||نـازداری بابە||

لە چاوەڕوانیدا || ١

∊∘⋆ڕاوبۆچوونت لە بیر مەکە گرنگە بۆم⋆∘∍🌱

نازداری بابە

هەموو سپێدەیەک کە خۆر دەبوو بە میوانی ماڵمان بابم لە نانەواخانەکەی نزیک گەرەکی خۆمان
سەمونی خڕ و نەرمی بۆمان دەکڕی هەر وەکو ڕوومەتی لەیلای تەمەن دوو بەهارە کە هەنگاوەکانی
لە چاو بەهاری پێشوو زۆر جوانتر و ژیکەڵەترە ، وا ڕاهاتبووین زۆربەی ڕۆژەکان مورەبای هەنجیر و پەنیری
کوردی بەو سەمونەوە بخۆین کە بابم بە دڵخۆشیەوە بۆمانی دەکڕی و لەگەڵ هەر پاروویەک پیمانی دەگووت
نۆشی گیانتان بێ نازدارەکانی من . میهرەبانی باوکم ببوو بە بەرەکەتی ماڵمان ، هەم دایکم هەمیش ئێمە
حەسابووینەوە لە پای ئەم باوکە تێگەشتووە ، هەمیشە سوپاسگوزاری خوا گیان بووین . ئەو هۆنراوە و چیرۆک
و بابەتە ئاینیانەی کە بۆمانی دەگێڕایەوە ببوو بە ڕیچکەی ئاداب و ڕەوشتی ئێمە لەم ماڵەدا ، ڕۆژان دەهات و
دەڕۆشت ئێمە دۆستی کتێب و قورئان و فەرموودە نازدارەکان بووین لە کتێبخانەکەی باوکم ، ماوەیەک بوو باوکم
زوو زوو نەخۆش دەکەوت ، هەرچەند پێم دەگوت بابەی شیرینم مەگەر چ باسە ؟ ناتەوێ سەردانی پزیشک بکەیت
بابیشم لە وەڵامدا هەر دەیگوت ( کیژی من ڕێحانەی دڵم ئەمە تەنها پەتای وەرزیە زوو باش دەبمەوە ) .
ڕستەی هەمیشەی و دووبارەی ئەمە بوو ، هەرچەندە زۆر توند دەکۆکا ، نەدەکرا بەردەوام لەسەر
قسەکانم بڕۆم نەوەک ماندوو بێزاری بکەم حەزم نەدەکرد بەدکار دەرکەوم
هەر خۆی بە تەمەندا ڕۆشتبوو . لە ئێوارەیەکی پایزی ساڵی ٢٠٠١ دا لە تەنیشت دەرگای دیوەخانەکە خەریکی
شیکارکردنی ئەو بابەتانە بووم کە مامۆستا کردبووی بە ئەرک بە سەرمانەوە ، باوکم لە دوای نیوەڕۆوە چووبۆیە
دەرەوە بۆ ناو بازاڕ بەڵام هێشتا نەگەڕاوەتەوە ، بەهێزی بایەکە بە دڵی خۆی
سەمای بە پەردەی دیوەخانەکە دەکرد ، چونکە دەرگام بە تاک هێشتبۆیەوە هەر چاوەری بابم بووم
دایکیشم چێشتی ئیوارەی ئامادەکردبوو بەڵام لەبەر بابم خوانەکەی نەڕازاندبۆیەوە
هەندیک ترس دڵی داگیرکردبووم ، ترسابووم ، چونکە بابم زوو زوو نەخۆش دەکەوت وتەمەنیشی هەبوو
دڵی من و دایکمی پەرێشان کردبوو ، کات تێپەڕی و نزیک بوو لە هەشتی شەو
ئەرکەکانم تەواوکردبوو چێشتەکەش ساردەوە ببوو دایکم پی وتم با خواردنەکەت بۆ تێبکەم
تا وەکو بیخۆم و بنووم سبەی دەبوو زوو هەستم ، بەڵام نە من نە دایکم نەمان دەتوانی پارویەک قوت بدەین
بیر و هۆشم هەر لای بابم بوو ، بەڕاستی بیرم دەکرد هەرگیز ئاوها بارودۆخ نەگۆڕابوو
ئەوەش نەبوو بتوانم بڕۆمە دەرەوە و پرسیاریک بکەین بگەڕێن ، مەگەر کوا شاڕ و وڵاتمان
پارێزراوە بەم کات و ساتە ؟ غەم زۆری بۆ هێنابووم و هەر لە کتیبخانەکە خەریکی خوێندنەوەی
قورئان بووم ، بەڵێنم دابوو سوڕەتیکی نوێ لەبەر بکەم لەگەڵ باوکم ، تەقەی دەرگا هات
خێرا هەستام و چووم بەرەو دەرەوە ، بە هیوای ئەوەی باوبم بێت . زەردەخەنە لێوی گرتبووم و وام دانابوو بابم
لە دەرگا بێتە ژوور، کەچی نە ڕیشە سپیەکەی بابم بی و نە پێڵاوە ڕەشەکانی .
