"ඒ සෙනූ.......මෙහෙ එන්නකෝ..."
"මොකද...මන් කිව්වනේ මාත් එක්ක කතා කරන්න එපා කියලා..."
"හරි හරි බන් දැන් උදේ ඉදන්ම බැන්නනේ,චුට්ටක් ඇවිත් මෙන්න මේක තාම ගඳයිද බලන්නකෝ..."
"ගඳයිද...ඇත්තමයි මට තමුසෙට දෙකක් අනින්නමයි හිතෙන්නෙ සිහින, දැන් දහපාරක් විතර ඕක හේදුවා නේද අනේ, දැන් ඕකේ නූලුත් ගැලවෙයි, ඔය ඇති සිහින,ශික්... ඒ මනුස්සයා මොනවා හිතන්න ඇතිද, අනිත් අයත් බිව්වා තමයි ඒත් ඔයා තරම් ජෝගි නැටුවේ නෑ අනේ, මිනිස්සු උනාම තමන්ට වැඩි වෙනවා කියලා තේරෙනකොට බොන එක නතර කරන්න ඕනේ, මේක එහෙම නෙමෙයි පෙරේතකමට බීලා බීලා මෙතන සර්ගේ ඇඟේ වමනෙත් දැම්මා,ඒ මදිවට කනක් ඇහිලා ඉන්න නෑ රෑ පුරා මොනවද මන්දා කියෙව්වත් එක්ක... අහන් ඉදලා බැරිම තැන මම අපේ කාමරේට ගිහින් දෝනි ගාවට වෙලා හිටියා..."
පහුවදා ඉරිදා දවසේ සිහින නැගිටිනකොට උදේ දහය පහු වෙලා තිබුනා, උදේ නැගිට්ට වෙලාවේ ඉදන් සෙනුරිගේ වැඩේ සිහිනට එයා කරපු හපන්කම මතක් කර කර බනින එක... ඒ ටික අහගෙන හිටිය සිහිනට තරු විසිවෙන්න ගත්තේ ශේනුකගේ ඇඟේ වමනේ දැම්මා කියලා දැනගත්තම, සිහින ඒත් ඒක පිළිගත්තෙම නෑ, ඊට පස්සේ සෙනුරි ශේනුකගේ ටී ෂර්ට් එක ගෙනත් සිහිනගේ ඇඟට දමලා ගැහුවට පස්සෙ තමයි සිහිනට හීන් දාඩිය දාන්න පටන් ගත්තේ... ඒ වෙලාවේ ඉදන් සිහින ශේනුකගේ ඇඳුම හෝදනවා ගඳද බලනවා ආයෙම හෝදනවා ආයෙම බලනවා, දැන් නම් සිහින පස් වතාවකටත් වැඩිය ඒ පෝලෝ ටී ෂර්ට් එක හෝදලා තිබුනා...
"මම...කියෙව්වා...?"
"නෑ නෑ පිස්සුද, මේ මමයි අපේ බබයි කියෙව්වේ..."
"මේ...මොනවද සෙනූ මම කියෙව්වේ..."
සිහිනට හරියට මතක නෑ ඊයේ රෑ එයා කරපු දේවල්, හරියට නෙමෙයි කොහොමත් මතක නෑ, එයා කියෙව්වා කියලා සෙනුරි කිව්වම සිහිනගේ හැසිරීම එකපාරට වෙනස් උනා, ඒක සෙනුරිටත් තේරුනා...
"ඇයි සිහින ඔයා බය වෙලා, ඇයි බය හිතුනද රෑ වෙරිමතේ වෙන කෙල්ලෙක්ගෙ නමක්වත් කියවුනා කියලා..."
"අනේ මේ මගුලක් කතා කරන්නෙ නැතුව ඉන්න සෙනූ, ඉන්නවා ඉන්නවා මට රෑට නම් කියන්න තරමට හතර වටේටම ගෑණු..."
