-يعامر دول خمس ايام بس
=يعم روحهم انت انا لا
-انا مش فاهم هتنضج امتي وتستلم الشغل
=شغل ايه ده يا كريم مشرف رحلات! وكل شويه حد ياكل نفوخي من الشكاوي قولتلك مليش في الجو ده ونصيبي يعم في الشركه انا متبرعلك بيه
_عامر ده اخر كلام عندي انا لولا اللي ورايا كنت سافرت جهز نفسك عشان فاضل ساعه وتبقي هناك مش هقعد اعيد في القصه دي كل شويه
.........
-حاسه ان قلبي مقبوض يا ايمي من الرحله دي
=ده عشان اول مره نطلع من غير ماما وبابا بس
_مهو لو كانو سمعوا الكلام وكنا طلعنا كلنا كان حصل ايه
=يا چيلا متعقدهاش بقي هما عشان ميدو بيمتحن امتحانات الثانوي واحنا مصدقنا اخدنا اجازه من الشغل يلا اجهزي عشان نلحق الباص
........
=شوفتي الباص كله عائلات اهو يعني الدنيا امان
_هنتحرك امتي هو مش كده العدد كمل
=المفروض المشرف يطلع يتمم
....
=السلام عليكم انا عامر علام مشرف الباص والرحله معاكم طول ال ٥ ايام بإذن الله التواصل وكل حاجه خاصه بالرحله هتبقي معايا لو حد محتاج حاجه هكون في الخدمه نتمم علي اماكنا ونتأكد ان مفيش حد فاضل عشان نتحرك بإذن الله ..
......
_الطريق هدني يا ايمي مش شايفه قدامي
=طب الحقي نامي عشان بيقول اول بروجرام كمان ساعتين
_كملت بيه هو كمان بقي
=يبنتي هو عملك ايه طول الطريق مش طيقاه
_مبحبش الناس الفاضيه بيهزر عمال علي بطال مع الناس ومشغل اغاني وحشه طول الطريق
=يا جيلا يحبيبي هو كان بيفك جو الرحله والراجل كل اللي عمله هزر مع الناس الكبيره بس وكان محترم مع الكل
_طب نامي يا ايمي انتي بتدافعي عنه اكنه ابن خالتك نامي
.....
ايوا يا كريم وصلت وبس بقي عشان انت السبب في اللي انا فيه ده
-
بقي انا حته عيله تفضل طول الطريق تبصلي بقرف اكني قتلت قتيل ليها
-
اقفل اقفل ياكريم انت السبب اصلا اقفل سيبني انام
.....
كده احنا وصلنا لأول بروجرام لينا علي الساعه ٣ هنتحرك رحله سعيده ان شاء الله
........
_رجلي وجعتني من اللف عاوزه اقعد انا تعبت
=جيلا بلاش تحسسيني اني اخده بنت اختي الصغيره
_والله تعبت يا إيمي بصي انا هقعد هنا وانتي لفي شويه ومش هتحرك والله
=مينفعش اسيبك هنا طبعا احنا متعرفش حد هنا
_إيمي انا الكبيره مش عيله صغيره روحي وانا هستناكي بس متبعديش
=حاضر خلي بالك من نفسك مش هتأخر
....
=هو احنا فيه بنا تار !
_افندم
=اصل كل ما اشوفك الاقيكي بتبصيلي بقرف
_ابدا والله هو بس مبشوفش في الشمس
=متأكده
*فيه حاجه ولا ايه
=كنت بسألها عشان كل شويه تبصلي بقرف
*جيلا لا دي طبيعتها
=يعني هي كده عندكم في البيت
*هي كده علطول
_مخلاص يالطيفه
=طيب عموما كنت حابب ابلغكم ان مينفعش تمشو لوحدكم خصوصا انكم بنات ودي بلد غريبه فا ممكن تمشو جمبنا في وسط الجروب يعني او مع اي اسره تبعنا
وهيبقي ليكم كامل الحريه طبعا بس عشان نبقي اخدين بالنا من بعض
*خلاص تمام
=هستأذن انا وشويه واتحركوا علي الباص عشان بنتجمع
*تمام
....
