النهارده كانت فرصتي عشان احاول من جديد يمكن اقدر افهم اي بيحصل
ماما سافرت الساعة ٣ الفجر رحلة قصيرة لمدة اسبوع و انا كنت متأقلمة مع فكرة اني هفضل بالبيت الكبير ده وحدي خصوصا ان بابا ميت من وانا طفلة و اخواتي كلهم متجوزين ...
اخيرا هحاول تاني بس المرة دي مكنتش عارفه هطلب اشوف اي بالتحديد .
فاكرة اول مرة حصل فيها الغريب علي اد ما انا واثقه انه حصل الا اني مازلت بقنع نفسي انه كان مجرد وهم .. وهم جوه عقلي وبس
انا بشتغل في مخزن ادويه مسؤولة مشتريات بشتري الدوا و دي كل مهمتى و في ناس تانيه بتبيعه للصيادلة و ناس بتحضره و ناس بتوصله و بما اني بقالي تقريبا عشر سنين بشتغل في الدوا حياتي كلها بقت عبارة عن ادوية و فاكسات و خصومات ..
اليوم ده بالذات علي اد ما كان عادي و بسيط علي اد ما كان غريب كلمتني ماما في التلفون و طلبت مني نوع معين من القطرة لعنيها حطيته في فاتورة علي حسابي و قررت ادخل المخزن بنفسي اجيبه خاصة ان الشباب جوه مشغولين و انا مستعجله عشان ارجع اكمل شغلي
بس للاسف انا معرفش مكانه بالتحديد كل اللي اعرفه مكان ارفف القطرات و مش عارفه ليه ببساطه و انا في مكتبي قفلت عيني و طلبت اشوف مكان القطرة دي بالذات .. مش عارفه كنت بفكر في اي و انا بعمل كده و فجاة شفت عين مدورة اشبه بعيون كاميرا متحركه خدتني و اتحركت للمخزن و هناك عند الرف التالت في الجانب اليمين وقفت العين و شفت علبة القطرة .
فتحت عيني بدهشة و انا مش مصدقة اللي حصل و جريت علي المخزن رحت نفس المكان و عند نفس الرف التالت الجنب اليمين ..
النهارده و بعد خمس سنين من اللي حصل اعتقد اني مش محتاجه غير اني اقفل عيني و احدد اللي هشوفه .. و اتحرك من جديد ورا عين غريبه و مدورة ..
