هاقد وصلنا إلى مشارف النهايات..
بين ايديكم الاحداث الاخيره لقصة طوبى اللي حتكشف تفاصيل كتيرة مبهمة وغامضه..
بعضكم ممكن مايصدقهاش او يقتنع بيها واني وظيفتي هني ننقلها وكل قارئ حيتلقاها حسب تفكيره وسعة ادراكه..
🍂ويااما فيك يادنيا مدسوس حكايات لو تطلع تشيب شعر الرضيع..
🍂وياما فيك ياواقعنا من مآسي صادمة تدمي القلب والعيون...
وفي هالحياة ياما نعيشوا وياما نشوفوا وياما نسمعوا..
..كل شي ممكن يصير حتى اللي ينقال عليه غير متوقع ومستحيل..
وزي ماقال دوستويفسكي مرة..
🍃" لا داعي للدهشة كل شيء يمكن أن يقع للإنسان
حتى الأمور التي كان لا يتصورها في الحلم "🍃
///////////////////////////////////////////////////////////
#طوبى "جنة طوبى"
#جمان_فريد
#الجزء_الأخير"إمتحان/نهائي 8"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الجنة
ألا إن سلعة الله غاليه..إلا إن سلعة الله الجنة..
..رسول الله صلى الله عليه وسلم..
●●●●●●●●●●●●●●●●●●●●
🍂هناك نفوس حرثتها أنواع الشقاء والمحن والأحزان حرثا إن صح التعبير، واصطبرت طول حياتها وعانت آلاما ضخمة وآلاما تافهة لا نهاية لها، فلا شيء يدهشها بعد ذلك، ولو كان كوارث مفاجئة،ولا شيء ينسيها قاعدة من قواعد فن الكياسة والتماس المودة والشفقة🍂
دوستويفسكي...
__________________________________________
في مكتبه في الفيلا..
كان مقعمز وراه وعيونه ع شخص واقف قدامه يبان يشوفله بكبر بس اللي يركز في هالنظرة حيلاحظ ان مخالطها شي من التوتر..
🍃المحجوب:والله مانبي نقعد معاك في مكان واحد ولانشوف وجهك من اصله لكن في امانه في رقبتي واجب نأدي حقها...فتح شنطته وطلع منه مظروف لونه بني خافت رماه ع الطاوله قدامه وقال..تحاليل الحمض النووي اللي تثبت ان طوبى لعيلة الواعر..طبعا بيولوجيا بس لكن في الشرع والقانون لا..وهادي وحده من جرايمك وجناياتك الكبيرة في اللي درتها حق هلبه ناس بريئه وهادي اعظمهم وياريتها وقفت عند هني شرك وحقارتك خلوك بعدها دير حاجات خلتني كل مالي نتأكد انك شيطان في صورة بنادم..اخر ماعندي نقوله ان شاء الله تكمل باقي عمرك وانت تعاني زي ماخليت هالمسكينه تعاني من لما جت ع الدنيا..
ومشي طول طلع من حداه وهو يمسح في دموعه قبل تنزل وخلا وراه ولد اخته مركز بنظره ع المظروف نظرة عينه اللي كان فيها كبر واضح سيطر عليها التوتر والخوف..
مد يده بش ياخد ويشوفه محتواه لكن في اخر لحظه تراجع وناض طلع من مكتبه من الباب اللي يفتح ع حديقه الفيلا..
حط يده ع قلبه وقعد يدلك في مكانه وهو ياخد في انفاسه ويقول بصوت منخفض.
"كذب..افتراء..كذب"
🍃والمحجوب بعد ماطلع من عنده توجه لحوشه اللي كان جامع فيه افراد عيلة الواعر بش يخبرهم بالحقيقه المخفيه عنهم من قرابة الربع قرن...
🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور اسبوع..
طلعت من المربوعه متوجهه للدار وصلت فيها لقت بابها مردود..سمعتها وهي تقرا في القرآن..دفت الباب وشافتها وهي شادة المصحف وتقرا وقدامها مذكرتها الخاصه بالحفظ وحواليها الاقلام..
قالتلها:طوبى..
وقفت طوبى قرايه والتفتت عليها..
كاريمان:عبد القيوم في المربوعه..
هزت راسها بإيجاب ورجعت نظرها للمصحف وكاريمان بعد ماقعدت تشوفلها للحظات تنهدت ومشت طلعت من حداها..
🍁وفي المربوعه..
عبد القيوم مقعمز يراجي فيها ع نار..
تاني يوم من جية الصابر وكاريمان للخمس سافرت معاهم لبنغازي وهو معاهم لكنها طلبت منه يخليها بروحها في حوش كاريمان والصابر فترة معينة..
وقعدت عندهم اسبوع منعزله في دارها حتى ماكلتها بروحها رافضه تكلم حد ولاتجتمع بحد..ماكانت تبي شي غير المصحف وبس ولاتبي حد يكون مرافقها غير رفيقها الاعلى..
هو وحده سبحانه..مش حتحس اتجاهه بنقصها ولاالخجل من حقيقتها قدامه هو بس..اللي كانلها في كل وقت سند ومعين المطلع ع حالها اللي فاهمها وعارفها كويس..هو بس اللي تنتميله انتماء تام هالانتماء اللي قاله في إحدى آيات كتابه العزيز...
"إنا لله وإنا إليه راجعون"...
🥀حطت المصحف مع المذكرة والاقلام في مكانهم المخصص بعدين ناضت وهي لابسة ملاية الصلاة ومشت بإتجاه باب الدار وطلعت منه..كانت طول طريقها للمربوعة تردد في جملة التوحيد .
"لاإله إلاالله"
الذكر الوحيد اللي قعدت ملازماته طول هالأسبوع..وصلت في المربوعه..خشتلها وهي تقول..
/السلام عليكم..
هو طول ناض وقف ورد عليها وعيونه يشوفولها بلفهة وشوق ممزوجات بالحزن..
هي رسمت ع وجهها التعيس ملامح الابتسامه وع طول مشتله..
