👰#عروس_الجحيم_34💀🌩️...sana bouabid.
.جمع الوقفة وجبد من بزطامو واحد ضمصة ديال الاورو...مدهم لتوريا بين ايديها....
بشار : مالحگتش نصرف...هاشم ولا حسام ولا شي حد يتحرك فهاد البلاد يصرفهم ليك...فضل ليك تعطي لهاشم ولا حسام يقضيو ليك...شوفي شنو خاصك..وفرحي ليا ميمتي وعيشي العادة بالعشق...مزيان ؟!...
توريا"هبطات عينيها لدوك الفلوس ماصو نيت..تبسمات وهي تحرك راسها" : مزياان...
تسناها تگول شي حاجة ابدا يااا امراة واش هضرتي...تصدق عليك السخط والمعيور...وتسقرم ليك على الرضى والهضرة زينة ودعاوي الخير.....
بشار : ماتنقصو من عادتكم ماتزيدو...الي حب خاطركم ديروه...الي خصاتك اميمتي "ضرب گرفادتو بجهد تا تسمعات سعيدة غمضات عينيها من دقة اما توريا غير كتشوف فيه وتسمع لاش يگول" رگبتي تحت رجليك...عندك ولد واحد عزري فرحي بيه....
توريا : داكشي الي كاين اولدي...
بشار : فين اشراق ؟!
توريا : فالبيت كتقرا كيف گلتي ليها...طلع عندها...
بشار : لا عيان معنديش جهد نشوفها...
زاد بلا هضرة بلا كلام باش لعيدة راسها وضار ماتسوقش لاخرين خلا مليكة تبرگم....تبعو هاشم تال برا.لقاه ركب وكيتسناه..
بشار : شحاال باقي ل ضريب صداق ؟!
هاشم : يومين...وليني بات البنت كيسول عليك...
بشار : علاش ماعلموهش راني ممساليش ؟!..ياك قضاو الغراض "هز فيه عينيه من تحت نضاضر كيبان مخنزررر واخا كيهضر بشوية وبصوت منخفض"
هاشم : الله ماعرفت اش دايرين معاه...مهم را ناس لباس عليهم والبنت باقيا صغيرة عندها 18 عام...راك عارف مي عشقتها ليك...فرحانة بيها بجهد...
بشار : مزيااان...
هاشم : ياك هادشي راضي عليه بعدا فرحان ؛؟!
بشار : درنا لخاطر لواليدين ماعليش...الوراق تكلفتي بيهم بالوكالة الي مخلي ليك ؟!
هاشم : وراقك راه وجدتهم ليك فنهارهم...تا راك مع القايد ديال ؤحامنة نحرك صباعي يتقضر الغراض...راهم لفوق فالبيت مابغيتش نگول لمك راه وصيتيني داك نهار نوجدهم باش ماتبقاش مبرزطة ليا راسب نعيط ليك ونتا تخدم بخاطرك...
بشار. : تزيرات عندي دعوة تما...
هاشم : ديك بنت الناس اش درتي معاها...
بشار : فضيت معاها...(مازاد كلمة مانقص)...
هاشم"تاهو ماعاودش حكر معاه عليها" : محرك لنفس لوطيل ؟!
حرك ليه راسو بمعنى اه...ومشا.....اما الحاج عبد القادر ماصاب مايقول من غير انه يخرج ويهضر مع مولاي حفيظ فالتيليفون ودار معاه وقيت فين يهضر معاه..
عيط لسيحمد يسوق بيه طوموبيل...خلاهم ناضو كل رجع لشغالو...
ع.القادر : صباح جاي نجار باش يركب داك الماريو وديك ناموسية وداكشي الي معاها...علم زكريا يوگف معاه هو وحسام...ونتا شد ايامات وسبر وگف على ضروبات يدب.حوهم...هاو شوف دجايجي را جايب الدجاج واجد ستة صباح يحطو ليهم فالكوشينة (الكوزينة) الي على برا ينقيوه تم گوليهم يطلقو ايديهم...
سيحمد : كاين شي لعب ؟!
ع.القادر : نزگيو مع المراكشي لا يدير لينا العصا فرويدة تاهو شتو لصق ليا على بشار...
