هي غير دشرة قبايلية صغيرة، يسكنوها مرابطين أبو سعن، ومنقارهم طويل، عقليتهم بيزار وأعمالهم من ميدان الجنونة والبهلولة، معمرين بالڥيس ويحبوا الدّبزة، حتى الملايكة والشياطين حاصلين بيهم. العلماء يسمّو هذ الجنس "هومو ساپيانس" مي نسميوهم انا "هومو ألجريانوس بيزاروس".
بوں، نضحك، ياك حنا هنا لهذا، وعلى خاطر هكا يوصفونا الناس 'لي بين 35 و70 سنة (ماشي ڨاع). على بالك هذوك اللي يديروا فالرجلة ويصيحوا كل يوم : "اه! هذو الشباب والله غير والو، كاتاصطروف ناتورال، قريب آخر الزمن..." دايور تيلمو نشعونا بدينا نجمعوهم في مصطلح "الكُهُولٌ" تيلمو شيكورين.
باش نكون سيريو، هذي صح دشرة يسكنوها عائلات مرابطية، ومتشكلة من زوج دشرات: ثدّارث وهي على حجر صغير فالحباط تاع الجبل والاخرة هي "الحمّام" على وضة (پلاطو) ونسموه الحمّام لخاطر عنده بزاف ماء فالارض وكاين البيار الله الله علينا.
نورمالمو قلت كلشي... اه وي!! نسيت نقولكم بلي راهي واقعة في بلاد بيزار ومش نورمال سمّوه ناس زمان بـ"الدزاير". مي وقيلة رومَركيتوه ديجا، نغ؟
أنت تقرأ
سيمبا فاملي فالدزاير
Fanfictionتنبيه: هذ الحكاية هي سوى يوميات مكتوبة بالدارجة الجزائرية ومهيش لا جمعي فاملي لا ناس ملاح سيتي هذ الحكاية هي يوميات تاع شباب البلاد كيفاش يعيشو وعلى واش يخممو هذ الحكاية واقعة في دشرة اسمها سيدي عياد في ولاية بجاية، تحكي على ناسها وقصة كايون وبونجار...
