ဂျူလီယန်း ၁၆ အကျဉ်း - တိုတောင်းစူးရှသည့်အကူအညီတောင်းသံမှာ ဖုန်းစပီကာမှတဆင့် တိတ်ဆိတ်နေသောကန်တင်းတွင်စူးထွက်လာသည်၊ တစ်ဖက်တွင်ထိုင်နေသည့်ဖေ့တုပင်ကြားလိုက်ရ၏။
- - - - - - - - - -
တိုတောင်းစူးရှသည့်အကူအညီတောင်းသံမှာ ဖုန်းစပီကာမှတဆင့် တိတ်ဆိတ်နေသောကန်တင်းတွင်စူးထွက်လာသည်၊ တစ်ဖက်တွင်ထိုင်နေသည့်ဖေ့တုပင်ကြားလိုက်ရ၏။ လော့ဝမ်ကျိုးဖုန်းပြန်ခေါ်သော်လည်းမရတော့။
အသံတစ်သံသာကြားလိုက်ရသော်လည်း ထိုသူမှာတရားမဝင်အငှါးယာဉ်မောင်းချန်ကျန့်ဖြစ်ကြောင်း လော့ဝမ်ကျိုးသိလေသည်။
ချန်ကျန့်သည် ချန်ယွမ့်ဖုန်းပြောနေသည်ကို ကြားလိုက်ရာမှ ဝမ်ဟုန်လျန့်အကြောင်းသတင်းပေးထားသူဖြစ်ပြီး သူ့ကိုယ်ပိုင်တွက်ဆမှုတချို့လည်းရှိသည်။ သို့သော် ထိရောက်သောသက်သေကိုတော့မပေးနိုင်သေးချေ။
ချန်ယွမ့်မှာ သူ့မိသားစုကိုဆွဲထည့်မိမည်စိုးသောကြောင့်ဘာမှမချန်ထားခဲ့သည်လား သို့တည်းမဟုတ် ဝမ်ဟုန်လျန့်သည် လူအားသတ်ပြီးချိန်တွင် 'မူးယစ်ဆေးတိုက်ဖျက်ရေး' နာမည်သုံးကာ သက်သေအားလုံးရှာဖွေသွားသည်လားမသိ၊ အနှစ်ချုပ်မှာတော့ လော့ဝမ်ကျိုး ချန်ကျန့်ထံမှရလိုက်သည်မှာ သူ့အစ်မ၏ဓာတ်ပုံအယ်လ်ဘမ်အဟောင်းတစ်ခုသာဖြစ်သည်။
သူတို့တွေ့ပြီးချိန်တွင် ထိုလူငယ်လေး၏မကျေနပ်မှုကို လော့ဝမ်ကျိုးရိပ်မိသောကြောင့် သူသေချာရှင်းပြခဲ့သည် "တခြားဘယ်သူ့မှမပြောသေးနဲ့၊ ငါတို့မှာသက်သေမရှိသေးဘူး။ မင်းဟာမင်းလျှောက်ရှာဖို့ဆိုပိုပြီးမကြိုးစားနဲ့။ တစ်ခုခုသတိရတာရှိရင် အချိန်မရွေးငါ့ကိုဖုန်းဆက်လို့ရတယ် — မင်းကအရဲစွန့်ပြီးသက်သေရှာလည်း အသုံးမဝင်တာဖြစ်နိုင်တယ်။ ငါတို့တင်ပြလို့မရတာဖြစ်နိုင်လို့ အဲ့လိုမျိုးဆိုအလဟဿပဲ။"
ထိုစကားမှာစကားကုန်ဖြစ်နေပြီဟုလော့ဝမ်ကျိုးထင်ခဲ့သည်။ ချန်ကျန့်ကိုအန္တရာယ်မကျစေရန်လုံလောက်သင့်သည်။ သို့သော် သူတို့စကားပြောအပြီး ၁ ရက်ပင်မရှိသေး၊ ထိုလူမှာဒုက္ခရောက်နေလေပြီ။
YOU ARE READING
စိတ်တွင်းဖတ်စာ (Myanmar Translation Novel)
Mystery / ThrillerChildhood, upbringing, family background, social relations, traumatic experiences... We keep reviewing and seeking out the motives of criminals, exploring the subtlest emotions driving them. It's not to put ourselves in their shoes and sympathize, o...