هو ابتسم من وسط قلبه وقدملها وفتح ايديها لما وصلتله ضمها بقوة وهي شدت فيه بقوة وغمضت عيونها من الراحة اللي حست بيها..
باس ع راسها وقال..
/طوبى..
قالت:نعم..
قاللها؛شن جو؟
ضحكت ضحكة خفيفه وزدت ضماته وهو ضحك ودموعه في عيونه..
🍁قعمزوا ع الكنبه جنب بعض هو حاضن ايديها الزوز بإيديه ويسمع فيها..
طوبى بنبرة مبحوحه قالت..
/نبي تجاوبني ع اسئلتي..
هز راسه بالموافقه وقال..
/اسألي..
خدت نفس والدمعة عبت عينها بعدين قالت..
"من امتى تعرف؟"
زاد حضن ايديها بإيديه وشد عليهم وهو يقول..
/قبل عقد القران بأربعه ايام..
نزلوا دموعها وقالت..
/كيف تقبلت؟
تنهد من وسط قلبه وقال..
/اول ماعرفت انصدمت صدمه قويه خلتني نبعد واجد عشان نختلي بنفسي ونفكر كويس..تصدقي اول ماطلعت من طرابلس حسيت اني خليت روحي فيها زي كل مرة نبعد فيها عنك وعن مكان انتي فيه..بس كان لازم نقعمز مع روحي ونفكر كويس من خوفي عليك..خوف اني نظلمك ونزيدك اوجاع ع اوجاعك وانا اللي مانتحمل فيك شي..وفي كل يوم وكل لحظه نفكر فيها كان شعوري جيهتك يكبر زدت حب ع حبي والله العظيم واحساسي بالمسؤوليه ناحيتك زاد كبر اكثر من قبل..قلت لنفسي انا لما حبيتك ماكنتش نعرف اسمك وبعد عرفتك حبيتك لدرجة العشق حبيت الانسانه الصالحه اللي قلبها لربي اللي ماريتش انظف ولااصفى منها اللي لها يد خير في كل مكان اللي خلت واحد كافر يسلم وبعد اسلم دخل ناس اخرى معاه الاسلام..لاهمني بنت مني ولاعيلتك مني ولاعنالي في شي همي انتي وبس..وياكم كنت متمنى لما رديت وعقدت عليك ناخدك لأبعد مكان في الدنيا ونكملوا عمرنا فيه..
شدت ع ايديه وقالت بنبرة مرتجفه.
/انت في الاول كنت مفهمني ان زواجنا مؤقت حتى مشاعرك مابيتش تصرح بيها..
قاللها بشي من الانفعال..
/منهم هما والله منهم..كانك عليا انا كنت ناوي من اول لحظه نطلع اللي في قلبي كله..لكن هما حرصوا عليا قالوا ماتشغلها بشي غير العلاج ولادير شي يخليها تتأمل فيك ع الفاضي انا كنت نبي نثبتلهم ونثبتلك انتي اني حبيتك من وسط قلبي بصدق حب مايقدر حد ينافسني فيه..انا لما عاشرتك زدت غرقت فيك..عرفتك اكثر عرفت انسانه مؤمنه علاقتها بربي تنحسد عليها..عرفت مراة جميله كل شي فيها يسحر فيا..عرفتك قويه وعقلك كبير وحمالة هموم ومسؤوليات من القريب والبعيد..عرفتك طفله تحسس فيا مرات انها بنتي..عرفت طوبى وبس..وماتمنيت نعرف في حياتي غيرها..
طلقت ايديه وحطت ايديها ع وجهها وانهارت بالبكي..
ضمها لحضنه وهو يقول..
/ديما نقولك فيها انا محظوظ بيك كسبت حظوظ الدنيا كلها لما خديتك ياطوبى ولو شن يصير ماني مخليك الا بالموت..
ماردتش عليه بشي غير البكاء كانت تبكي بالعبرة وبألم وهو يزيد يضم فيها ويمسح ع ظهرها ويبوس ع راسها ودموعه في عيونه...
بعد لحظات هدت بكي..لكن قعدت في حضنه وهي تقول..
/حاسه بشعور مش عارفه كيف نوصفه...حاسه في شي في داخلي ولى فاضي مافيه شي..حاسه..حاسه وكأنه الحياة اللي عشتها قبل كانت وهم خيال حياة عشتها في الحلم بس مافيش منها في الواقع..
قاللها:فاهم عليك وعارف شن تحسي لكن هما لعند هاللحظه مازلتي عندهم كيف ماانتي..سدرة تبكي عليك ليل نهار ترجتني عشان نقنعك تعطيها فرصه تحكي معاك..
قالت؛واني مانبيش ياعبد القيوم معاش نبي نعرف منهم حد..مش لأني كارهتهم لا..بس اني توا حاسه روحي غريبه عنهم وهما غراب عني..تصدقني لو قلت مش قادرة نتفكر شي ليا معاهم والله ماني عارفه كيف تقول كل مايخصهم في ذاكرتي انمسح بالمرة..حاسه وكأني عمري في حياتي ماعرفتهم..
كانت تتكلم ودموعها ينزلوا وهي تشوف للفراغ كملت تقوله..
/حتى مشاعر ناحيتهم مش حاسه مش حاسه بشي والله مش قادر نحس بشي بكل..
باس راسها وقعد محتفظ بصمته وهو يسمعلها بقلبه وعقله..
طوبى:انت وامي كاريمان وبوي الصابر الحقيقة الوحيده في حياتي انتم بس اللي ننتميلكم من البشر وهدا هو الواقع ياعبد القيوم..
قاللها:وجنة!؟
غمضت عيونها بشده من الألم وقالت بنبرة مخنوقه..
/هادي كسرة ظهري وغصه في قلبي هادي الوحيده اللي بديت نحس ناحيتها بالذنب..ياعمري وياروحي عليها بسببي اني اني مش بس اخترتلها اب ماينفعش اني اخترتلها مستقبل مرات يدمرها وين تكبر..وانهارت بالبكاء وهو قلبه يبكي من داخله دم ع وضعها المأساوي...