سيحمد : والى مابغاش لهلا يجعلو يبغي...درنا فيه خير ميكنا على الريالات الي نتسالوهم ليه يهز علينا خنافرو...
ع.القادر : مانصيبوش نرجعو البنت بغات ورشمناها ودواور علمات بالي تناسبنا معاه...
مسافة طريق حتى كانو فمراكش ودشو طريق السمارين..دخلو لقاوه فاستقبالهم كيشوف سيحمد ويتبدلو ملامحو من جهيتو..من سلام وكلام والسؤال على الحال والاحوال...دخل فالموضوع...
ع.القادر : الولد را جاي فطريق (كذب عليه)...وراه ميوصل تال نهار الملاگا (عقد القران)..
م.حفيظ"جمع ضحكة وخلا تبسيمة" : ههه..ايه ولكن كيفاش مايجي تال نهار الملاگا...اش هذا الحاج...شنو زعما مايسمع شروط البنية مانسمع هضرتو...كيفاش زعما !!..كيداير هاد جواج الحاج !!
ع.القادر : كي ناس الحاج...علاه فايامنا شفنا عيالاتنا ؟ ياك ماشفناهم تا نهار عرسنا.. العقد تكتب بالوكالة ولا فارق بيناتنا الخوامي ولا الحيوط...ياك المهم هو جواج لاصل وجواج دوام...نديرو ليهم جواج البراهش ؟! اجي يهضرو تشوفو ويضوفها.. ولدي را منعيبوش ليك بفلوسو باملاكو وبرزقو وبغلتو...راه برا وياك هي وياه مفاهمين ياك شافت صورتو وعجبها...الى على الفعل نعطيه العاهد مايخصها خير معاه...راك مشاركين د.م الحاج ماشي غير الطعام...
م.حفيظ."الصمت"..
ع.القادر : وراق البنية واجدين...
م.حفيظ. : لا مزال..ورا بينا يتفاهمو بيناتهم يحطو شروطهم على طابلة را بنتي هاديك ...نعرف فين باتمشي...را دوام هذا الحاج وبنتي ماشايطة عليا لوحها لمن ماكان...نهار گالت ليا ابا قابلة علمتك ديك ساعات...
ع.القادر"غوبش" : بنتك لايحها لجهنام !!؟..هذا مسوانا الحاج عندك...سمحنا ف الكريدي ولگينا معاك حل يعجبك غا باش منخسروكش...فلوس تگال بالفم ماتجمع باليد...تگوليا نلوحها لمن ماكان ؟ ياك هذا مسوانا ؟!
م.حفيظ"تقرص وكتم كيتو.ولا غير يهتهت" : ههه نهاك الله الحاج اش وصلنا لكلام العيب والعار...
ع.القادر"وقف" : هو هذا الحاج ملي ولينا هوك اش بقى...وما بغينا نوصلو لعيب الحاج..را معزتك هي الي جابتنا نتناسبو معاك لزين اصلك وترابي بنتك وزينها.. بنتك مايخصها خير وراه باغيها الولد ويدور ويوصي تهلاو وكبرو بيها...هاهي هضرت معاه هاهي تعرفو من سنين نديرو حنا ورا منهم عداااد مع تلاگاو مع گالو الله يعاون...ناس را تقل عالاصل زين ودوام...خلي فمنا مسك وعارنا بعيد...والفاهم يفهم..
م.حفيظ"حس بصدره تزير..حدر راسو وحركو..وحنحن يرجع صوته الي تقج" : واخا الحاج ميكون غا خاطرك...مرحبا بيكم...
ع.القادر. : الله يجعل كلشي مبارك ومسعود...
ريحة البخور الفخم فايحة فالرياض...وريحة طياب عاطية مزيج مع ريحة لبخور والند وعطاتنا ريحة الفرح...دار العروسة الي واجب يكون فيها مراسم عقد القران كيف جرات العادة المغربية الى كان غايجي لعدول لدار...هاد نهار تختار يوم الجمعة الي غايكون فيه عقد القراان...رقعو من هنا ورقعات حبيبة من هنا وتحط الحاج تحت التهديد الغير المباشر بمجرد انه قال "خاص نعرف فين تمشي بنتي مانلوحهاش لمن ماكان" جملة خلاتو يتحط تحت التهديد...كتم الكية فقلبو وصبر راسو را البنت راصية وفرحانة وصاحكة...واش يبغي الاب من غير يشوف ولادو فرحانين ضاحكين...
