فصليةة

البارت الثاني

_شلون هيج بيوم وليلة خسرت اهلي
توسلت بـ عمي علمود اشوفهم بس محد قبل يخليني، لان الحادث الي جانو مسوينه امي وابويه جاان كلش قوي فـ عمي رفض، رفض قاطع ميخليني اشوفهم نهائين
ومن بعدها ضليت ثلاث ايام الفاتحه واني نايمه لا اكل ولا اشرب وطول هاي الايام كضيتها فقط بجي وبلگوه يلاا اشرب الماي بوكتهاا
حسيت الدنيا كلها وكفت بعيني وحياتي انتهت نهائياً ما ضل بيها طعم ومن بعدها ببيت عمي كون اني وحده اهلي وماعندي غير هذا العم فقط بعد كم شهر من وفاة امي وابويه بدت المرحله الدراسيه الثانيه لاكن ماكدرت ارجع اكمل جنت كارها كلشي بلحياة وتركت السنة،
بعد الي صار اجه عمي وكال

احمد:  بنتياني اعتبريني مثل ابوج وهاي زوجتي اعتبريها بمقام امج وبنتي وابني هذول اخوانج وانتي راح تيعيشين ويانه هنانه بلبيت

بنتي بيتكم صغير اذا تردين نبيعه البيت واخذي فلوسه وذا متردين نبيعه أجري واخذي ربحن

_عمو أجر البيت

بعد ايام نقلت اغراضي وعشت يم بيت عمي وابات يم بنت عمي(نور) بلغرفه
وكلهم جانو تعاملهم زين اله زوجه عمي جانت نهائياً ما حابه وجودي بس جانت ساكته لان صار امر واقع ومتكدر تسوي شي،
نور عمرها 18سنه و علي 25 سنه واني 23 سنه فـ جنت كلش مرتاحه وياهم لان جانت اعمارنه متقاربه وصارولي كلشش اصدقاء..
بس عشت وياهم واني احس نفسي خطار بسبب امهم جنت كلشش مستثقله العيشه وممرتاحه بيها بس جنت مجبوره وبعد سنه رجعت لجامعتي وحاولت اكمل دراستي واتقلم وي الوضع الي اني بي

نور جانت عدها علاقه بواحد وكلش تحبه وجان جيرانهم حايط على حايط جان مراهق بعمرها دائما تكعد تحجيلي عن علاقتهم ومرات جانت تصعد للسطح حتى يتشاوفون من بعد لان جانت اكو مسافه بين السطحين وصارت تحجيلي نور كل اسرارها هيه وحبيبها وكالتلي يحبني وراح يجي يخطبني
واني جنت اشوفها كلش فرحانه وكلشش تحبه فـ جنت اساعدهاا
لماا تصعد على السطح تشوفه اني جنت اوكف على الدرج اراقبلها اخاف احد من اهلها يصعد وبيوم جانت صاعده بسطح بليل تحجي وياها وام لولد صعدت وره ابنها وشافتهم وصارت تصيح عليه وبلحضتها نور نزلت ركض وجانت كلش خايفه وكالت ام حبيبي شافتني وراح تسويلي مشكله

_لتخافين اهدئي مراح تسوي شي

_مو انتِ متعرفين هذا الي احبه امي وامه مو على اصطلاح واكيد راح تجي وتكول لامي حتى تلزم زله عليه وعلى امي

وفعلاً ثاني يوم اجتي ام لولد على زوجه عمي ونور اجتني خايفه وكالتلي الله يخليج ساعديني اذا اجت امي وسئلتني راح انكر واكللها رغد هيه الي جانت فوك مو اني لان اخويه اذا عرف راح يموتني بس انتي محد راح يسويلج شي

_اجتي زوجه عمي وتحقق بلموضوع
كتلها خاله مو نور الي جانت فوك اني جنت صاعده وهاي المره تتبله علينه واني معندي شي وي لولد مجرد صعدت فوك حتى اشتم هواى لان جنت مخنوكه وهذا لولد جان صاعد فوك واني ما منتبه
زوجه عمي ما اقتنعت بكلامي وكالت