قلبه اللي انفطر وهو يسمع فيها تقول بحرقه..
"الله ربي لاأشرك به شيئا..الله ربي لاأشرك به شيئا"
🍃🍃🍃🍃
من شرق البلاد لغربها تحديدا العاصمه..
اللي كان فيها الصابر ع موعد مختار ..موعد مايعرفش بيه مختار كان مفاجئ بالنسبه..
خش عليه مكتبه اللي كان في احدى مناطق العاصمه..
مختار لما شافه رفع حواجبه وهو متفاجئ والسكرتيرة اللي خشت ورا الصابر قالت بتوتر..
/كيف تخش هكي يااستاذ..
مختار وهو يشوف للصابر قاللها..
/اطلعي وسكري الباب..
هي شافتله بتوتر بعدين مشت طلعت وسكرت الباب وراها..
ويرمي الصابر ع مكتب مختار ورقه وهو يقول..
/نهنيك اللي تبيه ودرت المستحيل من وساخه وانعدام رجوله وضمير بش توصل فيه اهو وصلتله..الورقه اللي تبحت فيها قدامك ورقة تنازل عن الحوش عدي توا برطع فيه ودير ماتبي وان شاء الله ماتلحق..
وكيف جي بيطلع وقف لما سمعه قال..
"عندك قدرة تسافر بيها لألمانيا!؟"
شافله بإستغراب وعدم فهم..
مختار بملامح وجه بارده برود مصطنع قال..
/نبي ندير فحص DNA ونلوح ورقته في وجوهكم لما نثبتلكم كذبكم وافترائكم..
بدت ع وجه الصابر ملامح الازدراء وهو يقول..
/والله ياريت ياريت يطلع كذب وافتراء ولاتطلع وحده كيف طوبى بنت مخلوق قذر كيفك انت..
ومشي بعصبيه فتح الباب بقوة وطلع بدون مايسكره..
ومختار قعد مركز بنظره ع الباب وملامح البرود ع وجهه تبدلت لملامح خوف وضيق..غير نظره للورقه اللي كانت ع المكتب..خداها وقعد يدقق فيها الورقه كانت تبين انها عقد هبه مش تنازل.....هبه او تنازل او حتى عقد بيع شن ماكان هو حاليا مش قادر يحس بنشوة الانتصار اللي ياما تخيل انه يعيشها من سنين وهالشي صدمه هلبه..
واللي زاد صدمه اكثر احساسه بدقات قلبه اللي كانت متسارعه وهو يتفكر في مجموعه من المواقف قاعده تمر قدامه واحد ورا التاني..المواقف اللي جمعاته بطوبى كلها وابرزهم فترة مرضه بالكورونا...
ويخترق مسامعه صوت صابرين وهو يتفكر فيها لما قالت..
"طوبى تشبهك انت"
ويليه صوت فاتن اللي قالت..
"لو مختار عنده بنت مش حتجي تشبهه زي ماتشبهه طوبى"
حدف الورقه ع المكتب وغم وجهه بإيديه وهو يقول بصوت مكتوم..
"كذب..كذب..افتراء..كذابين كلهم كذابين"
🍃🍃🍃🍃🍃
مقعمزه في صالة حوشها والتلفزيون مفتوح قدامها..
لكن ماكانتش تتفرج عليه عقلها واخدها بعيد لزمان بعيد ليها سنين عايشه فيه ومش قادرة تطلع منه مهما حاولت تتناساه..
ويقطع عليها هالسرحان صوت الباب وهو يدق..
ضيقت عيونها بعدين رختهم وقالت..
/ان شاء الله مؤمن وجايب معاه خير..
ناضت ومشت بتطلع للباب وين وصلت في الشماعه خدت شال غليظ غطت بيه راسها وكتافها وطلعت من باب الحوش..
وقعدت تمشي لين وصلت في الباب الخارجي وهي تقول..
/من؟
جاها صوت عبد القيوم وهو يقول...
"افتحي ياخالتي سالمين.."
بدت ع وجهها ملامح الحزن وعيونها غرقوا بالدموع بلعت ريقها وفتحت الباب وتشوف قدامها مايجمدها في مكانها قالت بنبرة مرتعشه..
"طوبى"
عبد القيوم:خلينا نخشوا ياخالتي..
هي بلعت ريقها تاني وقالت..
/خشوا خشوا..
خشت طوبى وهو خش بعدها وسكر الباب..
رفعت طوبى خمارها وهي تشوف لسالمين بنظره ألم لكن ملامح وجهها كان باين فيهم البرود بلعت ريقها وقالت..
/نبي نسمع منك اللي صار كله مادرقي عليا شي احكي كل شي..
سالمين وهي تمسح في دموعها هزت راسها بإيجاب بعدين قالت بنبرة مخنوقه..
/خشي..
مشت طوبى وسالمين لحقتها اما عبد القيوم مشي بإتجاه المربوعه الخارجيه فتح الباب وخشلها بش يقعد فيها لين تطلع مرته...
🍃🍃🍃🍃🍃
ورجوعا للعاصمه مجددا..
اللي كانت فيها عيلة الواعر عايشه اكبر مصيبه نزلت عليهم ومافيش اكبر من هكذا مصيبه..
كل حد فيهم عايش في حالات مختلفه بين الصدمه والألم..
غرفه اللي قعدت حابسه روحها في دار اميمه حتى صغارها معاش دورتهم ومخلية معاناتهم ع عزوزتها اللي ماكانتش في حاله خير من حالة كنتها
ولا عبد المطلب اللي خدي هاديه ورفعها لغريان وقرر يستقر فيها بعيد ع الفضيحة والعار...
وحسين ولده كان يفكر يدير زيه..
🍃حسين بضيق شديد..
/نبي نطلع من ليبيا بكل يام نبي ناخدكم ونسافروا لمصر ونكملوا حياتنا غادي..
صفيه ودموعها ينزلوا قالت..
/اللي تشوفه مناسب ياولدي ديره..
