ភាគ៣
°°°°°
រាជសាររបស់នគរលីវ ដែលប្រកាសជ្រើសរើសព្រះរាជសន្នសាក៏បានមកដល់នគរសៀរ ។ ស្ដេចសៀរ បានកោះហៅព្រះអនុចរបស់ទ្រង់ទាំង៤ឱ្យចូលគាល់ ដើម្បីពិភាក្សាអំពីរឿងនេះ ។
ព្រះបុត្រាទាំងបី ហានអ៉ី ហានចុងយាន និង ហានអ៊ូស៉ីង បានមកដល់ជុំគ្នាអស់ទៅហើយ នៅឡើយតែ ហានយី នៅមិនទាន់មកដល់ ។ គួរបញ្ជាក់ផងដែរថា ព្រះបុត្រាទាំងអស់ត្បិតមានឪពុកតែមួយតែម្ដាយផ្សេងគ្នា ពួកគេមិនសូវជាត្រូវគ្នាប៉ុន្មាននោះទេ ម្នាក់ៗសុទ្ធតែចង់ឈ្នះរាងៗខ្លួន ស្នាមញញឹមនឹងការគោរពនៅពេលដែលជួបមុខគ្នា គឺគ្រាន់តែសម្តែងឱ្យល្អមើលប៉ុណ្ណោះ ។
" យូរយ៉ាងនេះទៅហើយ ម្ចាស់បងទី៣នៅមិនទានមកដល់ទៀត តើទ្រង់កំពុងតែធ្វើអ្វីទៅ ! " ហានអ៊ូស៉ីង បុត្រាតូចនៃនគរសៀរ ក៏បាននិយាយឡើងទាំងខឹងតិចៗ ។ ហានអ៊ូស៉ីង ទើបតែមានអាយុ១៩ឆ្នាំប៉ុណ្ណោះ នាយមានរូបរាងស្រស់សង្ហារមិនចាញ់បងៗរបស់ទ្រង់នោះឡើយ ។
" ម្ចាស់ប្អូនកុំអាលខឹងអី ហានយី អាចនឹងមានការរវល់ទើបមកយឺតបែបនេះ ! " ហានអ៉ី ព្រះបុត្រាទី២នៃនគរសៀរ ម្នាក់នេះគួរឱ្យចាប់អារម្មណ៍ជាងគេ ទ្រង់មានរាងខ្ពស់ស្រឡះ មុខសររលោងចិញ្ចើមក្រាស់ញញឹមមានមន្តស្នេហ៍ បើនិយាយពីវិជ្ជាគុនដាវវិញគេលេខពីរមិនមានអ្នកណាលេខមួយនោះទេ ។
" ព្រះបុត្រាទី៣យាងមកដល់ ! " ជំហានជើងបោះចូលទៅខាងក្នុងញាប់ៗ ជាមួយនឹងជើងតូចដើរតាមពីក្រោយតទ្រុក ។ ស៊ាវសឺ ស្ថិតនៅក្នុងឈុតជាអ្នកបម្រើដើរតាមពីក្រោយ ហានយី ចូលទៅខាងក្នុង រូបរាងតូចច្រឡឹងគ្រងដោយឈុតសាច់ក្រណាត់ទន់ល្មើយ បានទាក់ភ្នែកអ្នកកំលោះដែលអង្គុយនៅស្ងៀមមិននិយាយស្ដីនោះឱ្យងាកទៅមើលគេទាំងមិនដឹងខ្លួន ។ ហានចុងយាន ដាក់ទឹកតែនៅក្នុងដៃចុះយឺតៗជាមួយនឹងទឹកមុខភាំងជាខ្លាំង ស៊ាវសឺ ញញឹមដាក់នាយបន្តិចរួចក៏ឱនមុខចុះ នៅលើក្បាលរបស់គេមានសៀតស្នៀតសក់រូបចាបមួយទៀតផង ។
" ស្នៀតសក់នោះ ដូចជាប្រហែលៗ ! " ចុងយាន និយាយតិចៗជាមួយនឹងអារម្មណ៍មិនច្បាស់របស់ខ្លួន ។
