လွဲမှားသော ဆက်ဆံရေး(ဘာသာပြန်)

အခန်း ၁

အရက်မူးနေသူနှင့် -ိင်ဆက်ဆံရန် ကြံရွယ်ခြင်း

“အာ့ကျိကို ကောင်းကောင်းဂရုစိုက်လိုက်ဦး!”

ဟူ၍ အာလေးလျှာလေးသံဖြင့်ပြောသွားသော နောက်ဆုံးကျန်သည့် အတန်းဖော်အား တံခါးအပြင်သို့ လိုက်ပို့ပြီးနောက် လီလီသည် တံခါးကို ပိတ်လိုက်ရင်း အရှုပ်အထွေးများဘက် မျက်နှာလှည့်လိုက်သည်။

ကြီးမား၍ အဖိုးထိုက်လွန်းစွာ အလှဆင်ယင်မွန်းမံထားသော ဧည့်ခန်းသည် ယခုတော့ ဘီယာခွံများဖြင့် ပြည့်နေကာ ဝိုင်နီပုလင်းလွတ်များလည်း အနည်းငယ်ရှိနေ၏။ သုံးပြီးသား တီရှုးများနှင့် အစားအသောက် အကြွင်းအကျန်များမှာ နေရာတိုင်းမှာ ရှိနေပြီး ခြေချစရာပင် မရှိချေ။

ယန့်ကျိက ဆိုဖာပေါ်မှာ လှဲလျောင်းလို့နေသည်။ ဒီနေ့က သူတို့ဘတ်စကတ်ဘောအသင်းက တက္ကသိုလ်ပြိုင်ပွဲတွင် အနိုင်ရရှိခဲ့သည်ဖြစ်ရာ အားလုံးက အလွန်ပျော်နေသည်။  ထို့ကြောင့်ပင် သူ(ယန့်ကျိ)က အားလုံးကို သူ့အိမ်မှာ သောက်စရာများနှင့် အသားကင်များကို စားသောက်ဖို့ ဖိတ်ခေါ်လိုက်တာ ဖြစ်သည်။ အဆုံးမတော့ သူကိုယ်တိုင်က မူးပြီးမှောက်သွားတော့သည်။

 

လီလီတစ်ယောက်တည်းသာ သိပ်မသောက်တာဖြစ်ရာ သဘာဝတကျပင် သူက ယန့်ကျိအား ဂရုစိုက်ပေးဖို့ တာဝန်ကို လက်လွှဲယူလိုက်တော့သည်။

လီလီသည် သူ့အစီအစဉ်ကို အကောင်အထည်ဖော်ရန် အလွန်စိတ်ထက်သန်နေသော်လည်း အခန်းတစ်ဝိုက်က အမှိုက်သရိုက်များကို မြင်ချိန်မှာတော့ မနေနိုင်စွာ ရှင်းလင်းမိတော့သည်။ 

ပုလင်းလွတ်တွေ၏ ဂလုံးဂလွမ် လိမ့်သံတွေကြောင့် ယန့်ကျိ့မျက်လုံးက ပွင့်လာသည်။ သူရှေ့က မြင်ကွင်းကို ရှင်းရှင်းလင်းလင်းမြင်ရအောင် မနည်းအားစိုက်၍ အတည်ပြုရန်ကြိုးစားကြည့်ပြီးမှ ထထိုင်ကာ ပြောလာသည်။

“ရှောင်ချောင်..မလုပ်နဲ့။ မနက်ဖြန် အန်တီကြီးလာမှ ရှင်းလိမ့်မယ်”

“ဩ…”

လီလီက သူကိုင်ထားသည့် ပုလင်းအလွတ်တွေကို ကတ်ထူပုံးထဲထည့်ကာ အနည်းငယ် စိတ်ပျက်သွား၏။