_ ألو .. أنتي فين يا سارة ؟؟
_ أنت وصلت ؟؟
_ أه ... أنتي قاعدة فين مش شايفك ؟؟
_ خلاص خلاص شفتك ... تعالى ... أنا في آخر الكافيه ..(ثم ترفع له يدها ليراها ...)
_ أها .. شفتك خلاص سلام ...
___________________
_ مساء الخير ...( يجلس مذهولا ...)
_ ( تبتسم له ...) مساء النور ...
_ ( يبتسم مذهولا ...) عاملة ايه ...
_ ( تبتسم ..) أنا الحمد لله كويسة ... مالك بتبتصلي كده ليه ....
_ ( يضع يده على رأسه و بابتسامة خجل ...) بصراحة أنتي حلوة أوي ... شكلك أحلى من الصور بكتير ... مش مدياكي حقك أبدا ...
_ ( تبتسم ..) فعلا ... مع إن ناس كتير بتقلي إني في الصور بطلع أحلى كتير من الحقيقة ... مش عارفة ...
_ لا لا ... دول أكيد بنات .. و بيغيروا كمان ... بيغيروا أوي ...
_ يا سيدي ... مش مهم ...
_ لا .. بس بجد .. أنتي أمورة أوي .... بجد أحلى من الصور بكتير ....
_ ( تبتسم خجلا ....) ميرسي ...
_ ( يشعل سيجارة ثم يحدق بها قليلا .... و يبتسم ...)
_ ههههههههههههه .. لا مش للدرجادي يعني ...
_ ( يبتسم ...) ماشي ....
_ أنت عندك كام سنة يا أحمد ؟؟
_ عندي أربعة و ثلاثين ....
_ طيب أنا عندي كام سنة ....؟؟
_ ( يبتسم ...) ثلاثين باين ...
_ ( تمسك بكوب العصير بكلتا يداها .. ثم تبتسم ...) واحد و ثلاثين .... بس برافو عليك .. شكلك مركز معايا من فترة ....
_ ( يبتسم ...) ده حقيقي .... على الرغم أننا عمرنا ما اتكلمنا غير امبارح بس .... بس أنا فعلا متابعك على طول .... بحسك مختلفة شوية ...
_ الغريبة فعلا أنك عندي على الفيس بوك من سنة و نص تقريبا و عمرنا متكلمنا قبل كده .....
_ لا .. أنتي عارفة ايه الأغرب بقى ..؟؟
_ايه ...؟؟
_ أنك يوم متقرري تكلميني ... تقرري تقابليني و نخرج سوا ... دي الغريبة فعلا ....
_ ( تبتسم .. ثم تبعد ناظريها عنه ...)
_ أنا مش قصدي حاجة على فكرة .... بس هية فعلا غريبة ....
_ ( تبتسم ....) أنت خرجت قبل كده مع حد متعرفوش ؟؟
_ قصدك من على السوشيال ميديا ..؟؟؟
_ أه .. يعني .... ( تبتسم ...) ... أه ...
_ أول مرة الصراحة أعملها .... بس متفائل خير بإذن الله ... ( يبتسم ..)
_ ههههههههههه ... واضح أن دمك خفيف ...
_ ده حقيقي ... دمي خفيف جدا ....
_ وواضح أنك مغرور .... ( تبتسم ...)
_ ده بقى حقيقي أكتر ... أنا مغرور جدا ... ساعات من كتر ما أنا شايف نفسي بلاقي نفسي طاير كده ... أنتي فاكرة إني جايلك بالسيارة ؟؟؟ لا طبعا .. أنا جايلك طيران .... مسمعتيش صوت ال landing اللي عملته بركبي ؟؟؟
_ ( تضحك بشدة ...)
_ شكلك مش مصدقاني .... ( يبتسم ...) ...
_ لا طبعا مصدقاك ..( تبتسم ثم تشعل سيجارة ) ...
_ أنتي بتدخني ؟؟
_ أها .. ( تبتسم ..) عندك مشكلة مع البنات اللي بتدخن ..؟؟
_ لا أكيد معنديش مشكلة .... بس للأمانة أنا مبحبش شكل البنت المدخنة ... بحس أنه بيقلل من أنوثتها ... يعني .... البنت أرق بكتير من أن هية تمسك سيجارة و كده ....
