ملاحظة مهمة : الحالة المطروحة هي مجرد فترة تمر بينا اجمع ك بشر و هالشي جدا طبيعي فاطمئن و ارتاح ☁️☁️
....
كل شي مبهم و غير مفهوم ، احس نفسي بدوامة ، دوامة افكار و مشاعر ، توقعات للمستقبل و استرجاع للماضي ، ما اعرف متى راح يجي الوقت اللي اعيش بيه بالحاضر ، حتى باللحظات او الوقت اللي ماكو بيها فكرة معينة براسي ، احس راسي يوجعني و مليان افكار و كاني كنت افكر لمدة ساعات متواصلة ، الشعور ثقيل ،كريه وخانق مثل انك تريد تضغط على زر بحيث تفقد كل شي ..افكارك ، مشاعرك ، الهواجس ، التوقعات ، الذكريات ،الاراء ، الاختيارات و كل شي مسببلنا هذا الالم و الضغط بالراس اللي تحس كانه راح ينفجر و كانه عيونك راح تتقطع من شدة الالم ، الفكرة مو بس بالضجة اللي موجودة بعقلي ، المشكلة الحقيقية الثانية اني مجبور اتعايش مع ضجة بارض الواقع مع ناس هم اللي من المفترض يكونون ملجاي و اماني و الزر اللي راح يهدي كل افكاري ، بس بدل من هذا كله ، الاقي ضجة عملاقة ثقيلة ثانية لازم اتحمل مسؤوليتها ، نميمة الاقارب ، تانيب الاهل ، سلبيات الناس المحيطة ،مقارنات ما راح تقدم ولا تاخر ، تثبيط معنويات و طرح توقعات تحسسك انك غريق ، كلها اشياء تربط ايدينا و عقولنا لذلك نصير ما نقدر نتحمل اي شي و نريد بس نفرغ طاقتنا و الضغط اللي تيصير بداخل عقولنا ، بس حتى هذا الشي يصير صعب علينا نسويه ، لانك بكل بساطة بعد كل هذه الاشياء تحس انك محمل و مثقل بمسؤولية عملاقة ، تحس بضياع .. بشنو ابدا و بشنو انتهي ؟ شنو اول خطوة و متى ابداها ؟ و من تقرر تبدا ، الطاقة السلبية و كل شي صار ازعجك راح ينربط قدام عيونك بالبداية ، فتقرر انك تعوف الموضوع او تاجله الى وقت ثاني تكون مرتاح بيه اكثر....
مازال اكو هواي كلام ، هواي افكار ،هواي حالات ، هواي مشاعر ، هواي هواجس و الاهم هواي خواطر ...بس يمكن هذه الكلمات تختصر كل هذه ال "هواي" ..؟
