قصــــة..(عشق روح)..
ارتدت ملابسها في عجلة و اتي أيمن لاصطحابها من المنزل , استقلت بجانبه السيارة و هي تشعر بتوتر شديد
في احدي الكافيهات الهادئة..
أيمن : ها بقي يا ستي , عاوزه نتكلم في ايه ؟؟
شروق : انت عاوز تتجوزني ليه ؟؟
أيمن (ضاحكا) : ايه السؤال ده
شروق : انا بسأل بجد
نظر اليها ثم تحدث بجديه
أيمن : اعجبت بيكي , و واثق من تربيتك و اخلاقك
شروق : اعجبت بيا ازاي يعني ؟؟
أيمن : زي الناس ! عجبتيني يا شروق مالك في ايه ؟!!
شروق : كلامك مش واضح ! ايه عجبتك دي هو انت داخل تشتري بدلة ؟!! ايه اللي عجبك فيا بالضبط يعني
أيمن : عجبني شكلك لبسك طريقة كلامك طريقة تعاملك مع الناس , شايف فيكي مواصفات البنت اللي انا عاوز اتجوزها
شروق : يعني مشوفتش المواصفات دي في اي بنت قبل كده ؟؟
أيمن (مبتسما) : لا
شروق (بإرتباك ) : طيب انت ليه عاوز نكتب الكتاب علي طول
أيمن : عشان مليش انا في جو الخطوبة و الدباديب ده , و احنا مش محتاجين الخطوبه في حاجة اصلا
شروق : بس الخطوبة مش معموله للدباديب !! الخطوبة معمولة عشان الطرفين يتعرفوا علي بعض كويس و يدرسوا بعض انا و انت لسة منعرفش بعض كويس
أيمن : انا عارفك كويس , او علي الاقل اللي انا عارفه عنك كافي عشان اتأكد انك البنت المناسبة ليا
شروق : بس انا معرفكش كويس ! أيمن : اعرفيني ! انا جاي عشان كده , اسألي و انا اجاوبك
شروق : يا أيمن مش كده
أيمن ( مبتسما) : حلوة اوي أيمن منك
شروق (بإرتباك) : انا بتكلم جد
أيمن (ضاحكا) : انا كمان بتكلم جد
شروق (بنفاذ صبر) : افهمني , في حاجات مش بتبان في شخصية الواحد غير بالتعامل
أيمن : و انتي متعاملتيش معايا يعني ؟؟ ما انتي بقالك اكتر من 3 شهور دلوقتي بتشتغلي في الشركة و بتشوفيني و تتعاملي معايا
شروق : تعامل شغل مش تعامل شخصي !
أيمن : بصي يا شروق , احنا هنكتب الكتاب فترة و بعدين نعمل الفرح , في الفترة دي ابقي اتعاملي معايا و ادرسيني براحتك
شروق : بعد ما خلاص نكون اتجوزنا !!!
أيمن : محسساني ليه انك بتدبسي ؟!
شروق (بإحراج) : لا مش قصدي , بس انا قصدي يعني ان الكلام ده و التعرف بيبقي قبل الجواز مش بعده
أيمن : و انا قدامك اهو يا ستي قولت لك اسأليني في كل اللي انتي عاوزاه و انا هجاوبك و انتي بقالك فترة بتشوفيني بتعامل ازاي معتقتش ان في حاجة هتختلف يعني
شروق : طيب و السفر ؟
أيمن : ماله ؟
شروق : يعني لو اتجوزنا انا هيكون وضعي ايه من سفرك اللي كل شوية ده
أيمن : انتي عاوزة ايه ؟؟
شروق (بحيرة) : مش عارفة , بس انا مقدرش ابعد عن بابا و شيرين كتير
أيمن : انا مش هغصبك علي حاجة و كده كده انا كمان اهلي هنا و فرع الشركة هنا انا اللي بديره , فطبيعي اني هنزل مصر اكتر من الاول بكتير
شروق : يعني مش هسافر معاك ؟
أيمن (ضاحكا) : انا مقولتش كده انا بس بطمنك
شروق : يعني ايه اللي هيحصل بردو ؟؟
أيمن : هنكتب الكتاب عشان ابقي براحتي معاكي و هبقي بين هنا و امريكا لحد ما نحدد معاد الفرح
شروق : و بعدين ؟؟؟
أيمن : و بعدين تيجي معايا شوية ننزل مصر مع بعض , كده يعني انتي مالك مأزمه الامور ليه ؟!
شروق : مش مأزمه بس .....
أيمن : بس ايه ؟؟
شروق : طيب انت مش حاسس اننا كده بنتسرع ؟؟؟!
