تهور القلب

" مشهد "

گعدت ساكتة أباوع ع الشارع شگد هدوء
مثل داخلي
گمت عدلت ملابسي شويه ويجي لازم أكمل شغلي
مشيت وماكو شي أفكر بيه غير الحقد والأنتقام
ضحكت ع روحي .. يا إنتقام ؟ هوَّ آني محبوسة هنا لو يكتلني ويدفنّي محد يحس بيه
بديت أنظف خلصت باوعت ع الساعة بعد دقيقتين يجي رحت ع السريع صبيت الأكل حطيته ع الميز وگعدت
سمعت صوت الباب گلبي أنقبض وبطني لوتني
فات يحچي بصوت عالي :

- چم مرة گلتلچ الشاررررع متطلعييييله

گمت رجلي متعينني بس ترجف وگفت أحچي وصوتي مخنوگ :
- والله بس جبت معجون ماعدنا شلون أسوي أكل
تقدم عليه لزمني من شعري يعت بيه :
- مشكلتتتچ هااااي طلللعةةةة بره مااااكووووو
هزيت راسي أكثر من مرة والدمعة بعيني أحس شعري وگع بيده
وخر من يمي وگعد ياكل وآني صعدت بالغرفة گعدت خليت رجلي ع صدري وضميت راسي بيهن أبچي وأعاتب بأبويه الخلاني أمانة يمه
الله ينتقم منه بجاه محمد وآلِّ محمد
مسحت دموعي ورحت غسلت وجهي شويه وصاحني نزلت ع السريع :
- ها عمو
- عمه العماچ تعاي شيلي الأكل
- أي
رحت شلت الأكل ضميته وهوَّ راح يبدل وبعد مرجع آني هم صعدت فوگ ظليت أفكر
الحمدلله بعد يومين يبدي الدوام وأخلص منه ع الأقل الصبح أطلع أغير جو باقية بهالبيت الگبر
ميگدر يبطلني لأن وصية بابا أكمل دراستي
الحمدلله ألف الحمدلله
گمت لملمت الغرفة وجهزت ملابس وغراض علمود الجامعة صارت بالـ5:30 گعدت سويت العشاء وحطيته ع الميز يتزقنب من الـ6 كرشه واصل لسابع جار وشكله ذرة رحمه مابي عفت الأكل وصعدت تمددت أباوع بالتليفون
شويه وأذن المغرب گمت توضيت وصليت
قريت زيارة عاشوراء
كملت وشلت السجادة رحت تمددت دافتح التليفون وماحس إلا الباب أندفع قوي وفات عمي عيونه بگصته گمت من الچرباية أرجف :

- والله والله ممسويه شي
تقرب عليه بسرعة نزع حزامه ودفعني بالگاع وگعت ع أيدي حسيتها أنگطعت ظليت أصيح من وجع أيدي وهوَّ نزل عليه بالحزام گطعني مادري أعيط من وجع أيدي لو من جسمي لو من وجع روحي
تعب راح گعد ع الچرباية أريد أجر النفس ما أگدر :
- أيـ .. أيدي أيدي
- عساها بالكسر
- أيد .. أيدي داموت
شعل جكارة ظل يدخن بيها لحد مخلصت بقيت أرجف عرفته شراح يسوي :
- لا لا والله أتأذة لا سوي كلشي بس عوف هاي عمو الله عليك
أجنه سحب أيدي وطفاها بيها
عطت شايغة روحي وبعد محسيت ع شي ..
فزيت ع أصوات هواي وهوسة
فتحت عيني شويه راسي يموتني باوعت داير مدايري واضح بالمستشفىٰ شفت عمي ديحچي ويا الدكتورة وهيَّ تگله متعرضة لعنف وهوَّ يگللها واگعه من الدرج حچيت بصوت مبحوح :
- آخخ أيدي

أجتي الدكتورة عليه ..
- حبيبتي أنتِ متعرضة لعنف ؟
- عيني أنترست دموع باوعت ع عمي يخزر بيه أنداريت ع الدكتورة
- لا
غمضت عيونها بنفاذ صبر :
- الحمدلله ع السلامة تگدرون تطلعون
- شكراً
عافتنا وطلعت وهوَّ إجه عليه :
- خل نرجع وشوفي شسوي بيچ
- أيدي شبيها
- أنكسرت عساها بالگطع
بچيت شمسويتله وهالگد يكرهني عمري كله ممأذيته بكلمة وشيريد أسوي ليش هالكره هذا

- وسم أنلصمي
سكتت دايره وجهي وماحس غير ضرب أيدي المكسورة روحي طلعت روحي
ظليت أناشغ وأدعي وهوَّ طلع ولا كأنما مسوي شي بقت أيدي تموتني وبس أبچي مابيدي شي غير البچي 
شويه ونمت من الوجع مادري بروحي فزيت عليه يصيح :
- گومي يلا فضينا خل نرجع
گمت بالگوه جسمي منتهي مشيت وهوَّ گدامي يدردم :
- بس المصاريف من وراها عساچ بالموت بس الأذية منچ بنت الـ****
فتحت عيني جسمي أختض عطت بي :
- ديرباللكك كلشي ولا أهلي والله أذبحك وأكتل روحي ماعندي شي أخسره ديربالك تجيب طاريهم أشرف منكك
أندار عليه فاتح عينه كل قوته والمستشفىٰ كلها تباوع علينا
تقدم عليه ضربني راشدي وجهي دخن باوعت داير مدايري الكل يباوعلي بشفقة دفعته وركضت كل قوتي ما أدري شنو ببالي ووين داروح بس ردت أخلص منه أركض وأندار أباوع باقي بمكانه ركضت بقوة أكثر طلعت من المستشفىٰ وظليت أركض مدري وين رحت بمكان شبه مهجور كلش أبتعدت عن المستشفىٰ وگفت لزمت الشجرة ممستوعبة السويته وين راح أروح وين أجيت آني شلون راح أرجع بعد !!

°°°°°°°

السلام عليكم حبايبيي 🥹🥹
وياكم كاتبة جديدة تگدرون تصيحولي يلديز
قصتي " تهور القلب " إلي هيَّ هاي حينزل أول بارت منها يوم الأربعاء وإن شاء الله تعجبكم
القصة خيالية .. أوگفوا أوگفوا قبل متطلعون 😂😔 بنات القصص الخيالية مو شي سهل الروايات إلي نقراها بالكتب مو حقيقية كلها من وحي الخيال ومع هذا تعجبنا ولتنسون القصص الخيالية تتعب أكثر من الواقعية لازم الأحداث متناسقة وماكو مبالغة وكلشي لازم مكمل علمود تطلع حلوة ماعدا القصة إلي كلش صعب تجي ولازم تفكير قوي وترتيب وأيااام يلا تطلعون قصة حلوة !! ولو حلوة لو لا تطلع
آني مداحچي هيچ علمود تبقون تشوفون القصة 😂😂 لا والله بس داوضح لأن هواي كاتبات أنظلموا بسبب قصصهن خيالية مع العلم السرد والأحداث وكلشي ممتاز بس بسبب تفكير إلي ميريدون بس
" واقعي " تنظلم القصة وعادي أكو هواي يحبون الخيالي ويتابعوا فـَ بالحالتين إذا الموضوع بي خير إلنا حينجح وإذا لا معناها مابي خير إلنا
وتبقىٰ حرية الأختيار إلكم بس تفوتكم القصة ها 😂😔🩷
إن شاء الله نلتقي الأربعاء ويجوز أنزل بعد مشهد
مع السلامة حبيبيني 🩷🩷.