(فوبيا الفقد)👨🏻‍🦯.

بارت 1

- في يوم من الايام وتحديدا يوم الجمعه كان مثل اي يوم طبيعي بس الضحك اللي كنت اضحكه هل هو كان طبيعي؟
بعدها بدقايق انصدمت بان شخص احبه بالحيل صار له حادث
هل انا كنت حاسه انها اخر مره اضحك من قلبي ؟
يجيك خبر مفجع كذا محد حولك ماتقدر تسال احد تحس انك ضايع فجاة ترتسم صورة الشخص ببالك وهنا تبدا التساؤلات
هل بيروح وبيخلينا؟
هل بشوفه مره ثانيه؟
لا لا بيرجع مافيه شي صح مافيه شي ؟
لحظتها ودك يكون حولك شخص يجاوب على تساؤلاتك
الخبر كان مفجع لدرجة مو قادره اتنفس بسبب رساله وحده وفهمتها غلط وهنا فعلا بدا الصراخ ياربي تكفى لا تفجعني فيه
الرساله عباره عن :
"عمك صار له حادث وتوفى اللي معه "
ماقريت الرساله كامله وفعلا انهرت قلت يارب لا اعيش شعور الفقد الفقد اللي اخاف منه اخاف يدخل عائلتي اخاف افقد شخص منهم اخاف يختفي مكانه من بينا
وبدا الخبر ينتشر وبدا التوتر والانتظار

- وهنا مر اليوم الاول كان اطول يوم في حياتي
وبدات التساؤلات:
متى بيرجع لنا؟
انا بقوم فيه انا بساعده وبنام عنده بس متى يجي؟
ومر اليوم الثاني والثالث والرابع والشهر الاول والشهر الثاني
وهو ماصحى بعدها
صحى بس مارجع مثل اول
كنت احسب اسبوعين ويرجع بينا للاسف مرت تسع شهور ونص

- انام واخاف يجي اتصال او رساله تفجعني فيه اخاف افقده
احبه لدرجة تمنيت اللي صار له صار لي
"بس لا اعتراض على حكم الله "

- دائما افكر وش الشعور اللي حس فيه قبل يصير له اللي صار
هل كان خايف ؟
هل كان يتألم ؟
- دائما اتخيله قدامي احسه موجود معي اقوم ابي احضنه ويطلع خيال دائما اكلمه في خيالي واعاتبه ليش خليتنا ؟
- وصار عندي فوبيا جديده فوبيا الاتصال والرسايل وصرت اشوف الرسايل وماسوي لك سكب اخاف يكون فيها شي يفجعني
-وصرت انام كل يوم وانا بالي عنده بالي مشغول فيه احس ودي اشل تعبه واحطه بقلبي واقوله :
ليت الوجع بعروق قلبي ولا فيك
وليت التعب غلطان ساهي ولا جاك
لو الشفا بضلع صدري لداويك
واطحن جميع ضلوع صدري فداياك .

- فوبيا الفقد صدقوني مؤلمة هو شعور تحسه يكتم نفسك وقتها يجيك بكيه تكسر ضلوعك بس ماتبي طلعها ودك يطلع صوتك بس للاسف تحس احد مانعك عن الكلام

(وَقَالَ رَبُّكُمُ ادْعُونِي أَسْتَجِبْ لَكُمْ ۚ )
دعواتكم له بالشفاء العاجل 🤲🏻

- تنميت دائماً ان تالم بدلاً من افراد عائلتي ولكني نجوت مجدداً .