تنهد بقهر ومسح بإيديه ع وجهه بعدين قال..
/والله لعند توا مش قادر نصدق ولانستوعب..
قالتله بألم..
/كلنا ياولدي كلنا..اختك اميمه لبكري تكلم وهي تبكي بعبرتها وتقولي..قولي كذب يما قولي كنت نكذب عليك..
بدت ع وجهه ملامح الالم وهو يقول..
/سبحان الله..توا بس عرفت علاش ربي بعدها عن طريقي ونقول الحمد لله..
"علاش"
التفتوا هو امه لغرفه اللي كانت تشوفله بإستياء ودموعها ينزلوا قالت..
/قولي علاش!؟.. توا بعد عرفت الحاجه هادي بتطلع وحده ماتصلحش ومش كويسه وتحمد في ربي اللي افتكيت منها!!
حالة غرفه النفسيه خلتها تنسى ان اللي تقوله في كلام زي هدا زوجها..
حسين بربكه:لا والله ياغرفه ماهدا قصدي..اللي نقصده ان حاجه زي هادي اني مانقدرش نتحملها ولانقبلها بكل مرات لو خديتها وعرفت بعدين نزيد نكسرها هو هدا قصدي ياغرفه..
بدت ع وجهها ملامح البكاء وهي تقول بألم..
/كيف ياحسين قصدك حق!! قصدك طوبى توا خلاص معاش لينا معاش بنشوفوها معاش بتعرفنا بكل..
حطت صفيه يدها ع فمها وهي تبكي..
ناض حسين وقدملها وهو في قمة الحزن وصل فيها وضمها وهي تقوله..
/طوبى مش بس اختي ياناس تي هادي امي امي..اللي داراته معاي طوبى ماداروش لاسدرة ولابوي ربعه معاي عمري ماحسيت ان في حد يحبني ويقدر فيا بالحق غيرها هي..نبي اختي ياحسين بالله عليكم جيبوها ولاارفعوني ليها بالله عليكم..
وحسين وهو يسمع فيها ماقدرش يتمالك نفسه قعد يبكي بصمت وقلبه موجوع...
🍃وهدا كان حال اريج اللي ع قد مادار معاها نضال ماقدرش يطلعها من حالة الصدمه اللي خشتها من اسبوع ليلها مع نهارها وهي تبكي وتدعي وتقول..
" يارب يطلع كذب ومش حق"
وراجلها اللي كان متألم لدرجة كبيرة قلبه مليان خوف عليها لتصيرلها حاجه وهي في شهر حملها الاخير..
🍃زي ماكانوا خوه المهدي وصغاره خايفين ع سدرة اللي قاعده نفساء يومها كله بين البكاء والصلاة والنوم حتى بنتها الرضيعه كانت تعاني فيها حماتها نسرين زي ماسميره قاعده تعاني في جنة وعلي مع صغار طاهر..
🍃وخارج البلاد فردوس مريضه مرضها اللي عرفاته وكاد يقتلها وبنتها آلاء كانت في حالة تشبه لحالة اختها اريج لعند اليوم مش قادرة تستوعب ولاتصدق زي ماصار لمعتز اللي بكي بدموعه اللي عرفه اثر فيه لدرجة كبيره خلاه يفكر فأكثر شي بالفعل هو اكثر ماقهر وآذى طوبى انها ولت من غير اب حتى الذكرى فقدتها بالمرة لأنها مش من حقها...
اما عزيز اللي كان يعرف مختار من سنين طويله صدمه بقوة اللي عرفه ع قد مايعرف عن مختار من صفات وافعال سيئه لكن ماتوقعش ولاتخيل انه ممكن توصل بيه الدناءة لهالمواصيل...
🍃🍃🍃🍃
"وهذى اللي صار يابنتي كله والله مانقصت حاجه..يابنتي كنا مجبورين نديروا اللي درناه مجبورين لأن نحبوك واجد عارفه غلطنا كبير لكن والله نيتنا كانت خير..بالذات وردة ياطوبى وردة اللي كانتلك ام بمعنى الكلمه تقول طلعتي من رحمها هي.."
طوبى كانت تسمع فيها ودموعها يطيحوا وحده ورا التانيه كانت حاسه بمجموعه من المشاعر مش قادره تفهمهم..بلعت ريقها وقالت لسالمين..
"نبي نشوف دار امي"
هزت سالمين راسها بالموافقه وهي ترشف بعدين ناضت وقالت..
/تعالي..
ناضت طوبى وهي تقول..
"يارب"
ومشت ورا سالمين..وهي تمشي كان يتردد لمسامعه اللي حكاته سالمين من احداث وقعدت تتخيل فيها وكل ماله صدرها يزيد يضيق اكثر واكثر..
وصلوا للدار..فتحتها سالمين وخشت وهي تشوف لطوبى بألم..
وطوبى قدمت بخطوات خايفه وقلبها من قوة النبض حاساته بيوقف في أي لحظه..
خشت من الباب..ومن اول ماخشت تخيلت حادثة الاعتداء..تخيلت كيف صارت وكأنها قاعده تصير قدامها تخيلت حالة امها وقتها..ماحستش بروحها وهي واصله للسرير..نزلت عيونها ليه دامت ليه النظر للحظات وهي تفكر..
تفكر كيف هي كانت ثمرة لحظه شيطانيه..ثمرة في نظر الناس كلها حتكون فاسده وخبيثه..
قعمزت بهدة ع السرير..عيونها جو ع صورة لأمها مع ام سالمين كانت ع الكامدينو جنب السرير..
عزيزة كانت مصورة وهي لابسه حجاب وع وجهها ابتسامه حلوة بالمرة..وملامح وجهها اللطيفه الجميله فكرتها ان امها مراة طاهرة ونظيفه زيها بالزبط مالهاش ذنب في شي مجني عليها زيها هي ضحية زيها هي..
حطت ايديها ع وجهها وانهارت بالبكي وتطلع منها آهات قهر وألم خلت سالمين تبكي بالعبرة..
