في قبضة الاغا

Part1

في جهة من جهات الجزائر تحديدا في عشيرة آل غريب        

في يدو الفاليز تاعو يشوف في القصر لي كبر فيه عاش فيه احسن ايامات في حياتو عاش بين عايلتو الكبيرة حتى جا نهار لي دمرولو فيه حياتو وعد روحو انو مايرجع للعشيرة هاذي حتى يعرف شكون دمرلو حياتو هو صح رجع اما تبدل مش كيف راح راح مهزوم حيلو مهدود من الخسارة اما رجع وقلبو اكحل شاعلة فيه نار.. نار الانتقام لهيب كيف يخرج يحرق الاخضر واليابس دخل محبش يقلهم في اليل كلهم راقدين القصر هذا مش راح يتبدل مزال كلش كيف كان مفاقش مع روحو حتى وصل للغرفة تاعو
......: مزالت كيف مكانت متبدل فيها والو دخل عمل دوش خفيف وخرج راح للدريسينغ بدل وش لابس لقش تع رقاد حط راسو على المخدة يخمم في غدوة حتى غفا

....................

...: بابا متخلينيش ماما لا تعيشي لا متخلنيش
ملاك والله نعطيك تلعب معايا بالالعاب الجديدة متاعي علاه راقدين بابا لا لالللللا
ناض من النوم حواجبو مقرونين غير عينيه السود يبانو في الظلام ابيض عينيه  ولا احمر  عروقو مكبوسين عضلاتو تنفخو قطرات عرق على جبينو مظهرو يخوف
......: نوعدك ياكلب كيف ماحرمتني من اغلى ماعندي نحرمك من اغلى ماتملك يا حاتم الكلب

ناض من فراشو رايح للدوش الماء يسيل على عضلاتو المخدومة جسمو معمر وشوم يخمم كيفاش راح ينتقم من قاتل عائلتو قضى حياتو كل يحوس عليه بالو راح ل قبل 17سنة... 

Flash back
صوت ضحكهم مالي الطوموبيل كي العادة يسمط على اختو الصغيرة و خوه كانو يضحكو وفرحانين رايحين رحلة عائلية في دقيقة كلش تقلب باباه مقدرش يتحكم في الفران الطونوبيل لعبو بيه هو عندو بزاف اعداء لانو الوريث الشرعي بعد باباه تقلبت بيهم الطوموبيل  الدم مالي البلاصة..... فيقو صوت تيليفونو خرج من الدوش لابس البرنوس تاعو
...: الو مسيو بيرم لقيناها
بيرم: اني جاي
هههه واخيرا راح نبدا هذي اول خطوة واخير خبر مليح على الصباح توجه للدريسينغ لبس سروال اكحل وتيشرت اكحل واديداس تاعو وهبط لقاها توجد في الفطور
بيرم: اووو الحاجة زمرد توجد في الفطور
الصوت هذا تعرفو امبوسيبل تغلط فيه حفيدها ريحة الغالي والغالية تلفتت والدموع في عينيها وراحت تجري تلاحت عليه تبوس وتعنق ودموعها ملات وجها
زمرد: توحشتك ياوليدي علاه غبت عليا هك والله توحشتك ههه القصر بلا بيك سامط مينطاقش هههه
بيرم: خدمتي ياغالية لازم هك انا تاني توحشتك راك امي لي ربيتني شكون عندي انا يزي بلا بكا امممم ريحت الفطور تشهي اووو وعاملة سفنج
زمرد: هههه ارواح نحطلك تاكل
بيرم: وينو جدي و آدم وعمي ومرت عمي
ادم: بيرم وقتاه جيت طولت المرة هذي
بيرم: جيت البارح في الليل اما محبيتش نقلقكم
على اخر كلمة هبط بكل شموخ و اكابرية عينيه كيف عين الصقر لابس برنوسووفي ايدو عصا  ومن وراه ولدو  مالك ومن وراهم هزار و منال

عثمان: وهذا قلق نت راك الغالي ولد غالي المرة الجاية متقولش لكلام هذا
بيرم: اغا
مشا باسلو ايدو وعنقو عناق رجولي وسلم على الباقي وفطرو في جو عائلي

في جهة اخرى في عشيرة آل جابر

هابطة تجري في الدروج وشعرها الاسود كسواد اليل  طاير مزراها
....: ماما راح عليا الحال قول لبابا يوصلني
....: كالعادة روتار باباك ميقدرش يوصلكك اليوم
.....: امي اليوم عندي كور مهم
.....: شمس قول لشوفور يوصلك
شمس: باهي ايا باي يا زهرتي وباستها من خدها
زهرة: هههه مهبولة
شمس: صباح الخير عمو اليوم نت توصلني للافاك
......: تفضل بنتي
طول الطريق وهي تخمم في حياتها الاخرى وعلاه باباها يتصرف معاها هك كأنها مش بنتو الة للحرب مصلحتو فوق كلش

نحكيلكم على بطلتنا شمس طفلة عمرها 22سنة حلمها تكون مصممة ازياء لاكن قدرها ولا نقولو باباها كان عندو وجهة نظر اخرى انها تكون محامية و في نفس الوقت تكون طبيبة نفسية
هذا عامها الاخر اما عندها جانب خلاف ميعرفو حتى واحد الا باباها لي صنعها
(تكتشفوه في باقي الاجزاء) 🙂🙂

نرجعو لشمس وصلت للافاك وبقات تحوس على واحد الحيوانة

شمس: الهجالة هاذي راح تهبلني وين غبرت الحمارة
......: وين شارة
شمس: بسم الله الرحمن الرحيم من وين خرجتي نتي اوووووف كي الجن ازح معلاباليش من وين تخرجي وين كنتي ياواحد الهجالة
لمار:  😒 تنفسي بالراحة شوي شوي اولا منيش جن انا صاحبتك لمار دوك نشهد الا حبيتي ثانيا كنت هنا نتي لي مخك وين كان ثالثا منيش هجالة انا عزبة صاي
شمس: هيه صاي ايا ندخلو ولا كيف كل مرة ناخدو رخسة على الملأ و انا لساني تعرفيه متبري مني امالا هيا سوغتو هاد لبروف والله يرخسنا حكمتها من يدها وتسحب فيها حتى وصلو لقاو لبروف مزال مجاش قعدو في البلاصة الاخيرة
شمس: بففف باين مش جاي
لمار: ايه عندك حق وش رايك نخرجو نحوسو شوية
شمس: لمار علابالك بابا ميحبش وداير عليا العسة الحراس يراقبو فيا
لمار: 🥺 بلييييييييز هيا الزينونة تاعي
شمس: هيا باهي وين حابة تروحي ياللة
لمار:  بلاصة العادة
كملو يتمشاو.......... يتبع