_اياج ثم اياج مره ثانيه اشوفج على السطح خلي ببالج تراا احنه سوالف الحب والمواعده هاذي ما نقبلها

_بلحضتها حسيتها جاي تهيني بس بغير طريقه وسكتت وتحملت وما كدرت ارد عليها وكتلها

_تمام خاله
لان جنت مستحيه من نور وما ردت ارد عليها لان مردت نور تتأذه

بيوم من الايام جنت اني وزوجه عمي ونور بلبيت وعمي وعلي طالعين
ما حسينه اله دخل علي فجئه ويركض وجان كلش خايف احنه كولنه فزينه وكوناله شبيك شصاير وياك

_علي :   تعاركت وي واحد وضربته على راسه ويمكن مات،

وبيومها كلنه خفنه وامها خافت عليه كالتلها
روح يم خوالك هسه اكيد اهل لولد راح  يجون لبيت يدورون عليك
وفعلاً علي راح يم خواله وللاسف عرفنه لولد الي تعارك وياه مات
وصارت مشكله عشائريه كلشششش جبيره بين اهل لولد وبين عمي
وتدخلو كبار العشيرتين لحد يحاولون يحلون الموضوع
لان اهل الشاب الي توفه جانو مصممين يموتون "علي" (ابن عمي) 
وبعد واسطات وكعدات طويله وصلو الحل ومن ضمن هذا الحل جان اكو شرط
الشرط هوه
لازم عمي ينطي اهل الشاب "" فصليةة"" حتى يسكتون عنه

عمي مجان اله غير هذا الحل حتى ينقذ ابنه من الموت فـ وافق
لما رجع لبيت وحجه الموضوع زوجه عمي تخبلت ورفضت ونور انهارت وكالت مستحيل اوافق لو تموتوني اذا زوجتني فصلية قسم بالله انتح،ر واخلص
من يومها استمر المشاكل بين عمي وزوجته
اله ان سمعت زوجه عمي تكول لعمي زوج بنت اخوج اني ما اقبل تنطي بنتي 

بلحضتها اتفاجئت اني اعرف هيه متحبني  بس ما توقعت هيج يصدر منها هذا الكلام
وفجئه ما حسيت اله الموضوع كله تحول يمي وعمي كعد يقنع بيه حتى اوافق

_بنتي اريدج تساعديني وانتِ عاقله وهذي بنتي جاهله واخاف تسوي بنفسها شي واني مجبر وافق لان ابني راح يموتو اذا ما حليت الموضوع
حاولت ارفض بس عمي حاجاني بصيغه الامر وصلت للمرحله صرت اتوسل بي وهوه مصمم ويكولي خلص انتهى هذا الموضوع
وبلفعل صرت اني ضحيه ابن عمي وقررو يزوجوني لاخو الشاب المتوفي
ياريته جان هذاك اليوم زواج محترم ويشبه الزواجات
هيج فجئه حددو اليوم واجو ناس بسياره وياهم شاب حتى ياخذوني اجه عمي واخذني من ايدي وسلمني بيدهم صعدت وياهم بسياره واني لابسه ملابسي العاديه وطول الطريق اكول ياااا رب يطلع حلم
لان مجنت مصدكه
ولما وصلت دخلت وي الشاب لبيته وجان عايش وي اهله وجانت نضرات اهله اليه تخوف يريدون ياكلوني بعيونهم كانو اني للموتت ابنهم وام لولد اول ما دخلت كالتلي انتي اسمعيني زين لا تحسبين نفسج عروس ومثل النسوان ترااااا انتي مجرد فصليةة من باجر  تخدمين وتشتغلين وكلشي نطلبه منج تنفذي بدون ما تناقشين بلحضتها كلششش حسيت بـ اهانه وضليت ساكته ودموعي تصب وزوحي اخذني من ايدي وصعدني فوك للغرفه وكالي ادخلي هنا
وضليت كاعده وابجي وخايفه وابداااااً ما جنت مرتاحه وجنت احاول اهدء عن نفسي واكول اكيد مراح ياذوني واكيد زوجي يدافع عني بعتبار صرت زوجته  وعرضه بسسسس صار الي مجنت متوقعته........