وصلوا سيف والبنات البيت ودخلن البنات يعقن عباياتهن اما سيف سار عند يدته الي كانت يالسة بروحها في الخيمة الي قدام بيتهم , سلم على يدته وحب راسها
سيف: اماية شو تسوين هني بروحج
اليده فاخرة: ماشي فديتك مليت من يلست الحريم وصدعتهن , قوم ييب القهوة الحين بيي يدك من العزبة
سيف : انشاءلله
قام ودخل البيت وسار الصالة اييب القهوة وحصل البنات يالسات في الصالة
سيف : هود هود
مهرة : اقرب
دخل سيف وشل دلة القهوة والتمر( السح) ويا بيطلع
سيف : سيرن عند يدتيه في الخيمه محد عندها
مهره : انشالله
طلع سيف وطلعن البنات وراه سارو عند يدتهم وشوي ويو حمدان وعبيد وعبدالله سلمو على يدتهم ويلسو
حمدان (وعيونه على حمده) : يدووه فديتج صبيلي قهوه محلااه من ايدج فديت روحج
عبيد: عيونك الغالي انتبه عليهن
سكت حمدان وحمده صار ويهها احمر من الخاطر ، صبت اليده قهوه حق الشباب ويلسو يسولفون وعبدالله كان في عالم ثاني عيونه صوب روضه الي كانت تسولف ويا حمده ومهره بصوت خفيف
حمدان : يدتيه انا الصراحه أبا اعرس
مريم : منو هذي تعيسة الحظ الي بترضى فيك ؟
حمدان : انتي جب ما يخصج
اليده فاخره : افا عليك خلص دراسه وبنيوزك
حمدان : لين اخلص دراسه ! لا فديت روحج ماروم اصبر انا
اليده فاخره : في الصبر بركه
حب سيف يغير الموضوع قبل لا يتكلم حمدان واييب العيد
سيف: نزين يدوه شورايكم نسير العزبة سيره عائليه يقولون بيصب مطر باجر
اليده فاخره : زين عيل دق ع فراس قول له ينظف العريش
عبدالله : انا اقول نسير عزبتنا احسن ، كبيره ومرتبه وفيها كيرفانات ودراجات وخيول بعد
مريم : الللله نبا نسييير
اليده فاخره : بشاور بو خليفة ويصير خير
حطو العشى وسارو الشباب ميلس الرياييل واليده والبنات دخلن البيت . تعشو وكل حد راح ع غرفته ينام لانه ينتظرهم يوم جميل باجر وفي الصباح وتقريبا ع الساعه 6 ونص الصبح قامت حمده بحماس تسبحت وتلبست وطلعت من الغرفه بدون ماتسوي صوت عشان ما تقوم أمها ، سارت حمده الطابق الثاني عند غرف البنات ، طقت الباب على غرفة روضه ومريم لاكن محد رد عليها شكلهم في سابع نومه ، دقت باب غرفة مهره وشيخه و بعد دقايق فجت مهره الباب
مهره : خير ؟
حمده : مب على أساس متفقين نسوي الريوق
مهره : يوهه متعايزه انا برد انام
حمده : بكيفج عيل انا بنزل اسوي الريوق بروحيه
مهره: طعع انزين انتي اسبقيني انا بتسبح وباييج
حمده : اوكيه
ونزلت حمده صوب الصاله تتأكد اذا حد موجود وما كان حد موجود ، لمحت راديو يدها على الطاوله شلته ويلست تتعبل فيه لين اشتغلت اغنيه هنديه عجبها اللحن وشلت الراديو وسارتبه المطبخ ، طلعت الاغراض اللي بتحتاجها و علت على صوت الاغنيه وبدت تسوي الريوق ، دخل سيف المطبخ وانفجر ضحك على منظر حمده اما حمده مانتبهت له كانت مندمجه تقطع طماط وترقص ، قصر سيف على صوت الاغنيه
سيف : حمده ؟ شو تسوين ؟
لفت حمده صوب الصوت وصارخت من الخوف وركض سيف بسرعه حط ايده ع فمها يسكره
سيف : اييهه سكتي فضحتينا