مام اسماعیلی دراوسێمان هەناسەی خێرای دەدایەوە و ڕاستەوخۆ شڵەژان زۆری بۆ هێنام نە
زەردەخەنە لە ڕوومدا ما و نە شادی لە دڵما .. هەرکە هەندێک بە غەم و پڕ لە دڵەڕاوکێوە وتی
باجی گەلاوێژ خێرا با بڕۆینە نەخۆشخانە ، کاک جواد نەخۆش کەوتووە بەتەنیا لەوێیە
دڵۆپی فرمێسکی پڕ لە غەم و ژان پێش چاوەکانی ڵێڵ کردبووم دایکم هەتا توانی لەسەرخۆ و ئارام
عاباکەی لەسەر نا و ڕۆشت هەرچەندی دەم ویست منیش بڕۆم نەمەتوانی ، چونکە لەیلا بە تەنها بوو
نەدەبوو ئەو خوشکە دووساڵانەم خەبەر بکەمەوە . گریان بە توندی قورگی گرتبووم
مەگەر من هەر دەم وت سەردانی دکتۆر بکا نەوەک بگات بەم حاڵە ، لەسەر فەرشی دیوەخانەکە دانیشتم
و هەندێک گریام دواتر چووم و دەست نوێژیکی پاکم هەڵگرت و دوو رووکاتم کرد و دوعام بۆ باوکم کرد
نزیک بوو کاتژمیر لە دەی شەو هەر کەس نەهات و هیچ دەنگیکم نەبیستەوە لێیان ، نە تەلەفۆنێک نە هەواڵێک
نە تەقی دەرگایەکیش نەبوو ، ئەوەی هەبوو دەنگی بایەکی توند بوو کە سەمای دەکرد لەم کەشەدا ،خەویش چی دیکە
میوانی ماڵمان نەبوو ئەمشەو ، دوودڵی و نەرێنی بوون تەواو زۆری بۆ هێنابووم ، دەم ویست ئارام و لەسەر خۆ بم
بەڵام زەحمەت بوو ، دووبارە سەیری کاتژمیرم کردەوە بە دەم  زۆر بیرکردنەوە و خەیاڵەوە ئاگادار نەبووم
دوازدەی شەو تێپەڕیوە و هێشتا دایکم نەهاتۆتەوە ، چووم سەیریکی لەیلای خوشکم کردوو کە بینیم خەوەکەی
هێندە قوڵ و ئارامە ماچێکی نەرمم لە سێوەکانی سەر ڕوومەتی جێهێشت و بە هێمنی هاتمە
دەرەوە لە ژوورەکە و چوومە دیداری خودام .
زۆر گریام و دوعام کرد لە دوای کردنی شەونوێژ ، هیوای پڕاوپڕم بە خودای خۆم هەبوو ، باوکم هەمیشە دەی
وت ڕۆڵەی شیرینم نوێژ و دوعای سێ یەکی شەو ناگرێتەوە و خودا قبوڵی دەکات ، چونکە
خودا ئەزیزانی خۆی لەو کاتە بەخەبەر دەکات تا بڕۆن بۆ لای و خودا پەرستی بکەن .
