الفصل الرابع قبل الأخير💜
القاسم بقلم
#قصص_شروق_مصطفى
"نتقابل بكرة سلم ونستلم هي جاهزة وقدامي أهي"
"لازم أخدها قبل يسلمها يا قاتل يا مقتول أنهاردة يارب دلني أعمل أيه"
مرضتش أرجع أوضة تاني مش لازم يغيب عن عيني لحظة قعدت في الليفينج شوية هو مخرجش من جوة شايفة المكتب قدامي وأنا دماغي بتلف وتدور المهم جالي فكرة غصبت نفسي أعملها مش عارفة هتطلع مني أزاي بعد اللي حصل بس هجرب يارب سامحني مضطرة أعمل كدة، حاولت أشجع نفسي و وقفت ودخلت عليه المكتب، كان التوتر واضح على ايدي وصوتي اوي حمحمت ولاقيته ربع أيده كأنه مستني هجومي المعتاد اللي معداش ربع ساعة.
قربت وقعد على مكتب قدامه أقنعت نفسي بالعافية ابص في عينيه وأقوله "نزار أنا أسفة"
بسخرية بص لي مش مصدق كلامي لحد ما قولتله
"يعني أنا فكرت ولاقيت نفسي اننا لازم نحل بأسلوب أهدى من كدة من غير عنف وغصب لأي طرف أنا هرضى بالأمر الواقع دا وإني أعيش معاك لكن عندي شرط"
شرط!
قالها بتهكم، ولاقيته شال زي الفلاشة من جهازه وحطها في جيب جاكت اللي لابسه
"قولي شرطك"
_ يعني نرجع تاني فترة الخطوبة لحد ما أرجع أثق فيك وأدي لك الأمان من تاني لأنك طول الوقت معيشني في رعب وخوف وتوتر لازم أرجع أحب…
_ أ… ايه قولي يا نور أ… ايه قوليها بجد كلامك دا يا "نور" أنا موافق ومستعد أعوضك عن كل اللي عيشتيه و… مالك نور مالك حصل ايه تعبتي تاني؟
_ مقدرتش أمثل أكتر من كدة كلامه قلب معدتي مسكت معدتي بالعافيه لكن محاولتي فشلت وأتقيئت، ودوخت دخلني جوه حضنه وخرج بيا غسل وجهي حاولت أبعده مرضيش، ماسبنيش غير وهو موصلني عربيته، مش قادرة أفهمه بجد هو خايف عليا للدرجة دي أفرق معاه، هو بالنسبة ليا مجرد كلامه معايا قلب معدتي هعمل ايه في لامسته ليا وحضنه اللي لسه ريحته فيا، أنا عمري ما كرهت حد في حياتي غير الشخص دا، بكره نفسه، كلامه، لمسته.
وصلنا المستشفى ونقلوني أوضة الكشف الدكتور منع دخوله كالعادة وقابلني الشخص اللي شوفته قبل كده مش عارفة هو عرف منين اني جاية لكن هو سبقني في الكلام "عرفتي توصلي لها"
هزيت رأسي وخرجت له الظرف وطبعا منسيش يسألني جبته أزاي فقولتله " أنا دوخت وأنا بكلمه وتعبت وهو لحقني على طول وجابني لهنا وكان قبلها كان لسه شايله في الجيب وهو عشان كان ملهي بيا ومخضوض مخدش باله اني أخد حاجه من جيبه لأنه صغيرة أوي"
حكيت له على المكالمة اللي أنا كنت فاكراها يتاجر في الاعضاء وهيبعني طلع أنه هيبيع الأكبر مني كمان وقولتله على ميعاد التسليم وهو طمني أني أقرب وقت همشي من هنا خلاص بعد ما يقبضوا عليهم متلبسين لكن أنا كنت خايفة أوي
"أنا خايفة أروح معاه تاني دا ممكن يقتلني بجد أنا ساعدكم ماتسبونيش معاه لوحدي خليني هنا"
أنت تقرأ
القاسم بقلم شروق مصطفى
Akcjaمريض عنده حب تملك، حاولت البعد عنه وتزوجت بأخر، ترصد لها وخطفها من بيت زوجها وهرب بها للخارج، أكشن ، مطاردة، خطف