أيمن : لا خالص
شروق : انا متلغبطه و مش عارفه افكر
أيمن : انتي قلقانه من ايه ؟؟
شروق : مش من حاجة معينة بس الفكرة نفسها خضاني
أيمن (مبتسما) : انك تبقي حرم أيمن الشناوي
اطرقت برأسها في خجل و لم تجيب
أيمن : اعتبر السكوت ده علامة الرضا
شروق : أيمن...
أيمن : نعم
شروق : انت مش حاسس انك ناسي تقولي حاجة
أيمن : حاجة ايه ؟!
شروق (بخجل) : اي حاجة كده
أيمن : مش فاهم !
شروق : خلاص خلاص مفيش
أيمن : طب ايه ؟؟؟ اعتبر انك موافقه
شروق : اديني بس فرصة افكر شوية ليه الاستعجال ده و بعدين في حاجة تانية متكلمناش فيها
أيمن : ايه تااااني ؟؟؟
شروق : شغلي في الشركة
أيمن : ماله ؟! عاوزه تستمري في شغلك بعد ما نتجوز معنديش مانع و اما نسافر ابقي خدي القضايا معاكي ادرسيها هناك و انا قولت لك ان احنا حتي لما نسافر مش هنطول
شروق : ماشي
أيمن : انا مسافر امريكا يومين شغل و راجع عاوز اما ارجع اسمع ردك , اوكي ؟؟
شروق : اوكي
--------------------------------------------------------------
- تنح باااارد تلجة اووووووووووووف
آسيا (ضاحكة ) : يا بنتي كفايه بقي بهدلتي الراجل
شروق : و انا اقوله مش ناسي تقولي حاجة يقول لي مش فاهم !
آسيا : يا مفترية ما هو قالك معجب بيكي و بشكلك و لبسك و كلامك و شايف فيكي مواصفات البنت اللي عاوز يتجوزها , عاوزه ايه تاني ؟!!!
شروق : يتنيل يقولي بحبك حبيتك اي حاجة , اي مشاعر انسانيه
آسيا : اوباااااا ولعت بقي ,امال بس عامله فيها خجوله و بتاع , انتي داخله علي طمع
شروق : الله !!!! مش لازم اعرف طبيعه مشاعره من ناحيتي يعني ؟!!!
آسيا : اكيد مش طالب يتجوزك شفقه يا شوشو
شروق : مش عارفه بقي
آسيا : طالع من عينك كفايا مأوحه يا شروق
شروق : يا سيتي منكرش اني معجبه بيه بس ...... انتي متخيله اني هتجوز ؟!!!
آسيا (ضاحكة ) : الصراحة لا , اخر حاجة كنت اتوقعها , انا قولت هتبوري و تعنسي جنبي
شروق : شكرا يا عسل
آسيا (ضاحكة) : يا بت اهدي بقي , انا مش عارفه انتي خايفة من ايه ده كتب كتاب اعتبريه خطوبه لو كلمه كتب كتاب تعباكي اوي كده
شروق : يعني كتب كتاب بقي و زوجتك نفسي و دبل و زغاريط و كده ؟!!
آسيا : انتي بتتفرجي علي افلام ابيض و اسود كتير ؟!!! ربنا يصبرك يا أيمن علي ما بلاك !!! كويس ان هو رضي بيكي اصلااا
شروق : بقي كددده ؟!!!
