Antologi Cerita Cekak Misteri (Cerpen Berbahasa Jawa)

1. Alas Abang (Crita Cekak - Cerpen Berbahasa Jawa)

(*Crita iki namung karangan, dudu kasunyataan. Jeneng karo panggonan kang padha, namung kanggo kembang crita kang ngrewangi gawe imajinasi luwih nyata).

Rani lungguh ning kursi, adep-adepan karo awakku. Drijine isih ubet karo hapene, sinambi mesem-mesem dhewe. Tak batin palingan lagi scroll Instagram sing isine babagan plesir-plesir. Dheweke pancen senengane ngajak aku dolan ning panggonan sing lagi hits lan ngetrend lewat Instagram. Mulane iku dheweke uga seneng dolan lan gawe video estetik nganggo hapene. Ndilalah ya akeh sing seneng videone, dadi Rani duwe follower kang rada akeh nganti sepuluhewu luwih ning Instagrame. Apa maneh bocahe pancen ayu, gawe wong padha kesengsem nalika pisanan nyawang rupane.

"Nur, iki tak deloki Pantai sing lagi hits", ujare karo menyat pindah lungguh ning jejerku. Dheweke nuduhke video pantai pasir kang putih, ombake ora patia gedhe.
"Pantai apa iku Ran?" Takonku marang Rani.
"Iki jenenge pantai Jungwok, lagi hits soale saiki ana panggonan resto kang mirip Santorini ning Yunani".
"Jenenge kok Jungwok, lucu kaya jeneng artis Korea ", guyonku.
"Iku Jungkook lah, dudu Jungwok", wangsulane Rani karo mecucu.
"Ning ngendi iku?"
"Girisubo, Gunungkidul. Apike pas sore ndelok sunset nalika sore".
"Adoheeee, iku pucuk wetan Gunungkidul lho".
"Halah ora apa-apa, mung 2 jam. Awakmu cukup boncengke aku, liyane aku sing tanggung. Eman-eman iki nek ora diparani mumpung hits".
"awake dhewe kui durung tau menyang Girisubo lho".
"Halah padha wae, palingan kaya dalan sing arah pantai liyane".

Aku mung mesem wae, amarga pancen adoh saka omahku ning Banguntapan. Nanging Rani tetep ngajaki dina Minggu sesuk kudu dolan mrana delok sunset. Akhire aku ngalahi, sesuk dolan mrana karo Rani. Sing penting kabeh dibayari Rani, aku cukup urun nyetir motore Rani wae.

Dina Minggu isuk Rani wis tekan omahku. Tak ajak sarapan sik bareng-bareng, ndilalah ya durung sarapan uga. Bapak ibuku uga lagi sarapan bareng, dadi tambah gayeng. Diwelingi bapakku nalika arep mangkat, sing ati-ati ning dalan lan aja grusa-grusu. Apa maneh ning panggonan anyar sing durung tau diparani. Aku lan Rani banjur salim pamit budhal menyang Gunungkidul.

Dalan arah Wonosari isuk iki rame banget kendharaan. Motor, mobil nganthi bis gedhe uyel-uyelan mlaku rindhik-rindhik arah Gunungkidul. Sajake kabeh kepengin plesir menyang wisata Gunungkidul kayata pantai, Goa Pindul, Bukit Bintang, gunung purba Nglanggeran lan sapanunggale. Motorku tak setir alon-alon ora wani banter apa maneh nyelip bis. SIM C nembe wae entuk wulan wingi amarga nembe 17 tahun wulan wingi.

Sejam mlaku alon-alon, Wonosari wis tak liwati. Saiki wis tekan Semanu, belok arah ngidul mlebu dalan sing rada cilik. Dalane uga munggah mudun nikung ngiwa nengen nganti tekan Jepitu, Girisubo. Kendharaan wis mulai sepi, ora kaya dalan Gunungkidul-Wonogiri sing nembe tak liwati. Sinyale rada elek, dadi Rani ning mburi rada bingung aweh ancer-ancer. Malah luwih kepenak nyawang papan arah ning protelon utawa prapatan. Kiwa tengen dalan isine kebonan kang galengane tatanan watu. Akhire sekitar sejam, aku karo Rani tekan ning Pantai Jungwok.

Jam tanganku tak sawang, angka 10 punjul 30 menit. Rani ngajak ngaso dhisik ning warung kang cedhak kono. Ngombe degan awan-awan pancen seger tenan. Swasanane uga ora patia rame sanajan dina Minggu. Sing rada rame disawang saka adoh yaiku resto wisata sing kaya Santorini iku. Saking penasarane, Rani banjur ngajak aku wisata ning kana. Ora krasa nganti srengenge mulai labuh menyang kulon, jam wis ning angka 2. Aku banjur ngajak Rani menyang pantaine.

Pantai Jungwok iki pasire putih, ombake cilik amarga kaya wujud teluk kang diapit watu gedhe. Sansaya sore, sansaya rame pantaine iki. Bocah-bocah enom padha ngadhegna tendha kanggo camping ning kono. Srengenge sore sansaya angslup ning kulon, tandhane bengi wis meh teka. Rani karo aku banjur reresik ing toilet, sanajan sing nglangi namung Rani. Aku ora nglangi amarga iki pas wayahe datang bulan. Kanggo oleh-oleh, aku ngisi botol ngombeku sing isine wis entek, tak ganti pasir pantai. Rencanane arep kanggo dhasaran ning aquarium omahku.