
الملك: هيا فكره كويّسه...بس أنتا فاكر آخر مره خرجنا عملاء من ال777 ايه اللي حصل..أخبارهم انقطعت خالص..واعتبرناهم من المفقودين..واهاليهم بتجري دلوقتي علشان يثبتوا وفاتهم ويقبضوا القرشين بتوع نهايه الخدمه والمعاش...
رئيس الوزاره: بص سعادتك أحنا هنلبسهم لينسيز عشان عنيهم متبناش انها مشقوقه بالطول..وشويه مكياج هيغطوا لونهم الأزرق
الملك : والقرون هتعمل فيها ايه يا ناصح؟؟
رئيس الوزراه: سعادتك القرون هتسهلهم مهمتهم وهما داخلين عند الراس كبيره...الحرس هيفكروهم أعلامين سعادتك..
الملك : تعرف لو المهمه فشلت المره دي...وراس أبليس لأحمّيك بميّه نضيفه وأقرا عليك المعوّذتين
رئيس الوزاره : لا يا كبير ميه نضيفه أيه بس..الطيب أحسن ...رقبتي سعادتك
الملك: رقبتك ايه..هي فين دي؟هوا أي كلام وخلاص..ده أنتا كلك راس علي ديل...المهم..هاتلي جوز عيال صغيرين أكلهم الواحد جاع من كتر التفكير
رئيس الوزاره:الموّرد مجابش سعادتك...ليه عندنا حساب شهرين مخادهمش!!
الملك:.................!!
==============================
الزمان: الوقت الحالي
المكان: قسم شرطه مصر الجديده
سهام سعيد: اعزائي المشاهدين..شرطتنا العظيمه قدرت انها تقبض علي أخطر خليه أرهابيه..كان هدفهم يغتالوا الكبير..طبيب الفلاسفه..رمز مصر وحبيب المصريين..أنا هنا علشان أحاورهم ..هبدأ مع أول واحد في التلاته..أنتا مش عارف انك أخواني حقير وارهابي ووسخ؟؟
عفريت 1: يا مدام الله لا يسيئك..أخوان أيه بس..هوا فيه انسان لونه أزرق وعنيه مشقوقه بالطول ؟؟
سهام سعيد: أيوه الأخوان...انتو اوساخ أساسا..وليكم علاقات بالماسونيه..تقدروا تعملوا أي حاجه علشان تحرموا مصر من الراجل الوحيد اللي كل نساء مصر حبلي بنجمه
عفريت 1:يعني سعادتك حبلي بنجمه ؟
سهام سعيد: بــس يا سافل...بدل ما أفضحك دلوقتي
عفريت 1: .........................
سهام سعيد: هقول للجمهور ان تامر باشا ركّبك العروسه..وطفي سجاير في قرونك..
عفريت 2: بصي حضرتك..دا أحنا كنا عاوزين نساعدكم..فكرتنا كانت أننا...
سهام سعيد: أهو...أديك أعترفت أهو
عفريت 2: أعترفت بأيه يا وليه الله يهدك
سهام سعيد: مش قلت فكرتكم؟؟يعني فيه فكر أهو!!مش عفاريت بقي و الكلام اللي انتو قلتوه في التحقيق
عفريت 3: يعني هوا التفكير حرام علي العفاريت سعادتك..
سهام سعيد: وعلي البني آدمين كمان يا كلب،ازاي مش ندمان أنك بتفكر؟؟...
اللي يفكر ده ميستحقش يكون مصري..اللي مسموحله يفكر هوا الكبير ...وممكن طلاب الثانوي بتوع المنوفيه،غير كده لأ
عفريت 2: بصي يا مدام..فيه خمسه زمايلنا في غيبوبه دلوقتي بسبب حوار سابق معاكي..ارحمينا سعادتك...قصري عشان حاسس ان الاورطي أبتدي ينقح عليّا ،أنتي عاوزنا نعترف بأيه...قولي اللي انتي عوزاه وأحنا بيــس،موافقين
سهام سعيد : أنتو من أخوان الشياطين..صح؟؟
عفريت 2: ما احنا قلنا كده في الأول معجبكوش..وتامر باشا حط العصايه في..
سهام سعيد: أحنا مقدرين جهود الأمن ومش لازم نعرف العصايه أتحطت فين..أكيد أنتا تستاهل أكتر من كده
عفريت 1:قصره سعادتك أيوه أحنا أخوان..واشتراكيين ثوريين و6 أبريل..ومتدربين في تركيا وقطر وايران و ديزني لاند
سهام سعيد: وأزاي دخلتوا القصر الجمهوري من غير ما حد من الحراسه يشوفكم؟؟
عفريت 1: عشان لينا علاقات بالماسونيه العالميه وبنحاربكم بحروب الجيل السادس والسابع
سهام سعيد : وازاي مفيش غير أستاذ مصطفي فخري هوا اللي عرف يشوفكم لما كان- بالصدفه- بيعمل حوار مع الكبير ..
عفريت 1:عشان أذكي أخواته ماشاء الله عليه
سهام سعيد: وزي ما شفتوا أعزائي المشاهدين..الأخوان وحلفائهم من الاشتراكيين و6 ابريل وقطر وتركيا مش بيبطلوا يعملوا مؤامرات علي مصر اللي كانت هتضيع لولا الكبير..تحيا مصر..تحيا مصر
عفريت 2:كده خلاص سعادتك..اصلي عاوز أطرش ..ممكن؟؟
=============================
الزمان: الوقت الحالي
المكان: مدينه الأنتاج الأعلامي
مصطفي فخري: يا أستاذه سهاااام..استاااذه سهام
سهام سعيد: خير يا أستاذ مصطفي؟؟
مصطفي فخري: شوفتي اللي حصل..الملك بعت 3 من ال777 عشان يلبسوا الكبير
سهام سعيد: عرفت..كنت لسه عامله معاهم لقاء دلوقتي
مصطفي فخري: والنتيجه
سهام سعيد: متخفش...اقنعت الناس أنهم أخوان..
مصطفي فخري: مش عاوزين مشاكل..الملك عاوز ينضّف مصر..وأحنا بنحارب علشان تفضل وسخه..أحنا مصلحتنا أنها تفضل وسخه..وساختها دي هيا اللي خلتنا فوق..
فاكره زمان أيام ال777 كنّا عاملين أزاي؟؟
سهام سعيد: ايام سوده..يحرقه الميري وسنينه أحسن حاجه عملناها أننا مرجعناش هناك تاني،واعتبرونا مفقودين ،علي فكره..المكياج بدأ يسيح من علي وشك..ولون جلدك الحقيقي بدا يبان من تحته
مصطفي فخري: وانتي كمان داري ديلك كويس...شفته بيلعب من ورا لما جيت أنده عليكي
سهام سعيد: وانتا تبص عليا من ورا ليه يا........... !!
مصطفي فخري:..................!!
سهام سعيد: وكمان أنتا بالذات متتكلمش علي التنكر...أنتا أكتر واحد في فرقه 777 فاشل في التنكر...سبحان الله..مهما عملت برضه شكلك عفريت!!