جرات الامور كيف مخطط ليها وهادشي غير باش ميتحاشموش مع نساب جداد لان مولاي سلطان مابغاش يشوف العروس ويهضر معاها...راسو وماقاليه بحال الى شد معاهم العكس وولد العكس...ولاو يرقعو من هنا ويسدو من هنا....توريا راها فرحانة من بعد ملاحت حق الله لبسات لوان الفتانة وزرزرات ايديها بالذهب...هازا خنافرها لسما...واطات ليه راس وكلامها هو الي كاين..حسات براسها را دارت انجاز وهي الكل فالكل وهبطات ليه راسو تحت رجليها حيث هي مو وتاحد ميگوليها لا...دارت بهضرتها ورجعاتو يتزوج ويحني راس باش يتسگد لخوتو وخصوصا اشراق الي عفى عليها تخرج باش تعاونهم فتوجاد للفرح...
#الرميلة_مراكش...
جالسة جنب ناموسية مزيرة على لحافها وتحك عليه...بقفطانها المسكي توبو من اجود التواب الي فمحل باها...مخيط بسفيفة باليد عند خياط فالقنارية كيخيط غير لناس الهماوية حيث خياط قديم كيخدم باليد...محزمة بحزام الصم فلون القفطان والفوق عند صدر الي موقفان بسوتيان البونج...شعرها مصايب ومطلوق على راحتو...اما المكياج كان نااعم تقريبا مدايراش بزاف...وشكون الي دارو ليها ايوب الي هاز خنافرو وكيصايب ليها حلفات عليه ناديا تايقاد ليها وتاهو لقاتو طاايب غا زواجها الي ممرتاحش ليه...حتى دق الباب ودخل كيهضر من نيفو...
ايوب"لابس ليك قويميجة فالكحل معري ليك صدر..وسروال فصالة قصير وصباط كيبري..مصاوب شعرو بجنب ومدخل واحد گلوص كيكو فايدو فلون غوز" : قربي فمك نصايب ليك هذا...را شوي وبايجي العدول وهبطي...
حبيبة : بابا مابانش ليا...
ايوب : هو الي بيهبطك ؟؟...هي تهناي را مزيان فصحتو هي تدهى مع جري...اه وعتيني لاكارط ديالك...
حركات ليه راسها وسلمات ليه شفايفها تفنن ليها فداك الگلوص وزاد لمعو ليها ب ليپ اويل ديالو..تاكد انها مقادة....
ايوب : غذا فاش بتمشي لهيه بنصايب ليك مشطة باش تلصقي فيها خيط الريح...يلاه مبروك...
خلاها كتعيط ليه وخرج حابس دموع ماساخيش بيها وماهانيش عليها...تا خرج وتنهد وداز لبيتو...اما لتحت ناديا تمشي وتجي وتريتور خدام وتاهي ممرتاحاش ولكن تزيرو وتربطو ليهم ليدين وخا شوية هانيين من جيهة حبيبة ان قرارها جا برضاها وخا هكاك ماهانينش...هازة جلايل القفطان وتدخل عند العيالات ترحب بيهم حيث جاو كلهم كنينات الرحماني ورجالهم الا رضوان الي مغايجي تال غذ ليه غير فطيارة يحضر ويرجع.. ويوسف الي ملبسينو احسن مكاين فالاطقم....مكلف بيهم مولاي حفيظ و ايوب و فيصل وراجل لطيفة كيرحبو بيهم وقايمين بواجب ضيافات واخا را سرباية كاينين...الكنينات حلو فمهم فهاد رياض وقارنوه بالفيرما وخا كبيييرة قد سخط ومصلوحة ولكن رياض را لمستو خاصة...
مليكة : وصليو عالنبي وزغرتو وايلي لا تخليوهاش ناشفة را فرح هذا ماشي عزو..."لابسة تكشيطة ديال ثليجة فالموف ومضمة ديال ذهب دور دورة و تقادها باش تشوفها ناديا ولا لطيفة وتباهى اما الفوق را حانوت ديال ذهب.."
