منزل ام متاهه

البارت الاول

اهلا بيكم انا أمجد شاب فى العشرينات من عمرى الحقيقه يعنى انا فى اخر العشرينات اعزب حالتى الماديه كويسه إلى حد ما بقالى فتره كويسه بدور على مشروع حلو اعمله علشان استقر بئا انا لقيت الفكره بس للاسف زيى زي بائى الشباب مش معايا رأس مال .

انا حاليا بتكلم من قدام بيت عالم من اذكى علماء العصر زي ما بيقولوا الله اعلم انا مقابلتوش لحد دلوقتى احمد هو اللى قالى عليه بالمناسبه احمد دا شاب تقريبا فى العشرينات بردو بس شكله اصغر منى بكم سنه انا قابلته هنا اول لما وصلت وهو اللى ادانى جهاز التسجيل دا وقالى انى احكى تجربتى جوه البيت الغريب دا فأنا قررت انى اسجل التجربه دى لاصحابى وكل اللى اعرفهم فهتكلم كأنى بكلمهم يعنى ...
انا دلوقتى هدخل البيت دا واحكيلكم هو شكله ايه
اه انا مقولتلكمش انا جيت هنا ليه او اصلا انا هنا فين
انا من كام يوم كدا شوفت اعلان فى الجرنال عن مسابقه وجايزتها الماليه حوالى اتنين مليون جنيه وهى عباره عن بيت او الاصح متاهه على شكل بيت لو قدرت اخرج منها هاخد الجايزه ولو مقدرتش هنسحب واخد نص مليون جنيه انا جاى وطمعان في النص مليون حلوين لانى متأكد انى مش هعرف اطلع من المتاهه دى دا انا حتى مبعرفش احل الكلمات المتقاطعه يبئا هطلع من متاهه عاملها واحد عبقرى هه مش مهم انا راضى بالنص مليون
انا داخل دلوقتى البيت مش بطال بدايه حلوه فى قدامى ممر طويل لونه البيض بس اللون بيتحول بالتدريج للاسود وكل ما الاسود زاد بيظهر فيه نقط بيضه
لحد .....

ءءء انا مش عارف اقولكم ايه ولا لاقى كلام يوصف اللى انا شايفه عارفين.. عارفين الواحد بيحس احساس حلو لما يبص للسما وهى مليانه نجوم بالليل
بس الاحساس دا احلى بكتيييير اوى
دا احساس خيالى انا حاليا تقدروا تقولوا واقف فى قلب السما وسط النجوم
الممر اللى حكيتلكم عنه اخرته صاله كبيره لونها اسود ومليانه نقط بيضه بتلمع زى النجوم فى السما بالظبط
....
اكيد فى نور ولا حاجه للمكان دا بس هو فين الكهربا هنا هدور عليها ...
.....

امممم حاجه تحير انا دورت فى كل شبر فى المكان دا وملقتش حاجه
انا لازم اولع النور علشان اش.....
ازاى دا حصل النور ولع
بس ازاى ومنين انا دورت فى كل مكان
هو البيت دا فيه عفاريت ولا ايه
بصوا انا مش هشغل بالى
احمد قالى ان موجود فى اوضه من الاوض مفتاح مكتوب عليه انسحاب لو حركت المفتاح دا قبل اليوم الخامس ليا هنا هطلع واخد الجايزه ولو عدا اليوم الخامس هطلع بردو بس مش هاخد حاجه
وانا انا بصراحه بئا جيت علشان النص مليون والمكان دا بدأ يخوفنى انا هشوف المفتاح دا واطلع والحمد لله على كدا
انا حاليا شايف قدامى تسع ابواب اكيد انا هدخلهم باب باب ادور عالمفتاح لحد ما ألاقيه
هبدأ بأول باب ..
ما شاء الله المكان دا روعه شكله مذهل المكان عبارة عن نباتات تقدر تقول جنينه او مرعى طبيعى فيه شلال كمان وسما وشمس ازاى مش عارف بس مكان يجنن
تفاح ايوه دى شجرة تفاح ههه انا هاخد واحده ادوقه اصلا انا جعان
اممممم الله عالطعم ايه الحلاوه دى فى حياتى كلها مدوقتش تفاح بالطعامه دى
اظن مفتاح الانسحاب مش هنا انا هاخد تفاحتين واطلع اشوفه فى اوضه تانيه
ومحدش يقول عليا طفس التفاح طعمه حلو خالص واى حد مكانى كان هياخد اكتر
انا هطلع بئا ...
يلا بئا بينا عالاوضه التان...😦😦
مش معقول
البيت دا مسكون رسمى.....

************************
ياترى ايه اللى شافه امجد علشان يحصله ذهول كدا ؟
وايه سر البيت دا؟
وايه اللى هيقابله امجد تانى؟
وياترى هيقدر يحل لغز البيت ولا لأ؟

دا اللى هنعرفه فى البارت التانى
استنونى...