_ ( تبتسم ...) وجهة نظر جديدة ... على الأقل مقلتش مبحترمهاش ....
_ لا لا ...ملهاش علاقة طبعا بالإحترام ... أنا مش متخلف يا سارة ... أنا فعلا بس بحس أنه بيقلل من شكلها الأنثوي مش أكتر ....
_ اممممم .... أنت محامي صح ؟؟!!
_ أيوة .... تمام كده ... و أنتي فنانة تشكيلية موهوبة جدا .. متابع كل أعمالك على فكرة ....
_ ( تبتسم ....) ربنا يخليك ....
_ بقلك ايه ... ارتاحي ... حسك متوترة شوية .. مفيش داعي لأي تعامل رسمي ... خليكي براحتك ....
_ ( تبتسم ...) أنا أول مرة أخرج مع حد معروفوش يا أحمد .... فمتاخدة شوية بس مش أكتر ....
_ تشربي ايه ؟؟؟عصيرك خلص ....
_ و الله أنا طالبة قهوة فرنساوي بقالي نص ساعة لسة مجتش ....
_ أنا معرفش أنتي اخترتي الكافيه ده ليه أصلا ... خدمته سيئة جدا .....
_ بس قعدته حلوة أوي .. و الإنترنت فيه كويس جدا و سريع ... جوه لطيف يعني ....
_ بتحرجيني يا سارة ؟؟؟ ينفع كده ؟؟؟
_ ههههههههههههههه .. و الله أبدا مش قصدي أنا بس ....
_ ايييييه ... بهزر و الله معاكي .....BREATHE
_ ( تبتسم ....) ...
_ "لو سمحت كان فيه هنا قهوة فرنساوي اتأخرت أوي .. و هاتلي قهوة دوبل سادة "
_ "حالا يا فندم "
_ قوليلي يا سارة ....
_ أقلك يا سارة ليه ؟؟؟ ( ثم تبتسم ..)
_ لا كده أزعل و أضايق ... بتعب و الله من الألش ... أعصابي بتتهز كده ...
_ ههههههههههه .. أنت عسل يا أحمد ....
_ طيب قوليلي .. بما أنك أول مرة تقابلي حد متعرفهوش ... ايه اللي خلاكي تختاريني أنا .. بالذات أننا عمرنا ما اتكلمنا قبل كده ....
_ هقلك ... بص ... أنت عندي بقالك سنة و نص على الفيس بوك .. و أنا بالعادة ما بضفش ناس معرفهاش أصلا ... بس عمري ما فكرت أشيلك من عندي مش عارفة ليه ... بس بشوف بوستاتك و تقريبا عندي فكرة عن شخصيتك و تفكيرك من الكلام اللي بتكتبه و كده ....
_ فين السبب ؟؟؟ أحط ايدي عالسبب ؟؟ فين السبب؟؟
_ ههههههههههه .. استنى بس .... اديني فرصتي ...
_ خدي فرصتك ...
_ بص يا أحمد ... أنا بقالي فترة مش متزنة في حياتي ... و محتاجة أتكلم مع حد أفهمه اللي أنا حاساه ..
_ معندكيش صحاب؟؟
_ لا عندي ... كتير أوي كمان ... استنى أكمل بس لو سمحت ...
_ أنا آسف ... كملي ....
_ ( تنهيدة ... ثم تبتسم ....) أنا عندي صحاب كتير أوي... و معارفي ملهمش أول من آخر ... بس أنا مكنتش حاسة إني محتاجة أتكلم مع حد فيهم ..... كنت عاوزة أتكلم مع حد غريب ميعرفنيش ... ميعرفش حاجة عني ... غير اللي أنا هقوله ... عشان كلامي يبقى أوضح ... مش عاوزة أتكلم مع حد عارفني من زمان ... عارف أنا كنت ازاي و بقيت ازاي .. عارف تفاصيل أغلاطي و الكبوات اللي مريت بيها في حياتي ... و اللي حاليا لا تمثلني بأي شكل من الأشكال ... عاوزة حد لما أتكلم معاه ميعدش يحلل في شخصيتي و يعد يفهمني أنا ايه اللي وصلني لكده و يعد يعظ فية و ينخر في عضمي و يمارس جنون عظمته علية .... عاوزة حد يسمعني و مبينيش علية أي أحكام في دماغه ... غير اللي بيسمعها مني و بس .... فاهم قصدي ؟؟؟
_ ( يبتسم ...) فاهم طبعا .... كملي .....