"الله ربي لاأشرك به شيئا..الله ربي لااشرك به شيئا"
كانت تقول فيها بصوت عالي وكأنهل تبي تطرد وساوس الشيطان اللي تبيها تتسخط ع قدرها وتفشل في اكبر امتحان ليها...امتحانها النهائي...
🍃🍃🍃🍃🍃
"هي قالت معاش نبي اي شي يربطني بطرابلس واول شي تنازلت عنه الحوش اللي قالت انه عمره ماكان من حقها"
هز المحجوب راسه بأسف وألم بعدين فتح الدرج طلع منه ظرف رساله وسكره..بعدين مدها للصابر وهو يقول..
/هادي اخر امانه في رقبتي امني عليها لطفي الله يرحمه قال كان جي يوم وعرفت طوبى عطيها تقراها..
خداها الصابر وهو يسمع في جبريل يقول..
/خليها تقراها هادي وصيه ميت حاول فيها بش تقراها..وحاولوا فيها تعطي عيلتها فرصه تسمع منهم في منهم مايعرف شي زيها راهو..قوللها اللي عرفوه ماغير فيهم شي مازلتي عندهم بنتهم..
هز الصابر راسه وهو يتنهد بأسف بعدين ناض ومد يده للمحجوب وهو يقول..
/نشوفك ع خير ان شاء الله..
المحجوب صافحه وقال..
/مروح توا؟
الصابر هز راسها ايجابا بصمت بعدين طلق يد محجوب وقال..
/السلام عليكم..
المحجوب:وعليكم السلام توصل سالم ان شاء الله..
مشي طلع الصابر وهو يقول..
/بارك الله فيك..وطلع وسكر الباب..
تنهد المحجوب بضيق شديد بعدين خدي هاتفه وقامه وحط ع رقم المهدي واتصل بيه..
🍃🍃🍃🍃
ولأن وضع طوبى النفسي تأزم بعد لقائها بسالمين اجل الصابر موضوع الرساله بعد مرواحها لين يولي حالها باهي..
🍂🍂
لكن بنات لطفي الواعر ماقدروش يأجلوا الزيارة الاخيره لحوش بوهم اللي عاشوا فيه سنين طويله من اعمارهم من اول ماجوا ع الدنيا..
هالحوش اللي عاشوا فيه الحلو والمر الحزن والفرح..اللي ذكرياتهم فيه منقوشه بحروف غير مرئية ع حروفه اللي معبي بريحة حبايب راحو الى غير رجعه..
غرفه وسدرة وهما يلموا في اهم الحاجات اللي قعدت عندهم في الحوش واهمهم دار نوم بوهم وامهم كانوا يبكوا بالعبره وقلوبهم موجوعه لأبعد حد..
🍃سدرة وهي طلع في حوايج بوها من دولابه جت قدامها كراسة الانجليزي اللي نزلتها من دار الخزين الشهر اللي فات..
بعد ماطلعتها قعمزت بيها ع السرير وقالت بنبرة باكيه..
/تعرفي هادي شن فيها ياغرفه؟
غرفه وهي واقفه ع دولاب امها شافت للكراسه بعيونها المدمعات وقالت..
/شني!؟
رشفت سدرة وتتصفح في الكراسة وقالت..
/هادي الكراسه كان يسجل فيها بوي ذنوبه الكبيره اول مرة شفتها بعد وفاة امي الله يرحمها بفترة قالي كل ذنب كبير نديره نخط ع ورقه بعلامة غلط ونخلي في الكراسه هادي قبالتي بش نتفكرهم ونقعد نستغفر عليهم..الكراسه هادي مافيهاش كان تلاته وراقي خط عليهم تلاته ذنوب كبيره دارها بوي في حياته..حطت اول صفحة فيها علامه خطأ وقالت..اول ذنب نسب طوبى ليه لما سجلها ع اسمه..فتحت ع الصفحة التانيه كانت فيها نفس العلامه وقالت..تاني ذنب هو انه بيقعد مدرق ع طوبى سرها لأخره عمره...وأخر ذنب..فتحت صفحته وقالت..يوم عطي طوبى للجالي...الذنب هدا بالذات تعب بوي هلبه..
غرفه قعمزت قبالتها وقالت وهي تمسح دموعها..
/انتم كيف درتوا حاجه زي هادي! معقوله مافكرتوش ان حاجه زي هادي مرات تفضح كل شي! مافكرتوش في الصغار اللي بيجوا بعدين؟
سدرة بألم..
/قلنا كان عطيناها لراجل يخاف ربي مرات وين يعرف وضعها مايرضاش يفضحها بالذات بعد تولي ام صغاره..والجالي بالذات اني وبوي كنا متاملين فيه خير هلبه..ابتسمت بتهكم..نسينا ان الذنب يقعد ذنب وربي يعاقب عليه مهما كانت النيه...
غرفه قعدت ساكتة وهي تشوف للفراغ ودموعها ينزلوا..
سدرة بألم وغضب قالت..
/اللي خلاني نضغط عليها بش ترضى تتزوج مرواحة هداكا الشيطان خلاني نخاف ومن خوفي غلطت غلطة كبيره وخليت بوي الله يرحمه يشاركني فيها..
غرفه بحقد قالت..
/ااه وكان ربي يشفي غليلي فيه ويوريني فيه يوم..
قالتلها:حيجي هاليوم ياغرفه حيجي قتلك ربي مايخلي شي يمهل ولايهمل..
سكتوا للحظات بعدين قالت غرفه بألم..
/مازال مش قادرة نصدق ياسدرة والله ماقادرة..
سدرة بحزن قالت..
/اه ياغرفة ااه..مسحت دموعها وقالت..وحتى اني ماقدرتش نصدق اول مرة عرفت فيها من تكون طوبى..اللي صار كله مايستوعباش العقل..وياما منهم اللي زي طوبى ياما منهم اللي كانوا ضحية التسيب والاهمال والتربيه الغلط..شوفي حاجه زي هادي صارت في هداكا الزمان اللي يقولوا عليه زمان النوايا الصافيه مالا زماننا هدا شن يقولوا عليه!!