ربيعة : صلاااااااا وسلااااام على رسول الله الاااا جاه الى جاه سبدنا محمد الله معااااا جاه العالي..."تبعاتها كريمة وسعيدة الي زغرتو تزغريتة حااااارة تا وصلات لمسامع حبيبة لفوق..."
عيدة : فين هاشم ؟!
سعيدة : مشى لعند بشار يجي معاه راه ميعرفش طريق هنا...
الضحك والنشاط خدام واخا غير بيناتهم رجال والعيالات كيتضايقو بالحلاوي لاكريم بييس مونطي والمملحات ...اما العصائر حدث ولا حرج...صونا لمولاي حفيظ تيليفون كان واحد العدول صاحبو وشي رجال جاو...جات ناديا تجري دخلات وهي دوز الخامية على صالون تايدوزو...تا سمعو تحنحينهم وهما دايزين وكيرميو سلام "سلااام عليكم" دخلو وقف عبد القادر تاهو بجلابتو البزيوية وسلهام على ضهرو زادو هيبة ومع طويل ومگضر كمل المنضر...
طلعات سناء بنت عمة حبيبة لعندها وحلات عليها الباب...حركات حبيبة راسها وتنهدات...حاسة براسها كتخطوي فوق العافية...كلشي مقاد قدامها مكبرين بيها وفرحانين بيها عروستهم وعروسة توريا الكنة البكر...تا تلقات ليها لطيفة وناديا عند الباب وبداو يصليو عالنبي ويزغرتو تا دخلوها لصالون حادرة راسها ومزنننننگة...سلمات عليهم وخشاتها عيدة بينها وبين توريا الي فرحتها ماتعطيها لحد...تاهي بتكشيطة فالبيج وتحتي ذهبي ومضمة ديال نقرة مشللة بالذهب...والعينين مكحلين تالجدر...دايرة طوانگ لويز وشال ذهبي فوق من الزيف ديال حياتي بيض وفيه خيوط ذهبية...
مليكة : تبااارك الله بزينة العريسات..."هزات عينيها فتوريا" فين العريس شت هاشم تعطل...
يلاه بغات تهضر تا سمعو صوت هاشم كيحنحن...وقالت سعيدة هاهو...هزات حبيبة عينيها بالحس كتسرق الشوفات وتروي الفضول تا بان ليها واحد دايز وتابعو شي حد غادي بشواايا طوييييل فالظل بزااف ومگضر...صرطات ريقها وهي كتخطط فرسم وجهو من خلال صورتو الي شافت...ايديها بداو يترعدو جا م.حفيظ خذا لاكارط ديالها وجلسوووو تعطلو شحاال شي ساعة وهما فالصالون كيهضرو...فاتت ساعة وغادية فساعتين...حتى عيط ايوب لناديا تخرج عندو...
مولاي حفيظ : سوليها اشمن شروط بغات ؟!
ناديا : بنتي العدول سولك اشنو شروطك ؟!
حبيبة : يديرني فعينيه ويتهلى فيا..ومايتزوجش عليا...ومايبكيش واليديا عليا ومايحطش ايدو عليا...هذا هو شرطي...
م.حفيظ"شداتو البكية" : كوني هانية هادشي گلتو ليه...
رجع دخل وتاني بقى شحااال غاطس تا عيط لناديا وهي تخرج عندو مد ليها روجيستر دخلاتو ليها مع ستيلو...ناديا واحد لحظة تا بغات تقوليها بلاش جاتها شي حاجة فقلبها حسات بيه دخل فيه موس تا توقفت حساب ليها غا بغات طيح وهي تعوذ من شبطان رجيم...وتنهدات وهي تدخل عندها حطاتو ليها فوق طابلة ومدات ليها ستيلو ووراتها بحسب ماقاليها م.حفيظ فين تسني...
ناديا : سني هنا بنتي...