_ بس ... امبارح بقى .. لقيتك منزل بوست كده عجبني أوي ... دخلت عندك و فضلت أتفرج على كلامك تاني و بوستاتك ... حسيت أني ممكن أتكلم معاك .. و ارتحتلك ... حسيتك محترم و هتفهمني .. دماغك عجبتني يعني .... بس فقررت أكلمك و أطلب منك إننا نتقابل النهاردة .... و قد كان ... بس يا سيدي ....
_ ( تنهيدة ...) بصي ... هوة من حسن حظك فعلا إني من الناس القلائل اللي شخصيتها على الفيس بوك هية نفس شخصيتها عالحقيقة .... بس من السهل جدا أنك تتخدعي في شخصية إنسان على الفيس بوك و تتصدمي تماما بشخصيته عالحقيقة ... هتلاقيه حد مختلف تماما .... ففعلا من حسن حظنك إن إختيارك كان كويس ... مينفعش تتخدعي بكلام الناس و بوستاتها عالفيس بوك ... معظم الناس عايشة حياة مش حقيقية عالسوشيال ميديا .... ممكن يكون نفسهم يعيشوا الحياة دي و مش عارفين .. ممكن نفسهم يفكروا بالطريقة دي و مش قادرين .... ممكن يكونوا بيحاولوا يلفتوا انتباه حد معين بكلام مش حقيقي مبيعبرش عن شخصياتهم .. أسباب كتير أوي ... بس بعيدا عن كل ده أنا مبسوط إني قابلتك النهاردة .... و متفهم جدا كلامك عن احتياجك أنك تتكلمي مع خد غريب ميعرفكيش ولا تعرفيه بشكل شخصي ....
_ " القهوة يا فندم ..." ___ "تسلم ايدك شكرا" ...
_ أنتة ليه بتشربها سادة ؟؟؟
_ ( يبتسم ...) كيفي كده ...
_ هههههههههه .. لا بجد ليه سادة ...؟؟؟
_ عشان طعم البن أشهى و أقوى من إنه يتضافله أي حاجة تانية ... السكر أو الحليب بيضيع لذتي بالقهوة ... أصل أنا عاشق للقهوة .... يعني لو القهوة دي بنت كنت اتجوزتها من زمان و جبت منها فناجين صغيرة كتيرة ....
_ ( تبتسم ....) ...
_ كنتي بتقولي أنك بقالك فترة مش متزنة في حياتك ... متكلميني شوية في الموضوع ده يا سارة ....
_ ( ترتشف قهوتها الفرنسية ثم تشعل سيجارة ...) أنا بحب نفسي أوي ... كل حاجة بعملها في حياتي .. بعملها عشان نفسي و بس ... حتى الخير لما بعمله .. بعمله عشان نفسي .. عشان آخد ثوابه و أرضي ربنا فيكافئني بيه .... أو عشان يتردلي بعدين في حياتي .... بحب شكلي .... بحب جسمي ... بحب ذكائي و دماغي ... بحب قدرتي على فهم الناس اللي حوالية و فك شفراتهم من أول قعدة أو اتنين .... بحب نفسي بجد .... و معتزة بيها جدا ... و ... ( تصمت قليلا ثم تنظر اليه ....)
_ سكتي ليه ... كملي ....
_ مش عارفة ..( تبتسم ...) خايفة تفهمني غلط ....
_ مش هفهمك غلط ... زي ما قلتي من شوية .. مش هفهم غير اللي أنتي بتقوليه و بس و مش هحكم عليكي غلط .. كملي يا سارة ....
_ ( تبتسم ...) بحس إني أحسن من أي حد أنا بقابله ... بحس إني أحسن من الناس و محدش بيفهم أنا بفكر في ايه .. بس هما عارفين إني بعرف هما بيفكروا في ايه ... نفسي أقابل حد زيي كده .... أو أحسن مني ... حد أقوى مني .... حد يسبقني ... يسبق تفكيري ... يسبق ردود أفعالي .... حد يفاجئني بتصرفاته .... حد مختلف ... يعني مشكلتي في حياتي حاليا .... إني معندش اكتفاء من أي حد حوالية .. محدش مالي عيني ... محدش بيخليني أكمل معاه القعدة للآخر من غير ما أمل ولا أزهأ ..... قيس على كده كل حاجة .. كل علاقاتي .....