غرفه ودموعها ينزلوا قالت..
/بين فترة وفترة ينزلوا في خبر ع عيل لقيط بنت ولا والولد اللي يلقوهم ميتين في المكبات وهما قاعدين بالحبل السري..واللي يلقوهم في خلي مخلي واللي يلقوهم حدا جامع ولاقدام مستشفى..وفي اللي لقوه في سوق..
سدرة بألم قالت..
/ردي بالك من بنتك ياغرفه وكان جوك غيرها ربيهم كويس وحرصي عليهم راهو كل وقت احرف من اللي قبله..
بنبرة باكيه قالت..
/تو نربيهم زي ماانتي ربيتي طوبى..
حطت سدرة ايديها ع صدرها وقالت بقهرة..
/زي طوبى!!هو مازال يجي زي طوبى..غمضت عيونها بشده وهي تبكي..
غرفه بنبرة باكيه قالت..
/اسكتي معاش تقولي هكي وكأنها بعيد وبر ياربي ماتت..
فتحت سدرة عيونها يفزع وقالت..
/لاياربي لا..ان شاء الله اني قبلها ياربي ماتفجعني فيها اكثر من هكي يارب..
ضمتها غرفه وهي تبكي بألم وسدرة تبكي وهي تدعي..
"ماتفجعني فيها اكثر من هكي ياربي"
🥀ولموا كل شي ليه قيمة ماتتقدرش بثمن وجي وقت طلعتهم منه هالطلعه اللي حسوا انهم دفنوا نص عمرهم فيها..نص عمرهم راح مع هالحوش اللي لاكان قصر ولاسرايا لكن قيمته مازال اغلى منهم..
🍃طلع حسين شناطي الدبش لسيارته وهو متألم وهما طلعوا وراه ودموعهم مابطلتش نزول..
مررت سدرة نظرها ع الجنان نظراتها ليه هادي كانت الاخيره الجنان اللي كانت تشوف فيه في طيف امها وتسمع فيها وهي تغني لفيروز...
"شتي يا دنيي تيزيد موسمنا و يحلى
و تدفق مي و زرع جديد بحقلتنا يعلى
خليلي عينك عالدار عسياج اللي كلو زرار
بكره الشتويي بتروح و منتلاقى بنوار
يحلى عيد يضوي عيد نزرع و نلم عناقيد"
حطت يدها ع صدرها وهي تبكي بألم وغرفه جنبها شافت للكرسي اللي مات عليه بوها قاعد في مكانه جت بين عيونها ذكرى قديمه ليها في صغرها لما كان يقعمز فيها ع رجله ويلعب هو وياها اللعبه والوحيده اللي يحب يلعبها مع الصغار..
"طباخ"
معاش قدرت تتمالك نفسها قعمزت ع رووس اصابعها وهي منهارة بالبكي قدملها حسين بسرعه نزللها رفعها وضمها وقعد يمشي فيها للسيارة وسدرة تشوفلهم وهي تبكي بحرقه شويه دق باب الحوش مشتله فتحاته لقت المهدي قدامها لما شاف حالتها خشلها طول وسكر الباب وضمها لحضنه وقعد يهدي فيها..
🍃وبعد ماهدوا كل وحده فيهم طلعت مع راجلها من هالحوش طلعة نهائيه معاش في رجوع بعدها...
🍃🍃🍃🍃
وتعرض سدرة حوشها اللي كتبهولها الفاندي للبيع زي مامحمد شنيبه عرض حوشه للبيع بعد ماقرر يطلع بعيلته لمنطقه تانيه في طرابلس...
🍀🍀🍀🍀🍀
بعد مرور عشرين يوم..
🌼مقعمزة ع كرسي في الجنان وسط جو معتدل وحلو ينبأ بقرب جية فصل الربيع..
كانت تشم في ريحة الورد الحلوة وهي تتفرج ع راجل جميل قدامها وهو يسقي في الشجر وتسمع فيه يقوللها..
/الربيع فصلي المفضل..الارض تتنفس في الربيع وطلع احلى مافيها..حط طوبو الميه تحت شجرة والتفت عليها وهو يقول..هو يجي يعد فصل جوه قاسي صقع وعواصف وغيره من مظاهر فصل الشتا القاسيه الربيع يجي بلطف اجوائه وهدوئها بمناظر جميله كان داسهن الشتا تحت ملامحه القاسيه
طوبى بإبتسامه قالت..
/علاش ماتقولش ان ملامح الشتي القاسيه سقت هالجمال وطلعاته؟
الصابر بضحكه:وهذى اللي نبي نوصله..
اكتفت طوبى بإبتسامه وهي تشوفله وهو قدملها وقعمز ع كرسي قريب عليها وقال..
/في اخبار تقول انهم حيفتحوا رحلات العمر الايام الجايه..
طوبى:اني خاطري نديرها في رمضان..
هز راسه وقال..
/صح العمره خير في رمضان..خلاص بإذن الله كلنا نعدوا للعمرة ونقعدوا اول اسبوعين منه غادي..
ابتسمت طوبى ابتسامه فرح حلوة وقالت..
/ان شاء الله..
هو تنهد ومرر نظره قدامه وقعد يفكر يعطيها الرساله توا ولالا..خاف يعكر جوها الحلو وينوض عليها مواجعها اللي تحاول تغلبهم..ويقطع عليهم تفكيره باب الحوش اللي دق..
شافتله طوبى وحتى هو شافله معاها..
ناضت وهي تقول..
/خل نخش داخل..ومشت خشت للحوش من جهة الكوجينه وهو ناض بعدها توجه للباب..وصل فيه..وفتحه..
ويشوف قدامه مافاجئه بقوة..زائر كانت جيته غير متوقعة...
"مختار"
...مختار!!؟...في بنغازي!؟
وجي لحوش الصابر اللي قاعده فيه طوبى!؟
باهي علاش جاي!! شن يبي!؟ شن مازال قعد من انتقامه المرضي ومانفداش!!؟...
