اللهم صل وسلم على سيدنا محمد
لا إله إلا الله وحده لا شريك له له الملك وله الحمد وهو على كل شيء قدير.
.
.
.
اسماعيل لما سمع جده يقول ان جمعه تكلم مع جده باش يكملوا الخطوبه بشكل رسمي بعد عرس ايوب قطع كلام جده
اسماعيل: يا جدي انا نبي سلسبيل .. انا أحق ببنت عمي من البراني
هما كلهم شافوله بصدمه .. حتى بوه .. وفتح الله .. وياسين اللي شد زياد اللي قبل بينوض بيكسر وجه ولد عمه ..
مسعود: كيف يا اسماعيل؟؟ .. وانت متتحشمش على خليقتك تقول بناخد بنت عمي وانت متزوج؟
اسماعيل: مافيهاش باس يا جدي.. الراجل ما يعوره شيء يتزوج مره واتنين وثلاته وأربعه.. وانا بنت عمي هادي عاجبتني ونبيها..
زياد: تي يا فاسد لم فمك .. عاجباتك تقول فيها قدامنا انوض نفسدلك وجهك توا!!
زياد الراقي اللي كان ديما مبتسم ووجهه منور ولطيف.. توا فقد اعصابه لأن الحقير ولد عمه يتكلم على سبولته في مجمع هكي
اسماعيل: اسألوها حتى هي .. حاتوافق عليا ..
ياسين المره هادي ابتسم بهزوه وسيب زياد اللي انطلق شد اسماعيل اللي رعش ..
طلعه برا ..
و مسعود تجاهل الوضع وكمل يتناقش مع ولاده وولا كأنه في حشره ناض وقطع عليه كلامه المهم..
هو الصعلوك هاده .. بيزوجه سلسبيل اللي جوه فيها كبار الناس ؟؟
حفيدته جميلة الجميلات بيعطيها لواحد شعر يديه ينظفر؟؟
خوت اسماعيل باعدوا زياد من عليه وياسين اللي كان الدخان في فمه ويشوف للمنظر الدموي بكل برود متحركش..
زياد تأفف وتحرك لحوش بوه ..
ياسين: متقولش قدام خوتك بيقتلوه ..
زياد: علاش قال اسألوها تو توافق يا ياسين!! ..
ياسين: منعرفش ..
زياد ركبه الشك وتحرك ركب ل شقة امه .. خش ومشي لدار سلسبيل ..
دق وفتح الباب وخش..
زياد: سبوله شجو؟
سلسبيل: تمام وانت؟
زياد: ميه ميه .. بنسألك سؤال..
سلسبيل: اسأل..
زياد: اسماعيل .. قاربك؟
سلسبيل رعشت: ها؟؟
