سمعت جرس الباب بيرن.....وصوت خالتي ( صفيه ) بيزعق : انتي فين مالصبح ؟ تو ما افتكرتي ؟ دا انا قاعده في نص هدومي بسببك يا شيخه !
وكل اللي بسمعه مالطرف التاني عياط وصراخ وعويل
وصوت والدي : بس صلي على النبي واستغفري ربنا هوا في مكان احسن دلوقتي...اهدي يا ( مروه ) اهدي يا بنتي.....اللي بتعمليه دا بيعذبه....حراااام .
- ايه ده ( مروه ) ؟ صحيح مجتش زيهم من بدري....متضايقه مني ولا من زعلها عليا مش عايزه تصدق اللي حصل ؟....بس اديها جايه منهاره.
والدي : يا ( مروه ) انتي عارفه نادر كان بيعزك اد اي
( مروه ) باكيه : يا عمي انت مش عارف....نادر افضاله عليا ملهاش اول من اخر
والدي : ادعيله يا بنتي وسامحيه
( مروه ) : انا اول ما عرفت مصدقتش....قفلت على نفسي باب اوضتي ونمت عشان اصحا الاقي كل دا كان كابوس وان نادر لسه عايش
والدي : اللهم لا اعتراض
( مروه ) : لا نادر مكنش عيان ولا فيه حاجه...الوضع غريب يا عمي
والدي : يابنتي بس بطلي كلام ملوش لازمه انتي عاوزه ايه ؟!.....يعني عوزاهم يشرحوه ويبهدلوه حتى وهوا ميت
( مروه ) : لا طبعا
والدي : خلاص اكرام الميت دفنه
( مروه ) : طب اشوفه ارجوك يا عمي ( وانفجرت في العياط )
والدي : ملوش لازمه انتي هنا وعامله كدا اومال جوا هتعملي ايه ؟
( مروه ) : هسكت خالص هسكت بس دخلني اسلم عليه مش هقدر اشوفه في الكفن.....ابوس ايدك يا عمي.....اشوف نادر وبعدها اطردني من البيت كله لو عاوز
والدي : يا بنتي بس اي الكلام ده ؟!
خالتي ( صفيه ) باكيه : دخلها يا مصطفى....مروه زي امنيه بالظبط....بالله عليك
والدي : خلاص تعالي معايا يا مروه...
صوت الباب اتفتح ودخل والدي ومعاه مروه ولابسه عبايه سودا.....عماله بتترعش من العياط وماسكه نفسها زي ما وعدت والدي...
راحت قعدت على الارض جنب السرير وطلعت من معاها كتيب صغير فيه ادعيه المتوفي وبدأت تدعي وطولت :
اللهم انر قبره
اللهم حاسبه بما انت اهل له يا عظيم المغفره
اللهم اجعل قبره روضه من رياض الجنة
اللهم ثبته عند السؤال
اللهم هون عليه ضمة القبر وارحمه من عذاب القبر
الدعوه الاخيره دي بالذات رعبتني لإني دايما راسم اللي بيحصل جوا القبر تخيل مرعب وكنت كل ما اقول للشيخ ( لكفي ) يضحك و يقولي : يا ابني هون على نفسك ربنا ارحم بينا مما تتخيل....بطل تعيش في الهلع ده هتموت من الرعب كده...اعبد ربنا واعمل اللي عليك وادعي بالجنة وتخيل جمالها...مش يكون كل تفكيرك في العذاب وبس .
فضلت ( مروه ) تدعي والحقيقة انها كانت بتعيط بالراحة من غير مبالغة...
ووالدي سابها وخرج وقفل باب الاوضة وراه...
كملت ( مروه ) دعاء وبعدها قامت وقفت وراحت جنب الباب بتاع الاوضة ودعت تاني...
غالبا هيا فاهمه كدا اتجاه القبلة...بس هوا غلط الحقيقة
بعدها رجعت عند الجثة تاني وكشفت عن وش الجثة
وعملت حاجه غريبه !!!
رفعت العباية اللي كانت لابساها تحتها بنطلون جينز وطلعت من جيبها حاجه !
ومسكت بوق الجثة وفضلت تفتح فيه بالعافيه...واتضح انه ااخشب....بس فضلت وراه لحد ما اتفتح وقامت حاطه اللي طلعته من جيبها في بوق الجثة.....انا كنت من الصدمة مش عارف استوعب اللي بيحصل !
فجريت بسرعة عشان اشوف ده ايه....دا حجاب ياما شوفت زيه !
مديت ايدي بسرعة عشان اشيله لقيت حرارة شديدة زي النار ضربت جسمي كله منعتني اني اعمل ده !
حاولت تاني ونفس الامر اتكرر ! حرارة بشعة !
بصيت للغبية ( مروه ) دي....حاولت الفت انتباهها لكن دون جدوى...
هيا فاكره نفسها بتساعدني في الحساب....لان فيه معتقد وخرافة عندنا في البلد كتير بيعملوها....ان لما يموت لك حد اكتب ورقة فيها ( لا اله الا الله محمدا رسول الله ) وحطهاله في بوقه عشان وقت الحساب الملكين قال ايه....الورقة دي هتنقلك وهتعرف ترد على سؤال الملكين بكل طلاقة....الخرافة دي منتشرة جدا بس مكنتش اتوقع ان ( مروه ) تكون زيهم ! بس متاكد ان دي افكار خالتي ( صفيه ) بدون ادنى شك .
