#الجانب_المظلم (الجزء الأول)
#نورا_حسين_جاب_الله
كنت فاكر نفسي عارف كل حاجة عن الانترنت، يومى كان بيمر بين الفيسبوك، الانستجرام، واليوتيوب، واهو جوجل موجود لو احتجت اى معلومة، عمرى ما تخيلت ان فى حاجة تانية ورا الكواليس، لحد ما فى يوم وانا قاعد مع واحد صاحبى لقيته بيقولى:
_ انت عمرك سمعت عن الدارك ويب؟
انا ضحكت وقولتله:
_ الدارك ايه؟ يعنى ايه الكلام دة؟
قاللى وهو بيتكلم جد أوى كأنه بيشرح حاجة مهمة:
_ دة الجزء المظلم من الانترنت ياصاحبى، محدش يعرفه الا ناس قليلة، مكان مليان اسرار وناس مش طبيعية، مش زى أى حاجة احنا متعودين عليها ... على الدراك ويب بنلاقى كل اللى ما يخطرش على بالنا.
حسيت بحاجة بتشدنى للى بيقوله، بقى عندى فضول غريب بياكلنى من جوا، لقيته بيكمل كلامه وبيقول:
_ بس اسمع.. الموضوع مش لعبة، فى ناس بيدخلوا ويخرجوا زى الفل، وفى ناس مابيرجعوش تانى، اللى بيدخل الدارك ويب مش دايما بيرجع نفس الشخص، عشان كدة انا معاه خفيف خفيف.
قولتله وانا مندهش من طريقته اللى حسيت ان فيها شوية مبالغة:
_ ليه يعنى؟ بيعمل ايه الدارك ويب دة؟
قاللى وهو منبهر:
_ كنت فاكره مجرد اسطورة، او انه موقع اخره شوية افلام رعب، او حتى تجارة شمال، لكن طلع انه مليان اسرار كتير.
الفضول كان بيزيد جوايا، وفى نفس الوقت حسيت بخوف خفيف من العالم المجهول دة ، رجعت البيت وفى دماغى مليون سؤال، وأول سؤال فيهم ازاى حاجة زى دى موجودة وانا معرفش عنها حاجة؟
******
هعرفك بنفسى واحكيلك حكايتى، حكايتى مع الدارك ويب اللى كنت هضيع بسببه، انا رامي، فى اخر سنة ليا فى الكلية، والدى متوفى ومليش اخوات، وعايش مع والدتى ست قعيدة، وانا اللى باخد بالى منها، العيشة مستورة معانا والحمد لله معاش ابويا مكفينا، زى ما قولت علاقتى بالنت خفيفة ،وعمرى ما فكرت ان فى حاجات عنه معرفهاش، لكن بعد كلامى مع عمرو صاحبى روحت البيت وانا ناوى انى اكتشف كل حاجة.
قضيت الليل كله ابحث على النت عن الدارك ويب ، لقيت نفسى قدام مواقع كتير غريبة، كان فى حاجة بتشدنى انى ادخل وافهم اكتر ايه اللى بيحصل فى العالم الغريب دة، ايدى كانت بترتعش وانا بضغط enter على اول موقع ظهر قدامى، كنت حاسس انى بفتح بوابة على عالم جديد، عالم انا معرفش عنه اى حاجة غير انه خطر.
اول صفحة ظهرت قدامى كان مكتوب فيها جملة زى رسالة ترحيبية، لكن كانت مكتوبة بلون احمر زى الدم، حسيت بقلبى بيخبط جوه صدرى من كتر التوتر، قولت من أولها كدة الطريقة دى ، اومال لما ادخل جوه الموقع هلاقى ايه، وفجأة ظهر قدامى رابط لصفحة جديدة، لقيت ايدى بتتحرك لوحدها وكأنها متبرمجة وضغطت عليه، الصفحة اللى اتفتحت كانت أسوأ، لقيت فيها صور لناس كتير مشوهة، وشوش مش مفهومة، وكنت حاسس ان الصور زى ما يكون بتتحرك، او ان العيون اللى فى الصور بتراقبنى، حاجة كدة زى صورة الموناليزا تحس انها شايفاك منين ما تروح، لقيت فيديوهات كتير لكن محاولتش انى افتحها، كان باين عليها انها فيديوهات فيها حاجات دموية، دبح وتقطيع ومناظر مقدرتش اتحملها،
كان فيه كمان تسجيلات صوتية كتير اوى ، والغريب انها بدأت تشتغل لوحدها ، واول واحد اشتغل ظهر منه صوت راجل وهو بيقول:
_ انت ملكش مكان هنا، اطلع قبل فوات الاوان.
قلبى كان هيقف من الخوف، بس فى نفس الوقت مش قادر اقفل الموقع، الفضول واخدنى وكنت حاسس انى لازم اكمل، لكن فجأة النور قطع فى الاوضة ، وحسيت ببرودة مش طبيعية، وفى نفس اللحظة فى حاجة لمست كتفى، صرخت وانا حاسس بروحى بتتسحب منى، اللابتوب فصل فجأة مع انه كان مشحون، سمعت صوت امى بتنادى عليا من اوضتها وهى قلقانه، بتسألنى انا بصرخ ليه؟
كنت لسه هرد عليها لكن لقيت كل حاجة رجعت لطبيعتها، روحتلها الاوضة طمنتها وقولتلها:
_ متقلقيش ياماما دة الواد عمرو كان بعتلى فيديو يخوف ولما النور قطع وانا بتفرج عليه اتخضيت.
لقيتها بتقولى وهى مستغربة:
_ نور ايه اللى قطع يارامى؟ النور مقطعش ولا حاجة.
قلبى وقع فى رجلى، حاولت ابان طبيعى قدامها عشان متلاحظش عليا حاجة قولتلها وانا ببتسم:
_ يبقى اللمبة اللى فى اوضتى باظت، هبقى اجيب واحدة جديدة بقى.
رجعت اوضتى وانا بسأل نفسى.. اومال ايه اللى حصل معايا دة؟
قررت انى اسيب كل حاجة واحاول انام شوية يمكن اقدر اهدى، لكن التوتر والخوف مسابونيش، فضلت افكر فى كل اللى حصلى وانا مرعوب، لغاية ما قابلت عمرو صاحبى تانى يوم وحكيتله على اللى حصل،
سابنى اخلص كلامى وقال:
_ ايه دة يابنى؟ خوف ايه وحد لمسك ايه هو انت لحقت؟ دة انت يادوب فتحت حتة موقع لا راح ولا جه اومال هتعمل ايه لو شوفت فيديو من اللى عليه؟
قولتله وانا بحاول اتلم على اعصابى:
_ لا ياعم، باقى ايه انا مش هدخل على القرف دة تانى.
ضحك وقال وهو بيتريق عليا:
_ براحتك، انت اصلا عيل سيس ملكش فى الجو دة.
الكلمة استفزتنى ،ووجعتنى ، وحسيت بالاحراج وانا واقف قدامه، قولتله وانا بحاول ادارى خوفى:
_ ياعمرو انت مش فاهم، الموضوع كان مرعب بجد، كان في حاجة غلط
بصلى وهو مش عاجبه كلامى وقال:
_ ياراجل دى كلها فيديوهات وصور معظمها متفبرك، انت اصلا تلاقيك فتحت الموقع وانت متوتر، عشان كدة خوفت من اى حاجة بتحصل حواليك، وحتى الصوت اللى كان فى التسجيل اللى ظهرلك دة، على الدارك ويب فى ناس كتير بتحب تلعب بأعصاب العيال اللى ذيك.