آسيا : ايووون
شروق : طب اقفلي بقي احسن اقفل في وشك
آسيا (ضاحكة ) : انتي اللي متصله اصلا
شروق : اوووووووف , ممكن تبطلي ضحك ؟؟؟
آسيا (و قد هدأت قليلا ) : خلاص سكت اهووو
شروق (بجدية) : انا هفكر اليومين دول و اصلي استخارة و ربنا يسهل بقي
--------------------------------------------------------------
مضي اليومان بسرعة البرق , قضتهم شروق في التفكير و صلاه الاستخارة الي ان حسمت قرارها بقبول طلب أيمن , رغم انه لايزال في قلبها بعض المخاوف تجاهه
آسيا : مبرووووك يا عروسة
شروق : الله يبارك فيكي ياختي
آسيا : كلمتني أيمن ؟؟
شروق : بعد ما بابا كلمه و قال له اني موافقه هو كلمني و قال لي انزلي جيبي فستان لكتب الكتاب , مش عارفه ماله عم المستعجل ده
آسيا (ضاحكة) : يا سيتي الراجل فرحان سيبيه , انتي كمان لازم تبقي فرحانه
شروق : فرحانه اهو
آسيا : هو أيمن رجع صح ؟
شروق : اه , امبارح بالليل
آسيا : طيب يا حلوة هننزل نجيب الفستان امتي ؟؟
شروق : مش عارفه , انتي فاضية النهاردة ؟
آسيا : فاضية ياختي هيكون ورايا ايه يعني
شروق : طيب اجهزي و هعدي عليكي علي 5 كده اكون اتغديت مع بابا و شيرين
آسيا : خلاص تمام
اغلقت مع صديقتها و هاتفت آدم
-سيندريلااا
آسيا (ضاحكة) : مش هتبطل سيندريلا دي بقي
آدم : لا هي لزقت فيكي خلاص ، صوتك فرحان
آسيا : صح , انا مبسوطة اوي
آدم : يا رب دايما , بس اشمعني بقي ؟؟
آسيا : عشان شروق كتب كتابها قريب و انا و هي نازلين نجيب الفستان كمان شوية
آدم : بجد ؟؟ مبروووووك , هو ده الموضوع اللي قولتي لي لو حصل فيه حاجة كويسة هتقولي لي
آسيا : ايوووون
آدم : و هتجيبي فستان ليكي انتي كمان ؟؟
آسيا : اكيد
آدم : ماشي يا ستي , انبسطي و اول ما ترجعي طمنيني
آسيا : حاضر
آدم : بموت في حاضر بتاعتك دي
آسيا (بخجل) : باي بقي عشان الحق اتغدي و البس
آدم (ضاحكا) : باي يا سيندريلا
--------------------------------------------------------------
-ااااااه يا رجلي ياناااا
شروق : معلش معلش , عقبال ما اتعبلك في فرحك يا رب
آسيا : انتي مرمطييينيييي مش تعبتيني , حرام عليكي يا شيخه كل ده عشان فستان كتب الكتاب ؟!!! امال هتعملي فينا ايييه في فستان الفرح ؟!!!
شروق : الله !! مش لازم اختار بتأني ولا هشتري اي حاجة و السلام كده
آسيا : طيب يا ست المتأنيه مش خلاص نروح بقي ؟؟؟
شروق : محسساني اني كنت بعذبك , و بعدين ما انتي كمان جيبتي فستانك
آسيا : جبته من تالت محل مش زيك !!! بعد المحل ال 70
شروق : مش انا العروسة !!
آسيا : ماااشي يا عرسة
شروق : بس جيبنا حاجات حلوه اوي الحمدلله
آسيا : الحمدلله اخيرا
شروق : اصلا انتي لسة هتنزلي تاني مع شيرين تجيبي معاها فستانها , عندها دروس مكنتش فاضية تنزل النهاردة و انا مش هفضي تاني انزل معاها
آسيا : انتي اشترتيني انتي و اختك ؟!!
شروق : ده تمن الصداقة
آسيا : لا خلاص اتبريت منها الصداقة دي مش عاوزاها
شروق : ولا تقدري تعيشي من غيري اصلا , يلا اركبي خلينا نروح احسن انا حاسة اني هقع من طولي من التعب
--------------------------------------------------------------
اوصلتها شروق الي منزلها , دلفت الي حجرتها , همت بتبديل ملابسها لكنها سمعت رنين هاتفها
نظرت الي الشاشة وجدته "آدم"
اجابته علي الفور
آسيا : ايوة يا آدم
آدم : انتي فين ؟!! و اتأخرتي كده ليه ؟!!
آسيا : انا في البيت اهو لسة داخله , كنت هغير هدومي و اكلمك
آدم : اصلي قلقت لما اتأخرتي , المهم عملتوا ايه ؟؟
آسيا : مفيش اشترينا كل حاجة الحمدلله
آدم : جبتي فستانك ؟؟؟
آسيا : ايوون
آدم : لونه ايه ؟؟
آسيا (ضاحكه) : اشمعني
آدم : قولي بس
آسيا : ازرق
آدم : اكتر لون بحبه
آسيا : و انا كمان
صمت طويلا ..
آسيا : ادم ! مالك سكت ليه ؟؟
آدم : عاوز اقولك حاجة بس خايف تفهميني غلط
آسيا (بقلق ) : لا قول
آدم : آسيا انا نفسي اشوفك اوي , و اكيد انتي كمان نفسك تشوفيني مش كده ؟؟
آسيا ( بإرتباك) : ازاي يعني مش فاهمه ؟!!
آدم : يعني.... انا هبعت لك صورتي و انتي تبعتي لي صورتك , نفسي اشوفك يا آسيا !!