مەگەر نا ؟ ئەوەتا بابە نازدارەکەم وا لە بەردەمی خودای خۆم دەگریەم و دەپاڕێمەوە
دڵۆپ دڵۆپ فرمیسک دەکەویت بەسەر بەڕماڵەکەم ، خوداش خۆی بیسەر و بینەرە
تاکە کەسە ئاگاداری ئەو دڵە برینەمە ، لە دووری تۆ و نەزانین لە بارودۆخت
(خودایە بۆ خاتری ناوە جوانەکانت ، باوکم بپاریزە با ڕووناکی ماڵمان هیچی لێ نەیات مەگەر نا
من دڵم دەبێتە خۆڵەمێش و لەیلاش لە ئیستاوە نەبوونی باوک دەچێژێت )
ئەمەم بە چرپە لە ژێر لێوەکانمەوە دەوت بە جۆریک کە بەس خۆم گوێم لی دەبوو
سەر دەستی کراسەکەم بەهۆی دڵۆپە ئەستور و قورسەکانمەوە تەڕ ببوون و ببوون بە بارانی ئەم پایزە
وشکە ، هەر بە دەم قورئان خوێندن و دووبارە کردنەوەی دوعا خەو بوو بە میوانی ئەم ماڵە سارد و بێ ڕووناکە
بە نەبوونی بابم ، ڕۆژ دووبارە بوو بە میوانی ماڵمان ، هەر ئەو کاتەی کە لە دیوەخانەکە خەبەرم بۆیەوە
بەهۆی تینی خۆری سەر لەم بەیانییە هەستامەوە بە ئاواتی ئەوەی هاتبێتنەوە بەڵام کەس نەبوو
ماڵ بێدەنگ بوو ، لەیلاش لە برسان بە گریانەوە هاتە باوشم دوای ئەوەی بە قورسی دەرگاکەی بۆ کرابۆیەوە
خستمە باوشم و بە دڵێکی توندەوە بۆ چێشتخانەکە ڕۆشتم و هەوڵم دا لەیلای ڕوومەت سوور ژیربکەمەوە و
دووپارووی بدەمێ ، هێشتا کات مابوو تا وەکو خۆم ئامادە بکەم بۆ قوتابخانە بەڵام نەڕۆشتم و چاوەڕێی
دایکم بووم ، هەر لە نێو خەیاڵەکانم هاتمە دەرەوە ئەوکاتەی خەریکی پێدانی خواردن بووم بە
لەیلا ، دایکم بە دەنگە ناسکەکەی بانگی کردم و وتی ڕێحانەی گوڵ هاتینەوە بگە هانامان .
لەیلام لە باوشم لابرد و بە خێرای بەرەو پیریان ڕۆشتم .. بینیم باوکم ڕەنگی زەرد هەڵگەڕاوە هەر زوو
دەرگای ماڵەکەم بە تەواوەتی واڵا کرد تا بە ئاسودەی بێنە ژوور .
ئەو جۆرەی بینینه باوکم دڵمی توند گوشی ! لە جاران لاوازتر و ماندووتر دەردەکەوت ، ڕەنگی بە تەواوەتی
زەرد هەڵگەڕابوو .. چاوم پڕ بوو لە فرمێسک زۆرم لە خۆم کرد بیشارمەوە بەڵام نەمتوانی ، تەنانەت دوو هێندە
خەمبار دەبووم کە دەمبینی توانای قسەکردنیشی کەمە و هێزی نییە لەبەر ماندووی ، خێرا خستیانە نێو جێگا
و چاوەکانی بە ئارامی  لێک ناو و خەوت ، لە نزیک دەرگاکە راوەستابووم و قژم بە نەرمی
بایەکە دەیجوڵاند ، گوێم لێ بوو مام اسماعیل  بە دایکیمی وت نا تخوا ئەوە کەی قسەیە با پارەی
تەکسیەکە لەسەر خۆم بێت کاک جواد برا گەورەی منە .
بەم شێوەیە مام اسماعیل ڕۆشت و ئیدی هەر چوارمان بە تەنیا ماینەوە .