حق المظلوم ⅔

22

لا إله إلا أنت سبحانك إني كنت من الظالمين .

.

.

خليل كان مضايق وواضح فيه .. مباش حد يقربه كلهم تجنبوه..

علاش يغصبوا فيه؟؟

علاش خاطره توا يمشي ويسيبها المسابقه الغبيه..

هو حصانه مسح براسه عليه وخليل شافله ..

كان واضح فيه انه متنرفز بس مسح على راس حصانه اللي واضح فيه يدور في اهتمام خليل ليه .. لأن خليل ليه دقايق واقف زي الصنم ويراجي في امتى تبدأ المسابقه ..

حسام مشارك .. وكتب معاه خليل لأن خليل ليه فوق السته سنين مشاركش في المسابقات اللي زي هكي ..

لا خليل تدرب امس شوي .. ومحصلش فرصه أكثر.. بس هي المسابقه هادي كانت استعراضيه أكثر من انها للفوز ..

كان لابس جرد لأن من متطلبات المسابقه هكي بحكم ان اللي مشاركين من هلبا مدن .. ولبس هو على طريقة قبيلته .. زيه زي حسام بحكم انهم هما التنين بس اللي مشاركين من قبيلتهم ..

قام الشنه وحطها على راسه وطلع نقاله اللي هز من جيبه ..

شاف للرساله اللي وصلاته .. غريبه بعتتله أكثر من أربع مرات الأسبوع هاده..

" رد بالك اطيح من الحصان .. واصلني خبر انك تلهد ع الواقف"

هو علاش ابتسم .. مفهمش مغزى رسالتها بس ابتسم ..

حرك صوابعه وقعد يفكر شن بيرد..

" صبعي اللي بنحط فيه خاتمك مش حاينكسر .. كان مقصدك الخطبه حانحافظ عليه"

علاش شد ضحكته لما شافها شافت الرساله طول ..

خاطره في اللحظه هادي يشوف ملامح وجهها ..

هي في العاده تخلي في رسالته معلقه ايام .. او تشوف فيها ومتردش.. لا ب اعجاب او حتى بملصق..

" كويس"

هو ضحك بخفه .. علاش حس كلمة كويس هادي وكأنها وصلاته بصوت عالي متعفلق؟؟

" غر راهو يخطبك شيباني اخر ل بنته"

هو خليل ضحك بقوه .. حط ايده على عينه وضحك ..

حتى الولاد اللي كانوا يراقبوا فيه من بعيد استغربوا .. هما استغربوا من لما بدا يوزع في ابتسامات بعد شد نقاله ..

هو بكل استفزاز دارلها إعجاب على رسالتها وصكر نقاله وحطه في جيبه .. ومزالت ابتسامته قاعده ..