حمده بدت تحس ع نفسها وانتبهت لقرب المسافه بينها وبين سيف ف بعدت ايده عن فمها ، قطع عليهم المشهد دخول مهره
مهره : اييه انتو شو تسوون ؟
استحت حمده وبعدت عن سيف
سيف : ماشي
مهره وهي مستغربه من وجود سيف : انت شو مقومنك من وقت ؟ ترا إجازه
سيف : بنسير انا وعبدالله نرتب العزبه
حمده حاطه ايدها ع بطنها وكأنها تتألم
مهره : حمدوه فيج شي ؟
حمده : احس قلبيه طاح فبطنيه
مات سيف ضحك
مهره : سيف شرايك تطلع
سيف : نزين وانتو شو بتسوون ؟
مهره : فول وبيض
سيف : فول عالصبح ؟ الله يعين بطونا ، انزين ماتبونيه اساعدكم؟
مهره : بتسوي خير ، عليك عصير البرتقال
وبعد ما خلصو يسوون الريوق رتبوا الجلسه الخارجيه وحطو الريوق هناك دقايق و يتهم يدتهم بعد ما زلزلت البيت تدور الخدامات وحليلها ماتدري ان حمده عاطيتنهن إجازه اليوم ، سلمو عليها وحبو راسها
سيف : اقربي اقربي مسوين لج احلى ريوق
اليده فاخره : تسلم يدينكم يعلني ما خلا منكم ، ماشالله عليكن يا بناتيه كبرتن وغديتن حريم اليوم تطبخن حق يدتكن باجر بتطبخن حق رياييلكن
سيف : وانا بعد امدحينيه تراني مسوي العصير
اليده فاخره : عطنا بنذوقه
سيف : تسلك العيوز
اليده فاخره ( بعصبيه ) : امك العيوز
سيف حب راس يدته : امزح وياج فديتج
اليده فاخره : هيه عيل وين العرب ؟
مهره : رقوداليده فاخره : مالت عليهم ، أقول حمده قربيلي الخبز
ع الضحى تيمعت العايله في الصاله سوالف وكل حد يعطي اخر اخباره .. قطع عليهم صوت راشد الي نازل من فوق متهندق وبصوت عالي : تعبت من هالولد شلوه عنيه مايسكت صياح ورا صياح
ام راشد : مهروه قومي شلي ولد اخوج
( توفت زوجة راشد قبل 5 شهور بحادث سياره هي واخوها وكان عمر ولدها ناصر شهرين . . وتربى ناصر عند يدته ام راشد )
سارت مهره غرفة راشد وشلت ناصر سوت له حليب عشان يسكت ودخلت الحمام عبت البانيو ماي دافي وفجت الكبت بتطلعله ملابس
مهره : يووه شو ها ماعنده ملابس كلهن صغار وين يدخل فيهن .. افف منك يا راشد
نزل ناصر من على السرير وهو متوجه صوب صوت الماي اللي ياي من البانيو فج عيونه بالقو (اونه مصدوم) : ماي ماي
ركض ناصر صوب مهره بخطوات متسارعه وعق عمره في حضنها ، انصدمت مهره من حركته وماتت ضحك
مهره وهي تحبه على خده : فديت هالويه وفديت هالخدود ياربيي
سبحته وطلعتله شنطه صغيره وحطتله فيها اغراضه ونزلت بتشوف الناس متى بيسيرون البر لاكنها انصدمت من الهدوء .. محد كان موجود في البيت ، طلعت تلفونها واتصلت على أمها
مهره : امايه انتو وين ؟
ام راشد (باستغراب) : نحن سرنا البر انتي مب مع البنات ؟
مهره : لا انا كنت اسبح ناصر ونزلت مالقيت حد
ام راشد : الحين منو بييبج ؟ الدريوليه فمزرعة يدج
وتسمع ام راشد صوت ياي من عدالها ( ام حمد : حمد في البيت خليه اييبها )
ام راشد : مهره تسمعينيه ؟ سيري ميلس الرياييل بتحصلين حمد خليه ايييبج
مهره : استحي
ام راشد : عنبوج ولد عمج تستحين منه ؟عيل بتمين في البيت بروحج ؟ نحن بنطول وانتي خلي الحيا يفيدج
وبندت ام راشد التلفون بدون لاتسمع رد مهره .