_ أنتي مرتبطة يا سارة ؟؟؟
_ كنت مرتبطة من سنتين .. و دي أول قصة حب أمر بيها ... أو ممكن تقول ارتباط مش حب ... و مكنتش طويلة أبدا .. استمرت لمدة أربع شهور بس .... كان إنسان هايل و الله .. محترم و راقي جدا ووضعه المادي كويس أوي ... و متفتح ... بس ....
_ بس ايه ؟؟؟
_ كان تقليدي أوي ....
_ تقليدي و متفتح ؟؟ ازاي طيب؟؟
_ أه .. تقليدي مش بالمعنى الحرفي .. لا لا .. تقليدي يعني .. مكنش فيه حاجة زيادة ... الحتة الزيادة دي اللي أنا بدور عليها في أي بني آدم يدخل حياتي .... حتة الذكاء الخارق ممكن ... حتة الغموض المثير ... اللي بيخليك قاعد مش على بعضك أدام الشخص ده ... حد كده غامض بجد .. مش بيمثل أنه غامض و بتاع .... لا ... حد عارف بس ساكت ... حد مبيتكلمش كتير ... بس لما بيتكلم ... ممكن تقوم تبلعه من كتر ما أنتة مشدودله .... حاسس اني مجنوونة ؟؟؟
_ إطلاقا ..... و الله إطلاقا ... كلامك ممتع جدا ..... كملي ... متوقفيش كلام ....
_ كان تقليدي يا أحمد .... مكنش بيسحرني ... و بردوا كنت بحس إني أحسن منه ... حاولت كتير أفهمه أنا قصدي ايه ... لما جينا ننفصل ... بس ... طبعا معرفتش .. و قالي كلام زي السم ... قلي إني مغرورة و شايفة نفسي عالفاضي و إني تافهة جدا بس مش حاسة إني تافهة من كتر ما أنا معمية عن حقايق كتير .... كان حقه طبعا يقول أي حاجة ... و مضايقتش أوي من كلامه ... لأنه مش فاهم حاجة .... صعب علية ... تخيل ... و الله صعب علية ..... رغم أنه هزأني لحد ما شبع ... و أنا مردتش .... و الله ما رديت .. سبته يقول كل اللي يطفي ناره ... و مشيت .....
_ بس أنتي مش تافهة يا سارة .... ولا مجنونة ....
_ ( تنظر له و تشعل سيجارة أخرى ....) عارفة .....
_ بصي ... أنا لو في حاجة اتعلمتها في سنين عمري اللي فاتت دي كلها .. إن كل واحد في الدنيا دي ... مخلوق بطينة شكل و طباع شكل و احتياجات شكل .... كلنا لينا بصمتنا المختلفة في طبايعنا و جيناتنا و تفكيرنا ... و من هنا بيبدأ الصراع الحقيقي في الحياة .. بنفضل نصطدم في كل الناس اللي حوالينا و نجادل و نسيب و نفارق و نبني علاقات جديدة و نفارق و نبكي و نعزل نفسنا عن الدنيا .. و نرجع نحاول تاني و ثالث ... و نشك في نفسنا و نجلدها ... و نحاول نتغير ... و ما بنتغير بنبقى أسوأ .. لأننا ببساطة بنعمل حاجة مش بتاعتنا .... بنغير جلدونا عشان تتناسب مع الناس اللي حوالينا ... و اللي هما نفسهم مش مرتاحين و بيحولوا يغيروا جلودهم عشان يرتاحوا ... و بنعيش نتخبط في بعض ....
_ كمل أرجوك ......