حبيبة"قبطات ستيلو ايدها كترعد توريا ومليكة حاضييينها سعيدة حدرات راسها تلجم ليها الفم وتكبلو ليها ليدين...تا بغات تحبس تاهي وهي تفكر باها ومايتسناه وتقدر تخسرو فدنيتها...هبطات ايدها وهي تلمح الامضاء ديالو...الي كان مميز..امضاء مبعثر، مقاد ،مخربق،قاسي...عاكس شخصيتو القوية...عاكس نفسيتو الغير متزنة...بقات شحال وهي كتشوف فسنية ديالو حتى حطات ناديا ايدها على كتفها...وهي تهبط وسنات مع سنات تقطرات دمعة غفلتها ونزلات تجرييييي تا طاحت بين الامضاء ديالو وديالها...حركات لماماها راسها وحطات ستيلو غير داتو ناديا وهي تجيها نوبة بكااء تا دارت ايديها على وجهها وبدات تنخصص....
مليكة : ولواه لواه ههههه كاع كلنا دزنا من هنا ابنتي...
توريا : الله يعطيك رضى مايخصك خير ابنتي لا تخافي شاااي...
لطيفة"حضناتها وباست ليها على راسها" : الله يرضي عليك دابا تجي ناديا تشوفك تبكي وتكملي عليها...راها واگفة هي بالنية ودعاء...الله يرضي عليك...
حبيبة"صرطات ريقها ومسحات دمعتها وحركات راسها وهي تنهد كتنفس..كتبان صغييييرة وسطهم كي الكميشة وخا عندها ليهونش زايدين بشكل ملفت قصر قامتها ممعاونش...
_دارت العقد عقد القران الورقة الي غاتربطها بيه حتى انها ماشافتوش.....ماعرفاتوش كيفاش داير كيف دايرة هضرتو كيفاش غايكون الحوار بيناتهم..كيفاش غايكونو مخاصماتهم للحظة تبسمات على بلاهتها حيث دغيااا رسمات طريق لحياتهم دغيا دارت بلان ودارت الساس وبنات وعلات وسدات عليهم فبيتهم وهي حتى كلمة سلام ماسمعاتهاش من فمو..وجهو شافتو غير فالوصف الي عطاوها وتصاور الي وراوهم ليها...بحجة را نهار العرس غاتشوفو حيث سااافر لفين وهي مرتو دابا وماعارفاااش...سكتات راسها بهاد الحوارات باش تحط امل وترتاح ولكن الي ممرتاحش را ممرتاحش...تربطات وضحات فسبيل باها ماتشوفش دمعة منو..
~انا نبكي يا بويا ونتا ضحك...انا نواجه مصيري كيما كان غير فرح ياا بويا ولا تمرض...شقيتي عليا وشفتي الويل جيت وفرحتك خليني نفرحك ونكمل فطريقي انا نبرك عالشوك ونتا شد الورد...انا لگا عليك شحط ونتا نشط~~~
الزواج هذا ماعندو ساس ولا راس مبني على النفا.ق والكذوب ورقع من هنا وسد من لهيه...باش يتحفظ ماء الوجه فالقبيلة ودواور...كان ممكن تكون بنت ناس اخرى غير حبيبة لكن المكتاب اختار حبيبة وضحات براسها الى المجهول...هاهي تكتبات على اسمو اسم جناح بلا ريش...وهاهي غذا غادي تزف للمجهول...
فجأة سمعات رنة ميساج فالتيليفون الي مكانتش حاسة براسها مزيرة عليه من بعد ماجابتو ليها سناء من فوق....وايديها عراقو تا بانت شاشة كلها ماء ديال العرق...شعلاتو وهي تلقى نمرة من نهار رسلاتها ليها قيداتها باسمو تما بقات....حلات الرسالة وهي تلقى كلمة حروفها معدودة...
بشار : مبروك....
#نهاية_الفصل_التمهيدي..الفلاش باك باقي ما سالا....
..
أنت تقرأ
عروس الجحيم (طور التنزيل)
Action👰🏻"لا شيء يؤذي الروح أكثر من بقائها عالقة في مكانٍ لا تنتمي إليه." 💀🌩️ _ هيلووو نارگيلز ♥️ ☃️ #بمناسبة_رأس_السنة_الميلادية ☃️ 31/12/2023... كانقدم ليكم القصة الي واعدتكم بيها هادي ثلاث اشهر واعلنت على اسمها والي غاتكون من تاليفي وكتابتي بين ا...