🔺️🔺️🔺️قبل يومين🔺️🔺️🔺️
في الفيلا متاعه في طرابلس..
كان قاعد حبيس غرفة المكتب متاعه من ايام..
وفي الحقيقه هو كان حبيس افكار وذكريات ومواقف مابتش تفارقه ماقدرش ينساها ويتخطاها ولايتجاهلها ع قد ماشغل نفسه..حرموه يذوق طعم النصر اللي ليه سنين يحلم بيه..كان يبي شويه شجاعة تخليه ياخد قرار تنفيده بش ينهي هالحاله اللي هو فيها..وفي لحظه جاته هالشجاعه وخدي هالقرار وع طول ناض طلع من مكتبه متوجه للمطبخ اللي يكون موجود فيه الاقجم في هالساعه بش يشرب قهوته..
🍃والاقجم في الكوجينه يشرب في قهوته وهو يفكر وحداه امينه تسمع في الراديو..
شويه قال:نقصي الصوت شويه ترا..
نقصت امينه صوت الراديو وهي تشوفله بإستغراب..
الاقجم:تعرفي ياامينه اني ولى عندي شك 90% ان ابله طوبى بنت المعلم بالحق..
تعبوا عيون دموع وقالت..
/مافيهاش شك يااقجم انا متأكده..من زمان وانا حاسه ان بحاجه غريبه مخلياني اشوفهم شبه بعض ومش أي شبه بنت بأبوها واللي حصل في الكورونا خلاني اشوفهم بنت وابوها بجد في حنيتها عليه وخوفوا هو عليها..
الاقجم:مزبوط بس في حاجه تانيه ياامينه كلام هداكا الدكتور عن وجع قلبه تتفكريه..
نزلوا دموع امينه وهي تقول...
/اول حاجه افتكرتها بعد ماعرفت منك اللي حصل لكن خفت اقول خفت هو يسمعني فاكر ازاي كان وقتها..
الاقجم:اني بروحي خفت نتنفس وقتها الله يسامحه خلاني ندير شي مش قادر نسامح نفسي عليه..
"اقجم"
من الفجعه امينه جت واقفه والاقجم قريب طاح منه فنجان القهوة..
ناض وقف وهو يشوف للباب بتوتر وخوف قال..
/نعم..!
اشرله بيده يلحقه ومشي،حط الاقجم فنجان القهوة ع الطاوله ومشي بسرعة لحقه وامينه تدعيله..
"ربنا يحميه"
🔺️🔺️🔺️الوقت الحاضر🔺️🔺️🔺️
"شن جابك ؟"
مختار وهو يمرر في نظره ع الجنان قال..
/تعرف..
الصابر قعد يشوفله بغضب وهو محتفظ بصمته..
مختار ركز بالنظر وقال..
/نبي ندير فحص DNA
الصابر:ليش !!؟
مختار:تعرف..
الصابر:مش مهم نهائي لاليها ولاليك اللي تبيه ووصلتله شن مازال تبي تاني!؟
مختار:هدا حقي مايقدر حد يمنعني عنه انتم اتهمتوني اتهام كبير ومن حقي ندافع عن نفسي ونثبت بطلانه..
غمض الصابر عيونه وفتحهم بنفاذ صبر بعدين قال..
/انا راهو عصبي واجد وانت تعرفني كان رقيتها ليا ندفنك في مكانك..
مختار بحدة واصرار..
/واني مش متحرك من هني قبل لندير اللي نبيه..
شده الصابر من ياقة بالطوه وقاله..
/ماتمشيش معاك معاملة البشر..
"لابالله لا"
طلقه الصابر والتفت لطوبى اللي لما جو عيون مختار عليها حس بقشعريرة سرت في جسده وقلبه بدي يدق بقوة دقات موجعه بعض الشي..
وهي اللي كانت مركزه بالنظر ع الصابر قالت..
/حتى اني نبي نديره بش نرتاح وان شاء الله يطلع زي مايبي هو لأني مش متحمله تكون عندي صلة بالمخلوق هدا ولابأي شكل..
غرقوا عيون مختار بالدموع وهو يشوفلها..
والصابر اللي كان يشوفلها بحزن قال..
/حاضر يابنتي اللي تبيه يصير..
هي طول مشت هاربه بدموعها لما خشت للحوش تلقتها كاريمان ضمتها بقوة وهي تمسح ع ظهرها وطوبى تبكي بألم في حضنها...
🍁🍁🍁🍁
"امتى!؟"
الصابر بتجهم قال..
/بعد العصر بشويه..
عبد القيوم بقلق وغضب..
/مش عارف شن يبي في عقله لوين يبي يوصل..
الصابر وهو يفكر قال..
/الباين عليه بدي يقتنع او يصدق..
عبد القيوم قاله بخوف واضح..
/وكان صدق ولااقتنع شن بيدير بعدين!؟
الصابر:ماعنده مايدير...نحنا بعد نكملوا اجراءات تغيير الاسم لطوبى حنطلعوا كلنا ل****** هذي رغبة طوبى وانت تعرفها معاش تبي تقعد في البلاد..
هز عبد القيوم راسه بإيجاب وهو في قمة القلق..
••••••••••••••
"علاش انت خايف هكي صدقني مش حيدير شي"
ضمها لحضنه وقال..
/انتي حاسه هالشي يريحك؟
نزلوا دموعها وهي تقول..
/ايه...
تنهد من وسط قلبه بقلق..هي حطت يدها ع قلبه وبدت تقرا في سورة الفاتحه بصوت عذب يخلي القلوب تخشع معاه..
غمض عيونه وهو يسمع وهي تقرا ودموعها ينزلوا..
🍀🍀🍀🍀🍀
وبعد ماتمت اجراءات السفر ليهم هما الثلاثه الصابر وعبد القيوم وطوبى..سافروا متوجهين لألمانيا وخلوا وراهم سالمين وكاريمان وجبريل يدعوا من قلوبهم ربي يجعل الخير في اللي قاعد يصير ويحفظهم مش شرور مختار وطغيانه...
