"ඔය කියන විදිහට මිනිහා ටිකක් තද පොරක් නම් ඔයාට හෙට ටිකක් කලින් යන්න වෙයි සිහින..."
"ඔව් සෙනූ... අටටවත් ඔෆිස් එකේ ඉන්න ඕනේ, අලුත් බොසාගේ රූම් එක නම් පිළිවෙලක් කලා ඊයේ, ඒත් උදෙන්ම යන්න ඕනේ... ෆයිල් වගයක් ලෑස්ති කරන්න තියනවා..."
ජයලත් බොස් ඊයේ ඇමරිකාවට පිටත් උන නිසා අද ඉදන් සමාගමේ මුල් පුටුව භාර ගන්නේ ජයලත්ගෙ දෙවෙනි දරුවා, වැඩිමහල් දරුවා දුවෙක් උනත් එයත් ජයලත්ගෙ ඇමරිකානු සමාගමේ වැඩ වලට සම්බන්ද වෙලා හිටියා...
"අයන් කරලම නිදා ගන්න එක හොඳයි නේද, උදේට පරක්කු වෙයි නැත්නම්..."
"ම්න්... ඒක නෙමේ ඔයාට තාම ලොකුවට pains මුකුත් දැනෙන්නෙ නෑ නේද සෙනූ..."
"ලොකුවට නෑ, ඉදලා හිටලා චුට්ටක් බඩ රිදෙනවා, මන් හිතන්න කෙල්ල ටික ටික හැරෙනවා..."
"හ්ම්ම්ම්ම්... තව සති තුනයි සෙනූ... අපි අන්තිමට දෙමව්පියොත් වෙනවා..."
"ඔව් සිහින... මේ හැඟීම හරිම අමුතුයි නේද..."
"මට නම් බයයි සෙනූ... කොහොමද එච්චර චූටි බබෙක්ව වඩා ගන්නෙ... මට නම් පුරුදු වෙන්න කල් යයි... මම හිච්චි පැටියෙක්ව වඩාගෙනම නෑ..."
"හිමීට පුරුදු වෙමු සිහින..."
කලින් නිදාගන්න හිටියත් දරුවා ගැන කතා කරලා ඇදුම් මැදලා සිහින නිදාගන්න යනකොට දොළහටත් කිට්ටු වෙලා තිබුනා... සිහිනගෙ සිහින වලත් හිටියේ තාම නූපන් ඒත් තව සති කීපයකින් මේ ලෝකෙට එන එයාගෙ චූටි දූ සිඟිත්ත, ඉතින් පහුවදා වේලාසන වැඩට යන්න හිතන් හිටපු සිහිනට ඇහැරුනේ සෙනුරිගෙ කෑගැහිල්ලට...
"සිහින... සිහින නැගිටින්න අනේ... වෙලාව 7.30 යි..."
"අප්පට කෙලියා... යකෝ... එලාම් එක ඇහුනෙත් නෑ බන්..."
"සිහින........"
"ආ සොරි සොරි කලබලේටනේ..."
සෙනුරිටත් දැන් අමාරුවට ටිකක් තදට නින්ද යනවා, අනික එයා මේ ටිකේ ගෙදර නිසා කොහොමත් වේලාසන ඇහැරුනේ නෑ, ගොඩක් දවස් වලට සිහින පාන්දරින් ඇහැරිලා සෙනුරිට කෑමත් හදලා එයත් කෑම අරන් යනවා, එහෙම නැති දවසට සෙනුරිගෙ අම්මා දවල්ට සෙනුරිට කෑම ගේනවා, සිහින එදාට කඩෙන් කනවා... වේලාසන වැඩට ගිහින් ලොක්කව ශේප් කරගන්න හිටිය සිහින පරක්කු වෙලා නැගිටලා ලෑස්ති වෙලා ඔෆිස් එකට යනකොට 8.45 වෙලා තිබුනා... 8.30 කලින් සේරටම ඔෆිස් එන්න කියපු පුතණ්ඩියා 8.45 ට දොරෙන් ඇතුලට එනකොට ඔෆිස් වැසියෝ සේරම ඒ පැත්ත බලලා සිහිනට දුන්නෙ අනේ යකෝ වගේ බැල්මක්... ඒ වෙද්දිත් ඔෆිස් එකේ අය එක පැත්තක පේලියට හිටගෙන හිටියා, ඊට පස්සෙ තමයි සිහින නියම දර්ශනේ දැක්කේ...
