"බබාට ඕනේ සේරම ගත්තද සෙනූ..."
"ඔව් සිහින..."
"අපේ බඩු ටිකත් හරි...තව...ආහ් මගේ ෆෝන් එක චාජ් එකේ..."
"චාජරෙත් ගන්න සිහින..."
"හරි සේරම හරි...එහෙනම් දොර වැහුවා සෙනූ හොඳේ...යමු අයියේ..."
ඉතිරි වෙලා තිබුන දවස් දෙකත් ගෙවිලා ගිහින් සති අන්තය උදා වෙලා තිබුනා... ශේනුකගේ සමාගමේ annual trip එකට එකතු වෙන්න සිහින සෙනුරියි බබයි එක්ක එයාලා දන්න කියන නිතර හයර් යන ත්‍රීවිල් එකක නැගලා සමාගම ලඟට පිටත් උනේ උදේ පහට...
"කට්ටිය ඇවිත් වගේ නේද සිහින..."
"ම්න්...පවිත්‍රයත් ඉන්නවා...යමුකෝ..."
"ඔයාට ඔක්කොම ගන්න පුලුවන්ද..."
"මම ගන්නම්, ඔයා බබා එක්ක බහින්නකෝ... ඒ පවිත්‍රයා, help එකක්..."
"හම්මට...උඹලා සතියක්ම නවතින්නද බන් යන්නේ...මොකෝ නංගි රට යන නිසා උඹලා ආයේම හනිමූන් යන්නද හදන්නේ..."
"ඔය වාචාල කට වහපන්කෝ බන්... මේ උදේ පාන්දර කුණු හරුප කියන්නේ නැතුව ඉදින්... මේකෙන් තුන්කාලක්ම බබාගේ බඩු බන්..."
පවිත්‍රගේ වාචාල කතාබස් මැද සිහින පවිත්‍ර එක්ක බඩු ටික අරන් යනකොට සෙනුරි පවිත්‍රගේ කතා වලට හිනා වෙවී සිහිනලට ඉස්සර වෙලා ගියා...
"දැන් නම් කාර් පොඩ්ඩක් ගන්න කාලේ හරි වගේ බන්... බයික් එකේ බබත් එක්ක එහෙ මෙහෙ යන්න බෑනේ,සෙනුරි ගියහම කොහොමත් බෑ..."
"දැන්ම බෑ බන්...පස්සේ හිමීට බලන්න ඕනේ..."
"ගුඩ් මෝනින් සෙනුරි...ඔයා අපිත් එක්ක යන පලවෙනි ට්‍රිප් එක නේද..."
"ඔව් මිස්ටර් සිල්වා..."
"කට්ටියම ඇවිත්ද මිස්ටර් සිල්වා..."
"ඔක්කොම ඇවිත් සිහින...අපේ පොඩි බොස් විතරයි අඩු..."
"ශේනුක සර්...පුදුමයිනේ... එයා තමයි සේරටම කලින් ඔෆිස් එන්නෙත්..."
සිහින එතනට ඇවිත් වටපිට බලනකොට ට්‍රිප් එක යන දහතුන් දෙනා එයාලගේ පවුලේ අයත් එක්කම ඇවිත් තිබුනත් එයා හොයන රූපේ පේන්න හිටියේ නෑ... ඉතින් සිහිනට අහන්න ඕන උන දේම මිස්ටර් සිල්වා කිව්වම සිහිනට ඉතුරු ටික දැනගන්න අස්වැසිල්ලක් උනා...
