الحلقة 1 من رواية ع ع ح ن 🥀على عهدنا حتى نموت
اول يوم ف السنة الجديدة 1/1/2024
الساعه 2:30 موعد وصول اغلب الطلبه و الناس الي عندهم أعمال لحياشهم بعد يوم متعب
نزلت من السياره سكرت الباب وراها
و لفت شالها عليها زين وهيا تمشي ورا خوها تتبع ف خطواته بعيدا عن تجمعات الميا الي مكونتها المطر الليله الماضيه علي شكل برك صغيره💧
نقزت بخفه وشدت ف ذراعه وهيا تمشي وراه لعند ما وصلو قدام باب حوشهم 🏡
طلع سفيان يده من جيبه وبيفتح الباب انتبه لي ريحان الي صافنه ف الشارع وتشوف لمكان معين و ف عيونها عدت تساؤلات
شاف لإتجاه عيونها اللامعه من شدة سوادها وعقد حواجبه هوا الاخر وع باله نفس التساؤلات
تكلم باستغراب : سيارة بوي
حركت عيونها فاتجاهه : اها هيا..شن يدير بوي عندنا
حرك شفايفه ك در فعل لعدم فهمه : مش عارف معنديش علم خشي هي يستر الله ان شاء الله خير
يستر الله وان شاء الله خير
الجملة الي قدرت تزرع في قلبها شوي خوف
زي الي يعطيك انذار بحدوث شيء ما
فتح باب سور الحوش وخش قبلها
حست بشعور مخيف ومش مريح ابدا استغفرت ودخلت ورا خوها ورفعت خمارها من ع وجهها وخدت نفس
وكل ما يقربو من باب الحوش الرئيسي الي كان مفتوح كل ما صوت النقاش يعلا ويعلا تدريجياً
موسى بصوت عالي : هادم صغاري ونا حر نعطيهم لمن نبي انا مسؤل عنهم ماحد يوقفني يا نادية حتى لو كنتي امهم
ناديه بصوت مهزوز من الخوف : توا طلعت مسؤل عنهم صغارك وين كنت لما ربيتهم بروحي و كبرتهم بروحي وشقيت عليهم بروحي يمرضو وينوضو ويطيحو وينوضو انت وين من هدا كله
لاهي بمراتك الثانيه وما تندري عليهم حيين لا ميتين توا طلعو صغارك ومسؤول عليهم
تتكلم بحمق ودمها محروق من كلام زوجها ع صغاره الي كان بعيد عنهم كل البعد وجاهم وقت مصلحته لما استحقهم بس
علاش ناديه معصبه للدرجه هادي هوا موسى شن قاللها بش تتعصب هكي؟ شن صاير بالزبط !
هادي التساؤلات الي كانت ف بال سفيان و ريحان الي اول مره يشوفو امهم معصبه هكي
و على طول سالهم : شن في الصوت طالع للشارع خيركم
تلفت موسى لولده وهوا مقعمز ع الكرسي مقابل ناديه وبعدها طول عيونه دورت ع ريحان الي واقفه ورا خوها
نظراته ليها وصلت لي ريحان شعور ان الموضوع يخصها
ناديه مقابلاته مقعمزه ع الفراش لافه رجل والاخره ثانيتها فوق ويدها ع فمها كاتمه غيضها وعيونها حمر من الغضب
