هاي بنات مابي اتفلسف بس في اشياء تمنيت اني اقدر ارجع و اغيرها اشياء صارت تمنيت امحيها او اتصرف بطريقه مختلفه، فقلت بدال ماغيري يطيح بنفس الخطأ مابي اكون انانيه واحفظ النصيحه لنفسي، ياما حسيتي ان حظك زفت و ياما اختنقتي من الضيقه و ياما بكيتي، انا اعرف شخص كان مايبتسم ابدا وكانت الدنيا بعينه سوداء و هو توه صغير سن كان يحسب ان العالم تكرهه، كان وحيد، وزياده على وحدته ماكان يسمح لاحد يقرب من حياته، التجٲ لوسائل مع انه يدري انها حرام بس كان يبي يخفف المه وماكان يدري ان اللي يسويه يزيده الم، كان يضحك قدام الكل لدرجة ان العالم تحسده على سعادته لكن ماخفي اعظم كان من يدخل غرفته يبكي من الالم كان يصحى بنص الليل على نوبات بكي و احلام سوداء كان يحس ان الموت بيريحه بس بيوم شخص قاله
"اذا الانسان يبي السعاده لازم يواجه نفسه"
، اثرت فيه هالجمله صح اذا يبي السعاده لازم يواجه نفسه لازم يوقف شفقه على نفسه لازم يسمح لاحد غير نفسه يقوله شنو الصح
من الخطأ لانه وصل لمرحله مايعرف الفرق بينهم، كان خايف ينحكم عليه تردد يروح لٲحد، خاف يتكلم وينفهم غلط،
او يتكلم والشخص يعصب عليه او بيسفهه ومراح يهتم له، كان خايف ان الشخص ممكن يحسبه يكذب عشان الاهتمام فترك الموضوع وقرر يبقى بصمته وعذابه مع نفسه، لكن مع الوقت بدٲ يزهق من نفسه مستقبله بدأ يضيع درجاته بالمدرسه ضعيفه و اغلب الايام غايب، لكن سكت وقال مايهم هاذي درجات دنيا، كان يشوف ناس يبنون احلامهم قدامه وهو يضحك عليهم و يقول اغبياء احلامهم بتتهدم وبينتهي حالهم نفسي، وبالفعل بعضهم تهدمت احلامه وهو اللي كان يواسيهم و يخفف عنهم ٲلمهم و العجيب انه كان يعطيهم امل بالحياه وناسي نفسه لانه بكل بساطه يقول مافيه امل له، كان ينتظر اليوم اللي بيموت فيه عشان يرتاح، بس للمره الثانيه تٲثر بكلمة شخص
"مابي اقضي ايام المراهقه بحزن لاني ابي بعد 30 سنه اشوف ايام المراهقه و اقول كانت ايام حلوه ".
فكر بالموضوع مره ثانيه وقال صح مابي اندم اذا كبرت خلاص بسعد عمري .
وبالفعل بدٲ يتعرف على ناس جدد ماتوقع ان هالناس ممكن يغيرون حياته لهالدرجه كان يشوفهم يحزنون و كان مستغرب ليش يحزنون عشان أشياء تافهه مثل اهلهم مايهتمون فيهم او احد ضايقهم بكلمه!
لو يصير فيهم اللي صار فيه ايش ممكن يسوون!
كان ينصحهم ويقولهم ان هالاشياء بسيطه والمفروض مايهتمون فيها ولازم يكونون اقوى، واحد من هالاشخاص قاله وهو معصب
"احتفظ بالنصيحه لنفسك"
و استوعب انا ليش ما انصح نفسي!
ليش ما اهتم بنفسي!
في ناس نفس حالتي بس ما سوو اللي سويته وهم سعيدين بحياتهم!
ليش انا ما انصح نفسي!
مين قال ان السعاده يعني شخص!
السعاده بين يديني و الحزن بين يديني بس انا ايش اختار و احطه بقلبي!
انا اخترت الحزن بس السعاده بقت بيدي
ليش ما اختار السعاده وارمي الحزن!
حاول يرجع علاقاته بٲصدقائه اللي كانو يسٲلون عنه وهو قاطع
ورجعو بكل شوق لانهم حبوه لشخصه ماحبوه لعب او مصلحه
تعرف على ناس تهتم فيه تضحك لضحكه تمسح الحزن من قلبه اذا حس انه يٲس.
بدٲ حياته من جديد بدا يشوف الدنيا بصوره احلى
بدٲ الامل يرجع لقلبه مو سعيد كليا لكن صار يبتسم مرات من قلب
ماكان سعيد كل الوقت لانه عارف ان الدنيا تقلبات وورا الحزن قوة امل فما يٲس.
بدٲ يبني احلام من جديد لان كل شي ما انتهى و لسه باقي امل، بدٲ يحس بطعم الراحه بطعم السعاده كانت اجمل بكثير من ماضيه الكئيب، بدٲ يمارس هوايات يحبها.
بدٲ يفتخر بنفسه يفتخر بالانجاز اللي حققه.
وهو مقتنع كل الاقتناع لولا الماضي كان ماتحول للشخص اللي هو عليه اليوم.
متفائل، طيب، وشخص ايجابي.
صار يشوف المشاكل بنظره ثانيه وبدال ما يشوف النص الفاضي صار يحمد الله على النص المملوء.
اذا هذا الشخص مافقد الامل مع انه مر بظروف عصيبه انتي ليش تفقدين الامل!
عشان صديقتك اللي تحبينها تركتك!!
يمكن خيره لان ربي مخبيلك اللي احسن منها.
فقدتي الامل لان حلمك تهدم!
احلمي من جديد واشتغلي عليه بعزيمه و اصرار.
فقدتي الامل لان العالم يكرهونك!
طيب تلفتي حولك بتلقين ناس تحبك مستحيل كل العالم تكرهك.
ماتعبتي من كل الأشياء اللي تمنعك تضحكين!
ماتعبتي من الاحساس بالشفقه على نفسك!
ابني حياتك من جديد اذا ٲسسها تهتز، اشكري ربك على النعم اللي عندك.
خلي ثقتك بربك ثم نفسك عاليه وعمرك مراح تفشلين.
والفاشل مو هو اللي يطيح الفاشل هو اللي بعد الطيحه مايقوم.
أنت تقرأ
فلسفة نص الليل
Spiritualهنا خرابيشي بمعنى أشياء في داخلي احتجت اوصلها لكم مافي شي محدد مواضيع مختلفه ومتنوعه عشان افيد نفسي و افيدكم و بس
