"ඉස්කෝලෙට බලු වෑන් එකෙන් ඇවිල්ලලූ"
දැලක එල්ලිලා ඉඳගෙන epiphany පියානෝ වාදනයක් අහන් හිටිය මිහිනුට ස්කෝලේ ළමයි දෙන්නෙක් කතා වෙවී යනවා ඇහුනා. ස්කෝලේ ඉවර වෙලා දැන් ටිකක් වෙලා උනත් පියානෝ එක ප්ලේ කරපු ගෑනූ ළමය මිහිනුගේ හිත ඈතකට ගෙනිහින් තිබ්බා.
බලු වෑන් එක. මළා මන් ඉවරයි .
හදිස්සියේම දෙයක් මතක් වෙලා මිහිනු දුවගෙන ගියේ ඕලෙවල් සෙක්ශන් එකට තිබ්බ කොරටුව දිහාවට . හෝම් සයන්ස් ළමයින්ගෙයි ඇග්‍රි ළමයින්ගෙයි නානාප්‍රකාර කැති උදලු දාලා තිබ්බ චූටි කාමරේ හරියේ ඕලෙවල් සෙක්ශන් එකේ චූටි යාලුව හිටියා.
චූටි බලු පැටියෙක්.
මුළු ඇඟම කලු පාටයි . කකුල් දෙකේ අන්තිම හරිය විතරක් සපත්තු දාලා වගේ සුදු පාටයි. කළුවා කියල හරි ලස්සන නමක් එක්ක මුලු ඕලෙවල් සෙක්ශන් එකේම වගේ ආදරේ දිනාගන්න මේ චූටි කුක්කා සමත් වෙලා තිබ්බා. ඒත් අද වාරේ අන්තිම දවසනේ . ළමයි සේරම වගේ ස්කෝලෙන් ගියාට පස්සේ බලු වෑන් එක ආවේ අනිවාර්යයෙන් කළුවා ගෙනියන්න තමයි. ඉස්සරම කාටුන් එක්ක පුංචි මිහිනුගේ හිතේ බලු වෑන් ගැන තිබ්බේ එච්චර හොඳ අදහසක් නෙමේ.
මිහිනු එතකොට නමය වසරේ .කොට කලිසම් අඳින අන්තිම දවස අද. මියුසික් රූම් එකේ එල්ලිලා ඉඳපු දැල අත ඇරලා මිහිනු දිව්වේ ඕලෙවල් සෙක්ශන් එක පැත්තට . යද්දිම ඉන්නවා කාගෙන්හරි හම්බුන යෝගට් කප් එකකට හොම්බ ඔබාගෙන . අනේ පැටියෝ ඔයා මොනාද දන්නේ. කමක් නෑ වීරයා ආවා ඔයාව බේරගන්න .
කළුවවත් උස්සගෙන ස්කෝලෙ බිල්ඩින් අස්සේ හැංඟිගෙන වගේ මිහිනු පැන්නේ කළපුව පැත්තට . කළපුව හරිය තමා සේරම ළමයින්ගේ හැංඟෙන ස්පොට් එක. මිහිනු දන්නැති උනාට සමහර නසරාණි පැටවුන්ගේ ස්කෝලෙන් පනින ස්පොට් එකත් මෙතනම තමයි. ඒක ඉතින් තාම දන්නේ එකම එක්කෙනයි.
"හම්මේ හති කළුවෝ. බලපන් මුලු ස්කෝලෙම දෙන ඒව ගිලලා ගිලලා දැන් සයිස් එක. "
වූ වූෆ්
"බුහ් බුහ් තම. ඔන්න හොම්බ වටේ යෝගට් "
"ඔයා කවුද ? "
ඇහිච්ච සද්දයක් එක්ක මිහිනු පිටිපස්ස බැලුවා . බැලුවට පස්සේ තමයි ඇස් දෙක කටට ගියේ . ගෞරව් අයියා . ස්කෝලේ මැරයා. අදත් කාටද කොරිඩෝවේ තියාගෙන ගහගෙන ගහගෙන යනවා මිහිනු ඇස් දෙකටම දැක්කා. මෙයයි නිවුන්නයි දෙන්නම එකයි. ස්කෝලෙම එයාලගේ වගේ හිටියේ .