_ مش عيب أنك تحسي بينك و بين نفسك أنك أحسن من اللي حواليكي ... العيب أنك تترجمي ده لتصرفات عيب .. أنك تبدئي تقللي من قيمة الناس اللي حواليكي و تحتقريهم و تحتقري وجهات نظرهم ..... و تحسسيهم أنهم فعلا أقل منك .. ده العيب .... إنما إحساسك أنك أحسن منهم ... ده إحساس ممكن يكون أتولد عندك من ظروف كتير صعبة عشتيها بيتهيألك أن محدش مر بيها غيرك .. و أنك عرفتي تتجاوزيها لوحدك .. و أنك بطلة ... قدرتك على قراية عقول الناس اللي حواليكي .. ده أكيد نتاج علاقات كتير دخلتيها و أنتي كنتي بتقولي أنك عندك معارف كتير ... ده على مدى السنين الكتير بيخلي عندك خبرة كبيرة في سلوكيات الجنس البشري و قراية ال body language عندهم ... فالأنا عندك كبرت و زادت .. و صوتها علي ... و بقيت عاوزة تلاقي حد زيك .... حد حسك ... حد فاهم أنتي بتعملي ايه و عايشة ازاي ... حد أقوى منك تتسندي عليه لما تحسي أنك بدأتي تضيعي من نفسك ..... زي اي بني آدم في الدنيا ... نفسه يلاقي حد شبهه و يفهمه و يستوعب دماغه .... بس أنتي طلباتك صعبة شوية مش أكتر ... أنتي واحدة حبت نفسها بزيادة لما ملقتش حد شبهها تحبه ... و خزنت كل طاقة الحب اللي في روحها لنفسها ..... و ده مش غلط .. طول ما أنتي مسيطرة على سلوكياتك .... مش غلط ... حبي نفسك .. حبيها و احترميها و قدريها .... نفسك الحاجة الوحيدة اللي تملكيها في الدنيا دي و ليكي عليها كلمة و سلطان بعد ربنا طبعا سبحانه و تعالى ..... بس حافظي على طبايعك الإنسانية و متتغريش عالبشر ... حبي نفسك من غير متعليها على البشر يا سارة ..... و متقلليش من حد ... مش كل الناس اتحطوا في نفس الظروف اللي ممكن تكوني عشتيها .. ولا اتوفرتلهم الظروف أنهم يكتشفوا قدراتهم و إمكانايتهم الحقيقة عشان يعرفوا قيمة نفسهم كويس يحبوها .... في ناس عاشت و ماتت و هية مش عارفة هية عايزة ايه ولا عايشة ليه ولا هية أصلا بتعرف تعمل ايه ..... تقليدين ممكن نسميهم زي ما بتقولي .... ناس مكسرتش حواجز الحياة الروتينية .... ما فكرتش بزيادة ... ما حبتش بزيادة .... ما خافتش بزيادة ... ما اتكسرتش بزيادة .... ما رجعتش أقوى من الأول بزيادة ....
_ يا لهوي يا أحمد .....
_دي الحاجات اللي بتخلي الواحد يعرف إمكانياته و قدراته و يخليه بجد يعرف قيمة نفسه كويس أوي .... من حقك يا سارة تعيشي في وسط ناس شبهك .... بتحب نفسها زيك و بتفهم نفسها زيك ... طول ما أنتي حاطة الموضوع under control و بتتحكمي في تصرفاتك كويس أوي .... و الموضوع متحولش معاكي لجنون عظمة و احتقار للناس ... حبي نفسك .... و دوري على اللي شبهك .. و أكيد هتلاقيه .... إلا ما هييجي يوم و هتلاقيه .... و هتحبيه قد ما بتحبي نفسك و زيادة كمان .....
_ ( تنظر له قليلا .... ثم تبتسم ...)
_ حبي نفسك ... متحبنيش أنا .... ( ثم يبتسم ...)
_ هههههههههههههههه ... و الله شكلي هحبك .....
_ جايز ... كله حاجة جايزة وورادة .... بس أنا متجوز .... !!
_ ( تنظر له بدهشة ....) نعم !!!!!
_ هههههههههههههه .. بهزر معاك يا أخي ... اتاخدت كده ليه !!!
_ ( تبتسم ....) مش عارفة .... حسيت جسمي برد و الله .....
_ فاجئتك !!! فظيع أنا ... عارف عارف .....
_ لا ... أنتة بجد ......
_ ( يرتشف قهوته ... و يبتسم ...) بجد ايه ....
_ ( تبتسم .... ) مش تقليدي خالص .....
_ متجربي القهوة السادة ..... يمكن تعجبك و تحبيها ....
_ هجربها ...... أكيد هجربها ....
______________________________________