_هو ايه اللي تمام هو فاكرنا عيال صغيره
=جيلا بجد هو معملش حاجه للاوفر ده وده شغله وفكي وشك شويه بجد انا هسبقك علي الباص
......
_اسر انا الحوار بقي فوق طاقتي والله يومين بتبصلي بقرف بس
=بطل انت تنكش فيها يعامر وهي هتبصلك عادي
_بتبسط
=يبقي متزعلش يخفيف بقي لما تبصلك بقرف
.......
=شوفتي اللي بتقولي عليه غلبان بيتكلم معايا ازاي
_والله شكلكم بيضحك
=انتي هتجننيني يا ايمي بقي انا يقولي خليكي ست عجوزه وقاعده علي الكرسي
_مهو مكنش ينفع برضو تجيبي الكوره في وشه واحنا بنلعب
=مهو استفزني الاول لما قالي انتي مبتنزليش البحر خايفه تغرقي وبعدين غصب عني
_غصب عنك ايه انتي كنتي هتكسري مناخيره بالكوره
=مش مهم فدايا قومي يلا ناكل عشان تلحقي تنزلي البروجرام بليل
_ليه مش هتنزلي يا جيلا
=لا تعبانه ومصدعه مش قادره
_مش هينفع اسيبك لوحدك ولا انزل من غيرك
=لا انزلي مع عمو وطنط اللي بننزل معاهم احنا قد عيالهم وهيلخوا بالهم منك
_مش هعرف اسيبك لوحدك
=ايمي احنا جايين نتبسط يحبيبي انزلي انتي عشان بجد انا مش هقدر
..............
_خف عينك شكلها مش نازله اختها نزلت من بدري وركبت الباص
=اكيد هتنزل يا اسر
_انا هسبقك علي الباص التاني يعامر خمس دقايق وهنتحرك عشان حجز المكان مش هنستني حد بكررها تاني اهو مش هنستني حد
........
_كده يشباب كلنا كاملين
=جيلا نازله ممكن نستناها يعامر
_للاسف يا ايمي هنتحرك دلوقتي خليها تحصلنا بتاكس
=مش هينفع اسيبها لوحدها انا هنزل ونبقي نحصلكم
_تمام اتفضلي
........
=فين الباص
_مشي
=يعني ايه هما مش ملزمين يوصلونا
_لا حضرتك اتاخرتي وقولتي مش نازله
=مانا نزلت عشان مسبكيش لوحدك كنتي قولتي انو هيمشي مكنتش هنزل
_خلاص بقي مش مهم هنركب تاكس ونحصلهم
.........
=هتروح فين وتسيب الناس يعني
_هرجعلهم يا اسر ازاي هسيبهم لوحدهم
=دي قوانين الشركه ملناش دخل فيها ويعم متقلقش اوي اهم وراك نازلين من التاكس
_بص بص بتبصلي بقرف ازاي
=حقها يعم انتو معملتوش ولا موقف حلو مع بعض وركز في شغلك يعمور مش فيها ها
..........
=شوفتي واقف بيبص ازاي
_واقف بيبص عادي يا جيلا يحبيبي متأفوريش
=مجرد ما بشوفه بيعصبني
_متبصيش عليه كتير يروحي
=قومي يابت بتعصبيني انتي كمان
.......
=حمدالله علي السلامه بكره هستناكم الساعه ٨ عشان نتحرك بدري علي البحر
....
_مالك ماشيه مبوزه كده ليه يا جيلا
=بقي انا اختي تقولك استني تقولها حصلوني انتوا
_وطي صوتك احنا في الشارع واسمعيني
=مش هوطي صوتي
_طب اسمعي الحوار كله مش زي ماانتي فاهمه انا كان لازم الحق الباص التاني وكنت مرتبط بمعاد وكنت هركب واجي ليكم عشان متمشوش لوحدكم لكن انتو وصلتوا ورانا علطول فكي كده
=عارف ايه مشكلتك انك معتبرني عيله صغيره ماشي ترازي فيها
.......