🍃🍃🍃🍃
وبعد وصولهم بيوم تواصل الاقجم مع عبد القيوم ودله ع مكان المستشفى اللي حيجروا فيها الفحص..
وهما طول رفعوا طوبى للمشفى..
طوبى اللي كانت حاسه بشعور بشع للغايه ولولا تمسكها بذكر التوحيد اللي مخلي قلبها يزيد ايمان وقوة كانت انهارت..
وفي المشفى..
خدوا منها العينات هي ومختار وعطوهم مدة معينه يستنوا فيها نتيجة الفحص بش تطلع دقيقة تماما..
🥀وطول مدةالانتظار كانت طوبى متمسكه بالصلاة فروض ونوافل ومتمسكه بتلاوة القرآن وماجفش لسانها من ذكر..
"لاإله إلاالله"
🍃🍃🍃🍃🍃
"ياااه ياوخيتي ياوردة قداش عانيتي وقداش تحملتي"
المحجوب بحزن قال..
/وردة من يومها هكي تتحمل في نفسها هلبه..
نبيله بحزن قالت..
/الله يرحمها ويغفرلها..
اخت المحجوب وهي ترشف قالت..
/والله ماكان خاطر ع بالي هالكلمتين اللي قلتهم بيديروا هدا كله كان قصدي خير وانقلب شر..
نبيله:مرات ربي اراد يطلع كل شي عن طريقك انتي،مافيش سر يقعد سر ليوم القيامه..
المحجوب:عندك حق..
تنهدت اخته بألم وقالت..
/والله ماتستاهل وريده يصير فيها هكي كان اكثر وحده راضيه بوي وامي.
المحجوب:هي هادي الدنيا ماتجيش الا ع الباهي ياوخيتي..
نبيله بإبتسامة ألم قالت..
/قول الباهي الدنيا مش مكانه يامحجوب ربي يبي يزهده فيا ويطلعها من قلبه بش يبدا سليم ويفتحله طريق للجنه..
شافلها بإبتسامه حزن وهز راسه بإيجاب واخته كذلك وافقتها الرأي وهي تقول..
/صدقتي عندك حق..
🍃🍃🍃🍃🍃
وتجي اللحظه المرتقبه بالنسبه لمختار وعبد القيوم والصابر اما طوبى لهداكا الوقت ماكانتش مهتمه ولاكأن الأمر يعنيها كل اللي تبيه توا انها معاش تشوف مختار من بعد هاللحظه مهما كانت النتيجه..
🍂في ممر المشفى..
كان واقف مقابل طوبى وبينهم مسافه بعيده بعض الشي..
الصابر كان قريب عليها لكن عبد القيوم كان واقف في اخر الممر بطلب منها لأنها حست ان موقف زي هدا حيكون واعر عليه..
لكن هو كان كله خوف من ردة فعل مختار لما يعرف النتيجه خوفه خلا عقله يصورله انه اول مايعرف النتيجه حيقتل طوبى..
وهالنتيجه تجي مع طبيبه وعيون الاقجم وهي تمشي بإتجاه مختار معاها وهو واقف قريب عليه وحتى هو كان قلق وخايف..
وصلت الطبيبه في مختار سلماته الورقه بدون ماتتكلم ومشت وخلتهم..
وهو خداها..بلع ريقه وخدي نفس وفتحها...عقد حواجبه اللي كانوا يرتعشوا وبدي يشوف في النتيجه..
الاقجم والصابر كانوا يشوفوا لملامح وجهه لكن طوبى عيونها من تحت الخمار كانوا ع الورقه..ركزت عليها بدت ترتعش هالرعشة هادي سببها رعشه يد مختار اللي لما شاف النتيجه حس ان الدنيا ولت الوانها رماديه..حس ان الهواء انسحب من المكان كله..حس ان قلبه ماقعدش في مكانه وكأنه طاح..طاح وغاص في احشائه..ودرجه حرارة جسمه حسها وكأنه ولت تحت الصفر..
وفي هاللحظه يمر بين عيونه كل موقف جمعه بطوبى من اول مرة شافها فيها لعند ماوقف ع وجه مارييت او عزيزة اللي ملامحها كانت تشبه ملامح طوبى بشكل كبير..مش بس الملامح حتى بعض الصفات والطباع..حتى شعرها..شعرها الطويل اللي غالب عليه اللون الذهبي..!
"طوبى تشبهك انت"
"مختار لو كانت عنده بنت مش حتشبهه زي ماتشبهه طوبى"
" من زمان وانا حاسه بحاجه غريبه مخلياني اشوفهم شبه بعض ومش أي شبه بنت بأبوها واللي حصل في الكورونا خلاني اشوفهم بنت وابوها بجد في حنيتها عليه وخوفوا هو عليها."
"طوبى بالذات لا"
"طوبى بنتك انت جريمتك اللي درتها في عزيزة المصريه"
وهو في هالحالة من التوهان وعدم الاستيعاب جبدت طوبى من يده الورقه مزقتها وهي تبكي بصمت ورمتها في وجهه بعدين مشت للصابر اللي خداها وضمها وهي تبكي بإنهيار في حضنه لعند ماوصلوا لعبدالقيوم اللي خداها منه وضمها ودموعه في عيونه وقلوبهم هو والصابر تتقطع وهما يسمعوا في عبرتها..
..طوبى في اللحظه اللي تأكدت فيها ان مختار بوها بيولوجيا حست بمشاعر كلها تحركت مرة وحده مشاعر وجعتها وقهرتها ودمرت مقاومتها لتوابع وضعها الحالي اللي ولت عليه وياقداش تمنت وقتها لو ربي خدي روحها وريحها من اللي هي فيه...
🍂والجاني الاكبر عليها في حياتها كلها اللي تلقى صفعة من القدر رماته للقاع خلاته يرتطم ع بيه بقوة فيقاته بفزع ع نفسه وع اللي داره من جريمة في حق حب عمره والانسانه تحمل دمه وصفاته....
...ولم يعد في القصة الا نهايتها القسم القادم بإذن الله هو النهايه والخاتمه لروايه طوبى....
