ညဆယ်နာရီကျော်သည်အထိ သုံးယောက်လုံး အိပ်မပျော်သေးပေ။ ဥဂ္ဂံက အလယ်တွင် ပက်လက်လှဲကာ မျက်နှာကြပ်ကို ကြည့်ကာ ပြုံးနေပြီး ကျောပေးကာ လက်ကို ခေါင်းခုရင်း အိပ်နေသည့် ဥက္ကာက ဥဂ္ဂံဘက် လှည့်လာကာ ခပ်တိုးတိုး ပြောသည်။
" ငါ့ဘာသာ တစ်ယောက်တည်း အိပ်လည်းရပါတယ်။ မင်းတို့နှစ်ယောက် လာအိပ်မှ ကုတင်က ကြပ်ပြီး အိပ်လို့ကို မပျော်တော့ဘူး။ ငါ့ကို လာနှစ်သိမ့်တာလား ... အိပ်ရေးပျက်အောင် လာလုပ်နေကြတာလား။ "
မြင့်မိုရ်လည်း အိပ်မပျော်သေးသည်မို့ ဥဂ္ဂံ၏ ပခုံးတစ်ဖက်ပေါ် ခေါင်းလေးမှီကာ စောင်အောက်တွင် ဥဂ္ဂံ၏ ခါးကို လက်တစ်ဖက်ဖြင့် ဖက်ထားသည်။ ထိုလက်လေးကို ဥဂ္ဂံက ပြန်ကိုင်ထား၏။ထိုအနေအထားအတိုင်း မပြောင်းချင်သည်မို့ ဥဂ္ဂံက ဥက္ကာအား ခေါင်းစောင်းငဲ့ကာ ပြောသည်။
" အိပ်တော့ ကိုကို ... ငါလည်း အိပ်ချင်နေပြီ။ "
ဥက္ကာက ဆတ်ခနဲ ငုတ်တုတ်ထိုင်လိုက်တော့ သုံးယောက်လုံးပေါ် လွှားခြုံထားသည့် စောင်မှာ အောက်သို့ လျောသွားကာ ထိုနှစ်ယောက် ဖက်တွယ်ထားသည်ကို မြင်သွားသည်။
" အဲဒါကြောင့် ငါ စိတ်ရောကိုယ်ပါ ကျဥ်းကြပ်ပြီး အိပ်မပျော်တာ။ ငါ့စိတ်က အလိုလိုကို ခံစားလို့ရနေတာ။ လူပျိုလေး ရှိတယ်ဟ ... လူပျိုလေးဟ ... အနေအထိုင် ဆင်ခြင်ကြ။ "
ဥဂ္ဂံ၏ ခါးပေါ်မှ လက်လေးကို မြင့်မိုရ် ပြန်ခွာလိုက်သည်။ ဥက္ကာက ကုတင်ပေါ်မှ ဆင်းသွားပြီး ကျောပိုးအိတ် သွားယူကာ စာကြည့်စားပွဲ ထိုင်သည်။
" မျက်လုံးကြောင်သွားပြီ။ စာကြည့်လိုက်ဦးမယ်။ "
နည်းနည်း ရှက်သွားသည်မို့ ဥဂ္ဂံက လည်ချောင်းမကပ်ပါဘဲ နှုတ်ခမ်းနားသို့ ဘယ်ဘက်လက်ကို လက်သီးခပ်ဖွဖွ ဆုပ်ကာ ချောင်းဟန့်နေပြီး မြင့်မိုရ်လည်း ငုတ်တုတ်လေးထိုင်ကာ ခေါင်းလေး ကုပ်နေသည်။ဥက္ကာက ပါဝါပါသည့် စာကြည့် မျက်မှန် အကြည်ရောင် ခပ်ကြီးကြီးကို တပ်ထားသည်။
![](https://img.wattpad.com/cover/366867117-288-k816759.jpg)
YOU ARE READING
Youth , Sweet Love
RomanceMyanmar×OC Fic cover crd to pinterest နုနုပျိုပျို ချစ်ခြင်းလေးတစ်ခု ႏုႏုပ်ိဳပ်ိဳ ခ်စ္ျခင္းေလးတစ္ခု 11.4.2024 _