_مكنش ينفع اللي عملتيه ده
=عملت ايه انا مرضتش اكمل كلام وسيبته ومشيت
_فرجتي الشارع عليه بس جيلا بجد احنا متربناش علي كده صوتك كان عالي جامد
=طب نامي عشان دمي محروق مش عاوزه افتح في الحوار ده
........
=متقعد بقي انت رايح جاي كده زي النحله
_بقي انا تعلي صوتها عليا في الشارع وتسبني وتمشي
=ملكش دعوه بيها بعد كده عشان انتو زودتوها جامد في حق بعض
_انا دمي محروق يا اسر
=انتو بينكم حاجه عشان دمك يتحرق
_اكيد لا ايه العبط ده
=يبقي تهدا كلها بكره اخر يوم هتشوفها فيه
_لسه فاضل يوم في الرحله
=لا هي مش حاجزه معانا البروجرام ده يعني بكره اخر يوم هتشوفها وبعدها هتشوفها وانتو مروحين بس
_زي ما تيجي بقي
......
=شايفه بيبص ازاي من اول ما ركبنا الباص لحد ما نزلنا البحر
_يعني ينكش فيكي مش عاجب يسكت مش عاجب
=مهو ساكت وباصص بقرف
_بس مش ملاحظه حاجه
=حاجه ايه
_اول ما اشتغلت اغنيه يونس علي فونك هو شغلها علي الكاست
=مركزتش
_وقبل كده لما قولتي فين اغاني منير شغلها
=عادي يمكن بيحب الاغاني دي
_يمكن انا هنزل البحر شويه تتزلي
=لا انزلي انتي مليش مزاج
.......
_هتفضل قاعد باصص ليها كتير
=مش عارف
_اخرتها ايه يبن علام
=حاسس اني وقعت مش عارف مش هقدر اشوفها تاني ازاي
_مش عارف مش هتقدر تنكشها تاني ازاي
=مهو النكش ده محبه يا اهبل
........
_الفون بتاعي بيفصل
=خلي عمو السواق يحطو في الباص يشحن
_لسه هنزل من الباص ما تنزلي انتي يا جيلا مش قادره
=هاتي يا اخره صبري
......
_راحه فين
=بدور علي عمو يحط الفون في شاحن الباص
_هاتيه انا هشحنه
=عامر
_نعم
=انا اسفه زودتها شويه
_وانا اسف زودتها كتير بعد اذنك هطلع الباص
.....
_مالك
=بقي انا اعتذر يقولي بعد اذنك هطلع الباص
_متركزيش معاه بقي انتي عملتي اللي عليكي وخلاص اجهزي بقي عشان حفله بليل
..........
=بص هي حاجه متهوره شويه بس انا هعترف النهارده
_عشان تخليها حفله سودا علي نفوخك
=ليه يعني هو انا مش حلو
_سيبك من كده هي اصلا طايقه النفس اللي انت بتتنفسه عشان تقولي هعترف
=هجرب حظي
_عشان اخوك كريم يطردك من الشركه
=انا عاوز اتقدملها صدقني هي دي اللي ينفع انكش فيها بقيت عمري
.......
_هتعمل ايه بقي
=مش عارف الناس كلها قاعدين حواليها
_سهله ممكن تقولها انك عاوز تكلمها علي انفراد
=اخاف اسرح في عنيها دي تحفه اول مره اشوف حاجه فوق الواو
......
-بطلي تبصي عليه الناس اخدت بالها
=مش شايفه واقف بيبص ازاي
_طب اسكتي جاي علينا اهو
*انسه جيلا بعد اذنك ممكن كلمه علي انفراد بخصوص حسابات الرحله
=تمام
.......
=فيه مشكله في الحساب !
_اه
=ايه هي
_عنيكي
=نعم
_مش لاقي ليها حل
=بعد اذنك عشان شكلك فاضي
_طب خلاص هسالك سوال
=اتفضل
_بتحبي اغاني منير
=اه
_طب هو قالي قلبي ضايع مين يلاقيه لي وانا لقيت قلبي معاكي
=مش فاهمه
_يعني عاوز رقم باباكي اتقدملك
=عين انت ..والعين في هواك ميتمه مالي اراك في كل وجههِ إلي قادمه
_مش فاهم
=يعني موافقه
Nada talal
